༧གོང་ས་མཆོག་གི་བགྲེས་ཡོལ་ལ་མཇལ་བ།

༢༽ང་ཚོས་མི་འདོད་བཞིན་དུ་བརྒྱུད་དགོས་པ་ནི་སྐུ་ཕྲེང་བཅུ་བཞི་པ་དང་བཅོ་ལྔའི་བར་གྱི་བར་བརྒལ་གྱི་དུས་ཡུན་དེ་ཡིན། དུས་དེ་ང་ཚོར་གྲ་སྒྲིག་གང་ཡང་མེད་པར་གློ་བུར་དུ་བྱུང་ན་ང་ཚོར་ཉེན་ཁ་ཆེན་པོ་ཞིག་འཕྲད་མི་སྲིད་པ་མིན། ད་ལྟ་༸གོང་ས་མཆོག་འཚོ་ཞིང་བཞུགས་སྐབས་ང་ཚོས་སྲིད་དབང་གི་འགན་ཁུར་ཡོངས་མི་ཐེག་བཞིན་དུ་ཁུར་ནས་སྦྱོང་བརྡར་བྱས་ན་བར་བརྒལ་གྱི་དུས་ཡུན་དེར་ཉེན་ཁ་ཆུང་དུ་འགྲོ་བའི་རེ་བ་བྱེད་ཆོག།

༣༽ཆབ་སྲིད་ལས་བགྲེལ་ཡོལ་དུ་ཕེབས་པ་འདིས་རྒྱ་ནག་གིས་༸གོང་ས་མཆོག་ལ་རང་བཙན་བསྐྱར་གསོའི་གཞི་མེད་སྐྱོན་བརྗོད་དེ་ཁུངས་མ་འཁྱོལ་བས་ལོ་ཤས་སྔོན་ཡུལ་གྱར་ལོག་སྤྱོད་སྲིད་གཞུང་གི་དབུ་ཁྲིད་ཡིན་པའི་སྐྱོན་བརྗོད་བྱས་པ་དེའང་ད་ནས་གཞི་མེད་དུ་བཏང་བ་རེད།

༤༽ཆབ་སྲིད་ལས་བགྲེལ་ཡོལ་དུ་ཕེབས་པ་འདིས་མི་མང་གི་བདག་པོ་མི་མང་གིས་བྱེད་དགོས་པ་དེ་༸གོང་ས་མཆོག་གིས་རང་གི་མི་མང་རྣམས་མང་གཙོར་ཁྲིད་པའི་མཐར་ཐུག་གི་དམིགས་ཡུལ་ཡིན་པ་ཆེས་མངོན་གསལ་དུ་ཐོན་ཡོད།

༥༽རྣམ་པ་གཅིག་ཏུ་ཆབ་སྲིད་ལས་བགྲེས་ཡོལ་དུ་ཕེབས་པ་འདི་ལམ་དབུ་མ་ཡི་ཐབས་བྱུས་ཀྱི་ཆ་ཤས་གལ་ཆེན་ཞིག་དང་། ཕྱོགས་གཞན་ཞིག་ནས་གྲ་སྒྲིག་སྡུག་ས་ནས་བྱེད་དགོས་པ་དང་། རེ་བ་བཟང་ས་ནས་རྒྱག་དགོས་པའི་༸གོང་ས་མཆོག་རང་ཉིད་ཀྱི་བླ་ན་མེད་པའི་ཐབས་བྱུས་དེ་ཡི་ཆ་ཤས་ཤིག་ཡིན་ཡང་ཆོག་པ་ཡིན། ཡང་ན་རྒྱ་བོད་ཞི་འགྲིག་གི་བརྒྱུད་རིམ་གཅིག་ཡིན་ཡང་མི་ཆོག་པ་མེད།

༦༽སྲིད་དབང་ལས་བགྲེས་ཡོལ་དུ་ཕེབས་པ་འདིས་བོད་ཀྱི་གནད་དོན་༸གོང་ས་མཆོག་གི་སྐུ་ཚེའི་ནང་མངོན་འགྱུར་མ་བྱུང་བར་ཕྱི་རབས་པར་རྩིས་སྤྲོད་བྱས་པ་མཚོན་མི་ཐུབ་ཅིང་། དེ་ལས་ལྡོག་སྟེ་མདའ་གཅིག་གིས་འབེན་གཉིས་གཏོར་བ་སྟེ། ཁ་ཞེ་གཉིས་མེད་ཀྱིས་མང་གཙོའི་ཕྱག་ལས་མཐར་བསྐྱལ་བ་དང་གཅིག ཆོས་ཀྱི་མཛད་པས་འཛམ་གླིང་སྤྱི་དང་། རྒྱ་ནག་སྐམ་སའི་གྲངས་ལས་འདས་པའི་དད་ལྡན་པར་ནང་ཆོས་ཀྱི་གོ་རྟོགས་སྤེལ་བའི་ཁྲོད་༸གོང་ས་མཆོག་རང་ཉིད་མི་རིགས་སྣ་མང་ལས་གྲུབ་པའི་ཀྲུང་ཧྭ་ཁྱིམ་གཞི་ཆེན་མོར་ལྷག་བསམ་རྣམ་དག་ཡིན་པ་རང་ཤུགས་སུ་མཚོན་པར་གནང་སྟེ། ཀྲུང་ཧྭའི་སྤུན་ཟླའི་མི་རིགས་ཁག་ནས་བོད་ཀྱི་གནད་དོན་ལས་གཡོལ་བཞིན་པའི་ཀྲུང་དབྱང་གི་དབུ་ཁྲིད་ཁག་ནུས་པ་ཐོན་པའི་གནད་དོན་ཐག་གཅོད་ཀྱི་སྡིངས་ཆའི་སྟེང་དུ་བསུ་བར་བྱ་རྒྱུའི་གོ་སྐབས་ཇེ་མགྱོགས་སུ་ཕྱིན་པ་དེ་ཡིན།

