དབུས་གཙང་སྤྱི་འཐུས་འོས་མི་བྱ་ཉལ་ཚེ་རིང་ལྷ་སྐྱབས་ལ་བཅར་འདྲི།

དྲི་བ། ༡ སྐུ་ཉིད་སྤྱི་འཐུས་ཀྱི་འོས་མིར་ལངས་དགོས་པའི་རྒྱུ་མཚན་གསུང་རོགས།

ལན།༡ ཕྱི་ལོ་༡༩༥༩ ལོར་བོད་ནང་རྒྱ་ནག་གིས་བཙན་འཛུལ་བྱས་ཏེ་བོད་མི་རྣམས་སྐྱབས་བཅོལ་དུ་གྱར་དགོས་བྱུང་ཡང་། ༸གོང་ས་སྐྱབས་མགོན་ཆེན་པོ་མཆོག་གི་ཐུགས་རྗེ་བཀྲིན་ལ་བརྟེན། ཕྱི་ནང་གི་ཤེས་ཡོན་ཀྱི་གོ་སྐབས་བཟང་པོ་ཐོབ་པ་དང་། བཙན་བྱོལ་བོད་གཞུང་ཉག་ཕྲ་བའི་སྐབས། བོད་རྒྱལ་ཁབ་དང་མི་རིགས་ཀྱི་དོན་དུ་ཞབས་འདེགས་ཞུ་རྒྱུའི་འདུན་པ་དང་། རང་གི་སེམས་ནང་དམ་བཅའ་བརྟན་པོ་ཡོད། ལྷག་པར་དུ་སྤྱི་ཚོགས་ནང་ལོ་མང་རིང་ནས་ལས་དོན་འདྲ་མིན་ཐོག་འགན་ཁུར་ཞུ་མྱོང་བའི་ཉམས་མྱོང་ལ་བརྟེན་འོས་མིར་ལངས་པ་ཡིན།

དྲི་བ། ༢ སྐུ་ཉིད་ལ་འོས་ཐོབ་ན་ལས་དོན་གཙོ་བོ་གང་ལ་ཤུགས་སྣོན་རྒྱག་རྩིས་ཡོད་དམ།

ལན།༢ འོས་ཐོབ་བྱུང་ན། གཙོ་ཆེ་བ་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་བཀའ་དགོངས་ལམ་སྟོན་དང་། ཡང་སྒོོས་བཙན་བྱོལ་བོད་གཞུང་གི་གཏན་ལ་ཕབས་པའི་སྲིད་བྱུས་ཁག་ལ་གཙོ་བོ་ཤུགས་རྒྱག་རྒྱུ་དང་། ལྷག་དོན་དུ་རྒྱ་ཆེའི་མི་མང་ནས་བོད་རྒྱལ་ཁབ་དང་མི་རིགས་ལ་ཞེན་ཁོག ལྷག་པར་དུ་བོད་དོན་བདེན་མཐའ་སེལ་སླད་མི་མང་ལ་ལྷག་བསམ་གྱིས་ཀུན་ནས་བསླངས་ཏེ་སྐུལ་སློང་གང་མང་གཏོང་རྒྱུ་ཡིན།

དྲི་བ། ༣ སྐུ་ཉིད་ཀྱིས་འདས་པའི་གྲོས་ཚོགས་ནང་མ་འགྲིག་ས་གཙོ་བོ་དང་འཐུས་ཤོར་ཕྱིན་པ་གཙོ་བོ་ག་རེ་ལ་ངོས་འཛིན་བྱེད་ཀྱི་ཡོད་དམ། དེའི་ཐོག་དགོངས་ཚུལ་ག་རེ་ཡོད།

