ཕོ་ཡི་བླ་བཙོང་། མོ་ཡི་གཡུ་བཅག་པ་མ་རེད་དམ།

བགྲོ་གླེང་སྦྱང་བཤད་མཐིལ་ཕྱིན་གནང་རྒྱུའི་གོ་སྐབས་དང་དུས་ཚོད་ཆ་ཚང་སྤྲད་ནས་ཐག་གཅོད་གནང་དགོས་པ་དེ་ཡར་ཐོན་མང་གཙོའི་འགྲོ་ལུགས་ཤིག་ཡིན་པ་དང། མི་ཉུང་ཤས་ཤིག་གིས་ཐག་གཅོད་བྱ་རྒྱུའི་ལམ་ལུགས་དེ་ནི་ད་སྔོན་འཇུག་དང་ས་ཡང་འཇུག་ཡོད་པའི་གྲལ་རིམ་དམངས་གཙོའི་(Proletarian)ལམ་ལུགས་ཤིག་ཡིན་པ་བཅས། ང་ཚོའི་ལམ་ལུགས་མང་གཙོ་ཡིན་པ་དེ་མཁྱེན་དགོས་པ་དང། ཡུལ་མིའི་རྒྱལ་ཁབ་(Republic)ཀྱི་གོ་དོན་གསལ་པོ་མ་རྟོགས་པའི་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པའི་སྙན་ཐོ་དེ་དག་མཇལ་བ་ཙམ་གྱི་བློ་ཕམ་དང། ཡི་མུག་གི་ཚོར་བ་ཞིག་རང་བཞིན་འགོག་མེད་དུ་ཤར་བྱུང་བ་དེ་ནི། གཅིག་ནས་རང་ཉིད་༧རྒྱལ་དབང་སྐུ་ཕྲེང་རིམ་བྱོན་གྱི་སྐྱོང་ཡུལ་བོད་གངས་ཅན་ལྗོངས་སུ་ལུས་ཀྱི་ལྟེ་ཁྲག་བོར་བའི་མི་སེར་དཀྱུས་མ་ཞིག་ཡིན་པ་དང། གཉིས་ནས་ཕྱི་ལོ་༢༠༠༢ ལོར་བཙན་བྱོལ་སྤྱི་ཚོགས་ནང་བོད་གཞུང་མང་གཉིས་ནས་བོད་མིའི་ཁྲིམས་མཐུན་གཞུང་དགའ་ལྡན་ཕོ་བྲང་དབུ་བརྙེས་ནས་ལོ་ངོ་༣༦༠ འཁོར་བའི་བཀའ་དྲིན་རྗེས་དྲན་ཞུས་ནས་ལོ་ངོ་བཅུ་མ་འཁོར་བའི་གོང་དུ་དགའ་ལྡན་ཕོ་བྲང་གི་གཞུང་གི་སྒྲིག་འཛུགས་དེ་དག་བོད་མི་རང་ཉིད་ཀྱིས་མཇུག་བསྡོམས་བརྒྱབ་པ་དེ་དག་དོན་དུ་གནས་ཐུབ་མེད་པ་བཅས། དེ་འདྲའི་ཚོར་བ་དེ་ང་དང་ང་འདྲ་བའི་རྙིང་ཞེན་རིང་ལུགས་ཅན་གྱི་བསམ་ཡོད་བློ་མཐུན་བོད་མི་མང་པོ་ཞིག་ལའང་། ཞལ་ནས་མ་ཐོན་པ་མ་གཏོགས་ཁོག་ཏུ་ཤར་ཡོད་སྲིད།

༧གོང་ས་༧སྐྱབས་མགོན་ཆེན་པོ་མཆོག་གིས་བོད་མི་མང་སྤྱི་འཐུས་གྲོས་ཚོགས་སུ་ཕེབས་པའི་གསུང་འཕྲིན་རིན་པོ་ཆེའི་ནང་དོན་ངོ་མ་བཅའ་ཁྲིམས་ཀྱི་ཟིན་བྲིས་ནང་ཡུལ་མིའི་རྒྱལ་ཁབ་ཀྱི་བརྗོད་ཚིག་འཁོད་པའི་སྐོར་གསལ་སྟོན་གནང་ཡོད་པ་དང། བཅའ་ཁྲིམས་དོན་ཚན་གསུམ་པའི་ནང་དུ་འཁོད་པའི་ཡུལ་མིའི་རྒྱལ་ཁབ་ཀྱི་དགོངས་དོན་དང། ༧གོང་ས་མཆོག་གི་མཚན་གནས་གཉིས་ཕྱོགས་མཐུན་དགོས་པ་དང་གལ་ཆེན་པོར་བརྟེན་ཡུལ་མིའི་རྒྱལ་ཁབ་ཀྱི་གོ་དོན་ནི། རྒྱལ་ཁབ་ཀྱི་དབུ་ཁྲིད་(Head of