༧༽༸གོང་ས་སྐུ་ཕྲེང་ན་རིམ་ལ་བོད་ཀྱི་ཆོས་ལུགས་ཐད་བླ་ན་མེད་པའི་མི་མང་གིས་དད་སེམས་ཤིག་སླེབས་སྟབས་ལྔ་པ་ཆེན་པོར་ལུགས་གཉིས་ཀྱི་འཁོར་ལོ་ཕྱག་ཏུ་ཕུལ་བ་ཡིན། དེས་ན་༸གོང་ས་མཆོག་ནི་ཆོས་ཀྱི་དབུ་ཁྲིད་ནས་སྲིད་ཀྱི་དབུ་ཁྲིད་དུ་ཕེབས་པ་ཡིན་པས། སླར་ཡང་ཆོས་ཀྱི་དབུ་ཁྲིད་དུ་ཕྱིར་ཕེབས་པ་ལ་སྐྱོན་གང་ཡང་མེད། ནང་ཆོས་ཀྱི་དབུ་ཁྲིད་ནི་ཨ་མའི་བུ་ལ་ལུང་རྟོགས་ཀྱི་ཡོན་ཏན་ཡོད་ན་སུའང་ཆགས་སྲིད་པ་ཞིག་ལས་གང་གིས་ཀྱང་དབང་སྐུར་བྱ་མི་རིགས།

༨༽ཆབ་སྲིད་ལས་བགྲེལ་ཡོལ་དུ་ཕེབས་པ་འདིས་རྒྱ་ནག་གིས་ཆབ་སྲིད་ཀྱི་འབོད་སྒྲའི་འོག་བོད་ཀྱི་གནད་དོན་མེད་པར་༸གོང་ས་མཆོག་གི་གནད་དོན་ཙམ་ཡིན་ཟེར་བ་དེར་དངོས་དོན་ནས་བརྡ་ལན་ཞིག་སྤྲོད་བཞིན་ཡོད།

༩༽ད་ལྟའི་ཆར་གང་ཟག་གཞན་སུ་ཞིག་གིས་ཚབ་མཚོན་བྱེད་ཐབས་བྲལ་བའི་ཆོས་སྲིད་གཉིས་ཐད་བོད་མི་མང་ཁྲོད་༸གོང་ས་མཆོག་ནས་བླ་ན་མེད་པའི་གནས་བབས་ཤིག་བཟུང་ཡོད་པས། ང་ཚོའི་མི་མང་དང་གཞུང་གིས་༸གོང་ས་མཆོག་གི་ནུས་ཤུགས་ལ་དངོས་ཤུགས་བརྒྱུད་གསུམ་ནས་མ་བརྟེན་ཐབས་མེད་ཡིན་ཀྱང་། ཕུགས་རྒྱང་རིང་པོར་གཞུང་གཅིག་དང་མི་རིགས་གཅིག་གང་ཟག་བྱེ་བྲག་པ་གཅིག་ལ་བརྟེན་ནས་འཚོ་ཐབས་མེད་པ་དངོས་དོན་ཡིན་གཤིས་སྲིད་དབང་ནས་བགྲེལ་ཡོལ་དུ་ཕེབས་པ་འདི་བོད་གཞུང་མང་བཅས་པ་མ་འོངས་སྲ་བརྟན་གནས་ཐབས་ཀྱི་གལ་ཆེའི་ཆ་རྐྱེན་དུ་གྱུར་ཡོད།

༡༠༽༸གོང་ས་མཆོག་སྲིད་དབང་ལས་བགྲེལ་ཡོལ་དུ་ཕེབས་ཀྱང་༸གོང་ས་མཆོག་ནི་བོད་ཀྱི་ནང་བསྟན་ལམ་སྲོལ་གྱི་བླ་སྤྲུལ་མཐོ་ཤོས་དང་། བོད་མི་མང་གིས་དད་ཞེན་གཞི་རྒྱ་ཆེ་ཤོས་དང་མཐོ་ཤོས་དེ་ཡོད་པའི་བོད་བརྒྱུད་ནང་ཆོས་ཀྱི་བླ་ན་མེད་པའི་དབུ་ཁྲིད། བོད་མི་མང་གི་ཚབ་མཚོན་བླ་ན་མེད་པ། བོད་མི་མང་གི་སེམས་ཁམས་དབང་བསྒྱུར་གྱི་དོན་གྱི་གཙོ་འཛིན་ཡིན་པ་སོགས་དངོས་དོན་ཁག་བཀའ་སྤྱི་ཟུང་གིས་བགྲེལ་ཡོལ་དུ་ཕེབས་པའི་གོ་སྐབས་དང་བསྟུན་ནས་བདག་སྲུང་ཤེས་པ་ལོས་དགོས།

