བར་མའི་འོས་བསྡུ་དང་དེའི་རྒྱུ་རྐྱེན།

སྐབས་འདིའི་བར་མའི་འོས་བསྡུ་བྱེད་དགོས་དོན་ནི། དངོས་གཞིའི་འོས་འཕེན་སྐབས་འོས་ཤོག་ཁ་འཐོར་ནས་ཁྲིམས་སྒྲིག་གི་དགོངས་དོན་བཞིན་དགོས་ངེས་ཀྱི་བརྒྱ་ཆ་མ་ལོངས་པར་བརྟེན་བསྐྱར་དུ་སྤྱི་འཐུས་གཉིས་བར་མའི་འོས་བསྡུ་བྱེད་དགོས་བྱུང་བ་རེད། བར་མའི་འོས་བསྡུ་བྱེད་པར་རྒྱུ་རྐྱེན་མི་འདྲ་བ་མང་པོ་ཡོད་ཀྱང།  ཐེངས་འདིའི་བར་མའི་འོས་བསྡུ་ནི་ཐད་ཀར་མི་མང་གིས་འོས་འདེམས་བྱེད་པའི་སྐབས་སུ་འོས་ཤོག་བླུག་སྟངས་ལ་བརྟེན་ནས་བྱུང་བ་ཞིག་ཏུ་གྱུར་ཡོད་པ་ལས། བདམས་ཟིན་པའི་སྤྱི་འཐུས་རྣམས་ཀྱི་ལས་དོན་བྱེད་ཕྱོགས་དང་འགན་ཁུར་ལེན་ཕྱོགས་འགྲིག་དང་མ་འགྲིག་ལ་འབྲེལ་བ་གང་ཡང་མེད།སྐབས་རེ་བར་མའི་འོས་བསྡུ་བྱེད་དགོས་པའི་རྒྱུ་རྐྱེན་མི་འདྲ་བ་མང་པོ་ཡོད་པ་དང། དཔེར་ན་སྤྱི་འཐུས་སྐབས་བཅུ་གསུམ་པ་འགྲོ་བཞིན་པའི་སྐབས་སུ་དབུས་གཙང་སྤྱི་འཐུས་ཚེ་རིང་ནོར་འཛོམས་ཁེ་ན་ཌར་གཏན་བསྐྱོད་དང། མདོ་སྨད་སྤྱི་འཐུས་གདུགས་དཀར་ཚེ་རིང་ཨ་རིར་གཏན་བསྐྱོད་ཆེད། ཁོངས་སོ་སོར་གཤམ་དུ་སྒུག་ཐོ་མེད་བཞིན་སྤྱི་འཐུས་ནས་དགོངས་པ་ཞུས་པ་དང། མདོ་སྨད་སྤྱི་འཐུས་བསྟན་འཛིན་མཁས་གྲུབ་ལགས་དགོངས་པ་ཞུ་དགོས་ཐུག་པ་སོགས་ལ་བརྟེན་ནས་བར་མའི་འོས་བསྡུ་བྱེད་དགོས་བྱུང་བ་རེད། སྤྱི་འཐུས་ཡིན་བཞིན་པ་རྣམས་ཀྱིས་གཤམ་འོག་སྒུག་ཐོ་ཡང་མེད་པར་དགོངས་པ་ཞུས་ན་མི་མང་ལ་བརྡབ་གསིག་དང། གཞུང་དངུལ་འབུམ་ཕྲག་མང་པོ་ཆུད་ཟོས་སུ་སོང་བ་ནི་གཞུང་དམངས་གཉིས་ལ་འགན་མ་ཁུར་བའི་བྱེད་སྟངས་འབའ་ཞིག་ཏུ་གྱུར་ཡོད།

