བསམ་ཞིབ་དང་གྲ་སྒྲིག་ངེས་པར་དུ་དགོས།

ད་ཆ་རང་རེའི་མང་གཙོའི་འཕེལ་རིམ་ཡོངས་སུ་རྫོགས་པའི་ཆེད་དུ་༧རྒྱལ་བ་རིན་པོ་ཆེས་བོད་ཀྱི་ཆབ་སྲིད་ཀྱི་འགན་ཁུར་མ་དགོས་པར་མི་མང་གིས་འོས་འདེམས་བྱས་པའི་འགོ་ཁྲིད་སོ་སོས་ཆབ་སྲིད་ཀྱི་དབང་ལུང་ཡོངས་རྫོགས་འགན་ཁུར་བྱེད་དགོས་པའི་དུས་ལ་བབས་ཡོད།” ཅེས་༧གོང་ས་མཆོག་གིས་བོད་ཀྱི་ཆབ་སྲིད་ཀྱི་འགན་ཁུར་བཞེས་མི་དགོས་པར་བགྲེས་ཡོལ་ཆ་ཚང་བཞེས་རྒྱུ་ཡིན་ཞེས་གསུངས་ཡོད་པ་མ་ཟད། “བཙན་བྱོལ་བོད་མིའི་བཅའ་ཁྲིམས་དོན་ཚན་༣༡ པའི་ནང་སྡེ་སྲིད་ལྷན་ཚོགས་ཀྱི་ཆ་རྐྱེན་ཞིག་ཡོད་ཀྱང་དེ་ནི་སྔོན་སྲོལ་རྒྱུན་སྐྱོང་ལྟ་བུ་དང་བར་བརྒལ་གྱི་ཆ་རྐྱེན་ཙམ་ལས་༧རྒྱལ་བ་རིན་པོ་ཆེས་བོད་ཀྱི་ཆབ་སྲིད་ཀྱི་འགོ་ཁྲིད་བྱེད་མི་དགོས་པའི་ཆ་རྐྱེན་ཞིག་ཏུ་གྱུར་མེད། དེར་བརྟེན་ད་ལམ་བཅའ་ཁྲིམས་བསྐྱར་བཅོས་སྐབས་བཅའ་ཁྲིམས་ཀྱི་སྒྲོམ་གཞི་ལ་འགྱུར་བ་བཏང་ནས་ཆབ་སྲིད་དང་འཛིན་སྐྱོང་གཉིས་ཀའི་འགོ་ཁྲིད་མང་ཚོགས་ཀྱིས་འོས་འདེམས་བྱས་པའི་མི་སྣས་དུས་ཡུན་ངེས་ཅན་དུ་བྱ་རྒྱུའི་ཆ་རྐྱེན་བསྐྲུན་ཏེ་བཅའ་ཁྲིམས་ཡུལ་མིའི་རྒྱལ་ཁབ་ཀྱི་སྒྲོམ་གཞི་དང་མཐུན་པ་ཞིག་ངེས་པར་བཟོ་དགོས་ཤིང་། དེའི་འོག་རྗེས་འབྲེལ་དོན་ཚན་གཞན་དག་དང། ཁྲིམས་སྒྲིག་གཞན་ཁག་བསྐྱར་བཅོས་བྱ་རྒྱུའི་ཆེད་ཚོགས་ཆུང་ཟུར་འཛུགས་སམ་ལས་རིམ་ཇི་དགོས་ཚོགས་དུས་འདི་རང་དུ་གཏན་འབེབས་ལག་བསྟར་ངེས་པར་དུ་ཐུབ་པ་དགོས་རྒྱུ། དེ་ལྟར་བྱུང་མཚམས་མ་འོངས་བོད་ཀྱི་རྩ་ཁྲིམས་འཆར་ཟིན་དང་ཆབ་སྲིད་ལམ་སྟོན་སོགས་ངོས་ཀྱིས་སྤེལ་བའི་སྲིད་དོན་གྱི་ཡིག་ཆ་འགའ་ཤས་