བོད་ཀྱི་སྤྱི་ཚོགས་ནང་གསར་འགོད་པའི་ལས་རིགས་གཉེར་བཞིན་པའི་བོད་མི་གསར་འགོད་པ་ཡོངས་ལ་ཞུ་རྒྱུར།

བློ་འཚབ་འདི་ཇི་ལྟར་བྱུང་བར་རྒྱུ་རྐྱེན་དེ་ག་རེ་ཡིན་བཤད་ན། ཉེ་སྔོན་དྲ་རྒྱ་ཁག་ཏུ་ཨ་རིའི་རླུང་འཕྲིན་ཁང་གི་གསར་འགོད་པ་ཚོས་བཀའ་ཁྲིའི་འོས་མི་ལངས་མཁན་བྱེ་བྲག་གཅིག་ལ་རྒྱབ་སྐྱོར་གྱི་སྒོ་ནས་མི་མང་གི་ཁྲོད་དུ་གསུང་བཤད་གནང་གི་ཡོད་པ་དང། ད་དུང་ཚད་ལས་བརྒལ་བའི་ལངས་ཕྱོགས་འཛིན་གྱི་ཡོད་པ་སོགས་ཀྱི་གནས་ཚུལ་གོ་ཐོས་བྱུང་ལ། བཀའ་ཁྲིར་ལངས་མཁན་བྱེ་བྲག་བ་དེ་ལ་རྒྱབ་སྐྱོར་བྱེད་མཁན་གྱི་ཨ་རིའི་རླུང་འཕྲིན་ཁང་གི་གསར་འགོད་པ་ཁ་ཤས་ཤིག་མངོན་གསལ་དོད་པོས་མི་མང་གི་འཚོགས་སར་གར་སྟེགས་ཡོད་སར་བཞེངས་ནས་བཀའ་ཁྲི་འོས་མི་བྱེ་བྲག་ཅིག་ལ་བསྟོད་པ་དང་བྱེ་བྲག་གཅིག་ལ་སྨད་ར་གཏོང་བཞིན་མི་མང་ལ་གསུང་བཤད་གནང་རབས་འདུག་པས། གསར་འགོད་པ་ཚོས་ཕྱོགས་ཞེན་ལྡན་པའི་གནས་ཚུལ་མི་སྤེལ་བ་ལ་ཡང་སུས་ཀྱང་ཡིད་ཆེས་བྱེད་ཐབས་བྲལ་བས། རང་རེའི་སྤྱི་ཚོགས་ནང་དུ་སྤྱིར་མིང་དོན་ལྡན་པའི་གསར་འགོད་པ་མེད་པ་བདེན་ན་ཨ་རིའི་རླུང་འཕྲིན་ཁང་གི་བོད་མི་གསར་འགོད་པ་ཚོས་མི་མང་ལ་བློ་ཕམ་པོ་མ་བཟོས་ན་ཡག་ཙམ་གདའ་ལ། ཡང་མི་མང་གི་ཡིད་ཆེས་བརླག་པར་ཅུང་ཙམ་གཟབ་གཟབ་བྱ་རོགས་ཞེས་ཞུ་འདོད་བྱུང་། 

བོད་མི་གསར་འགོད་པ་ཚོ་ཡིན་ཡང་བོད་མི་ཡིན་པས་མི་སོ་སོའི་ལྟ་ཚུལ་ལྟར་རྒྱབ་སྐྱོར་བྱེད་ཡུལ་དེར་རྒྱབ་སྐྱོར་བྱ་ཆོག་པ་ཡོད་ཀྱང་། ད་ལྟ་བོད་ཕྱི་ནང་གཉིས་སུ་ཨ་རིའི་རླུང་འཕྲིན་ཁང་ནི་ཆོལ་ཁ་གསུམ་རིས་མེད་ཀྱིས་ཉན་ཞིབ་བྱེད་ཡུལ་ཡིན་པས། ཨ་རིའི་རླུང་འཕྲིན་ཁང་ལྟ་བུའི་ལས་ཁུངས་ཤིག་གི་གསར་འགོད་པ་ཚོས་མི་མང་གི་ནང་དུ་ཕྱོགས་ཞེན་གྱི་ལྟ་བ་ཁྱེར་ནས་གསལ་འགྱུར་བསྒྲགས་པ་ཡིན་ཚེ།  བོད་མི་རིགས་ཀྱི་ཡིད་ཆེས་བརླག་ཉེན་ཡོད་པ་དང་བོད་མི་རིགས་ལ་རླུང་འཕྲིན་ཁང་འདི་ ཡིས་ཞབས་ཞུ་བྱ་མི་ཐུབ་པར་གྱུར་བའི་ཉེན་ཁ་ཡོད་པས། དུས་ཚོད་གལ་ཆེན་པོ་འདིའི་ནང་དུ་རླུང་འཕྲིན་ཁང་སོ་སོའི་གསར་འགོད་པ་ཚོས་རང་ཚུགས་བརྟན་པོ་དང་བར་གནས་ཀྱི་ཁྱད་ཆོས་ཐོན་པ་བྱ་དགོས་པ་གལ་ཆེན་པོ་རེད་དོ།
ཞེས་པདྨ་རྒྱལ་པོས་ལྷག་བསམ་དཀར་པོས་བོད་ཀྱི་གསར་འགོད་པ་ཚོར་འབོད་སྐུལ་ཞུས་པའོ།