བོད་ཀྱི་ལོ་གསར། བོད་ཀྱི་གནས་སྟངས།

འབྲུག་ཆུ་རྫོང་དུ་འདམ་རུད་ཀྱི་དོན་རྐྱེན་སོགས་ལ་བརྟེན་ནས་བོད་རིགས་གང་མང་ཞིག་གི་ཚེ་སྲོག་ཤོར་བ་དང། རྒྱུ་ནོར་ལོངས་སྤྱོད་ལ་གྱོང་གུད་ཚད་ལས་བརྒལ་བ་བྱུང་བ་རེད། དེ་བཞིན་བཙན་བྱོལ་ནང་དུའང་ལ་དྭགས་ས་གནས་སུ་སྤྲིན་པ་གས་འཐོར་ལ་བརྟེན་ནས་བྱུང་བའི་ཆུ་རུད་ཀྱིས་ཡུལ་མི་གང་མང་ཞིག་གི་ཚེ་སྲོག་ཤོར་བ་དང། བོད་མི་རེ་ཟུང་ཞིག་གི་ཚེ་སྲོག་ཤོར་བ་མ་ཟད། རྒྱུ་ནོར་ལོངས་སྤྱོད་ལ་གྱོང་གུད་ཚབས་ཆེན་ཕོགས་ཡོད། ཉེ་བའི་ཆར་༧གོང་ས་མཆོག་གི་སྐུའི་ཚ་བོ་དང་བོད་རང་བཙན་དོན་གཉེར་བ་འཇིགས་མེད་ནོར་བུ་མཆོག་བོད་རང་བཙན་གྱི་ལས་འགུལ་སྤེལ་བཞིན་པའི་སྐབས་དུས་མིན་རྐྱེན་འདས་སུ་གྱུར་པ་སོགས་མྱ་ངན་དང་གུས་འདུད་ཞུ་དགོས་པ་དང། བཀྲ་མི་ཤིས་དང་། བྱ་བ་མ་ལེགས་པ་འབའ་ཞིག་ལས་བཟང་ཕྱོགས་ཀྱི་གནས་ཚུལ་ངོ་སོ་ཐོན་པ་ཞིག་བྱུང་མེད་པ་བཞིན། བོད་དོན་ཆབ་སྲིད་ཀྱི་གནས་བབས་ཐོག་ནས་ཀྱང་བཟང་ཕྱོགས་ཀྱི་གནས་ཚུལ་ཞིག་གཏན་ནས་བྱུང་མེད། དེར་བརྟེན་འདས་མ་ཐག་པའི་རབ་གནས་ལྕགས་སྟག་ལོ་དེའི་ནང་རྗེས་དྲན་བྱེད་འོས་པའི་གནས་ཚུལ་ཞིག་བྱུང་མེད་པ་དང།  གནས་ཚུལ་མང་པོ་ཞིག་གི་ཐོག་ནས་ལོ་སྔོན་མ་ལས་གནས་སྟངས་སྡུག་ཏུ་སོང་ཡོད།

སྤྱིར་ལོ་གསར་ནི་འདས་ཟིན་པའི་ལོ་དེའི་ནང་དུ་ནང་མི་སོ་སོའི་མི་ཤི་རྐྱེན་ཆག་མ་བྱུང་བར་གནས་ཡོད་པའི་དགའ་སྟོན་དང། ལོ་གསར་པའི་ནང་དུ་མི་འདོད་པའི་ཉེར་འཚེ་ཞི་ཞིང་བསམ་དོན་ཡིད་བཞིན་དུ་འགྲུབ་པའི་རྟེན་འབྲེལ་བསུ་ཆེད་དུ་ཡིན། འོན་ཀྱང་ལོ་གསར་པ་འདིའི་ནང་དུ་བོད་ཕྱི་ནང་གི་གནས་སྟངས་ཡག་ཏུ་འགྲོ་སྲིད་དམ། བོད་དོན་ཆབ་སྲིད་ཀྱི་ཐོག་ནས་བཤད་ཀྱང་བཟང་ཕྱོགས་ཀྱི་གནས་ཚུལ་ག་འདྲ་ཞིག་ཐོན་སྲིད་དམ། ཞེས་སོགས་ཀྱི་དྲི་བ་མང་དག་ཅིག་ཡོད་པ་དེ་དག་ལ་ལན་འདེབས་བྱེད་ཚོད་ཐིག་དཀའ་བ་ཞིག་ཏུ་གྱུར་ཡོད། དེར་བརྟེན་གནམ་ལོ་གསར་ཚེས་ཀྱི་དགའ་སྟོན་རྟེན་འབྲེལ་འདི་ནི་བོད་པའི་ཛ་དྲག་གི་གནས་སྟངས་ལ་གཞིགས་ན་སྲུང་བརྩི་བྱེད་འོས་པ་ཞིག་ཏུ་གྱུར་མེད། མ་འོངས་པའི་བོད་མི་རིགས་ཀྱི་ཆེད་དུ་བདེན་དོན་རྩོད་ལེན་བྱེད་དགོས་པ་དང།  བོད་པ་རྣམས་འགྱེལ་ས་ནས་ལངས་ཐུབ་པ་བྱེད་དགོས་པས་ལོ་འདི་ནི་ཆེས་གལ་གནད་ཆེ་བའི་ལོ་ཞིག་ཏུ་གྱུར་ཡོད། བལ་ཡུལ་དུ་བོད་མི་སྐྱབས་བཅོལ་བ་རྣམས་ཀྱི་གནས་སྟངས་སྡུག་ཏུ་ཕྱིན་ཡོད་པ་དང།  རྒྱ་གར་ནང་དུ་མཚུར་ཕུ་བླ་བྲང་ལ་སྐུ་ངལ་འཕྲད་པ་སོགས་ལ་གཞིགས་ན་མ་འོངས་པར་བོད་མི་སྐྱབས་བཅོལ་བ་རྣམས་ཀྱི་གནས་སྟངས་ག་འདྲ་ཞིག་ཏུ་འགྱུར་ཐུབ་མིན་གྱི་ཐོག་ལ་རང་བཞིན་གྱིས་དོགས་པ་སྣ་ཚོགས་སྐྱེ་དགོས་པ་ཞིག་ཏུ་གྱུར་ཡོད་པས། དགའ་སྐྱིད་རྟེན་འབྲེལ་གྱིས་བསུ་འོས་པའི་ལོ་གསར་པ་ཞིག་ཡིན་མིན་ཡང་ཕྱོགས་གང་ནས་བལྟས་ཀྱང་རོབ་ཙམ་ཤེས་ཐུབ་པ་ཞིག་ཏུ་གྱུར་ཡོད། དེར་བརྟེན་ཚང་མས་རྡོག་རྩ་ཆིག་སྒྲིལ་དང་གདུང་སེམས་མཉམ་སྐྱེད་ཀྱིས་མི་རིགས་རྩ་སྟོངས་སུ་མི་འགྲོ་བ་དང། ཆོས་དང་རིག་གཞུང་རྒྱུད་འཛིན། བདེན་དོན་རྩོད་ལེན་གྱི་ཐོག་ལ་ནུས་ཤུགས་ཡོད་རྒུ་འདོན་དགོས་པའི་དུས་ལ་བབ་ཡོད་པར་སྙམ།།

{jcomments on}