རང་བཞིན་ནུས་མེད་དུ་འགྲོ་རྒྱུ་དང། དགའ་ལྡན་ཕོ་བྲང་ཞེས་པའི་མིང་བྱང་ཡང་སྐབས་བསྟུན་འགྱུར་བ་གཏོང་དགོས་དེ་དོན་ཡིད་འཇགས་འཚལ།”ཞེས་བཅའ་ཁྲིམས་ཀྱི་གཞི་རིམ་སྒྲོམ་གཞི་དང་འབྲེལ་བའི་༧གོང་ས་མཆོག་གི་སྐུ་དབང་སྐོར་ལ་འགྱུར་བ་ཆེན་པོ་གཏོང་དགོས་པ་མ་ཟད། དགའ་ལྡན་ཕོ་བྲང་ཞེས་པའི་མིང་དེར་ཡང་འགྱུར་བ་གཏོང་དགོས་ཞེས་གསུང་འཕྲིན་ནང་འཁོད་ཡོད་པ་རེད།

གྲོས་ཚོགས་ནང་གནད་དོན་དེའི་སྐོར་གླེང་སློང་བྱེད་པའི་སྐབས་མང་ཆེ་བས་གཅིག་གྱུར་གྱིས་༧གོང་ས་མཆོག་གིས་བཀའ་ཡི་ཕེབས་སྒོ་དེ་ལྟར་གཏན་ནས་མི་གནང་བར། མུ་མཐུད་གཞིས་བྱེས་བོད་མི་ཡོངས་ཀྱི་ཆབ་སྲིད་ཀྱི་དབུ་ཁྲིད་གནང་སྐྱོང་ཡོང་བའི་གསོལ་འདེབས་ཞུས་སོང་བ་དང། ཁག་ཅིག་གིས་༧གོང་ས་མཆོག་གིས་ཕུགས་རྒྱང་རིང་པོའི་ལམ་སྟོན་དེ་དག་ངེས་པར་ལག་བསྟར་བྱེད་དགོས་པའི་དུས་ལ་བབ་ཡོད་ཅེས་ཀྱང་གསུངས་སོང། གནད་དོན་འདིའི་ཐོག་ནས་༧གོང་ས་མཆོག་ལ་དད་གུས་དང་གཞིས་བྱེས་རྒྱ་ཆེའི་མི་མང་གི་མངོན་འདོད། དངོས་ཡོད་གནས་ཚུལ་གསལ་སྟོན་བྱས་པ་མཚོན་ཡོད་པ་དང། ཕྱོགས་གཅིག་ནས་༧གོང་ས་མཆོག་གིས་སྔ་རྗེས་སུ་བགྲེས་ཡོལ་ཕེབས་རྒྱུའི་བཀའ་ནན་ཡང་ཡང་ཕེབས་པ་མ་ཟད། ད་ལན་གྲོས་ཚོགས་ནང་དུ་གསུང་འཕྲིན་གྱི་ཐོག་ནས་གསལ་སྟོན་གནང་ཡོད་པ་བཅས་ལ་བརྟེན་བསྐྱར་དུ་ཨུ་ནན་གྱིས་གསོལ་འདེབས་ཞུས་ཀྱང་དང་ལེན་གནང་མིན་བཤད་ཚོད་ཐིག་དཀའ་བ་ཞིག་ཏུ་གྱུར་ཡོད། དེར་བརྟེན་གྲོས་ཚོགས་ནས་ཞིབ་འཇུག་དང་བསམ་ཞིབ་ཙམ་ཡང་མ་ཞུས་པར་བསྐྱར་དུ་གསོལ་འདེབས་ཞུ་རྒྱུ་ཁོ་ན་གཙོ་འདོན་མི་བྱེད་པ་དང། ༧གོང་ས་མཆོག་གིས་བཀའ་ནན་ཕེབས་པ་བཞིན་ལོ་རྒྱུས་ཀྱི་དཀྱོགས་མཚམས་ཤིག་ཏུ་གྱུར་ཡོད་པས་བཀའ་ཤག་དང་སྤྱི་འཐུས་གཉིས་ངོས་ནས་མ་འོངས་པའི་ཆེད་དུ་གྲ་སྒྲིག་གཟབ་ནན་དང་འཐུས་ཚང་ཞིག་བྱེད་དགོས་པའི་དུས་ལ་བབ་ཡོད།

