གྲོས་ཚོགས་འཕར་མའི་འགན་ཁུར།

  གྲོས་ཚོགས་སུ་གསུང་འཕྲིན་གྱི་གནད་དོན་སྐོར་ལ་བགྲོ་གླེང་ཡུན་རིང་ཞུས་མཐར་གྲོས་ཆོད་ཀྱི་ལམ་ནས་༧གོང་ས་༧སྐྱབས་མགོན་ཆེན་པོ་མཆོག་ལ་དགོངས་བཞེས་དེ་ལྟར་གཏན་ནས་མི་གནང་བའི་གསོལ་བ་ཕུར་ཚུགས་སུ་བཏབ་ཀྱང། ༧གོང་ས་མཆོག་གིས་སྐུ་སྒེར་ཡིག་ཚང་བརྒྱུད་གྲོས་ཆོད་དེ་ཕྱིར་སློག་དང་འབྲེལ། གསུང་འཕྲིན་དུ་ཕེབས་པའི་དགོངས་དོན་བཞིན་ལག་བསྟར་དགོས་པའི་བཀའ་ཕེབས་པར་བརྟེན། སླར་ཡང་གྲོས་ཚོགས་སུ་བགྲོ་གླེང་ཡང་ཡང་གནང་ནས་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་དབུ་བཞུགས་ཐོག་ལས་འཆར་ཚོགས་ཆུང་ཞིག་བཙུགས་པ་དང། ཚོགས་ཆུང་དེས་དུས་ཐུང་ནང་དོན་སྙིང་ལྡན་པའི་སྙན་ཐོ་ཞིག་གྲོས་ཚོགས་སུ་འབུལ་ལམ་ཞུས་ཡོད་པ་རེད། ལས་འཆར་ཚོགས་ཆུང་གི་སྙན་ཐོ་དང་ཟུར་རྒྱན་གྱི་ནང་དུ་འཁོད་པ་བཞིན་བཙན་བྱོལ་བོད་མིའི་བཅའ་ཁྲིམས་བསྐྱར་བཅོས་ཀྱིས་མཚོན་སླར་ཡང་གྲོས་ཚོགས་ནང་བགྲོ་གླེང་ཡང་ཡང་ཞུས་ནས་མཐར་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་ཕྱི་ཟླ་༥ པའི་བདུན་ཕྲག་གསུམ་པའི་ནང་འཚོག་རྒྱུ་དང་། དེའི་རྗེས་སུ་སྐབས་བཅུ་བཞི་པའི་གྲོས་ཚོགས་ཀྱི་ཚོགས་འདུ་འཕར་མ་ཞིག་འཚོགས་ནས་བཅའ་ཁྲིམས་བསྐྱར་བཅོས་དགོས་པ་དེ་དག་གཏན་འབེབས་གནང་རྒྱུ་མང་མོས་ཀྱིས་ཐག་གཅོད་བྱུང་ཡོད་པ་རེད། གནད་དོན་གང་གི་ཐོག་ནས་བལྟས་ཀྱང་ཚོགས་འདུ་འཕར་མ་དེ་གྲོས་ཚོགས་ཀྱི་ཚོགས་འདུ་གཞན་དག་ལས་ཀྱང་འགན་ཁུར་ཆེ་བ་དང། འགན་དེ་ཡང་སྤྱི་འཐུས་མི་རེ་ངོ་རེ་བཞིན་གཡོལ་ཐབས་མེད་པ་ཞིག་ཏུ་གྱུར་ཡོད་པ་རེད།