མ་འོངས་པར་བཟློག་མེད་ཀྱི་འགལ་རྐྱེན་གང་ཡང་མེད་པར་སྤྱི་འཐུས་ཡིན་བཞིན་པའི་སྐབས་གཤམ་དུ་བརྒྱ་ཆ་ལོངས་པའི་སྒུག་ཐོ་ཡང་མེད་པར་དགོངས་པ་ཞུས་ན། འོས་བསྡུའི་འགྲོ་སོང་འཕར་མ་ཇི་སོང་དགོངས་པ་ཞུ་མཁན་སྤྱི་འཐུས་དེ་རང་ནས་སྒྲུབ་འབུལ་ཞུ་དགོས་པའམ། ཡང་ན་སྤྱི་ཟུར་གྱི་མཚན་མཐོང་དང་ཐོབ་ཐང་གང་ཡང་མེད་པ་བཟོ་དགོས་པ་ལྟ་བུའི་ཐག་གཅོད་ཅིག་མེད་ཚེ་གཞུང་དམངས་གཉིས་ལ་དགོས་མེད་ཀྱི་བརྡབ་གསིག་ཆེན་པོ་ཞིག་ཏུ་གྱུར་འདུག སྒོར་འབུམ་བཅུ་ཕྲག་ལྷག་གི་འགྲོ་སོང་འཕར་མ་དེ་དག་ལས་གཞི་གཞན་ཞིག་དང། ལྷག་པར་དུ་དབུལ་ཕོངས་ཉམ་ཐག་རྣམས་ཀྱི་འཚོ་ཐབས་ཆེད་གཏོང་ཐུབ་པ་བྱུང་ན་གྲུབ་འབྲས་ཆེན་པོ་ཐོན་ཐུབ་པ་ནི་བཤད་མི་དགོས་པ་རེད། དེར་བརྟེན་ཁྲིམས་སྒྲིག་ཁག་གི་ནང་དུ་གནད་དོན་འདི་ལྟ་བུ་བྱུང་བའི་སྐབས་སུ་ཐག་གཅོད་བྱེད་སྟངས་ཁ་གསལ་ཞིག་དགོས་པ་ཧ་ཅང་གལ་ཆེ་བར་མཐོང།

ནམ་རྒྱུན་འོས་བསྡུ་ཆེན་མོའི་སྐབས་སུ་མི་མང་གིས་སྔོན་འགྲོ་ལ་དོ་སྣང་དེ་ཙམ་མི་བྱེད་པར་མི་སུ་དང་སུ་ཡག་པོ་ཡོད་མེད་མི་ཤེས་པས། སྔོན་འགྲོ་ལ་འོས་ཤོག་མ་བླུག་པར་དངོས་གཞིའི་སྐབས་སུ་མི་༢༠ ཙམ་རེ་ལས་མེད་པར་སྐབས་དེར་འདེམས་རྒྱུ་ཡིན་ཞེས་བརྗོད་མཁན་ཡང་མང་པོ་ཡོང་གི་ཡོད། དོན་དངོས་ཐོག་སྔོན་འགྲོ་དང་དངོས་གཞི་གཉིས་ཀ་གཅིག་མཚུངས་གལ་ཆེན་པོ་ཡིན་པ་དང། ལྷག་པར་དུ་སྔོན་འགྲོ་དེ་དངོས་གཞི་ལས་ཀྱང་གལ་ཆེ་བ་ལྟ་བུར་ངོས་འཛིན་བྱེད་ཆོག གལ་སྲིད་རང་ཉིད་ཀྱི་འོས་མི་ཞིག་སྤྱི་འཐུས་སུ་སླེབས་དགོས་ཀྱི་ཡོད་ན། སྔོན་འགྲོའི་ནང་དུའང་མ་སླེབས་པར་དངོས་གཞིའི་ནང་འགྲོ་ཐུབ་ཐབས་གཏན་ནས་མེད་པས་སྔོན་འགྲོ་ལ་དོ་སྣང་དེ་ཙམ་མི་བྱེད་པ་ནི་རང་བཞིན་གྱིས་ནོར་འཁྲུལ་ཞིག་ཏུ་གྱུར་ཡོད།