ད་རེས་ཀྱི་གསུང་འཕྲིན་དེ་ཕེབས་པའི་རྒྱབ་ལྗོངས་ཀྱི་སྐོར་ལ་གྲོས་ཚོགས་ནང་འགྲེལ་བརྗོད་བྱེད་མཁན་ཁ་ཤས་ཀྱིས་བོད་པའི་སྤྱི་ཚོགས་ནང་༧གོང་ས་མཆོག་གི་དབུ་ཁྲིད་གནང་རྒྱུར་མོས་མཐུན་མེད་སྐོར་གྱི་རྩོམ་ཡིག་དང་གཏམ་བརྗོད་སྤེལ་མཁན་བྱུང་བས་ཡིན་སྐོར་ཡང་བརྗོད་སོང་བ་ནི་ཧ་ཅང་ཐལ་ཆ་ཆེ་བའི་སྐད་ཆ་ཞིག་ཏུ་གྱུར་ཡོད། ༧གོང་ས་མཆོག་གིས་གསུང་འཕྲིན་རིན་པོ་ཆེ་གྲོས་ཚོགས་སུ་ཕེབས་དགོས་པ་དེ་བོད་མི་རིགས་དང་འཐབ་རྩོད་ཀྱི་ངོ་བོ་རྒྱུན་རིང་སྲ་བརྟན་དུ་གནས་ཆེད་དང། ༧གོང་ས་མཆོག་ཞལ་མ་བཞུགས་པའི་ཉིན་མོ་ཞིག་ཤར་ནའང་བོད་མི་རིགས་དེ་རང་ཉིད་ཀྱི་རྐང་པའི་སྒང་དུ་རང་ཉིད་ལངས་ཐུབ་ཆེད་ཕུགས་རྒྱང་རིང་པོའི་དགོངས་གཞི་ཞིག་ཡིན་པ་ལས། གནས་ཚུལ་ཆུང་ཙག་ཉི་ཚེ་བ་རེ་ཟུང་ལ་བརྟེན་ནས་བོད་ཀྱི་ཆབ་སྲིད་ཀྱི་ཐུགས་འགན་བཞེས་རྒྱུ་མིན་གསུངས་པ་ཞིག་གཏན་ནས་མ་རེད། དེ་ནི་བསྟོད་མི་ཤེས་པ་ཞིག་གིས་བསྟོད་པ་ལས། སྨད་མི་ཤེས་པ་ཞིག་གིས་སྨད་ན་དགའ་ཞེས་པ་དང་གཅིག་མཚུངས་སུ་གྱུར་འདུག མདོར་བསྡུས་ན་ད་རེས་ཀྱི་གནད་དོན་འདི་ནི་གཞིས་བྱེས་བོད་རིགས་མི་མང་གིས་ལམ་སེང་དང་ལེན་ཞུ་ཐུབ་པ་ཞིག་གཏན་ནས་མིན་པས་གྲོས་ཚོགས་ཀྱིས་དུས་ཐུང་ནང་ཐག་གཅོད་བྱེད་ཐུབ་པ་ཞིག་མ་ཡིན་པ་དང། བཀའ་ཤག་དང་སྤྱི་འཐུས་ཙམ་མ་ཡིན་པར་མི་མང་གིས་ངོས་ནས་ཀྱང་བགྲོ་གླེང་དང་བསམ་ཞིབ་གང་མང་བྱེད་དགོས་པར་མཐོང།།