གཉིས་པ། ལོ་ངོ་ང་གཉིས་ལ་ཕྱིར་མིག་ལྟ་བ།

༡༽བཙན་བྱོལ་དུ་འབྱོར་ནས་ཤེས་ཡོན་གྱི་ལྟེ་གནས་སློབ་གྲྭ་ཁག ཆོས་སྒར་ཁག།གཞིས་ཆགས་ཁག གཞུང་གི་ལས་ཁུངས་མ་ལག་དང་བཅས་པ་རིམ་འཛུགས། བོད་དོན་རྒྱལ་སྤྱི་ཅན་དུ་བསྒྱུར་ཐབས། བཙན་བྱོལ་བོད་མིའི་ལྟོ་གོས་ཚུན་ཁུངས་འཁྱོལ་ཐབས་སོགས་ཉིན་བརྒྱུད་ཞག་བརྒྱུད་ཀྱི་འབད་པ་དུ་མས་གོོམ་པ་རིམ་བགྲོད་བྱས་པ་རྣམས་སྐབས་དོན་མིན་པས་བཞག།

༢༽དགུང་གྲངས་བཅུ་བདུན་དུ་ཕེབས་པ་སྟེ་ང་གཉིས་ལོར་༼ལེགས་བཅོས་སྤྱི་ཚོགས་༽དང་༼གྱོད་ཞིབ་ལས་ཁུངས་༽བཙུགས་པ་དེས་བོད་མི་རྣམས་བཅོས་བསྒྱུར་དང་སྤྱི་ཚོགས་གསར་པ་ཞིག་ལ་ཁ་ཕྱོགས་དགོས་པའི་དྲིལ་བརྡ་གཏོང་བ་དང་ཡོངས་སུ་མཚུངས་པ་ཡིན།

༣༽བཙན་བྱོལ་དུ་ཕེབས་པའི་ལོ་ཕྱི་མ་སྟེ་དྲུག་ཅུ་ཐམ་པའི་ལོར་སྐབས་དང་པོའི་བོད་མི་མང་སྤྱི་འཐུས་ལྷན་ཚོགས་ཀྱི་སྒྲིག་འཛུགས་གསར་དུ་གཏོད་པ་དང་། དྲུག་བཅུ་རེ་གསུམ་ལོར་མ་འོངས་བོད་ཀྱི་མང་གཙོའི་རྩ་ཁྲིམས་འཆར་ཟིན་གསལ་བསྒྲགས་གནང་བ་དེས། བོད་མི་རྣམས་སྲོལ་རྒྱུན་གཞུང་སའི་ལམ་བུ་ནས་མང་གཙོའི་ལམ་ལུགས་སུ་གོམ་ཁ་སྒྱུར་དགོས་པའི་ཐུགས་རེའི་མྱུ་གུ་འདི་ནས་འབུས་པར་གསལ་བར་མཚོན།

༤༽རེ་དགུ་དང་གྱ་བརྒྱད་ལོའི་གསུམ་བཅུའི་གསུང་འཕྲིན་དུ་མ་འོངས་བོད་ཀྱི་ཐག་གཅོད་བོད་མི་རང་གིས་བྱེད་དགོས་པ་དང་། ཏཱ་ལའི་བླ་མས་འཛིན་སྐྱོང་བྱེད་པའི་གཞུང་གི་སྲོལ་ལུགས་འདི་ངེས་པར་དུ་ཡོང་དགོས་ཀྱི་མེད་པ་དང་། ཏཱ་ལའི་བླ་མའི་ལམ་སྲོལ་འདི་མུ་མཐུད་གནས་དགོས་མིན་བོད་མི་མང་གིས་ཐག་གཅོད་བྱེད་ངེས་པའི་བཀའ་བསྩལ་མཛད། ལོ་རབས་བརྒྱད་ཅུ་ཙམ་ནས་བོད་གཞུང་མང་ལ་༸གོང་ས་མཆོག་རང་ཉིད་མེད་པའི་གནས་སྐབས་བཞིན་ལས་ཀ་བྱེད་དགོས་པར་ཡང་ནས་ཡང་དུ་གདམས།