Nation)དང་། སྲིད་གཞུང་གི་འགོ་ཁྲིད་(Head of State)དེ་གཉིས་མི་མང་གིས་བདམས་པའི་མི་ཞིག་དགོས་པ་དང། དེ་ཡང་སྲིད་འཛིན་ལམ་ལུགས་དང། གྲོས་ཚོགས་ལམ་ལུགས་བཅས་གཉིས་ཡོད་པ་ནས་ཨ་རི་ལྟ་བུ་སྲིད་འཛིན་ལམ་ལུགས་ནང་སྲིད་འཛིན་དེ་མི་མང་ནས་ཐད་ཀར་འོས་འདེམས་བྱེད་བཞིན་པ་དང། རྒྱ་གར་ལྟ་བུ་གྲོས་ཚོགས་ལམ་ལུགས་ནང་སྲིད་འཛིན་དེ་གྲོས་ཚོགས་གོང་འོག་གཉིས་ཀྱི་འཐུས་མི་དང་། མངའ་སྡེའི་གྲོས་ཚོགས་ཀྱི་འཐུས་མི་བཅས་ནས་འོས་འདེམས་བྱེད་པ་ལྟར་སྔ་མ་དེ་དབང་ཆེ་བ་དང། ཕྱི་མ་དེ་དབང་ཆུང་བ་ཡོད་པ་མི་ཚོའི་ཁ་རྒྱུན་ལའང་(Rubber Stamp)ཟེར་སྲོལ་འདུག

ཕྱི་ལོ་༡༦༤༢ ནས་ད་བར་ལོ་ངོ་༣༧༠ མ་ཟིན་ཙམ་གྱི་གཟི་བརྗིད་ཆེ་ལ་དོན་སྙིང་ལྡན་པའི་རླབས་ཆེན་གྱི་ལོ་རྒྱུས་ཅན་གྱི་བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་པར་རྒྱལ་བའི་སྒྲིག་འཛུགས་དེ་མུ་མཐུད་གནས་དགོས་མིན་དང། བཅའ་ཁྲིམས་དོན་ཚན་གསུམ་པའི་ནང་དུ་གསལ་བའི་ཡུལ་མིའི་རྒྱལ་ཁབ་ཀྱི་མིང་དོན་མཚུངས་པའི་ཐོག་ནས་༧གོང་ས་མཆོག་བོད་རྒྱལ་ཁབ་དང། བོད་མི་རིགས་ཀྱི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་ཀྱི་སྐུ་དབང་སྐོར་ལ་གཞིས་བྱེས་བོད་མིའི་སྤྱི་ཚོགས་ནང་གོ་བསྡུར་དང་སྦྱང་བཤད་མཐིལ་ཕྱིན་གནང་ནས་ཐག་གཅོད་གནང་དགོས་པ་ལས། ༧གོང་ས་མཆོག་གིས་གནང་གི་མིན་གསུངས་པ་དང། བོད་མི་མང་གིས་འགྲིག་གི་འདུག་ལྟ་བུའི་ལོ་རྒྱུས་དུམ་དུམ་ཞིག་མ་འོངས་བོད་ཀྱི་རྒྱལ་རབས་དང་ལོ་རྒྱུས་ནང་དུ་ལྷག་ཚེ། བོད་མི་རིགས་འདི་འཛམ་གླིང་མི་མང་དང། ལྷག་དོན་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མདུན་དུ་ངོ་ཚ་དགོས་པ་ཞིག་ཆགས་རྒྱུར་བརྟེན་མི་ཉུང་ཤས་ཤིག་གི་བརྒྱ་ཐག་གཅིག་གཅོད་བྱ་རྒྱུའི་ལམ་ལུགས་དེ་དག་དུས་ལས་ཡོལ་ཟིན་པ་མ་ཟད། བོད་གཞུང་ཕྱི་དྲིལ་ལས་ཁུངས་ནས་ཡོངས་ཁྱབ་འགྲེམས་སྤེལ་གནང་བའི་བོད་མིའི་ཁྲིམས་མཐུན་གཞུང་དགའ་ལྡན་ཕོ་བྲང་དབུ་བརྙེས་ནས་ལོ་༣༦༠ འཁོར་བའི་བཀའ་དྲིན་རྗེས་དྲན་དང་མ་འོངས་མདུན་བསྐྱོད་ཀྱི་ཁ་ཕྱོགས་ཞེས་པའི་དེབ་ཕྲེང་དང་པོའི་ནང་། བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་བློ་བཟང་བསྟན་འཛིན་མཆོག་གི་གསུང་བཤད་དུ་མ་འོངས་པའི་ལངས་ཕྱོགས་ག་འདྲ་ཞིག་དགོས་པའི་སྐོར་ངོས་ནས་གསལ་པོ་བརྗོད་མི་ཐུབ། ད་ལྟ་ང་ཚོ་མང་གཙོའི་ལམ་སྲོལ་ལ་ཡིད་ཆེས་བློ་གཏད་བྱས་ཏེ་ལག་བསྟར་དང་མདུན་བསྐྱོད་བྱེད་བཞིན་པ་ཡིན་པས། མ་འོངས་པའི་མདུན་ལམ་ཡང་མང་ཚོགས་ཀྱིས་ཐག་གཅོད་རྒྱུ་མ་གཏོགས་མི་རེ་གཉིས་ཀྱི་བསམ་ཚུལ་ཐོག་ནས་ཐག་གཅོད་ཐབས་མེད་ལ། གལ་སྲིད་ཐག་བཅད་པ་ཡིན་ནའང་ལམ་དུ་འགྲོ་མི་ཐུབ། མ་འོངས་པར་གནས་ཚུལ་ཇི་འདྲ་ཞིག་ཡོང་མིན་ད་ལྟའི་བོད་མིའི་སྤྱི་ཚོགས་ཀྱི་བསམ་བློ་གཏོང་ཕྱོགས་ལ་རག་ལས་ཡོད། ལྷག་པར་དུ་བོད་མི་ན་གཞོན་ཚོའི་འཚར་ལོངས་བྱེད་སྟངས་དང་འབྲེལ་བ་གཏིང་ཟབ་ཡོད། བཙན་བྱོལ་ལ་ཡོད་པའི་བོད་མི་རྣམས་བོད་སྤྱི་ཚོགས་ཀྱི་མི་འབོར་དང་བསྡུར་ན་གྲངས་འབོར་ཧ་ཅང་ཉུང་ཉུང་ཡིན། བོད་མི་མང་ཆེ་བ་ད་ལྟའང་བོད་ཀྱི་ནང་དུ་ཡོད། དོན་དངོས་ཐོག་བོད་ཀྱི་བདག་པོ་བོད་ནང་ཡོད་པའི་བོད་རྒྱ་ཆེའི་མི་མང་རྣམས་རེད། ༧གོང་ས་༧སྐྱབས་མགོན་ཆེན་པོས་དུས་དང་རྣམ་པ་ཀུན་ཏུ་མ་འོངས་པའི་བོད་ཀྱི་གནས་སྟངས་ནི་གཞིས་བཞུགས་རྒྱ་བོད་རྒྱ་ཆེའི་མི་མང་གི་ཐག་གཅོད་བྱེད་དགོས་པ་ལས། ང་ཚོ་བྱེས་འབྱོར་བོད་མི་ཉུང་ཤས་ཀྱི་ཐག་གཅོད་མི་ཐུབ་ཅེས་ཞི་བའི་དོན་ཚན་ལྔ། སི་ཊས་སྦག་གི་གྲོས་འཆར། མ་འོངས་བོད་ཀྱི་ཆབ་སྲིད་ལམ་སྟོན། མ་འོངས་བོད་ཀྱི་རྩ་ཁྲིམས་སྙིང་དོན་བཅས་ཚང་མའི་ནང་ཡོངས་གྲགས་ཀྱིས་བཀའ་གནང་ཡོད་པ་མ་ཟད། རྒྱུན་གྱི་དགོངས་པའི་ཉམས་བཞེས་ཀྱང་དེ་རང་རེད་ཅེས་གསུངས་འདུག

དེ་བཞིན་ཆོས་ཤེས་བཀའ་བློན་ཐུབ་བསྟན་ལུང་རིགས་མཆོག་གིས་གསུང་བཤད་གནང་བའི་ནང། ལྷག་པར་དུ་ནན་བཤད་དགོས་པ་ཞིག་ལ་འཕགས་མཆོག་ཕྱག་ན་པདྨོ་དང་རང་ཅག་གངས་ཅན་པ་རྣམས་གདུལ་བྱ་འདུལ་བྱེད་ཀྱི་འབྲེལ་བ་ཐུན་མོང་མ་ཡིན་པ་ཞིག་ཡོད་པ་འདི། ཇི་སྲིད་བོད་གངས་ཅན་ལྗོངས་གནས་པ་དེ་སྲིད་དུ་ཐུགས་རྗེའི་སྐྱབས་ཀློང་ནས་མི་འདོར་བའི་གསོལ་འདེབས་དགོས་པ་ཡིན་སོགས་གསུངས་འདུག་ན། གོང་གི་གསུང་བཤད་ཁག་ཆབ་སྲིད་རྣོ་ངར་གྱི་གཏམ་བཤད་མ་ཡིན་པར་བོད་མི་མང་ལ་དོན་དམ་པའི་སྙིང་གཏམ་ལམ་སྟོན་བཀའ་སློབ་དྭངས་མ་ཞིག་ཡིན་ན། གཞིས་བཞུགས་རྒྱ་ཆེའི་མི་མང་གི་མངོན་འདོད་དང། བོད་ཀྱི་རྒྱལ་རབས་དང་ལོ་རྒྱུས། ཆོས་འབྱུང་། རིག་གཞུང་ཁོར་ཡུག