ལོ་བརྒྱད་ལ་སོན་པའི་དེ་རིང།

དེའི་རྗེས་སུ་ཉིན་བཅུའི་མཚམས་སུ་ཐེངས་རེ་བྱས་ནས་ལོ་གཉིས། དེའི་རྗེས་ཕྱི་ལོ་༢༠༠༧ ཟླ་༤ ཚེས་༡༨ ཉིན་ནས་བཟུང་ཉིན་བདུན་རེའི་གསར་ཤོག་ཅིག་ཏུ་བསྒྱུར་ནས་བདུན་ཕྲག་ཡོད་དོ་ཅོག་གི་རེས་གཟའ་ལྷག་པ་༧གོང་ས་མཆོག་གི་སྐུའི་བླ་གཟའ་ནམ་ཡིན་ལ་གཅིག་ཀྱང་ཆད་ལུས་མེད་པར་འདོན་འགྲེམས་བྱེད་བཞིན་ཡོད་པ་མ་ཟད། བོད་ཡིག་དང་། དབྱིན་ཡིག རྒྱ་ཡིག་བཅས་ཀྱི་ལམ་ནས་ཉིན་རེའི་གནས་ཚུལ་ཁག་དྲ་རྒྱ་བརྒྱུད་ནས་དུས་ཐོག་རྒྱ་ཆེའི་ཀློག་མཁན་རྣམས་ཀྱི་སྤྱན་ལམ་དུ་འགྲེམས་སྤེལ་བྱེད་བཞིན་ཡོད།

རྒྱ་གར་དང་བལ་ཡུལ་འབྲུག་ཡུལ་གསུམ་དང། ཕྱིའི་རྒྱལ་ཁབ་ཉི་ཤུ་ལྷག་ཅིག་ཏུ་འགྲེམས་སྤེལ་བྱེད་བཞིན་ཡོད་ལ། ཕྱི་ལོ་༢༠༠༧ ལོ་ནས་བཟུང་ནས་བོད་ཀྱི་བང་ཆེན་གསར་ཤོག་བདུན་ཕྲག་རེ་རེ་བཞིན་དྷ་རམ་ས་ལ་དང། རྒྱ་གར་ལྷོ་ཕྱོགས། བལ་ཡུལ་གྱི་རྒྱལ་ས་བཅས་སུ་ཉིན་གཅིག་དུས་གཅིག་ཏུ་གློག་འཕྲིན་བརྒྱུད་གཏོང་ལེན་གྱིས་པར་སྐྲུན་འགྲེམས་སྤེལ་བྱས་དང་བྱེད་བཞིན་ཡོད་ཀྱང། ཕྱི་ལོ་༢༠༠༩ ལོའི་ཕྱི་ཟླ་༣ པའི་ནང་བལ་ཡུལ་གྱི་ས་གནས་གསར་འགོད་པ་འཛིན་བཟུང་དང་། བལ་སྒོར་དྲུག་འབུམ་ལྔ་ཁྲི་བཙན་འཕྲོག་བྱས་པ་ནས་བོད་ཀྱི་བང་ཆེན་གསར་ཤོག་བལ་ཡུལ་དུ་འགྲེམས་སྤེལ་བྱེད་མཚམས་འཇོག་དགོས་བྱུང་ཡང། ས་གནས་གཞན་ཁག་ཏུ་སྔར་བཞིན་མུ་མཐུད་བར་མཚམས་གཏན་ནས་མ་བཞག་པར་འདོན་འགྲེམས་བྱེད་བཞིན་ཡོད།

