བཟང་སྤྱོད་ལྡན་པའི་མང་གཙོ་ཞིག་དགོས།

བཙན་བྱོལ་བོད་མིའི་མང་གཙོ་ཡར་རྒྱས་ཀྱི་འཕེལ་རིམ་ནང་དམིགས་བསལ་གྱིས་ཡོད་དགོས་པ་ཞིག་ནི་ཡ་རབས་བཟང་སྤྱོད་ཀྱི་སྙིང་པོ་བྱས་པའི་མང་གཙོ་ཞིག་ཏུ་འགྱུར་ཐུབ་དགོས་པ་དེ་རེད། བོད་པའི་སྤྱི་ཚོགས་ལ་ཤུགས་རྐྱེན་ཆེ་ཤོས་ཡིན་པ་ནང་པ་སངས་རྒྱས་པའི་གཞུང་ལུགས་ཀྱི་ལྟ་གྲུབ་ནང་བདག་ལས་གཞན་གཅེས་དགོས་པའི་ལམ་སྟོན་གཙོ་བོར་བཟུང་ཡོད་ཀྱང༌། ཆབ་སྲིད་ཀྱི་ཐོག་ནས་མང་གཙོའི་ལམ་ལུགས་སུ་བསྐྱོད་པའི་སྐབས། བདག་ལས་གཞན་གཅེས་ཞེས་པའི་ལྟ་གྲུབ་འདི་ལག་བསྟར་བྱེད་རྒྱུ་དཀའ་ངལ་གྱི་རང་བཞིན་དུ་གྱུར་ཡོད་མོད། ཆབ་སྲིད་ཀྱི་ནང་དུ་མང་གཙོའི་གོམས་གཤིས་ཡང་དག་པ་ཡོད་མཁན་ཞིག་ཡིན་ན་བདག་ལ་དགོས་པ་དེ་གཞན་ལ་དགོས་པ་དང༌། བདག་གི་འདོད་པ་དེ་གཞན་གྱིས་ཀྱང་འདོད་བཞིན་པར་བསམ་ཤེས་བྱེད་ཐུབ་པའི་བདག་གཞན་འདྲ་མཉམ་གྱི་ལྟ་ཚུལ་འདི་ངེས་པར་ཡོད་དགོས་པ་ཞིག་ཏུ་གྱུར་ཡོད།

ད་ལྟ་བོད་པའི་སྤྱི་ཚོགས་སུ་ཕྱོགས་གཅིག་ནས་མང་གཙོའི་གོམས་གཤིས་ཡར་རྒྱས་སུ་སོང་ནས་གཞན་གྱི་ཤུགས་རྐྱེན་ལ་བརྟེན་ནས་འོས་ཤོག་བླུག་མཁན་དཀོན་ལ། ལྷག་པར་དུ་བཀས་བཀོད་དབང་ཤུགས་ཀྱི་འོག་ཏུ་འགྲོ་མཁན་དེ་བས་ཀྱང་དཀོན། འོན་ཀྱང་འོས་འགྲན་པ་དང་རྒྱབ་སྐྱོར་བྱེད་མཁན་རྣམ་པའི་ངོས་ནས་ཁ་གཏད་དེ་ལ་དངོས་ཡོད་གནས་ཚུལ་ལས་བརྒལ་བ་མ་ཟད། གཞི་རྩ་ཙམ་ཡང་མེད་པའི་བསྙོན་འཛུགས་དང༌། སྒྲོ་འདོགས་སྣ་ཚོགས་ཀྱིས་མིང་ཤས་བཟོ་ཐབས་བྱེད་བཞིན་པ་དང༌། ཕྱོགས་གང་ས་ནས་དངོས་ཡོད་གནས་ཚུལ་ལས་བརྒལ་བའི་འུད་བརྗོད་ཀྱིས་བསྟོད་ར་གཏོང་མཁན་ཡང་ཧ་ཅང་ཡོང་གི་ཡོད་པ་ནི། ཡ་རབས་བཟང་སྤྱོད་དང་གཞན་ཕན་གྱི་སྙིང་པོ་ཅན་གྱི་ལྟ་གྲུབ་ལྡན་པའི་ནང་པ་སངས་རྒྱས་པའི་ཆོས་ལུགས་ཀྱི་རྗེས་འབྲངས་མི་རིགས་ཤིག་གི་བྱེད་སྟངས་ལས་ཡོངས་སུ་བརྒལ་ཡོད། དེར་བརྟེན་བྱེད་སྟངས་དེ་དག་ནང་ཆོས་ཀྱི་དྲི་མ་ཙམ་ཡང་མེད་པའི་སྤྱི་ཚོགས་ཁག་གི་བྱེད་སྟངས་དང་གཅིག་པ་ཡིན་པས། བོད་པའི་མང་གཙོ་ལ་དམིགས་བསལ་གྱི་ཁྱད་ཆོས་གང་ཡང་མེད། བོད་པའི་མང་གཙོ་ནི་ཁྱབ་བསྒྲགས་བྱས་ཀྱང་དྲང་བདེན་དང༌། བསྟོད་བསྔགས་བྱས་པའང་དྲང་བདེན། སྐྱོན་བརྗོད་དང་དགག་པ་བརྒྱབ་པ་བཅས་ཀྱང་དྲང་བདེན་དང་ལྡན་པ་ཞིག་བྱས་ན་བོད་པའི་མང་གཙོ་དེ་གཞན་ལས་ཕུལ་དུ་བྱུང་བའི་ཡ་རབས་བཟང་སྤྱོད་དང་ལྡན་པའི་མང་གཙོ་ཞིག་ཏུ་འགྱུར་ངེས་རེད། དེ་ལྟར་འགྱུར་བར་བོད་པ་ལ་མཚོན་ན་གཞན་དང་མི་འདྲ་བར་དམིགས་བསལ་གྱི་གོ་སྐབས་དང་ནུས་པའང་ཡོད་པས་དེའི་ཐོག་ལ་ཤུགས་རྒྱག་དགོས་པ་ཧ་ཅང་གལ་ཆེ་བར་མཐོང༌།།

{jcomments on}