སྤྱིར་གསུང་འཕྲིན་དེ་སྤྱི་འཐུས་སྐབས་བཅུ་བཞི་པའི་སྐབས་སུ་བསྩལ་བ་ཞིག་ཡིན་སྟབས་ཐག་གཅོད་ཀྱང་སྐབས་བཅུ་བཞི་པའི་རང་གི་ནང་དུ་བྱེད་ཐུབ་ན་ཧ་ཅང་འོས་འཚམས་སུ་མཐོང་ཡང། སྐབས་བཅུ་བཞི་པའི་ནང་དུ་དཀའ་ངལ་ཆེ་ཤོས་ཤིག་ནི་གྲོས་ཚོགས་འཚོགས་པའི་སྐབས་སྤྱི་འཐུས་རྣམས་ཚོགས་བཅར་མ་ཞུས་པའི་གནས་ཚུལ་འདི་ཉིད་ཡིན་ལ། ཉེ་ཆར་གྲོས་ཚོགས་ཀྱི་ནང་དུའང་དུས་ཡུན་མང་ཆེ་བར་སྤྱི་འཐུས་སུམ་ཅུ་སོ་གཉིས་ཙམ་ལས་མེད་པ་དང། སྐབས་རེ་གྲོས་ཚོགས་ཀྱི་ར་བའི་ནང་རྩ་འབོར་གྱི་སུམ་ཆ་གཉིས་ལོང་ཙམ་སྤྱི་འཐུས་གྲངས་༢༨ ལས་མེད་པ་མང་པོ་ཡོང་གི་ཡོད་པ་རེད། སྐབས་བཅུ་བཞི་པའི་ནང་དུ་བཅའ་སྒྲིག་བསྐྱར་ཞིབ་ཚོགས་ཆུང་བཙུགས་པ་སོགས་ལ་བརྟེན་ཁྲིམས་དང་སྒྲིག་གཞི་བསྐྱར་བཅོས་ཀྱི་ཁྲིམས་འཆར་མང་པོ་ཞིག་ཁུར་མྱོང་ཡང་གཏན་འབེབས་ཐུབ་པ་ཉུང་ཤས་ལས་བྱུང་མེད། དཀའ་ངལ་དེ་ནི་སྤྱི་འཐུས་ཁག་ཅིག་གིས་ཚོགས་འདུ་གཅིག་ཆ་ཚང་ལ་དགོངས་པ་ཞུས་པ་དང། ཁ་ཤས་ཀྱིས་ཕྱེད་ཙམ་ལ་དགོངས་པ་ཞུས་པ། ཁ་ཤས་དྷ་སར་ཕེབས་ཡོད་ཀྱང་གྲོས་ཚོགས་སུ་མ་ཕེབས་པ་ལྟ་བུ་གང་མང་ཡོང་བཞིན་པ་སོགས་ཀྱིས་བཅའ་ཁྲིམས་བསྐྱར་བཅོས་ལ་དགོས་ངེས་ཀྱི་བརྒྱ་ཆ་མ་ལོངས་པར་བརྟེན། བསྒྱུར་བཅོས་དགོས་ངེས་ཁག་ལའང་འགྱུར་བ་གཏོང་ཐུབ་མེད། སྐབས་བཅུ་བཞི་པའི་གྲོས་ཚོགས་འཕར་མ་འདིའི་ནང་དུ་བཅའ་ཁྲིམས་བསྐྱར་བཅོས་བྱ་རྒྱུར་དོན་གྱིས་འདོད་པ་ཡོད་མེད་གང་ལྟར་ཡང་། ཟིན་བྲིས་ཚོགས་ཆུང་གི་ཚོགས་མིའི་ངོ་གདོང་ལ་བལྟས་ནས་དགག་པ་རྒྱག་ངེས་ཡིན་པ་ཚོད་དཔག་བྱེད་ཐུབ་པ་དང། གལ་སྲིད་གྲོས་ཚོགས་འཕར་མའི་ནང་སྤྱི་འཐུས་ཚང་མ་ཕེབས་མ་ཐུབ་ན་གྲོས་ཚོགས་འཕར་མ་འཚོག་པ་དེ་ཉིད་འགྲོ་སོང་ཐོལ་བ་དང། གླེང་ཕྱོགས་གསར་པ་ཞིག་ཏུ་འགྱུར་ངེས་པ་ལས་གྲུབ་འབྲས་གསར་པ་ཞིག་འཐོབ་རྒྱུར་རེ་བ་ཧ་ཅང་ཕྲ།

