རོགས་སྐྱོར་མེད་ན་ཉམ་ཐག་ཡོད་དམ།

མི་སྒེར་བཅས་ཧ་ཅང་མང་པོ་ཞིག་ཡོང་གི་ཡོད་པ་དང་། དེ་དག་གི་དམིགས་ཡུལ་ནི་ཉམ་ཐག་རྣམས་དབུལ་ཕོངས་ཀྱི་གནས་ལས་ཐར་ཐུབ་པའི་ཆེད་དུ་ཡིན། ཉམ་ཐག་ཅེས་པའི་མིང་འདིའི་འོག་ལྷོད་ཉལ་དལ་སྡོད་བྱེད་མཁན་མང་པོ་ཞིག་ཀྱང་ཡོང་གི་ཡོད་པ་དང་། སྐྱོབ་གསོ་རོགས་རམ་ལ་བརྟེན་ནས་སྒྱིད་ལུག་གི་ངང་དུ་མི་ཚེ་སྐྱེལ་མཁན་ཡང་གང་མང་ཞིག་མཐོང་རྒྱུ་ཡོད། དེར་བརྟེན་ཕྱོགས་ཡོངས་ནས་བསམ་བློ་བཏང་བའི་སྐབས་རོགས་སྐྱོར་མེད་ན་ཉམ་ཐག་ཡོད་དམ་ཞེས་པའི་དྲི་བ་འདི་སླེབས་ཡོང་གི་འདུག

བོད་ནང་ལ་མཚོན་ན་ཉམ་ཐག་ཡིན་ཡང་མིན་པའི་བཟོ་ལྟ་སྟོན་གང་ཐུབ་བྱེད་པ་དང་། བཙན་བྱོལ་བོད་པའི་སྤྱི་ཚོགས་ནང་ཆེས་དབུལ་ཕོངས་མིན་ཡང་ཡིན་བཟོ་བྱེད་མཁན་མང་པོ་ཡོད། བྱེད་སྟངས་འདི་གཉིས་ཀྱིས་ཆ་ཚང་འདི་ལྟར་ཡིན་ཞེས་ཁ་ཚོན་གཅོད་དཀའ་ཡང་མང་ཕྱོགས་ཀྱི་གནས་ཚུལ་དང་བསྟུན་ནས་བཤད་ན་དེ་ལྟར་ཡིན། བོད་ནང་དུ་ཉམ་ཐག་ཡིན་ཡང་མིན་ཚུལ་བྱེད་དགོས་དོན། མིའི་མཐོང་ཆུང་བྱེད་ཡུལ་ཙམ་ལས་གཞུང་ངོས་ནས་རོགས་རམ་གང་ཡང་རག་གི་མེད་པས་རེད། བཙན་བྱོལ་ནང་ཕྱི་ལོ་༡༩༥༩ ལོ་ནས་ད་བར་༧གོང་ས་མཆོག་དང་བཙན་བྱོལ་བོད་གཞུང་གི་བཀའ་དྲིན་ལ་བརྟེན་ནས་རོགས་རམ་རྒྱུན་མ་ཆད་པར་ཡོད་པས་དེ་ལྟར་བྱུང་བར་བརྟེན་ཉམ་ཐག་ཅེས་པའི་མིང་འདི་ལ། གཞིས་བྱེས་གཉིས་ཀྱི་སྤྱི་ཚོགས་ནང་འདུ་ཤེས་འཛིན་སྟངས་མི་འདྲ་བ་བྱུང་བ་རེད།

ན་གཞོན་ལས་འཕེར་ཡིན་ཡང་བུ་ཕྲུག་ལ་བརྟེན་ནས་དབུལ་ཕོངས་སུ་གྱུར་པའི་གནས་སྟངས་ལ་རོགས་རམ་གནང་མཁན་མང་པོ་ཡོད་ལ། ཟླ་རེ་བཞིན་ཕྲུ་གུའི་འཚོ་སྣོན་གྱི་སྐྱོབ་གསོའི་ཡོང་ཁུངས་ལ་བརྟེན་ནས་ཕ་མས་ཀྱང་ཡོང་འབབ་འཚོལ་སྒྲུབ་ཀྱི་ཐོག་ལ་འབད་བརྩོན་བྱེད་མ་ཐུབ་པ་དང་། དུས་རྒྱུན་སྐྱོབ་གསོ་ཙམ་ལ་བརྟེན་ནས་འཚོ་བ་སྐྱེལ་ཐབས་བྱ་རྒྱུའི་སྒྱིད་ལུག་པའི་བསམ་ཚུལ་ཞིག་ཡོང་གི་ཡོད་པས། ཅིག་བྱས་ན་ཕ་མ་འདི་དག་ལ་ཉམ་ཐག་གི་མིང་ཐོག་ནས་རོགས་རམ་རག་གི་མེད་ན་རང་ཁ་རང་གསོ་བྱེད་པར་འབད་བརྩོན་མི་བྱེད་ཀ་མེད་དུ་འགྱུར་སྲིད་པ་རེད། བཙན་བྱོལ་བོད་པའི་སྤྱི་ཚོགས་སུ་ཉམ་ཐག་ཡོད་དམ་ཞེ་ན་མང་པོ་ཡོད་པ་དང་། ཨར་པོ་དང་ས་ཞིང་འདེབས་ལས་བྱེད་མཁན་གྱི་ལས་མི་མི་རག་པའི་དཀའ་ངལ་ཡོད།

