རུལ་སུངས་སྤྱི་ཚོགས་ཀྱི་ནད་ཡམས།

ད་ལྟའི་ཆར་རྒྱ་གར་གྱི་རྒྱལ་ས་ལྡི་ལི་གཙོ་བོར་གྱུར་པའི་ས་གནས་མང་ཆེ་བ་ཞིག་ཏུ་ལྐོག་ཟ་རུལ་སུངས་ལ་ངོ་རྒོལ་བྱེད་མཁན། སྤྱི་ཚོགས་ཞབས་ཞུ་བ་གྲགས་ཅན་ཨཱ་ན་ ཧ་ཛ་རེ་ཡིས་སྣེ་ཁྲིད་ནས་ཞི་བའི་ལས་འགུལ་ཤུགས་ཆེ་ཞིག་སྤེལ་བཞིན་པ་དང་། གཙོ་ཆེ་ཤོས་རྒྱ་གར་གྱི་གྲོས་ཚོགས་ནས་ལྐོག་ཟ་རུལ་སུངས་བྱེད་མཁན་རྣམས་ལ་སྟངས་འཛིན་དང་ཉེས་ཆད་གཏོང་སྟངས་ཁྲིམས་ལུགས་ཤིག་གཏན་འབེབས་ཡོང་ཆེད་རེད། དེ་ཡང་གཙོ་བོ་མི་མང་གི་དབང་ཤུགས་ཀྱང་ཁྲིམས་དེའི་ནང་སླེབས་ཐུབ་དགོས་པ་སོགས་ཞི་རྒོལ་བྱེད་བཞིན་པ་དང་། གཞུང་ཕྱོགས་ནས་དགོས་འདུན་ཆ་ཚང་ལ་དང་ལེན་གནང་མེད་པ་དང་ཨཱ་ན་ ཧ་ཛ་རེ་འཛིན་བཟུང་བྱས་པས་མི་མང་གི་ལས་འགུལ་གཞི་རྒྱ་ཆེ་རུ་སོང་ཡོད་པ་རེད།

ལོ་འདིར་ཨཱ་ན་ ཧ་ཛ་རེ་ཡིས་སྣེ་ཁྲིད་ནས་ངོ་རྒོལ་གྱི་ལས་འགུལ་མང་པོ་སྤེལ་བར་བརྟེན་ལྐོག་ཟ་རུལ་སུངས་བྱེད་མཁན་གང་མང་ཞིག་འཛིན་བཟུང་བཙོན་འཇུག་བྱས་ཡོད་པ་རེད། གཙོ་ཆེ་ཤོས་གཅིག་ནི་ལོ་སྔོན་མར་ལྡི་ལིར་ཚུགས་པའི་རྩེད་འགྲན་(Common Wealth Game)གྱི་སྐབས་ལྐོག་ཟ་རུལ་སུངས་ཀྱི་གནད་དོན་མང་པོ་ལྷགས་ཡོད་པ་དང་། གཞན་ཡང་མངའ་སྡེ་རེ་ཟུང་གི་སྤྱི་ཁྱབ་བློན་ཆེན་ཡང་གོ་གནས་ནས་དགོངས་པ་ཞུ་དགོས་བྱུང་བ་སོགས་ཀྱི་གནས་ཚུལ་ཡང་གཙོ་ཆེ་ཤོས་ལྐོག་ཟ་རུལ་སུངས་དང་འབྲེལ་བའི་ཐོག་ནས་བྱུང་བ་རེད། གནས་ཚུལ་དེ་དག་ལོ་འདིར་ཡོངས་ཁྱབ་བྱུང་བ་ཙམ་ལས། སྤྱི་ཚོགས་འདིའི་ནང་ཡུན་རིང་ནས་ཁྱབ་ཟིན་པའི་ནད་ཡམས་ཤིག་ཏུ་གྱུར་ཡོད་པ་རེད།

