དབུས་གཙང་སྤྱི་འཐུས་འོས་མི་བསོད་ནམས་བཟང་པོར་བཅར་འདྲི།

དྲི་བ། ༡ སྐུ་ཉིད་སྤྱི་འཐུས་ཀྱི་འོས་མིར་ལངས་དགོས་པའི་རྒྱུ་མཚན་གསུང་རོགས།

ལན།༡ ཕྲན་གྱིས་མི་ལོ་༣༠ ལྷག་རིང་བོད་མིའི་སྤྱི་ཚོགས་དང་དེ་བཞིན་ཕྱི་ནང་གི་སྤྱི་ཚོགས་མང་དག་ནང་ཞབས་ཞུ་སྒྲུབ་པའི་གྲུབ་འབྲས་དང་གུས་པའི་ལྷག་བསམ་གཡོ་མེད་སོགས་ལ་གཟིགས་ཏེ། བོད་རྒྱལ་ཡོངས་མང་གཙོ་ཚོགས་པ་དང་མངའ་རིས་སྤྱི་མཐུན་ཚོགས་པ་གཉིས་ནས་འོས་གཞིར་བཏོན་གནང་གིས་དབུས་གཙང་མི་མང་རྣམས་ནས་ཀྱང་ཞིབ་འཇུག་འདྲི་རྩད་བགྱིས་ཏེ། ཕྲན་ལ་འོས་འཕེན་རྒྱ་ཆེན་གནང་འདུག་པར་རྒྱ་ཆེའི་མི་མང་དེ་དག་གི་ཡིད་ཆེས་དང་རེ་བ་བརྒྱུད་ཕྲན་ནས་མུ་མཐུད་མི་མང་གི་ཞབས་ཞུ་དགོས་རྒྱུ་སྔར་ལྷག་གི་འདུན་པ་དྲག་པོ་སྐྱེས་ནས་ལངས་པ་ཞིག་ཡིན།

དྲི་བ། ༢ སྐུ་ཉིད་ལ་འོས་ཐོབ་ན་ལས་དོན་གཙོ་བོ་གང་ལ་ཤུགས་སྣོན་རྒྱག་རྩིས་ཡོད་དམ།

ལན།༢ གཙོ་ཆེར་བོད་མི་རྩམ་ཟན་ཡོངས་ཀྱི་རྩ་དོན་འགྲུབ་ཐབས་དང་སྒོས་སུ་སྐྱབས་བཅོལ་བོད་མིའི་སྒྲིག་འཛུགས་སྲ་བརྟན་ཡོང་ཐབས་ལྷག་པར། ཕྲན་བལ་ཡུལ་ནས་ཡིན་སྟབས་ད་ལྟའི་བལ་ཡུལ་ནང་གི་སྐྱབས་བཅོལ་བོད་མི་ཛ་དྲག་གནས་སྟངས་འོག་ཡོད་པ་ཕྲལ་དུ་སེལ་ཐབས་སུ་ཤུགས་སྣོན་གཙོ་བོ་རྒྱག་རྒྱུ་ཡིན་ལགས།