བོད་མི་རིགས་ཀྱི་ཁྱད་ཆོས། ནང་པ་སངས་རྒྱས་པའི་དམ་པའི་ཆོས་ཀྱིས་ངོ་སྤྲད་པའི་ཚེ་འདི་ཕྱི་དང་ལས་རྒྱུ་འབྲས། བོད་མིའི་ལྷན་སྐྱེས་གོམས་གཤིས་སུ་ཡོད་པའི་ཡ་རབས་བཟང་སྤྱོད། ལྷག་པར་དུ་རྒྱལ་སྤྱི་དང། རྒྱ་ནག་གི་གནས་བབས་སོགས་ལ་ཐུགས་ཞིིབ་གནང་ནས་བཅའ་ཁྲིམས་དོན་ཚན་གསུམ་པའི་ནང་དུ་གསལ་བའི་ཡུལ་མིའི་རྒྱལ་ཁབ་གྱི་གོ་དོན་ངོ་མ་གསལ་པོ་མཁྱེན་པའི་ཐོག་ནས་བོད་རྒྱལ་ཁབ་དང། བོད་མི་རིགས་ཀྱི་ཆབ་སྲིད་འཕེལ་རིམ་ལོ་རྒྱུས་ལ་འགན་ཁུར་ནས་དེང་དུས་ཡར་ཐོན་མང་གཙོའི་རྒྱལ་ཁབ་སྤྱིའི་འགྲོ་ལུགས་ལྟར། མི་མང་ལ་རང་དབང་ཆ་ཚང་སྤྲད་ནས་བོད་མི་བཙན་བྱོལ་བ་རང་ལོ་༡༨ ཡན་གྱི་ཁྲིམས་མཐུན་འོས་བསྡུའི་ལམ་ནས་མང་མོས་ཐག་གཅོད་(Referendum)གནང་དགོས་པ་དེ་གལ་ཆེན་ནང་གིས་ལོ་རྒྱུས་ཀྱིས་ངོ་སྤྲད་པའི་གལ་ཆེན་ཞིག་ཡིན་ཡང། དེ་ལས་ལྡོག་སྟེ་ད་ལམ་ཚོགས་ཆེན་དུ་ཕེབས་པའི་བཙན་བྱོལ་སྤྱི་ཚོགས་ནང་གི་ཨ་ཡོད་ནང་གི་ད་ཡོད། སྒོ་ངའི་ནང་གི་སེར་རིལ་རྣམས་ཀྱིས་ཡུལ་མིའི་རྒྱལ་ཁབ་ཀྱི་གོ་དོན་ངོ་མ་ཇི་མ་ཇི་བཞིན་མ་རྟོགས་པར། རི་བོང་ཅལ་འགྲོགས་དང།  གཞན་ཟེར་རྗེས་འབྲངས། རང་གི་མིང་གྲགས་ཐབས་བརྒྱུད་ནས་ཚ་ཚ་འུར་འུར་གྱིས་ཐོག་ནས་མི་ལོ་༣༧༠ མ་ཟིན་ཙམ་གྱི་གཟི་བརྗིད་ཆེ་ལ་དོན་སྙིང་ལྡན་པའི་རླབས་ཆེན་གྱི་ལོ་རྒྱུས་ཅན་གྱི་བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་པར་རྒྱལ་བའི་སྒྲིག་འཛུགས་དེ་དག་བོད་མི་རང་ཉིད་ཀྱིས་མཇུག་བསྡུས་པ་དེ་ནི་བསུབ་ནས་ཟུབ་རྒྱུ་མེད་པའི་ལོ་རྒྱུས་དཀྱོག་མཚམས་ཀྱི་ནག་ཐིག་ཅིག  བོད་ཀྱི་རྒྱལ་རབས་ལོ་རྒྱུས་བྱུང་རིམ་ནང་གསར་གཏོད་གནང་བ་ཞིག་ཡིན་པ་མ་ཟད། འདས་པའི་མི་ལོ་༥༢ རིང་ང་ཚོ་མི་ཡུལ་དུ་བསྡད་ནས་གཞིས་བཞུགས་རྒྱ་ཆེའི་མང་ཚོགས་ལ་ང་ཚོའི་བྱས་རྗེས་དང། ངོ་སོ། ལེགས་སྐྱེས་འདི་ལས་འབུལ་རྒྱུ་མ་རྙེད་པ་དེ་ཕོ་ཡི་བླ་བཙོང། མོ་ཡི་གཡུ་བཅག་པ་མ་རེད་དམ།།