༥༽གོ་གཉིས་ལོ་ནས་བཀའ་བློན་རྣམས་༸གོང་ས་མཆོག་གིས་ཐད་བསྐོས་གནང་བཞིན་པ་དེ་སྤྱི་འཐུས་ལྷན་ཚོགས་རང་ནས་འོས་འཕེན་གྱིས་འདེམས་བསྐོ་གནང་རྒྱུར་བསྒྱུར་བཅོས་མཛད་ཅིང་། ཆབས་ཅིག་ཁྲིམས་ཞིབ་ཁང་ཡང་གསར་གཏོད་མཛད།

༦༽༢༠༠༡ ལོར་བཀའ་བློན་ཁྲི་པ་མི་མང་ནས་འོས་འཕེན་གྱིས་འདེམས་བསྐོ་དགོས་པའི་ལམ་སྟོན་རིམ་ཕེབས་ཀྱིས་མི་མང་ནས་བདམས་པའི་བཀའ་ཁྲི་སླེབས་ཏེ་༸གོང་ས་མཆོག་རང་ཉིད་ཕྱེད་རྒས་ཡོལ་དུ་ཕེབས།

༧༽༢༠༡༡ ལོར་རྒྱལ་ཁབ་ཞིག་དང་མི་རིགས་གཅིག་གི་སྲིད་དབང་གང་ཟག་བྱེ་བྲག་པ་གཅིག་ལ་བརྟེན་མི་རུང་བའི་བཀའ་སློབ་ནན་ཕེབས་ཀྱིས་༸གོང་ས་མཆོག་རང་ཉིད་ལ་ཡོད་པའི་སྲིད་དབང་ཡོངས་རྫོགས་མི་མང་ནས་བདམས་ཐོན་བྱུང་བའི་བཀའ་ཁྲིར་རྩིས་སྤྲོད་གནང་སྟེ་བགྲེས་ཡོལ་ཆ་ཚང་དུ་ཕེབས་ངེས་ཐག་བཅད་མཛད།

༨༽མང་གཙོར་ཁྲིད་པའི་བརྒྱུད་རིམ་ནང་༸གོང་ས་མཆོག་ལ་མཛད་དཀའ་སྣ་ཚོགས་བྱུང་ཡོད་པར་མངོན་སྟེ། སྐུ་དྲག་ཁྱིམ་བརྒྱུད་ཀྱིས་བཟུང་བའི་གཞུང་སྲོལ་རྙིང་པ་ཡོངས་སུ་བསྒྱུར་ནས་སུས་ཀྱང་དཔོན་པོ་བྱེད་ཆོག་པའི་གཞུང་གསར་ཞིག་འཛུགས་པར་བཅན་བྱོལ་དུ་འབྱོར་བའི་ཀླུ་ཁང་དང་། ཟུར་ཁང་།  གཞུང་ཞབས་རྙིང་པ་སོགས་ཇི་སྙེད་ནས་དགག་བྱ་བྱས་ཡོད་སྲིད། ཐ་ན་དགུང་ན་ཆུང་བའི་༸གོང་ས་མཆོག་ལ་གཞུང་སའི་སྔར་ཡོད་སྲོལ་བཟང་ལས་ལུགས་གསར་འཛུགས་མི་རུང་བའི་རྣམ་འགྱུར་དང་བསྐུལ་འདེབས་ཤུགས་ཆེ་བྱས་པ་སྨོས་མེད་རེད།

༩༽ལོ་ངོ་ང་གཉིས་རིང་གི་བརྒྱུད་རིམ་དེ་དག་ལ་ཕྱི་ལྟས་བསློགས་ཚེ་བྱིས་པ་ཆུང་ངུ་ཞིག་ཕ་མས་ལག་གཉིས་ནས་འཇུས་ཏེ་ཐོག་མར་གོག་སྟངས་ནས་རིམ་གྱིས་གོམ་པ་སྤོ་སྟངས་སློབ་པ་བཞིན་༸གོང་ས་མཆོག་གིས་འཆར་གཞི་ལྡན་པའི་བརྒྱུད་རིམ་གཅིག་ནས་བོད་མི་རྣམས་མང་གཙོའི་ལམ་སྲོལ་དུ་ཁྲིད་ཡོད་པ་དང༌། བོད་ཀྱི་མང་གཙོ་ནི་༸གོང་ས་མཆོག་གིས་སྣེ་ཁྲིད་དེ་རྩ་བ་ཚུགས་ཤིང་ཡལ་ག་རྒྱས་པ་ཞིག་ཡིན་པ་ལས་མི་མང་རང་ངོས་ནས་འཐབ་རྩོད་ཀྱིས་བྱུང་བ་མིན་པ་དང་། སྲིད་གཞུང་དང་མི་མང་གི་བདག་པོ་མི་མང་རང་ཉིད་ཀྱིས་བྱེད་དགོས་པ་དེ་༸གོང་ས་མཆོག་གི་དགུང་གྲངས་ཉེར་ལྔ་ནས་རང་གི་མི་མང་རྣམས་མང་གཙོའི་ལམ་དུ་ཁྲིད་པའི་མཐར་ཐུག་གི་ཐུགས་རེ་ཡིན་པར་མཐོང་ཐུབ།