གོང་དུ་བརྗོད་པ་ལྟ་བུའི་རོགས་རམ་དེ་ཕྲུ་གུ་མང་པོ་ཡོད་པས་དབུལ་ཕོངས་སུ་གྱུར་པའི་ཉམ་ཐག་རྣམས་ལ་རོགས་རམ་གྱི་ཆེད་དུ་སྐྱོབ་གསོ་གནང་བ་ཞིག་ཡིན། བཙན་བྱོལ་ནང་ཕྲུ་གུ་རྣམས་ཀྱིས་གཞི་རིམ་སློབ་གྲྭ་འགྲིམ་སྐབས་བཙན་བྱོལ་བོད་གཞུང་དང་རྒྱ་གར་གཞུང་གི་བཀའ་དྲིན་ལ་བརྟེན་དཀའ་ངལ་མེད་པ་དང་། སྐྱོབ་གསོ་དེ་གཞི་རིམ་སློབ་གྲྭའི་སྐབས་སུ་དེ་ཙམ་དགོས་མཁོ་ཆེན་པོ་ཆགས་མེད། དཔལ་འབྱོར་གྱི་གནས་སྟངས་ཅུང་སྐྱོ་བའི་རིགས་ཀྱི་ཕྲུ་གུ་ལ་རོགས་རམ་དགོས་པ་དེ་གལ་ཆེན་པོ་ཡིན་ཡང་། རོགས་རམ་བྱེད་པའི་སྐབས་ཕྲུ་གུ་དེ་དག་གི་ཆེད་དུ་ཟླ་རེར་འཚོ་སྣོན་གནང་བཞིན་པ་དེ་དག་ཟུར་དུ་གསོག་འཇོག་བྱེད་དགོས་པ་ལས། ཕྲུ་གུ་གཞི་རིམ་སློབ་གྲྭར་འགྲོ་བཞིན་པའི་སྐབས་ཕ་མའི་ལག་པར་སྤྲད་བཞིན་པ་དེས་དོན་དུ་ཕན་ཐོགས་ཡོད་མེད་བཤད་དཀའ།

མི་ཚང་གི་གནས་སྟངས་ཞན་པ་ཞིག་ཡིན་ན་ཕྲུ་གུ་འཛིན་རིམ་བཅུ་གཉིས་ཐོན་པའི་སྐབས་མཐོ་སློབ་ཏུ་འགྲོ་བར་མང་ཆེ་བར་སློབ་ཡོན་གྱི་དཀའ་ངལ་ཡོད་པ་དང་། སྐབས་དེ་དུས་རོགས་རམ་མེད་པ། སྔོན་མ་རག་པ་དེ་དག་ཀྱང་རྫོགས་ཟིན་པས་ཕྲུ་གུ་མཐོ་སློབ་ཏུ་གཏོང་མི་ཐུབ་པ་དང་། གཏོང་ཐུབ་པའི་དབང་དུ་བཏང་ཡང་ཕྲུ་གུའི་དམིགས་ཡུལ་དང་སྤྱི་ཚོགས་ཀྱི་དགོས་མཁོ་ལ་གཞིགས་པའི་མཐོ་སློབ་ཚད་ལྡན་དུ་གཏོང་མི་ཐུབ། གཞི་རིམ་སློབ་གྲྭ་འགྲིམ་བཞིན་པའི་སྐབས་སུ་གཞུང་གིས་རོགས་རམ་གནང་བ་དེ་དག་ཟུར་དུ་གསོག་འཇོག་བྱས་ཡོད་ན། སྐབས་དེ་དུས་ཕྲུ་གུའི་མདུན་ལམ་ལ་ཕན་ཐོགས་ཆེན་པོ་ཡོད་པ་དང་། བོད་པའི་སྤྱི་ཚོགས་སུ་རིགས་གཅིག་རྐང་འཛིན་གྱི་སློབ་ཐོན་པ་སྐྱེད་སྲིང་བྱེད་པར་ཡང་ཕན་ཐོགས་ཆེན་པོ་ཞིག་ཏུ་འགྱུར་ཐུབ་སྙམ།

མདོར་བསྡུས་ན་བཀའ་ཤག་གསར་པས་ལས་དོན་འདི་དག་གི་ཐོག་ལ་བསྐྱར་ཞིབ་ཡང་ཞིབ་ཚད་ལྡན་ཞིག་བྱས་ནས་སྤྱི་ཚོགས་ཀྱི་དགོས་མཁོ་དངོས་ལ་ཕན་པ་ཞིག་ཏུ་བསྒྱུར་དགོས་པ་ཧ་ཅང་གལ་ཆེན་པོར་གྱུར་ཡོད་ལ། ལོ་བསྟར་ཆགས་སུ་རོགས་རམ་གཞི་རྒྱ་ཆེན་པོ་གནང་བཞིན་ཡོད་ཀྱང་ད་དུང་ཉམ་ཐག་གི་གྲངས་ཀ་ཉུང་དུ་འགྲོ་ཐུབ་མེད་པས། གནས་སྟངས་འདི་ལ་ངེས་པར་དུ་དུས་དང་མཐུན་པའི་ཐག་གཅོད་ཅིག་གནང་རན་ཡོད།།