སེར་མོ་བ་ཞིག་ཡིན་པའི་འདུ་ཤེས་མེད་པའི་འཆར་སྣང་།

བཟང་ཕྱོགས་ཀྱི་འགྱུར་བ་ལ་མཚོན་ན་དེང་གི་ཆར་མི་རྣམས་རང་འདོད་ལྟར་ཤེས་རིག་གི་ནུ་ཞོ་བསྣུན་རྒྱུའི་གོ་སྐལ་བཟང་པོ་ཞིག་ཡོད་པ་དེ་ལས་མི་རྣམས་ཤེས་ཡོན་ཅན། རྣམ་དཔྱོད་ཅན། བསམ་བློ་པ་བཅས་ཆགས་ཐུབ་པ་དེ་རེད།

ངན་ཕྱོགས་ཀྱི་འགྱུར་བ་ལ་མཚོན་ན་མཚན་རིག་གི་ལག་རྩལ་ལས་འཁྲུངས་པའི་ཉེར་འཁོའི་ཅ་དངོས་རྣམས་ས་ཁྱབ་རྡོ་ཁྱབ་ཏུ་འགྲོ་བཞིན་པའི་དུས་འདིར་མི་རྣམས་བག་མེད་ཀྱིས་གཡེང་ནས་སློབ་གྲྭ་ཁག་ལ་མཚོན་ན་སློབ་གྲྭའི་ཤེས་རིག་གི་ཆུ་ཚད་དམའ་རུ་འགྲོ་བཞིན་པ་དང་། སློབ་གཉེར་བའི་བསམ་བློ་དང་རྒྱང་ཐག་རིང་དུ་བྲལ་འགྲོ་བ་སོགས་ནི་ངན་ཕྱོགས་ཀྱི་འགྱུར་བ་ཞིག་ལ་ཁོ་བོས་འདོད། དེ་བཞིན་དུ་ན་གཞོན་སེར་མོ་བ་མང་དག་ཅིག་ལ་མཚོན་ན་སྲང་ལམ་གཡས་གཡོན་དུ་འགྲུལ་བཞུད་སྐབས་སྤོབས་པ་མཐོན་པོས་ལག་ཐོགས་ཁ་པར་ལས་དབྱིན་ཧིན་སོགས་ཀྱི་གཞས་རིགས་འདྲ་མིན་ཧང་སྒྲ་དང་བཅས་བསྐྱོད།

མ་ཟད་ཚུལ་མཐུན་ལོ་ཆུང་གི་དགེ་འདུན་པ་གཟན་ཤམ་བསྣམས་སྟངས་སོགས་ཕྱིའི་ཀུན་སྤྱོད་མཛེས་ཤིང་ལག་ཏུ་འཕྲེང་པ་ནར་ནར་དུ་བསྐྱོད་མཁན་འགའ་མཐོང་ཚེ་བླ་རྒན་དང་དགྲ་བཅོམ་པ་སོགས་ཀྱི་བརྙས་ཚིག་འདྲ་མིན་བེད་སྤྱད་ནས་འཕྱ་སྨོད་གཏོང་བ་སོགས་མདོར་ན་རང་ངོ་རང་གིས་མ་ཤེས་སེར་མོ་བའི་ཆ་འདྲ་བ་གདན་ས་གྲྭ་ཚང་ཁག་ལ་མང་ལས་ཆེ། དོན་ངོ་མར་མནོ་བསམ་བཏང་ན་གང་ཟག་དེའི་རིགས་ནི་རང་ཉིད་སེར་མོ་བ་ཞིག་ཡིན་པའི་འདུ་ཤེས་མེད་པ་དང་། ཤེས་རིག་གི་རྗེས་མ་ཟིན་པའི་ཐ་ཤལ་པ་ཞིག་ཏུ་འཁུམས། དེ་རིང་འདིར་ཁོ་བོས་འདི་ལྟར་གླེང་དགོས་དོན་ནི། འུ་ཚོར་ཁ་བྱང་རྫིག་པོ་ཐེག་པ་ཆེན་པོ་པ་དང་། དེ་བཞིན་དུ་གཞིས་དགོན་ཆུང་ཆུང་ཞིག་ཡིན་ཡང་ཐེག་ཆེན་གླིང་སོགས་ཀྱི་མིང་བྱང་རྫིག་པོ་བཀོལ་སྤྱོད་བྱེད་ཀྱི་ཡོད་ཀྱང་། དོན་ངོ་མར་འུ་ཚོ་མི་རེ་ངོ་རེར་ཐེག་པ་ཆེན་པོ་པ་ཞེས་པ་འདི་དོན་དང་མཐུན་པ་ཞིག་བྱས་འདུག་གམ་མི་འདུག་དེ་ནི་རང་ལ་ཁ་བསྐོར་ནས་འདང་རྒྱག་དགོས་པ་ཞིག་ཡིན་པས་སོ།