༡༠༽ལོ་ངོ་བཞི་བརྒྱ་ཙམ་གྱི་ལོ་རྒྱུས་ཀྱི་རྒྱབ་ལྗོངས་ཡོད་ཅིང་། བོད་མི་མང་གིས་བླ་ན་མེད་པའི་དད་ཞེན་སྔར་རྒྱུན་བཞིན་ཡིན་པའི་༸གོང་ས་མཆོག་གིས་དགུང་གྲངས་ཉེར་ལྔ་ནས་རང་ཉིད་ཀྱི་སྲིད་དབང་ངམ་ཡང་ན་སྐུ་དྲག་གིས་བསྐོར་བའི་གཞུང་སའི་ལམ་ལུགས་དེ་སྲ་བརྟན་དུ་གཏོང་ཐབས་མི་གནང་བར། མང་གཙོའི་གོ་རྟོགས་གང་ཡང་མེད་པའི་རང་གི་མི་མང་ལ་ཐོག་མར་མང་གཙོའི་ཤེས་བྱའི་གོ་རྟོགས་རིམ་སྤེལ་དང་མཐར་མང་གཙོའི་སྒྲོམ་གཞི་ཆ་ཚང་བ་ཞིག་ནང་ཁྲིད་ཟིན་མཚམས་རང་ཉིད་ཡོངས་སུ་བགྲེས་ཡོལ་དུ་ཕེབས་ཏེ་དགའ་ལྡན་ཕོ་བྲང་པའི་སྲིད་དབང་འཇུག་སྒྲིལ་བར་གནང་བ་ནི། བླ་ཆེན་གཅིག་གིས་བོད་ཀྱི་སྲིད་དབང་ལོ་ངོ་བཞི་བརྒྱ་ཙམ་བཟུང་བའི་ལོ་རྒྱུས་ཀྱི་ལེའུ་ཆེན་པོ་ཞིག་ཆེད་དུ་འཇུག་སྡུད་པ་ཡིན།

