བོད་གཞུང་དང་གྲྭ་ཚང་གཞུང་།

སྤྱིར་འགྲོ་སྟངས་ལྟར་བྱས་ན་གལ་ཆེ་བའི་ལས་དོན་འདི་ལྟ་བུ་ཐག་གཅོད་བྱེད་པའི་སྐབས་ངང་རྒྱུད་རིང་པོ་དང་བརྟག་དཔྱད་ཞིབ་འཇུག་ཡག་པོ་དགོས་པ་ཧ་ཅང་གལ་ཆེན་པོར་གྱུར་ཡོད། བྲེལ་བྲེལ་ཚུབ་ཚུབ་ཀྱི་ཐོག་ནས་སྔ་ཕྱི་གང་ལའང་ཞིབ་འཇུག་ཚད་ལྡན་མ་བྱས་པར་ཐག་གཅོད་བྱས་པ་ནི། ཕྱོགས་གཅིག་ནས་བལྟས་ན་བོད་མི་རིགས་ཀྱི་ལོ་རྒྱུས་ལ་འགན་མ་ཁུར་བ་དང། བོད་ཀྱི་རྩ་དོན་འཐབ་རྩོད་ལ་འགན་མ་ཁུར་བ་ཞིག་ཏུ་གྱུར་ཡོད་ཅེས་བརྗོད་ཀྱང་མི་ཆོག་པ་མེད།

༧གོང་ས་མཆོག་གི་སྐུ་དབང་དང་འབྲེལ་བའི་བཅའ་ཁྲིམས་བསྐྱར་བཅོས་བྱེད་པའི་སྐབས་བོད་གཞུང་གི་མིང་དང་འབྲེལ་བའི་ཐོག་ནས་ཀྱང་བསྒྱུར་བཅོས་ཆེན་པོ་བྱས་ཡོད་པ་རེད། བསྒྱུར་བཅོས་དེ་དང་འབྲེལ་བའི་སྐོར་ལོ་འདིའི་སྐྱེས་རབས་གསུང་ཆོས་སྐབས་༧གོང་ས་མཆོག་གིས་དབྱིན་ཡིག་ནང་བོད་གཞུང་ཞེས་པ་དེ་ཐོག་མ་ནས་བེད་སྤྱོད་བྱེད་མྱོང་མེད་པ་དང། བོད་སྐད་ནང་གཞུང་ཞེས་པ་དེ་དབྱིན་སྐད་ནང་Government ཞེས་པར་ཡིན་གཅིག་མིན་གཅིག་གོ་མི་དགོས་པར་དགོན་པ་གཞུང་དང་། གྲྭ་ཚང་གཞུང་ཞེས་འབོད་བཞིན་ཡོད་ཅེས་བཀའ་གནང་ཡོད། དེ་བཞིན་གཞུང་མང་རྒྱལ་ཡོངས་ཚོགས་ཆེན་གྱི་མཇུག་བསྡོམས་སྐབས་ཀྱང་བོད་གཞུང་གི་མིང་དང་འབྲེལ་བའི་སྐོར་བཀའ་སློབ་ཟབ་ནན་བསྩལ་ཡོད། དེའི་རྗེས་བཅའ་ཁྲིམས་དོན་ཚན་དང་པོ་བསྐྱར་བཅོས་དང་འབྲེལ་བའི་ལམ་སྟོན་ཡིག་ཐོག་ནས་གནང་བ་དེ་བཅའ་ཁྲིམས་བསྐྱར་བཅོས་སྐབས་བོད་གཞུང་གི་མིང་བསྒྱུར་བཅོས་བྱེད་པའི་རྩ་འཛིན་ལྟ་བུར་གྱུར་སོང།