ལན།༣ འདས་པའི་གྲོས་ཚོགས་ནང་མ་འགྲིག་ས་གཙོ་བོ་དང་། འཐུས་ཤོར་ཕྱིན་པ་གཙོ་བོ་དམིགས་བསལ་ཞུ་རྒྱུ་མེད། ཡིན་ནའང་སྤྱི་འཐུས་ལྷན་ཚོགས་སྐབས་༡༤ པའི་གྲོས་ཚོགས་ཚོགས་དུས་ཐེངས་གཅིག་གི་ཐོག་ལམ་གྲོན་གྱི་གནད་དོན་ཆུང་ཚགས་ཤིག་གི་ཐོག་ཚད་ལས་བརྒལ་བའི་བགྲོ་གླེང་འབྱུང་རྐྱེན་དེ་དག་རྒྱ་དམར་གཞུང་ནས་བེད་སྤྱོད་ཀྱིས། བོད་ནང་དྲིལ་བསྒྲགས་བྱས་རྐྱེན་གཞིས་བྱེས་གཉིས་སུ་ཡོད་པའི་བོད་མི་རྣམས་ཧ་ཅང་གི་བློ་འཚབ་དང་བློ་ཕམ་གྱི་རང་བཞིན་དུ་གྱུར་ཡོད།

༤ གལ་སྲིད་༸གོང་ས་མཆོག་གིས་བོད་ཀྱི་སྲིད་ཀྱི་ཐུགས་འགན་མ་བཞེས་ཚེ་བཅའ་ཁྲིམས་ལ་བསྒྱུར་བཅོས་གང་དགོས་དང། ད་ལྟའི་བཅའ་ཁྲིམས་ནང་གི་སྡེ་སྲིད་ལྷན་ཚོགས་བསྐོ་སྟངས་ཐོག་དགོངས་ཚུལ་ག་རེ་ཡོད།

ལན།༤ ༸གོང་ས་མཆོག་གི་སྐུ་དབང་གི་ཐོག་ནས་སྲིད་ཀྱི་འགན་ཁུར་བ་ཞིག་བསྐོ་བཞག་ཆོག་རྒྱུའི་བཅའ་ཁྲིམས་བསྒྱུར་བཅོས་དགོས་རྒྱུ། སྡེ་སྲིད་ལྷན་ཚོགས་བསྐོ་སྟངས་སྐོར་ད་ལྟའི་བཅའ་ཁྲིམས་རང་གནས་དགོས་རྒྱུ་དགེ་མཚན་དུ་མཐོང་།

དྲི་བ། ༥ ད་ཡོད་ཀྱི་སྤྱི་འཐུས་ལྷན་ཚོགས་ཀྱི་གྲུབ་ཆ་སྒྲིག་འཛུགས་ཀྱི་འགྲོ་སྟངས་དེ་མ་འགྲིག་པ་དང་འགྱུར་བ་གཏོང་དགོས་པ་དེ་འདྲ་གཟིགས་ཀྱི་ཡོད་དམ།

ལན།༥ ད་ཡོད་སྤྱི་འཐུས་ལྷན་ཚོགས་ཀྱི་གྲུབ་ཆ་དང་སྒྲིག་འཛུགས་ཀྱི་འགྲོ་སྟངས་ལ་འགྱུར་བ་གཏོང་དགོས་པའི་བསམ་ཚུལ་འདྲ་མིན་སྤྱི་ཚོགས་ནང་ལོ་མང་ནས་ཡོད་པ་ཞིག་ཡིན་ཡང། བོད་མི་མང་སྤྱི་འཐུས་ལྷན་ཚོགས་འདི་བཞིན་གཞིས་བྱེས་བོད་མི་ཡོངས་ཀྱི་སྐུ་ཚབ་མཚོན་གྱི་ཡོད། ལྷག་དོན་དུ་བཙན་བྱོལ་གྱི་སྒྲིག་འཛུགས་ཤིག་ཡིན་པའི་ཆ་ནས་སྐྱབས་བཅོལ་གནས་རིང་ད་ལྟའི་སྤྱི་འཐུས་ལྷན་ཚོགས་ཀྱི་གྲུབ་ཆ་དང་སྒྲིག་འཛུགས་ལ་འགྱུར་བ་དམིགས་བསལ་གྱིས་གཏོང་དགོས་མཐོང་གི་མི་འདུག་པ་བཅས།

{jcomments on}