ཉེ་ཆར་ཟླ་ཤས་སྔོན་བལ་ཡུལ་གཞུང་ལ་ཁྲིམས་མཐུན་དེབ་སྐྱེལ་བྱས་པ་བརྒྱུད་ཧི་མ་ལ་ཡའི་བང་ཆེན་ཞེས་བདུན་རེའི་གསར་ཤོག་ཅིག་ཕྱི་ལོ་༢༠༡༡ ལོའི་ཟླ་༡ ཚེས་༡ ནས་བཟུང་འགྲེམས་སྤེལ་བྱེད་བཞིན་ཡོད་ལ། བལ་ཡུལ་ཁུལ་གྱི་བོད་རིགས་མི་མང་དང་ཧི་མ་ལ་ཡའི་རི་རྒྱུད་ཀྱི་མི་མང་བཅས་ནས་དོ་སྣང་ཆེན་པོ་བྱེད་བཞིན་འདུག་པ་དང། གསར་འགྱུར་གྱི་ནང་དོན་ཕལ་ཆེ་བ་ནི་བོད་ཀྱི་བང་ཆེན་དང་གཅིག་མཚུངས་ཡིན་ཡང།  ཧི་མ་ལ་ཡའི་རི་རྒྱུད་ཀྱི་མི་རིགས་རྣམས་དང་འབྲེལ་བའི་གནས་ཚུལ་སྐོར་མང་ཙམ་གསར་ཤོག་དེའི་ནང་དམིགས་བསལ་གྱིས་འདོན་འགྲེམས་བྱས་དང་བྱེད་འཆར་ཡོད། འདི་ལ་བརྟེན་ནས་བལ་ཡུལ་ནང་དུ་ཡོད་པའི་བོད་པ་དང་ཧི་མ་ལ་ཡའི་རི་རྒྱུད་ཀྱི་མི་རིགས་རྣམས་ལ་ཞབས་འདེགས་རྒྱ་ཆེ་ཙམ་ཞུ་ཐུབ་པའི་རེ་བ་ཡོད།

ད་བར་མི་ལོ་བརྒྱད་ཙམ་སོང་བ་དང། མི་ལོ་བརྒྱད་ནི་གསར་ཤོག་ཅིག་ལ་མཚོན་ན་དུས་ཡུན་ཧ་ཅང་ཐུང་ནའང་བཙན་བྱོལ་ནང་སྐད་གྲགས་ཅན་གྱི་མི་སྣ་མང་པོ་མཉམ་རུབ་དང་། གཞན་ཡང་མི་མང་པོ་ཞིག་གིས་གསར་ཤོག་ཉི་ཚེ་བ་ཧ་ཅང་མང་པོ་ཞིག་འདོན་འགྲེམས་བྱས་པའི་ལོ་རྒྱུས་ཡོད་ཀྱང། དེ་དག་ཚང་མ་དུས་ཡུན་རིང་པོར་སྐུ་ཚེ་མ་བརྟན་པའི་གནས་སྟངས་ལ་གཞིགས་ན་མི་ལོ་བརྒྱད་ཧྲིལ་པོར་བར་མཚམས་འཇོག་དགོས་མ་བྱུང་བར་རྩོམ་སྒྲིག་འདོན་འགྲེམས་བྱེད་ཐུབ་པ་དེ་ཡང་ཅུང་སྤོབས་པ་སྐྱེ་འོས་པ་ཞིག་ཏུ་གྱུར་ཡོད། ཕྱོགས་གཞན་ཞིག་ནས་བསམ་བློ་བཏང་ན་གསར་ཤོག་ནི་དུས་ཇི་སྲིད་ཀྱི་བར་དུ་འདོན་དགོས་པ་ཞིག་ཡིན་པས། ལོ་བརྒྱད་ཀྱི་དུས་ཡུན་དེ་གོམ་པ་གཅིག་ཙམ་ལས་མིན་པའི་ཚོར་སྣང་རང་ཤུགས་ཀྱིས་ཡོང་གི་འདུག