དངོས་གཞིའི་འོས་བླུག་པའི་སྐབས་སུ་ཆོལ་ཁོངས་རེ་ལ་མི་༡༠ རེའི་ས་མིག་ཡོད་པ་དེ་མ་བསྐངས་པར། རང་ཉིད་ཀྱི་ངོ་ཤེས་དང་ཕ་ཡུལ་གཅིག་པ་བཅས་རེ་ཟུང་ཞིག་ལས་འོས་མ་བླུགས་པར་བརྟེན། བརྒྱ་ཆ་མི་ལོངས་པའི་དཀའ་ངལ་འདི་འཕྲད་བཞིན་ཡོད་པ་དང། འདི་ལྟ་བུ་བྱུང་བའི་རྒྱུ་རྐྱེན་གཙོ་བོ་ནི་མི་མང་གིས་འོས་མི་རྣམས་ལ་དོ་སྣང་ཆེན་པོ་མ་བྱས་པའི་རྒྱུ་རྐྱེན་ལ་བརྟེན་ནས་བྱུང་བ་ཞིག་ཡིན། གལ་སྲིད་རང་ཉིད་ཀྱི་འཐུས་མི་བཅུ་སུ་དང་སུ་འོས་ཚང་མར་དོ་སྣང་དང་ཞིབ་འཇུག་གཏིང་ཟབ་བྱས་ནས་འོས་ཤོག་བླུག་ཐུབ་པ་ཡིན་ན། བརྒྱ་ཆ་མི་ལོངས་པའི་དཀའ་ངལ་སེལ་ཐུབ་པ་དང། འདེམས་ཐོན་བྱུང་བའི་སྤྱི་འཐུས་རྣམས་ཀྱི་འོས་ཤོག་གི་བརྒྱ་ཆ་ཡང་ཚད་མཐོན་པོ་ཡོད་ན། དངོས་སུ་ལས་དོན་བྱེད་པའི་སྐབས་གདེང་སྤོབས་ཆེ་བ་ཡོད་པ་ནི་བཤད་མི་དགོས་པ་རེད།

མ་འོངས་པར་སྤྱི་འཐུས་ཀྱི་འོས་འདེམས་སྐབས་མི་མང་གིས་སྤྱི་འཐུས་ཀྱི་མི་འགྲོ་རྣམས་ཀྱི་ལོ་རྒྱུས་དང་རྒྱབ་ལྗོངས་ལ་ཞིབ་འཇུག་གིས་ཤེས་རྟོགས་མང་ཙམ་ཡོང་ཐབས་བྱེད་དགོས་པ་དང། རང་ཉིད་ཀྱི་ཕྲག་ཏུ་བབ་པའི་ལས་འགན་དེ་འོས་ཤོག་བླུག་པ་གཅིག་པུ་མ་ཡིན་པར་རང་ཉིད་ཀྱི་འཐུས་མི་རྣམས་ཀྱིས་མི་མང་གི་སྐུ་ཚབ་མཚོན་པའི་ལས་དོན་ཡག་པོ་བྱེད་ཐུབ་མིན་གྱི་ཐོག་ལའང་སྟངས་འཛིན་དང་དོ་སྣང་ཤུགས་ཆེ་རུ་གཏོང་དགོས། སྔོན་མ་དང་མི་འདྲ་བར་ཉེ་ཆར་བཅའ་ཁྲིམས་བསྐྱར་བཅོས་ཀྱིས་སྤྱི་འཐུས་བྱེ་བྲག་པ་གཅིག་ཕྱིར་འཕུད་བྱེད་དགོས་ན་ལས་སླ་རུ་སོང་ཡོད། སྤྱི་འཐུས་གང་ཞིག་ཕྱིར་འཕུད་དགོས་པའི་གྲོས་འཆར་ལ་སྤྱི་འཐུས་ཀྱི་རྩ་འབོར་སུམ་ཆ་གཉིས་ཡན་གྱིས་རྒྱབ་སྐྱོར་ཐོབ་ན་ཕྱིར་འཕུད་བྱེད་ཆོག་པ་ཡིན། མདོར་ན་ཐོག་མ་རང་ཉིད་ཀྱི་འཐུས་མི་ཡག་པོ་འདེམས་དགོས་པ་དང་། བདམས་ཟིན་པའི་རྗེས་སུ་སྟངས་འཛིན་ཡང་དུས་ལས་མ་ཡོལ་བ་ཞིག་བྱེད་དགོས་པ་ནི་མི་མང་གི་འགན་ཁུར་ཁོ་ནར་གྱུར་ཡོད།།

{jcomments on}