གསུམ་པ། ལུགས་གཉིས་ཀྱི་འགན་དབང་ཕྲག་ཏུ་བཞེས་པ།

༡༽༡༩༥༠ ཟླ་༡༡ ཚེས་༡༧ ཉིན་ནི་དགུང་གྲངས་བཅུ་དྲུག་ལ་ཕེབས་པའི་༸གོང་ས་མཆོག་ལ་ལུགས་གཉིས་སྲིད་དབང་གི་འཁོར་ལོ་ཕྱག་ཏུ་ཕུལ་བའི་དུས་རེད། ཡང་སྙིང་༸གོང་ས་མཆོག་ལ་བོད་ཀྱི་ཆབ་སྲིད་ཇི་འདྲ་ཞིག་ཕུལ་ཡོད་དམ། དེ་ནི་ང་ཚོས་སྲིད་དབང་ཕུལ་སྐབས་གཡས་གཡོན་གྱི་བོད་ཀྱི་གནས་བབས་ནས་བལྟ་དགོས་པར་སྙམ། སྐུ་ཕྲེང་བཅུ་གསུམ་པ་དགོངས་པ་གཞན་དོན་དུ་གཤེགས་མ་ཐག་ལྷ་སའི་གློག་ཁང་གྱི་དོན་རྐྱེན་དང་། ཞེ་བདུན་ལོར་རྭ་སྒྲེང་དང་སྟག་སྦྲག་བར་རྣོ་ངར་ཆེ་བའི་ནང་འཁྲུགས་སོགས་ཀྱི་མེ་ལྕེ་ད་དུང་ཡལ་ཟིན་མེད་ཅིང་། ཞེ་དགུ་ལོའི་ཟླ་༡༠ པའི་ཚེས་༡༠ ཉིན་མའོ་ནས་བོད་ལྗོངས་སུ་དཔུང་བསྐྱོད་དགོས་པའི་བཀའ་རྒྱ་བཏང་འདུག།ལོ་དེ་གའི་ཕྱི་ཟླ་༡༢ པའི་ཚེས་༣༡ ཉིན་བོད་ལྗོངས་བཅིངས་གྲོལ་གཏོང་རྒྱུ་དེ་ཕྱི་ལོ་༡༩༥༠ ཐམ་པ་ལོའི་ཀྲུང་གོའི་དམག་འཐབ་ལས་འགན་དུ་གཏན་འཁེལ་བྱས་ཏེ་ལྔ་བཅུ་ཐམ་པའི་ལོར་མི་མང་བཅིངས་འགྲོལ་དམག་བོད་དུ་འབྱོར་ཡོད། ལྔ་བཅུ་ཐམ་པའི་ཟླ་༧ པའི་ཚེས་༢༤ ཉིན་མཚོ་སྔོན་རྟ་དམག་རུ་ཁག་སྐྱེ་དགུ་མདོ་རུ་འབྱོར་ཞིང་། ཟླ་༨ པའི་ཚེས་༢ ཉིན་དམག་སྡེ་བཅོ་བརྒྱད་པའི་སྔོན་འགྲོའི་དཔུང་དམག་འབའ་ཐང་དུ་འབྱོར་ཡོད། ཟླ་༨ པའི་ཚེས་༢༤ ཉིན་ཆབ་མདོའི་རྒྱུད་དུ་བོད་དམག་ཁག་གཅིག་ཕམ་ཉེས་བཏང་སྟེ་ལོ་རྗེས་མར་ལྷ་སར་དཔུང་བསྐྱོད་དང་བོད་ལྗོངས་བཅིངས་འགྲོལ་གཏོང་རྒྱུའི་གྲ་སྒྲིག་བྱས། ཟླ་༡༠ པར་ཆབ་མདོར་རྒྱ་བོད་བར་དམག་འཁྲུགས་ཐེངས་མང་བྱས་ཏེ་མཐར་བོད་དམག་ལྔ་སྟོང་བདུན་བརྒྱ་རྩ་གཏོར་བཏང་སྟེ་ཆབ་མདོ་ཡོངས་སུ་བཅིངས་འགྲོལ་གཏོང་བ་ཡིན་ཞེས་དྲིལ་བསྒྲགས། ཟླ་༡༡ པའི་༩ ཉིན་༸གོང་ས་མཆོག་ལ་ཀྲུང་དབྱངས་ནས་ཞི་གྲོས་བྱ་དགོས་པའི་ཏར་འཕྲིན་བཏང་ཞིང་ཆབ་མདོར་རྒྱ་གཞུང་ནས་ལས་དོན་ཨུ་ཡོན་ལྷན་ཁང་ཟེར་བ་བཙུགས། ཟླ་༡༡ པའི་ཚེས་༡༧ ཉིན་༸གོང་ས་མཆོག་ལ་ལུགས་གཉིས་ཀྱི་སྲིད་དབང་ཕུལ་ཞིང་། ཆབ་སྲིད་ཀྱི་འགན་དབང་བཞེས་ནས་ཟླ་བ་གཅིག་ཙམ་ལས་མ་སོང་བར། ཆབ་མདོ་དང་། དཀར་མཛེས། སྐྱེ་དགུ་མདོ་སོགས་བོད་ས་སྟོད་སྨད་ཀུན་ནས་རྒྱ་དམག་ཕོན་ཆེན་ལྷགས་ཏེ་ཡུལ་དམག་དང་དམག་འཐབ་ཛ་དྲག་མང་པོ་བྱས་པ་དང་ལྷ་ས་ཡང་རིང་མིན་བཅིངས་འགྲོལ་གཏོང་ངེས་ཡིན་པ་བསྒྲགས་པར་བརྟེན། ལྔ་བཅུ་ཐམ་པའི་ཟླ་༡༢ པའི་ཚེས་༡༦ ཉིན་༸གོང་ས་མཆོག་སྟོན་འཁོར་རྣམས་གྲོ་མོར་ཉེན་ཡོལ་དུ་ཕེབས་ནས་དེར་བཀའ་ཤག་སྲིད་གཞུང་བཙུགས་ཏེ་ཟླ་བ་བདུན་ཙམ་བཞུགས་དགོས་བྱུང་།

༢༽ང་གཅིག་ལོའི་ཟླ་༣ པའི་ཚེས་༢༧ ཉིན་གྲོ་མོར་བཞུགས་སྐབས་ང་ཕོད་དང་བསམ་ཕོས་གཙོས་པའིསྐུ་ཚབ་ཁག་ཅིག་པེ་ཅིང་དུ་བཏང་སྟེ་ཕྱི་ཟླ་༥ པའི་ཚེས་༢༣ ལ་པེ་ཅིང་དུ་གྲོས་དོན་དོན་ཚན་བཅུ་བདུན་ཞེས་པ་བཞག་བཅུག་སྟེ། བོད་ཀྱི་སྣོད་བཅུད་གཉིས་ཀ་མི་རིགས་གཞན་གྱི་བཀོད་ཁྱབ་འོག་ཡོངས་སུ་ཚུད། ཚེས་༢༣ ཉིན་ཞི་བའི་བཅིངས་འགྲོལ་འབྱུང་ཐབས་ཀྱི་གྲོས་དོན་དོན་ཚན་བཅུ་བདུན་ལ་ཀྲུང་དབྱང་ནས་མིང་རྟགས་བཀོད་པ་དང་ཚེས་༢༥ ཉིན་མའོ་ནས་བཅིངས་འགྲོལ་དམག་བོད་དུ་བཅའ་སྡོད་དགོས་པའི་བཀའ་ཕབ། ཞི་གྲོས་བྱེད་བཞིན་པའི་བརྒྱུད་རིམ་གྱི་ཟླ་༥ པའི་ཚེས་༦ ལ་ཤིང་ཅང་རྒྱ་ཡི་རྟ་དམག་རུ་ཁག་སྟོད་པུ་ཧྲེངས་ལ་རྟ་དམག་གི་རྗེས་སྣོན་དུ་བཏང་ནས་མངའ་རིས་རུ་ཐོག་རྫོང་བཅིངས་འགྲོལ་བཏང་བར་བསྒྲགས། ཟླ་༧ པའི་ཚེས་གཅིག་ཉིན་དམག་སྡེ་བཅོ་བརྒྱད་པའི་ལས་ཁུངས་དཀར་མཛེས་ནས་ལྷ་སར་ཐོན། ཟླ་༡༢ པའི་ཚེས་༡ ཉིན་ནུབ་བྱང་བོད་བསྐྱོད་དཔུང་སྡེ་ལྷ་སར་འབྱོར།