ཉེ་བའི་ཆར་ཝ་ཤིང་ཊོན་དུ་སྐུའི་འཁྲུངས་སྐར་དུས་ཆེན་སྐབས་༧གོང་ས་མཆོག་གིས་སྲིད་དབང་རྩིས་སྤྲོད་སྐོར་བཀའ་སློབ་ཕེབས་ཡོད་པ་དང། ལྷག་པར་དུ་བོད་གཞུང་གི་མིང་དང་འབྲེལ་བའི་སྐོར་སྐྱེས་རབས་གསུང་ཆོས་སྐབས་བསྩལ་བའི་བཀའ་སློབ་དང་གཅིག་མཚུངས་གནང་ཡོད་པ་མ་ཟད། དགོན་པ་གཞུང་དང་སློབ་གྲྭ་གཞུང་སོགས་དཔེ་མཚོན་དེ་ལས་མང་བ་གསུངས་ཡོད་པ་རེད། གནད་དོན་འདི་ལ་བརྟེན་ནས་བསྐྱར་དུ་བོད་མིའི་སྒྲིག་འཛུགས་ཀྱི་མིང་དང་འབྲེལ་བའི་སྐོར་གྲོས་ཚོགས་ནང་ཁྲིམས་འཆར་སླེབས་སྲིད་མིན་སྐབས་འདིར་དྲི་བ་ཞིག་ཏུ་གྱུར་ཡོད་པ་དང།  གལ་སྲིད་སླེབས་པའི་དབང་དུ་བཏང་ན་གྲོས་ཚོགས་ཀྱིས་ཁྲིམས་སྒྲིག་གཞིར་བཟུང་བསྐྱར་བཅོས་ལས་སླ་པོའི་ཐོག་ནས་འགྲོ་ངེས་རེད་སྙམ།

བོད་པ་སྤྱི་ཡོངས་ཀྱི་སྒྲིག་འཛུགས་འདི་ལ་གཞུང་ཞེས་པའི་མིང་ཚིག་འདི་ངེས་པར་ཡོད་དགོས་པ་བོད་མི་ཕལ་མོ་ཆེའི་རེ་བ་དང་མངོན་འདོད་རེད་ཅེས་བརྗོད་ཆོག་མོད། ཟླ་བ་དྲུག་རེའི་མཚམས་སུ་སྒྲིག་འཛུགས་ཀྱི་མིང་དང་འབྲེལ་བའི་བསྐྱར་བཅོས་རེ་སླེབས་སོང་ན་གཞི་འཛིན་ས་དང་། སྲིད་བྱུས་ལ་ཁ་ཕྱོགས་བརྟན་པོ་མེད་པ། ད་དུང་བཅའ་ཁྲིམས་ཀྱང་ཆ་འཇོག་འཕེར་བ་ཞིག་ཏུ་ངོས་འཛིན་བྱེད་དཀའ་བར་འགྱུར་ངེས། གལ་ཆེ་བའི་ལས་དོན་ཐག་གཅོད་བྱེད་པའི་སྐབས་ཚ་ཚ་འུར་འུར་བྱེད་མི་འོས་པ་མ་ཟད། ལོ་འདིའི་བཅའ་ཁྲིམས་བསྐྱར་བཅོས་མཐའ་མའི་གཏན་འབེབས་༧གོང་ས་མཆོག་གིས་མཚན་རྟགས་འཁོད་པ་དེའི་ནང་དུའང་ཉིས་ལྡབ་དང་། ཆད་ལྷག་ཧ་ཅང་མང་པོ་ཡོད་པ་དང། གྲོས་ཚོགས་ནང་མཐའ་མའི་གཏན་འབེབས་གང་བྱས་པ་དེ་ཆ་ཚང་ཆགས་མེད། དེར་བརྟེན་ཆད་ལྷག་ཤོར་བ་འདི་དག་ལའང་མཚན་རྟགས་བཀོད་ཟིན་པས་དེ་དག་ཚང་མ་ཁྲིམས་ལུགས་སུ་ངོས་འཛིན་བྱེད་དགོས་མིན་ཡང་དྲི་རྟགས་ཤིག་ཏུ་གྱུར་ཡོད།

