ཕྱི་ནང་གང་གི་ཤུགས་རྐྱེན་ཡིན།

རྒྱ་གར་གྱི་གསར་འགྱུར་བརྒྱུད་ལམ་ཁག་ནས་གནས་ཚུལ་དེ་ལ་དཀྲོག་གཏམ་དང་དངོས་བདེན་མ་ཡིན་པ་གང་མང་ཞིག་འགོད་འགྲེམས་བྱས་སོང་བ་མ་ཟད། ཐ་ན་༸རྒྱལ་དབང་ཀརྨ་པ་ཨོ་རྒྱན་ཕྲིན་ལས་རྡོ་རྗེ་མཆོག་རྒྱ་གཞུང་གི་གསང་ཉུལ་ཡིན་པའི་དོགས་གཞི་ཡོད་ཚུལ་གྱི་གཞི་མེད་སྐུར་འདེབས་ཀྱང་བྱས་ཡོད་པ་རེད། གནད་དོན་འདིའི་སྐོར་རྒྱ་གར་གྱི་གསར་འགོད་པ་ཁག་ཅིག་གི་བྱེད་སྟངས་ནི་གཞིས་བྱེས་བོད་མི་ཡོངས་ཀྱི་སྙིང་ལ་གྲི་བཙུགས་པ་དང་གཅིག་མཚུངས་ཆགས་ཡོད་པ་དང།  ༸རྒྱལ་དབང་ཀརྨ་པ་གང་ཉིད་རྒྱ་གར་དུ་ཆིབས་བསྒྱུར་གནང་ནས་མི་ལོ་ཧྲིལ་པོ་༡༠ ལྷག་འདས་ཟིན་ཀྱང་ད་དུང་གཏན་འཇགས་ཀྱི་བཞུགས་གནས་ཤིག་གོ་སྒྲིག་གནང་ཐུབ་མེད། དེ་བཞིན་ཕྱིའི་ཡུལ་གྲུ་ཁག་ཏུ་ཆིབས་བསྒྱུར་གནང་ཐུབ་ཀྱི་མེད་པ་དང།  སྐབས་རེ་རྒྱ་གར་ནང་ཁུལ་དུའང་ཆིབས་བསྒྱུར་གནང་རྒྱུར་འགོག་རྐྱེན་དང་སྐུ་ངལ་གང་མང་ཞིག་འཕྲད་བཞིན་ཡོད་པ་རེད། ༸ཀརྨ་པ་སྐུ་སྒེར་གྱི་ངོས་ནས་བཤད་ན་ད་བར་༸གོང་ས་མཆོག་གི་དབུ་འོག་དཔུང་འདེགས་ཁོ་ན་ལས་གཞན་རྒྱ་གར་གཞུང་དང་བོད་གཞུང་ལ་གནོད་པའི་བྱ་བ་གཅིག་ཀྱང་མཛད་མེད་པ་ནི་ཀུན་གྱི་ཤེས་གསལ་དུ་གྱུར་ཡོད།