༣༽ང་གཉིས་ལོར་ཀྲུང་དབྱང་སྐུ་ཚབ་བཞུགས་གནས་སུ་གནད་དོན་ལྷགས་རྐྱེེན་སོགས་ཀྱིས་སྲིད་བློན་ཀླུ་ཁང་དང་བློ་བཟང་བཀྲ་ཤིས་གཉིས་རྒྱ་མིས་དབང་ཤེད་འོག་སྲིད་སྟེགས་ནས་གནས་དབྱུང་གནང་ཁུལ་མཛད་དགོས་བྱུང་། ཁམས་བོད་གཞུང་ལམ་དཀར་མཛེས་ནས་ཆབ་མདོར་ཤར་གཏོང་བྱས། ང་གསུམ་ལོར་ལྷ་སར་རྒྱལ་གཅེས་གཞོན་ནུ་ཤེས་རིག་མཐུན་གྲོགས་ཚོགས་པ་དང་སྤྱི་ཚོགས་སློབ་གྲྭ་ཟེར་བ་བཙུགས། ང་བཞི་ལོར་ཀྲུང་དབྱང་ནས་བོད་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁང་འཛུགས་རྒྱུ་ཐག་བཅད། མཚོ་བོད་གཞུང་ལམ་ཡངས་པ་ཅན་བར་དུ་ཤར་གཏོང་ཐུབ། ང་ལྔའི་ལོར་ལྷ་སར་མི་མང་འཐུས་མི་ནས་བོད་དམག་རྒྱ་དམག་ཏུ་བསྒྱུར་རྒྱུར་ངོ་རྒོལ་བྱས། ང་དྲུག་ལོར་རྒྱལ་སྲིད་སྤྱི་ཁྱབ་ཁང་ནས་བོད་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁང་གི་ཁོངས་མི་རྣམས་བསྐོ་བཞག་བྱས་ཏེ་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁང་ཟེར་བ་དངོས་སུ་བཙུགས། པེ་ཅིང་ནས་ལྷ་སའི་བར་གྱི་མཁའ་ལམ་ཚོད་ལྟ་ལེགས་གྲུབ་བྱུང་། ༸གོང་ས་མཆོག་རྒྱ་གར་དུ་སྟོན་པ་མྱང་འདས་ཀྱི་དུས་དྲན་དུ་ཕེབས།

༤༽ང་བདུན་ལོར་ཁམས་རྒྱུད་དུ་དམག་འཐབ་ཤུགས་ཆེར་བྱས། ཟླ་༢ པའི་ཚེས་༢༧ ཉིན་མའོ་ནས་ཆེས་མཐོའི་རྒྱལ་དོན་ཚོགས་འདུ་རྒྱས་འཛོམས་ཐེངས་བཅུ་གཅིག་པའི་ཐོག་བོད་དུ་ལོ་དྲུག་རིང་མང་གཙོའི་བཅོས་བསྒྱུར་མི་བྱེད་རྒྱུའི་ཐག་གཅོད་བྱས། ཟླ་༤ པའི་ཚེས་༡ ཉིན་༸གོང་ས་མཆོག་རྒྱ་གར་ནས་བོད་དུ་ཞལ་བསྒྱུར། ཟླ་༡༠ པའི་ཚེས་༦ ཉིན་ཤིན་ཅང་ནས་བོད་བར་གྱི་གཞུང་ལམ་ཐོག་རླངས་འཁོར་ཤར་གཏོང་ཐུབ། ང་བརྒྱད་ལོར་ལྷོ་ཁ་གྲི་གུར་ཆུ་སྒང་བསྟན་སྲུང་དྭངས་བླངས་དམག་གི་སྒྲིག་འཛུགས་བཙུགས། ཨ་རིའི་གསང་འཕྲིན་ལས་ཁུངས་ནས་བོད་མི་གཉིས་གནམ་ཐོག་ནས་བོད་དུ་གཡུགས།