སྐབས་བཅུ་བཞི་པ་འདིར་༢༠༠༨ ལོའི་བོད་ནང་གི་ཞི་རྒོལ་ཆེན་མོ་དང། དེ་དང་འབྲེལ་བའི་དམིགས་བསལ་ཚོགས་ཆེན། ༧གོང་ས་མཆོག་གིས་ཆབ་སྲིད་ཀྱི་ཐུགས་འགན་བཞེས་རྒྱུ་མིན་པའི་ཐུགས་ཐག་བཅད་ནས་གསུང་འཕྲིན་བསྩལ་བ་སོགས་སྤྱི་འཐུས་ལས་རྒྱུན་སྐབས་གཞན་དག་ལས་འགན་ཁུར་ཧ་ཅང་ལྕི་བའི་དུས་ཚོད་ཅིག་ཏུ་ཁེལ་སོང་ལ། དེ་བཞིན་སྐབས་བཅུ་བཞི་པའི་སྤྱི་འཐུས་ལྷན་ཚོགས་ནང་ཐོག་མ་ཁྲིམས་སྒྲིག་གི་དགོངས་དོན་བཞིན་ཚོགས་གཙོ་འདེམས་མ་ཐུབ་པ་དང། ཚོགས་དུས་བརྒྱད་པའི་སྐབས་ཡིག་ཆ་ཨང་༣༨ པ་ལ་བརྟེན་ནས་གྲོས་ཚོགས་མཇུག་བསྡོམས་མ་ཐུབ་པ། སྐབས་རེ་རྙོག་གླེང་གང་ཡང་མེད་ཀྱང་ཚོགས་བཅར་བ་ཉུང་བའི་རྐྱེན་གྱིས་ཚོགས་འདུའི་གྲུབ་ཆ་མ་ལོངས་པར་ཚོགས་འདུ་མུ་མཐུད་འཚོགས་མ་ཐུབ་པ་སོགས་གནས་ཚུལ་མི་སྙན་པའང་གང་མང་ཞིག་ལྷགས་ཡོད་པ་རེད། དེར་བརྟེན་སྐབས་བཅུ་བཞི་པའི་གྲོས་ཚོགས་ཀྱི་ཚོགས་འདུ་འཕར་མ་དེའི་སྐབས་སྤྱི་འཐུས་༤༣ ཡོངས་རྫོགས་ཚོགས་བཅར་ངེས་པར་དུ་དགོས་པ་དེ་རང་ཉིད་ལ་བཟློག་ཐབས་མེད་པའི་འགན་ཁུར་ཞིག་ཏུ་གྱུར་ཡོད་པ་དང། གལ་ཆེ་བའི་གནད་དོན་འདི་ལྟ་བུའི་སྐབས་ཚོགས་བཅར་མི་ཞུ་མཁན་གྱི་སྤྱི་འཐུས་ཤིག་ཡོད་པའི་དབང་དུ་བཏང་ན་དེ་ནི་མི་མང་དང་རྩ་དོན་ལ་འགན་ཁུར་གཏན་ནས་མེད་པ་ལྟ་བུར་གྱུར་པ་རེད་ཅེས་བརྗོད་ཀྱང་ཐལ་ཆ་ཆེར་མེད་པ་ལྟ་བུར་གྱུར་འདུག སྔ་རྗེས་ཀྱི་གནད་དོན་དེ་དག་ལ་བརྟེན་ནས་ཚོགས་འདུ་འཕར་མ་དེ་ལ་གྲུབ་འབྲས་ཐོན་པ་ཞིག་ཡོང་ཐུབ་མིན་ནི་གྲོས་ཚོགས་ཀྱི་འཐུས་མི་མི་རེ་ངོ་རེས་འགན་ཇི་ལྟར་ཁུར་མིན་ལ་རག་ལས་ཡོད་པ་རེད།།

{jcomments on}