མི་ལོ་བརྒྱད་ཀྱི་རིང་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གི་ལས་དོན་སྤྱི་དང་བྱེ་བྲག་བོད་ཀྱི་བང་ཆེན་གསར་ཤོག་གི་ལས་དོན་བར་མ་ཆད་པར་རྒྱུན་མཐུད་ཐུབ་པ་དང། ལས་དོན་ལའང་གྲུབ་འབྲས་མི་དམན་ཙམ་ཐོབ་པ་ནི། གཙོ་བོ་སྔ་རྗེས་ཀྱི་ལས་བྱེད་རྣམ་པའི་ལྷག་བསམ་སེམས་ཤུགས་ཀྱིས་འབད་བརྩོན་བྱས་པ་དང།  རྒྱ་ཆེའི་མི་མང་གིས་གདེང་འཇོག་དང་བཅས་ཀློག་མཁན་ཧ་ཅང་མང་པོ་བྱུང་བ། སློབ་སྟོན་པ་བཀའ་ཟུར་པདྨ་ཆོས་འབྱོར་མཆོག་དང། མཁས་དབང་བློ་བཟང་སེང་གེ་མཆོག་གཉིས་ཀྱིས་དུས་ནས་དུས་སུ་སློབ་སྟོན་རོགས་མགོན་གནང་བ། གཏོང་ཕོད་ཆེ་བའི་ཕྱི་ནང་གི་མི་སྣ་གང་མང་ཞིག་གིས་དཔལ་འབྱོར་གྱི་མཐུན་འགྱུར་བཅས་ལ་བརྟེན་ནས་བྱུང་བས་ལོ་བརྒྱད་འཁོར་བའི་དེ་རིང་འབྲེལ་ཡོད་ཡོངས་ལ་ཐུགས་རྗེ་བཀའ་དྲིན་བླ་མེད་དུ་ཆེ་ཞེས་སྙིང་ཐག་པ་ནས་ཞུ་བཞིན་ཡོད།

བོད་ཀྱི་བང་ཆེན་གསར་ཤོག་ཐོག་མ་འདོན་འགྲེམས་བྱེད་པའི་སྐབས་དྷ་སའི་སྤྱི་ཚོགས་ནང་གསར་ཤོག་གི་དམིགས་ཡུལ་དང་ལས་དོན་སོགས་ལ་ལོག་འགྲེལ་དང་གཞི་མེད་སྐྱོན་འཛུགས། དཔལ་འབྱོར་གྱི་རོགས་རམ་འགོག་ཐབས། ལས་དོན་རང་བཞིན་གྱིས་མཚམས་འཇོག་ཡོང་ཐབས་སོགས་དངོས་ཤུགས་བརྒྱུད་གསུམ་ནས་གནོན་ཤུགས་སྤྲོད་མཁན་དང། བར་ཆད་བཟོ་མཁན་མི་སྣ་ཆེ་ཆུང་མི་ཉུང་བ་ཞིག་བྱུང་ཡང། དེ་དག་ཚང་མ་དངོས་སུ་ལས་ཀ་བྱེད་མཁན་རྣམས་ཀྱི་ལས་དོན་ལ་ཧུར་བརྩོན་དང་སེམས་ཤུགས་སྤར་བའི་ཆ་རྐྱེན་གལ་ཆེན་ཞིག་ཏུ་གྱུར་སོང་བས་ཁོང་རྣམས་ལའང་ཐུགས་རྗེ་ཆེ་ཞུ་རྒྱུ་ཡིན།

མདོར་ན་བོད་ཀྱི་བང་ཆེན་གསར་ཤོག་ནི་བཙན་བྱོལ་བོད་པའི་སྤྱི་ཚོགས་ནང་རང་དབང་ཅན་གྱི་བདུན་རེའི་གསར་ཤོག་གཅིག་པུ་དང་ཁྱབ་ཆེ་ཤོས་དེ་ཡིན་པ་དང། སླད་ཀྱི་ཆར་ཡང་མུ་མཐུད་ནས་བཙན་བྱོལ་བོད་པའི་སྤྱི་ཚོགས་ལ་ཞབས་འདེགས་གང་ནུས་ཞུ་རྒྱུའི་འཆར་གཞི་དང་ཆོད་སེམས་བརྟན་པོ་ཡོད་ལ། རྒྱ་ཆེའི་ཀློག་མཁན་རྣམས་ཀྱིས་ཀྱང་སྔར་བཞིན་རྒྱབ་སྐྱོར་ཡོང་བའི་འབོད་སྐུལ་ཡང་ཆབས་ཅིག་ཏུ་ཞུ་བཞིན་ཡོད།།