དཔལ་༸རྒྱལ་དབང་ཀརྨ་པ་མཆོག་ལ་རྒྱ་གཞུང་གི་གསང་ཉུལ་གྱི་དོགས་གཞི་ཡོད་པའི་གཞི་མེད་སྐུར་འདེབས་བྱས་པ་དེ་ལ་མཚོན་ན་ཕྱོགས་ཡོངས་ནས་རྒྱུ་མཚན་སྣ་གཅིག་བགྲང་རྒྱུ་མེད་ལ། གསང་ཉུལ་བ་ཞིག་ལ་མཚོན་ན་ཕྱོགས་གཉིས་ནས་ཁེ་ཕན་ཡོད་དགོས་པ་རེད། གསང་ཉུལ་གཏོང་མཁན་གྱི་ངོས་ནས་བཤད་ན་གསང་ཉུལ་གཏོང་ཡུལ་གྱི་མི་མང་དཀྱུས་མ་དང་གཞུང་གི་ལས་དོན་སོགས་ཀྱི་སྐོར་གསང་བ་མཁོ་སྒྲུབ་བྱེད་ཐུབ་མཁན་ཞིག་དགོས་པ་དང། གསང་ཉུལ་བྱེད་མཁན་གྱི་ངོས་ནས་དངུལ་དངོས་དང་རྐུབ་སྟེགས་སོགས་ཀྱི་ཁེ་ཕན་ཞིག་རག་དགོས་པ་ནི་གསང་ཉུལ་བ་སྤྱི་ཡོངས་ཀྱི་འགྲོ་སྟངས་ཆགས་ཡོད་པ་རེད། ཀརྨ་པ་ལྟ་བུའི་བླ་ཆེན་ཞིག་མི་མང་དཀྱུས་མའི་ནང་གི་གནས་ཚུལ་གང་ཟག་གཉིས་པ་དང་གསུམ་པ་ཞིག་བརྒྱུད་ནས་མ་གཏོགས་མཁྱེན་རྟོགས་མི་ཐུབ་པ་དང། གཞུང་གི་གནས་ཚུལ་ཁག་ཀྱང་དེ་དང་གཅིག་པ་ཡིན། སྐུ་སྒེར་གྱི་ངོས་ནས་ཀྱང་དངུལ་དངོས་ཀྱི་ཁེ་འབབ་ལ་རྔམ་དགོས་དོན་མེད་ལ། རྒྱུ་མཚན་འདི་ལྟ་བུ་ལ་བརྟེན་ནས་ཐོབ་དང་གོ་ས་ལ་རེ་བ་རྒྱག་དགོས་དོན་དེ་བས་ཀྱང་མེད། གལ་སྲིད་སྐུ་སྒེར་གྱི་མདུན་ལམ་དང་འབྲེལ་བའི་རྒྱ་གཞུང་གི་གོ་ས་ཞིག་ལ་ཐུགས་རེ་གནང་བའི་དབང་དུ་བཏང་ན། ༸ཀརྨ་པའི་མཚན་གནས་རྗེས་འབྲེལ་གྱི་ཐོག་ནས་བོད་དུ་བཞུགས་བསྡད་ན་ད་ལྟའི་ཆར་རྒྱ་གཞུང་གི་གོ་གནས་མཐོན་པོར་བསྐྱལ་ཟིན་ཡོད་པ་ཕྱོགས་ཡོངས་ཀྱི་གནས་སྟངས་ཐོག་ནས་ཁ་ཚོན་གཅོད་ཐུབ་པ་ཞིག་ཡིན་པ་དང། སྐུ་ངལ་དུ་མ་ཁྱད་དུ་བསད་དེ་ཧི་མ་ལ་ཡའི་རི་བོ་ཞབས་ཐང་གིས་བགྲོད་ནས་བཙན་བྱོལ་དུ་ཕེབས་དགོས་དོན་གཏན་ནས་མེད། གནད་དོན་འདིའི་ཕྱོགས་ངོས་གང་ནས་བལྟས་ཀྱང་ཀརྨ་པ་མཆོག་ལ་གཞི་མེད་སྐུར་འདེབས་ཞུ་མཁན་གྱི་གསར་འགོད་པ་དེ་དག་ལ་རྒྱ་དམར་རམ་དེ་དང་འབྲེལ་ཡོད་ལྟ་བུ་ཕྱོགས་གང་ཞིག་ནས་དམིགས་བསལ་གྱི་ཁེ་ཕན་ཞིག་རག་མེད་དམ་བསམ་པའི་དོགས་པ་ཟ་འོས་པ་དང། མཚུར་ཕུ་བླ་བྲང་གི་ངོས་ནས་དངུལ་ཉར་ཚགས་བྱེད་སྟངས་སོགས་ཀྱི་ཐོག་ལ་ལས་དོན་ཚགས་མ་ཚུད་པ་བྱུང་ཡོད་ཀྱང། ༸ཀརྨ་པ་སྐུ་སྒེར་གྱི་ཐེབས་རྩ་ཚོགས་པ་ལྟ་བུ་ཞིག་ཀྱང་འཛུགས་རྒྱུའི་ཆོག་མཆན་རྒྱ་གར་གཞུང་གིས་མ་གནང་ན། འཛམ་གླིང་གི་ས་ཁུལ་ཀུན་ནས་དད་རྫས་དང་གཤིན་རྫས་ཕུལ་བ་རྣམས་འདི་ལྟར་མི་ཉར་ཀ་མེད་ལྟ་བུའང་ཡིན་སྲིད། མདོར་ན་གལ་སྲིད་རྒྱ་གར་གཞུང་གི་ངོས་ནས་༸རྒྱལ་དབང་ཀརྨ་པ་མཆོག་ལ་དོགས་པ་བྱེད་ཀྱི་ཡོད་ན། བཙན་བྱོལ་བོད་གཞུང་གི་ངོས་ནས་༸རྒྱལ་དབང་ཀརྨ་པའི་གནད་དོན་དང་འབྲེལ་བའི་ཐོག་ལ་རྒྱ་གར་གཞུང་ཐུགས་དོགས་སེལ་བ་ཞིག་བཟོ་མི་ཐུབ་པའི་རྒྱུ་མཚན་གང་ལ་ཐུག་ཡོད། བདེན་པ་དང་འཚེ་བ་མེད་པ་ཡང་དག་པའི་མང་གཙོ་ཞེས་བཀའ་ཤག་གི་རྩ་དོན་གསུམ་གྱི་གང་རུང་ཞིག་འགལ་བ་ཡིན་ནམ། གནད་དོན་འདི་དག་གི་སྐོར་ལ་ཕྱག་ལས་ནུས་པ་ཐོན་པ་ཞིག་གནང་མ་ཐུབ་པ་ནི་འཐུས་ཤོར་ཧ་ཅང་ཆེན་པོ་ཞིག་ཏུ་ངོས་འཛིན་བྱེད་འོས་པ་ཞིག་རེད། ད་ལན་གྱི་གནད་དོན་འདི་ནི་རྒྱ་གར་གཞུང་དང་བླ་བྲང་གི་ལས་བྱེད་སོགས་ཕྱི་ནང་གང་ས་ནས་ཤུགས་རྐྱེན་ངན་པ་ཐེབས་ཡོད་པ་ཧ་ཅང་གསལ་པོར་གྱུར་འདུག།།

{jcomments on}