དྲི་བ། ༣ སྐུ་ཉིད་ཀྱིས་འདས་པའི་གྲོས་ཚོགས་ནང་མ་འགྲིག་ས་གཙོ་བོ་དང་འཐུས་ཤོར་ཕྱིན་པ་གཙོ་བོ་ག་རེ་ལ་ངོས་འཛིན་བྱེད་ཀྱི་ཡོད་དམ། དེའི་ཐོག་དགོངས་ཚུལ་ག་རེ་ཡོད།
ལན།༣     བོད་མི་མང་སྤྱི་འཐུས་རྣམས་ཀྱིས་ལས་འཁུར་དམ་བཅའ་བཞེས་སྐབས་རང་དོན་ཕྱོགས་ལྷུང་དང་འཇིགས་ཞུམ་ཆགས་སྡང་མེད་པར་དྲང་བདེན་དང་། ལྷག་བསམ་ཟོལ་མེད་ཀྱི་སྒོ་ནས་རང་ནུས་གང་ཐེག་ཞུ་རྒྱུ་ཡིན་ཞེས་འཕགས་མཆོག་སྤྱན་རས་གཟིགས་ཀྱི་སྐུ་མདུན་ནས་དམ་འཇོག་གནང་ཡོད་ཀྱང། སྐབས་འགར་ཕྱོགས་ལྷུང་དང་ཆགས་སྡང་གི་རྐྱེན་པས་ཚོགས་འདུ་མཇུག་བསྡོམས་མ་ཐུབ་པའི་གནས་སྟངས་དེ་དག་ང་རང་གིས་ཡག་པོ་རྩ་བ་ནས་མཐོང་མ་སོང་། གལ་སྲིད་ང་རང་མ་འོངས་པའི་སྤྱི་འཐུས་ལ་སླེབས་ན་གནད་དོན་དེའི་རིགས་ལ་མི་ཚུད་པ་བྱེད་རྒྱུ་ཡིན་ལ་དེའི་ཐད་ང་ཚོས་རོབ་ཙམ་དགོངས་བཞེས་དགོས་ངེས།

དྲི་བ། ༤ གལ་སྲིད་༸གོང་ས་མཆོག་གིས་བོད་ཀྱི་སྲིད་ཀྱི་ཐུགས་འགན་མ་བཞེས་ཚེ་བཅའ་ཁྲིམས་ལ་བསྒྱུར་བཅོས་གང་དགོས་དང། ད་ལྟའི་བཅའ་ཁྲིམས་ནང་གི་སྡེ་སྲིད་ལྷན་ཚོགས་བསྐོ་སྟངས་ཐོག་དགོངས་ཚུལ་ག་རེ་ཡོད།

ལན།༤ གལ་སྲིད་༧གོང་ས་མཆོག་གི་བོད་ཀྱི་སྲིད་དོན་ལ་ཐུགས་འགན་མ་བཞེས་ཚེ། ད་ལྟའི་བཅའ་ཁྲིམས་ནང་སྡེ་སྲིད་ལྷན་ཚོགས་བསྐོ་ཕྱོགས་ཐད་བསྒྱུར་བཅོས་གཏོང་དགོས་འདུག་པ་ནི་སྡེ་སྲིད་ལྷན་ཚོགས་སྤྱི་འཐུས་དང་། བཀའ་ཤག་གིས་བསྐོ་བཞག་མ་དགོས་པར་བཀའ་བློན་ཁྲི་པ་ལྟར་མི་མང་གིས་ཐད་ཀར་འོས་འདེམས་གནང་ཐབས་བྱུང་ན་ལེགས་སྙམ།

དྲི་བ། ༥ ད་ཡོད་ཀྱི་སྤྱི་འཐུས་ལྷན་ཚོགས་ཀྱི་གྲུབ་ཆ་སྒྲིག་འཛུགས་ཀྱི་འགྲོ་སྟངས་དེ་མ་འགྲིག་པ་དང་འགྱུར་བ་གཏོང་དགོས་པ་དེ་འདྲ་གཟིགས་ཀྱི་ཡོད་དམ།

ལན།༥   ད་ཡོད་སྤྱི་འཐུས་གྲུབ་ཆ་ལ་འགྱུར་བ་གཏོང་དགོས་པ་དེ་ཙམ་མ་མཐོང་ཡང་། ས་གནས་མི་མང་གི་དངོས་ཡོད་ཀྱི་བདེ་སྡུག་གཞུང་གིས་མཁྱེན་རྟོགས་སླད་ས་གནས་མི་མང་གི་འཐུས་མི་གྲོས་ཚོགས་གོང་འོག་གང་རུང་ཞིག་ངེས་པར་དགོས་པར་མཐོང་གི་འདུག་ལགས། ཐུགས་རྗེ་ཆེ།

{jcomments on}