ད་ལྟ་འགྲོ་བཞིན་པའི་བཀའ་ཤག་ལ་མཚོན་ན་བོད་པ་རེ་ཟུང་གིས་དགོས་མཁོ་གལ་ཆེན་ཞིག་གི་ཆེད་དང་བླངས་དཔྱ་ཁྲལ་ལག་དེབ་ནང་གི་མིང་བརྗེ་མོ་ལོག་དགོས་ཐུག་པའི་སྐབས། བོད་གཞུང་གིས་དང་བླང་དཔྱ་ཁྲལ་ལག་དེབ་ནང་མིང་གཏན་ནས་བརྗེ་མོ་ལོག་མི་ཆོག་པ་དང།  གྲྭ་པ་ཞིག་གི་དང་བླངས་དཔྱ་ཁྲལ་ལག་དེབ་ནང་གྲྭ་པའི་པར་ཐེབས་ཡོད་པས། སྐྱ་བབས་བྱས་ན་འདྲ་པར་བརྗེ་མོ་ལོག་མི་ཆོག་པ་འདི་གཞུང་གི་སྲིད་བྱུས་སུ་ཐག་གཅོད་གནང་ཡོད། མི་སྒེར་པ་ཞིག་གི་མིང་དང་འདྲ་པར་བརྗེ་བསྒྱུར་ལ་བརྟན་པོ་འདི་འདྲ་གནང་དགོས་ཀྱི་ཡོད་ན། བཙན་བྱོལ་བོད་གཞུང་གི་མིང་བརྗེ་བསྒྱུར་བྱེད་སྐབས་ཚད་ལྡན་མ་བྱུང་བར། གང་མགྱོགས་མགྱོགས་གིས་གཏན་འབེབས་ཐུབ་པར་རྩོད་ལེན་གནང་ན་ཁྲིམས་བཟོའི་ལས་དོན་གྱི་གཟི་བརྗིད་ལ་ཐེ་ཚོམ་རང་བཞིན་གྱི་དྲི་རྟགས་ཤིག་སླེབས་པ་རེད།

ད་ལན་ཕྱི་ཟླ་དགུ་པའི་ནང་སླར་ཡང་བོད་མིའི་སྒྲིག་འཛུགས་ཀྱི་མིང་དང་འབྲེལ་བའི་སྐོར་གྱི་བགྲོ་གླེང་ཞིག་སླེབས་སྲིད་མིན་དང། གལ་སྲིད་སླེབས་ན་གཞུང་ཞེས་པའི་མིང་ཚིག་འདི་སླེབས་སྲིད་པ་ལྟ་བུར་གྱུར་ཡོད། སྤྱིར་མི་མང་གི་རེ་བ་དང་རྩ་དོན་རང་བཞིན་གྱི་གལ་ཆེ་དོན་ཆེན་ཞིག་ཡིན་ཀྱང། བྱེད་སྟངས་ཀྱི་ཐོག་ནས་དུས་ཡུན་ཐུང་ངུ་ཟླ་དྲུག་རེའི་ནང་སླར་ཡང་གཞུང་གི་མིང་བསྒྱུར་བཅོས་གཏོང་དགོས་པ་ཞིག་བྱུང་ཡོད་ན་ཅུང་འོས་འཚམས་མེད་པ་དང། ལྷག་པར་དུ་གནད་དོན་འདིའི་ཐོག་ནས་ཉེ་ཆར་གྲོས་ཚོགས་འཕར་མའི་ལས་དོན་ལེགས་འགྲུབ་བྱུང་ཡོད་མེད་ལ་དྲི་བ་དང་། ཚོགས་གཙོ་མཆོག་གིས་ཞལ་པར་བརྒྱུད་ངག་ཐོག་ནས་དང་ཡིག་ཐོག་ནས་སྔ་རྗེས་སྐུ་སྒེར་དྲུང་ཆེའི་མཚན་ཐོག་ནས་གྲོས་ཚོགས་སུ་སླེབས་པའི་ཡིག་ཆ་དང།  འཁྲུངས་སྐར་ཉིན་༧གོང་ས་མཆོག་གི་ཞལ་ནས་བསྩལ་བའི་བཀའ་སློབ་གཉིས་ཅུང་མི་འདྲ་བར་གྱུར་ཡོད།།

{jcomments on}