ཐེག་ཆེན་ནི་ཐེག་དམན་ལས་ལྟ་སྒོམ་སྤྱོད་གསུམ་གང་གི་ཀྱང་ཁྱད་པར་དུ་འཕགས་པས་ཐེག་པ་ཆེན་པོ་པ་དེ་ཡང་ཐེག་དམན་པ་ལས་ཕྱི་ཡི་ཀུན་སྤྱོད་སོགས་གང་ཐད་ནས་གོང་དུ་མ་སླེབས་རུང་རྗེས་སུ་མ་ལུས་པ་ཞིག་བྱེད་གལ་ཆེ་ཡང་དེང་གི་དུས་འདིར་དེ་ལས་ལྡོག་སྟེ་ཐེག་དམན་པ་ལས་ལྟོས་ཏེ་བཤད་ན་འུ་ཅག་ཚང་ལ་ནར་མ་སོན་པའི་བྱིས་པ་ཧ་ཅང་མང་། ལྟོས་དང་ཐ་ཡི་ལན་དང་ཤྲི་ལངྒ་སོགས་ཀྱི་ཐེག་དམན་པ་རྣམས་ཅི་འདྲའི་གཟི་བརྗིད་ཆེ་བ་ཞིག་རེད་ཨང་། དད་ལྡན་དང་བ་འདྲེན་པའི་མིག་བརྒྱན་ཟེར་ན་ཁོང་རྣམས་ལས་སུ། འོན་ཀྱང་གལ་སྲིད་ཁྱེད་རྣམས་པས་རྡོ་རྗེ་གདན་དུ་མཐོང་པའི་ཐེག་དམན་གྱི་དགེ་སློང་རྣམས་ཀུན་སྤྱོད་རྫོབ་རོ་འདུག་ཅེས་ན་དེའི་རིགས་ནི་དོན་ངོ་མར་ཐེག་དམན་པ་ཕར་ཞོག་ནང་པ་ཙམ་ཡང་མ་ཡིན། དེའི་རིགས་ལ་གཡས་གཡོན་རྒྱ་གར་པ་ཚོས་ཀྱང་༼དྷ་སི་འདིན་གྱི་བླ་མ་༽ཞེས་འབོད་ཀྱི་ཡོད། དེ་བོད་སྐད་དུ་བསྒྱུར་ན་ཉིན་བཅུའི་བླ་མ་ཞེས་པ་དེ་རེད། ཁོང་ཚོར་ཅིའི་ཕྱིར་མིང་དེ་ལྟ་ཡར་བཏགས་ཤེ་ན་དོན་དངོས་ལ་མི་དེ་རྣམས་བི་ཧར་གྱི་ཡུལ་མི་སྐྱོ་པོ་ཚོ་ཡིན་པ་དང་།  ཁོང་ཚོའི་དངུལ་གྱི་ཆེད་ཁོ་ནར་བསམ་ནས་གྲྭ་པའི་ཆ་ལུགས་བྱས་པ་ཙམ་ལས་གྲྭ་པ་གཏན་ནས་མིན། དེའི་རིགས་ནི་ཐེག་དམན་གྱི་གྲས་སུ་བརྩི་མི་རུང་བ་ཁྱེད་ཀྱིས་ཀྱང་ལོས་ཤེས། ཐེག་དམན་དགེ་སློང་གི་ཆས་གོས་ཙམ་ལ་བསམ་ན་ཧ་ཅང་ཐལ་ཆེ་སོ། དེར་རྟེན་དྲང་མོ་བཤད་ན་ཕྱིའི་ན་གཟའ་བསྣམས་སྟངས་དང་ཟ་འདུག་འགྲོ་གསུམ་གྱི་སྤྱོད་ལམ་གང་ཅིའི་ཐད་ཁོང་ཚོ་ལས་འུ་ཅག་སྟེ་ཐེག་པ་ཆེན་པོར་རློམ་མཁན་རྣམས་ལྡབ་ཀྱིས་ཞན་པས་འུ་ཅག་གིས་ཐེག་དམན་པ་ཚོར་ངེས་པར་དུ་ཁ་མིག་ཡར་ལྟ་བྱེད་དགོས་པ་ཡིན། དེང་གི་ཆར་སེར་མོ་བ་དག་ལ་མཐོང་བརླག་འགྲོ་བཞིན་པ་དེ་ཡང་ན་གཞོན་སེར་མོ་པ་མི་ཉུང་པ་ཞིག་གིས་བྱ་སྤྱོད་ལས་བྱུང་བ་གོར་མ་ཆག ཕྱོགས་ཡོངས་ལ་ཞིབ་ཏུ་བལྟས་ནས་བཤད་ན་གང་ཟག་སུ་འདྲ་ཞིག་ཡིན་རུང་ཕྱིའི་མཛེས་སྤྱོད་ནི་རང་ཉིད་ལ་མཐོང་སླེབ་པའི་གོམ་པ་དང་པོ་དེ་ཡིན་པས་དེ་ནི་ཅིས་ཀྱང་གཅེས་སྤྲས་གནང་གལ་ཆེ།།

སེར་གཙང་ལྡོང་ཕྲུག་ཐུབ་བསྟན་བློ་གྲོས་ཀྱིས།

{jcomments on}