ལྐོག་ཟ་རུལ་སུངས་འགོག་ཆེད་སྤྱི་ཚོགས་ནང་ཕྱི་ལོ་༡༩༦༠ རེ་གྲངས་ནས་རྗེ་པྲཀཤ་ནཱ་ར་ཡན་གྱིས་སྣེ་ཁྲིད་ནས་ངོ་རྒོལ་གྱི་ལས་འགུལ་སྤེལ་ཡོད་ཀྱང་། སྐབས་དེར་དེ་ཙམ་གྱི་ནུས་པ་ཆེན་པོ་ཐོན་ཐུབ་མེད། ད་ལྟའི་ཆར་ཡང་གྲོས་ཚོགས་ནས་ལྐོག་ཟ་རུལ་སུངས་བྱེད་མཁན་རྣམས་ལ་སྟངས་འཛིན་དང་ཉེས་ཆད་གཏོང་བའི་ཁྲིམས་ལུགས་ཤིག་གཏན་འབེབས་བྱེད་ཐུབ་མིན་བཤད་དཀའ་བ་དང་། གཞུང་འཛིན་ཀོང་རི་སི་ཚོགས་པའི་ངོས་ནས་དེ་ལ་མཐུན་འགྱུར་གྱི་ཕྱོགས་ཉུང་བ་མ་ཟད། ཕྱོགས་འགལ་ཚོགས་པ་ཆེ་ཤོས་བྷི་ ཇཱེ་ བྷི་ཡིས་ནང་ཁུལ་སྲིད་དོན་འཐབ་རྩོད་ཆེད། གཞུང་འཛིན་ཚོགས་པར་ཁ་གཏད་གཅོག་རྒྱུ་ཁོ་ན་རྩལ་འདོན་གྱི་གོ་སྐབས་འཛིན་བཞིན་པ་ལས། ཁྲིམས་ལུགས་དེ་གཏན་འབེབས་བྱེད་ཐུབ་པར་གཙོ་བོའི་ནུས་པ་འདོན་གྱི་མེད།

གལ་སྲིད་ལྐོག་ཟ་རུལ་སུངས་འགོག་པའི་ཁྲིམས་ལུགས་དེ་ཨཱ་ན་ ཧ་ཛ་ རེ་སོགས་ཀྱི་རེ་བ་བཞིན་གཏན་འབེབས་བྱེད་ཐུབ་པའི་དབང་དུ་བཏང་ཡང་། ད་ལྟའི་ཆར་རྒྱ་གར་གྱི་སྤྱི་ཚོགས་ནང་ལྐོག་ཟ་རུལ་སུངས་ནི་ཆེ་ས་ནས་གཞུང་གི་མཐོ་རིམ་དཔོན་རིགས་ཀྱི་གྲས་སུ་སྡོད་མཁན་ནང་དང་། ཆུང་ས་ནས་ལམ་འགྲམ་གྱི་ཉེན་རྟོག་པ། གཞུང་གི་བཟའ་བཅའ་བཙོང་ས་ཡན་ཆད་ཀྱི་ལས་རིགས་ཡོངས་རྫོགས་ནང་ཁྱབ་གདལ་དུ་གྱུར་ཟིན་པས། ཇི་སྲིད་རྒྱ་གར་གྱི་ལས་བྱེད་པ་དང་མི་མང་གི་སེམས་ནང་ལྐོག་ཟ་རུལ་སུངས་ནི། སྤྱི་ཚོགས་ཡར་རྒྱས་ཀྱི་འགོག་རྐྱེན་གཙོ་བོ་དང་། ལྐོག་ཟ་རུལ་སུངས་ནི་གཞུང་འབངས་གཉིས་ཀ་ངོ་ཚ་དགོས་པའི་གནད་དོན་ཞིག་ཏུ་ངོས་འཛིན་མ་ཐུབ་པ་དེ་སྲིད་དུ་ཁྲིམས་ལུགས་ཡོད་པ་ཙམ་གྱིས་ལག་བསྟར་ཐུབ་པའི་རེ་བ་མེད་སྙམ།

