བརྒྱུད་ལམ་དང་ནང་ཁུལ་སྲིད་དོན།

བཙན་བྱོལ་བོད་པའི་སྤྱི་ཚོགས་ལ་མཚོན་ན་གསར་འགྱུར་བརྒྱུད་ལམ་ནང་ནས་རླུང་འཕྲིན་རེ་ཟུང་ཞིག་དང་། གསར་ཤོག་རེ་ཟུང་ཞིག་ཡོད་ལ། བརྙན་འཕྲིན་གྱི་བརྒྱུད་ལམ་ནི་ཁྱབ་ཆེ་ཤོས་ལྟ་བུ་ཨ་རིའི་བོད་སྐད་རླུང་འཕྲིན་གྱི་ཀུན་གླེང་ལེ་ཚན་ཁོ་ན་ཆགས་ཡོད་ཅེས་བརྗོད་ཆོག སྤྱི་ཚོགས་ནང་གསར་འགྱུར་བརྒྱུད་ལམ་དང་སྲིད་དོན་པ་སོགས་ལ་ཕྱི་ནས་ལྟ་སྟངས་འདྲ་མིན་ཡོང་སྲིད་པ་ཙམ་དུ་མ་ཟད་ཡོང་ངེས་པ་ཞིག་ཀྱང་རེད། འོན་ཀྱང་རྣ་བས་ཉན་བྱར་གྱུར་པ་རླུང་འཕྲིན་དང་། མིག་གིས་བལྟས་ནས་ངག་གི་ཀློག་བྱ་གསར་ཤོག་དང་དྲ་རྒྱ། དེ་བཞིན་མིག་གིས་བལྟས་ནས་རྣ་བས་ཉན་བྱར་གྱུར་པ་བརྙན་འཕྲིན་བཅས་གསར་འགྱུར་བརྒྱུད་ལམ་དུ་ལས་ཀ་བྱེད་མཁན་རྣམས་ཀྱིས་ནང་ཁུལ་གྱི་སྲིད་དོན་འཁྲབ་སྟོན་ནམ་འཐེན་འཁྱེར་གྱི་རྗེས་སུ་མི་འབྲངས་པར་དྲང་ཚུགས་དང་སྒམ་བརླིང་ལྡན་པ་ཞིག་དགོས་པ་ནི་སྐབས་སུ་བབས་པའི་འགན་ཁུར་གཙོ་བོ་ཡིན་ལ། དཔེར་ན་ད་ལྟའི་ཆར་བཀའ་ཁྲིའི་འོས་གཞི་མི་གསུམ་ལས་མེད་ཀྱང་དེ་དག་ལ་བཅར་འདྲི་ཞུ་བ་ལྟ་བུའི་སྐབས་སུའང་གསར་འགོད་པའི་ངོ་བོ་དོར་ནས། རེ་ཟུང་ལ་ཁ་གཏད་ཁྲིམས་རྩོད་པའི་ངང་ཚུལ་འཛིན་པ་དང་། རེ་ཟུང་ལ་དག་འབུད་ཁྲིམས་རྩོད་པའི་ངང་ཚུལ་བཟུང་བ་ལྟ་བུའི་གནས་ཚུལ་གལ་སྲིད་ཐོན་པ་བྱུང་ན་རང་དབང་མང་གཙོའི་སྤྱི་ཚོགས་ནང་གི་མང་གཙོའི་ཀ་བ་བཞི་པའི་འགན་ཁུར་གྱི་ཟུར་ཆ་ཙམ་ཡང་མ་འགྲུབ་པར་གྱུར་པ་རེད། དེ་ལ་བརྟེན་ནས་བརྒྱུད་ལམ་ཁག་གི་མཐོང་དང་ཆ་འཇོག་ལའང་རང་བཞིན་གྱིས་གནོན་སྐྱོན་ཡོང་རྒྱུ་ཡིན་པ་སྨོས་མེད་ཡིན་པས་བརྒྱུད་ལམ་གྱི་འགན་ཁུར་བ་ཚོས་གནད་དོན་འདི་འདྲའི་རིགས་ལ་དོ་སྣང་ངེས་པར་དུ་བྱེད་དགོས་པ་གལ་ཆེ་བར་གྱུར་ཡོད།