༥༽ང་དགུའི་ལོར་ཟླ་༣ པའི་ཚེས་༡༧ ཉིན་༸གོང་ས་མཆོག་བཙན་བྱོལ་དུ་ཕེབས་དགོས་བྱུང་བ་སོགས་ལོ་ངོ་དེ་དག་རིང་གི་བྱུང་རྐྱེན་ཆ་ཚང་བ་ཞིབ་ཚགས་སུ་བལྟས་ཚེ་ཆེས་ཉམ་ང་བའི་མི་རིགས་གཅིག་གི་ཆབ་སྲིད་ཀྱི་ཟློས་གར་སྐྱོ་བོ་ཞིག་ང་ཚོའི་མིག་ལམ་དུ་ཤར་ཡོང་། གོང་འཁོད་ལོ་རྒྱུས་དེ་དག་ལས་ང་ཚོས་བོད་ཀྱི་ཆབ་སྲིད་ཀྱི་གནས་བབས་ཆེས་ཛ་དྲག་དང་ཆེས་ཉེན་ཁའི་དུས་ཤིག་ཏུ་དགུང་གྲངས་བཅུ་དྲུག་ལ་ཕེབས་མ་ཐག་པའི་༸གོང་ས་མཆོག་ལ་ཆག་རལ་དུ་གྱུར་ཟིན་པའི་སྲིད་དབང་ཞིག་ཕུལ་འདུག་པར་ཟུར་བལྟས་ལེབ་མཐོང་དུ་གྱུར།

བཞི་པ། བླ་མའི་སྲིད་དབང་།

༡༽བོད་དུ་བླ་མས་སྲིད་དབང་བཟུང་བའི་སྲོལ་དུས་རབས་བཅུ་གསུམ་པར་འགྲོ་མགོན་ཆོས་རྒྱལ་འཕགས་པ་ནས་ཚུགས་ཤིང་། ༸གོང་ས་ལྔ་པ་ཆེན་པོ་ནས་ད་བར་རྒྱལ་དབང་རིམ་བྱོན་གྱིས་བོད་ཀྱི་སྲིད་དབང་སྐྱོང་བར་མཛད། ལོ་ངོ་བཞི་བརྒྱ་ཙམ་གྱི་རིང་ལོ་རྒྱུས་ཀྱི་རྙོག་ཟིང་མང་ཞིང་ལྷག་པར་ཆོས་ལུགས་དུག་ཏུ་རྩིས་པའི་གུང་ཁྲན་ནས་ལོ་ངོ་ང་གཉིས་རིང་སྐྱོན་བརྗོད་སྣ་ཚོགས་ཀྱི་དྲག་ཆར་རླུང་འཚུབ་ཇི་ལྟར་ལྡང་རུང་བོད་མི་མང་ནས་༸གོང་ས་མཆོག་ལ་བསྐྱངས་པའི་དད་ཞེན་ད་དུང་འགོག་ཐུབ་མེད། དེས་༸གོང་ས་སྐུ་ཕྲེང་ན་རིམ་གྱིས་རང་གི་མི་མང་ལ་བཞག་པའི་བག་ཆགས་ཇི་འདྲ་ཞིག་ཡིན་པ་གསལ་བར་མཚོན་པ་མ་ཡིན་ནམ།

༢༽ལྷག་པར་སྟོབས་ཆེན་རྒྱ་དམར་གྱི་དྲག་དཔུང་གིས་བླ་སྲོག་བཅད་ཟིན་པའི་མི་རིགས་ཤིག་བོད་ཀྱི་ལོ་རྒྱུས་སྟེང་བྱུང་མྱོང་མེད་པའི་མི་རིགས་གཞན་གྱི་དབང་བསྒྱུར་འོག་རང་གི་མི་རིགས་རིག་གནས་དང་བཅས་པར་རེ་བ་བརླགས་ས་ནས་རེ་བ་ཡོད་པ་དང་། རེ་བ་ཡོད་པ་ནས་བསྐྱར་དར་གྱི་མངོན་རྟགས་སྒོ་གང་ས་ནས་མཐོང་དུ་ཡོད་པའི་གནས་བབས་འདི་འདྲ་ཞིག་ཆགས་ཡོད་པ་དེ་ནི་བོད་ཀྱི་ལོ་རྒྱུས་མི་སྣ་སུ་ལའང་མཐོང་རྒྱུ་མེད་པའི་༸གོང་ས་སྐུ་ཕྲེང་བཅུ་བཞི་པ་འདིའི་ལོ་རྒྱུས་རང་བཞིན་གྱི་མཛད་རྗེས་ཤིག་ཡིན། དེས་ནི་འཆི་ནད་ཕོག་པའི་མི་རིགས་ཧྲིལ་པོ་ཞིག་ཁྱོན་ཡོངས་ནས་འཆི་ལམ་ནས་བསྐྱབས་ཏེ་རྒྱལ་སྤྱིའི་སྡིངས་ཆར་གསོན་ཤུགས་ལྡན་པ་དང་གཟི་བརྗིད་ལྡན་པའི་མི་རིགས་ཤིག་ཏུ་གསོ་སྐྱོང་གནང་བ་མཚོན་ཡོད། མདོར་ན་༸གོང་ས་སྐུ་ཕྲེང་བཅུ་བཞི་པའི་རྣམ་དཔྱོད་ཀྱི་འཆར་འགོད་འོག་བོད་ཕྱི་ནང་གི་ཆོས། རིག་གཞུང་། ཆབ་སྲིད་སོགས་ཀྱི་ད་ལྟའི་ཚད་གཞི་འདི་བྱུང་ཡོད།།

{jcomments on}