རྒྱ་གར་ལ་མཚོན་ན་ལྐོག་ཟ་རུལ་སུངས་ཀྱི་གནད་དོན་མང་པོ་ཡོད་པ་དང་། དེ་དག་ལ་ཁྲིམས་ལུགས་གཞིར་བཟུང་ཐག་གཅོད་བྱས་པའི་གནས་ཚུལ་བྱུང་ཡོད་པ་མ་ཟད། མི་མང་གི་སྣེ་ཁྲིད་ནས་ངོ་རྒོལ་གྱི་ལས་འགུལ་སྤེལ་བཞིན་པ་དང་། སྤེལ་རྒྱུའི་རང་དབང་དང་གོ་སྐབས་ཡོད་པ་འདི། རྒྱ་ནག་ལྟ་བུའི་རང་དབང་དང་མང་གཙོ་མེད་པར། མི་རེ་ཟུང་གིས་དབང་བསྒྱུར་བའི་སྤྱི་ཚོགས་ཤིག་དང་བསྡུར་ན་ཧ་ཅང་གཟི་བརྗིད་ཅན་ཞིག་ཏུ་གྱུར་ཡོད། དེར་བརྟེན་གཞུང་གི་འགོ་ཁྲིད་མཁན་སྐབས་སོ་སོར་མི་སུ་ཡིན་མིན་དང་། ཚོགས་པ་གང་ཡིན་མིན་ལ་མ་ལྟོས་པར་དོན་གྱི་བདག་པོ་ངོ་མ་དེ་རྒྱ་ཆེའི་མི་མང་ཡིན་པ་གསལ་པོར་གྱུར་པ་རེད། དེར་བརྟེན་འདིའི་ཕྱོགས་ནས་བསམ་ན་ཡིད་སྨོན་དང་བསྔགས་བརྗོད་བྱེད་འོས་པ་ཞིག་ཏུ་གྱུར་ཡོད།

མདོར་བསྡུས་ན་རྒྱ་གར་གྱི་སྤྱི་ཚོགས་ནང་གི་ནད་ཡམས་ཆེ་ཤོས་སུ་གྱུར་པ་དེ་ལྐོག་ཟ་རུལ་སུངས་ཡིན་པ་དང་། གཞུང་གི་དཔོན་རིགས་རྣམས་ཀྱི་སེམས་ངོར་ལྐོག་ཟ་རུལ་སུངས་ནི་མི་མང་ལ་ངོ་གནོང་དགོས་པ་ཞིག་ཏུ་ངོས་འཛིན་ཐོག  རྒྱ་གར་གྱི་སྤྱི་ཚོགས་ཆེན་པོ་འདི་ཡར་རྒྱས་སུ་མི་འགྲོ་བའི་འགག་རྩ་གཙོ་བོ་ཡིན་པར་ངོས་འཛིན་གསལ་པོ་དགོས་པ་དང་། ཁྲིམས་ཀྱིས་དབང་བསྒྱུར་བའི་སྤྱི་ཚོགས་ཤིག་ཡིན་པའི་ཆ་ནས་ཁྲིམས་ལུགས་གཏན་འབེབས་གྱིས་དབུས་གཞུང་དང་མངའ་སྡེའི་དཔོན་རིགས། ས་གནས་ཀྱི་ལས་བྱེད་ཆུང་ཙག་རིགས་ཡན་གྱི་ངོས་ནས་ལྐོག་ཟ་རུལ་སུངས་ཀྱི་བྱ་སྤྱོད་དེ། རྒྱུན་ལྡན་དང་ཡིན་ཤག་ཤག་མི་བྱེད་པར། མི་རེ་བཞིན་རང་ངོས་ནས་འགོག་ཐུབ་ན་རྒྱ་གར་ནི་འཛམ་གླིང་གི་མདུན་དུ་བསྐྱོད་ཐུབ་ངེས་རེད་སྙམ།།