དེ་བཞིན་དྲ་རྒྱའི་བརྒྱུད་ལམ་ནང་དུ་མིང་མེད་དྲ་འབུ་གང་མང་ཞིག་གིས་བོད་ཀྱི་རྩ་དོན་དང་མཐུན་སྒྲིལ་གྱི་ཁོར་ཡུག་ཀུན་ལ་ཅི་མི་སྙམ་པར་དཀྲོག་གཏམ་དཀྲུགས་ཤིང་གི་བསམ་ཚུལ་འབྲི་མཁན་གང་མང་ཡོང་གི་ཡོད་པ་དང་། ཆེ་ས་ལ་བསམ་བློ་གཏོང་མ་ཐུབ་ཀྱང་ཆུང་ས་ནས་དྲ་བདག་སོ་སོས་ཚགས་གྲོན་གང་ཐད་ནས་འབད་བརྩོན་གང་མང་བྱས་པའི་གྲུབ་འབྲས་ལས་བྱུང་བའི་དྲ་རྒྱ་དེ་དག་གི་དམིགས་ཡུལ་དང་མི་མཐུན་པར་གྱུར་སོང་ན་དེའང་རང་བཞིན་གྱིས་གྱོང་གུད་ཅིག་ཏུ་ངོས་འཛིན་མི་བྱེད་ཀ་མེད་རེད། མིང་འབྲི་མི་ཕོད་པའི་དྲ་འབུ་དག་གི་བྱེད་སྟངས་ལ་བརྟེན་ནས་ཀྱང་དྲ་རྒྱའི་བརྒྱུད་ལམ་གྱི་ཆེ་མཐོང་ཉམས་དམས་སུ་འགྲོ་བཞིན་པ་མ་ཟད། དེ་ལ་བརྟེན་ནས་སྤྱི་ཚོགས་ལ་གནོད་པའི་རིགས་ཀྱང་གང་མང་ཡོང་སྲིད་པ་ལྟ་བུའི་གནས་ཚུལ་དག་ལ་བསམ་ན་དྲ་བདག་སོ་སོ་ལའང་དཀའ་ངལ་འཕྲད་སྲིད་པ་གང་མང་ཞིག་ཡོད་པས། དྲ་རྒྱའི་ནང་གི་བགྲོ་གླེང་ཁག་ཀྱང་ཚད་ལྡན་དང་འགན་ཁུར་ཡོད་པའི་ལམ་དུ་འཁྲིད་ཐུབ་ན་ཕན་ཐོགས་ཆེ་བར་མངོན། ལོ་ཁ་ཤས་སྔོན་རྩིག་གྱང་ངོས་སུ་སྦྱར་བའི་མིང་མེད་ཡིག་འཁྱམ་རྣམས་དེང་སྐབས་དྲ་རྒྱའི་བརྒྱུད་ལམ་དུ་གཏོང་བཞིན་ཡོད་པ་སོགས་བརྒྱུད་ལམ་ཁག་གི་ལས་དོན་དང་འགན་ཁུར་ཕྱོགས་ལ་མ་འདེང་བའི་ཆ་མང་དུ་འགྲོ་བཞིན་ཡོད་པ་ནི་ཅུང་མངོན་གསལ་དུ་འགྱུར་བཞིན་ཡོད། དེར་བརྟེན་ད་ནས་བཟུང་དྲ་རྒྱ་ཁག་གི་ནང་དུ་མི་ལ་སྐྱོན་འཛུགས་བྱེད་མཁན་རྣམས་ཀྱིས་ཆུང་ས་ནས་བཤད་ཀྱང་རང་ཉིད་ཀྱིས་འགན་ཁུར་ལེན་ཐུབ་པ་ཞིག་ཡོང་ཆེད། དངོས་མིང་བཀོལ་དགོས་པ་ནི་བཟློག་ཐབས་མེད་པའི་འགན་འཁྲི་ཞིག་ཏུ་གྱུར་ཡོད། རང་ཉིད་ཀྱིས་འགན་ཁུར་བའི་ཐོག་ནས་སྐྱོན་དང་ནོར་འཁྲུལ་ལ་མཛུབ་མོ་ཐད་ཀར་འཛུགས་ཕོད་པ་ནི་གལ་ཆེ་ཞིང་བསྔགས་བརྗོད་ཀྱི་རང་བཞིན་ཞིག་ཏུ་གྱུར་ཡོད་པས་སྨྱུག་ཐོགས་པ་ཡིན་ཟེར་མཁན་རྣམས་ཀྱིས་ཀྱང་འགན་ཁུར་ཆེ་ཙམ་བཞེས་དགོས་པའི་དུས་ལ་བབ་ཡོད་སྙམ།།

{jcomments on}