བཀའ་ཁྲིའི་ཕྱག་རོགས་ཀྱི་གདམ་ཀ

མང་ཆེ་བ་ཞིག་གིས་བོད་ཀྱི་ལས་དོན་ལ་ཕན་ཐོགས་ཡོད་པའི་མི་སྣ་ཞིག་སླེབས་ཐུབ་མིན་ཙམ་གྱི་ཆེད་དུ་དོ་སྣང་བྱེད་པ་སོགས་དོ་སྣང་བྱེད་ཡུལ་འདྲ་མི་འདྲ་སྣ་ཚོགས་བྱེད་བཞིན་ཡོད་པ་རེད། བཀའ་བློན་ཁྲི་པ་ལ་མཚོན་ན་ལས་དོན་འགྲུབ་དང་མི་འགྲུབ་ཀྱི་ཚད་ཐིག་གཙོ་བོ་ཡང་། ཕྱག་རོགས་བཀའ་བློན་རྣམས་ཀྱི་ཤེས་ཡོན་དང་འཇོན་ཐང་གཅིག་སྒྲིལ་གྱི་ལས་དོན་བྱེད་ཐུབ་མིན་ཁོ་ན་རག་ལས་ཡོད་པ་རེད།

དེ་ལ་སྲིད་བྱུས་འཛིན་སྟངས་མི་འདྲ་བ་གཉིས་ཡོད་ངེས་རེད། ཡང་ན་བཀའ་བློན་ཁྲི་པ་མཆོག་གིས་གཞན་ལ་བརྟེན་མི་དགོས་པར་རང་ཉིད་ཀྱི་སྟོབས་ཤུགས་ཁོ་ན་བརྟེན་ནས་སྤྱི་པའི་ལས་དོན་སྒྲུབ་ཐུབ་པར་འབད་བརྩོན་གནང་སྲིད་པ་དེ་རེད། དེ་ལྟར་གནང་བའི་དབང་དུ་བཏང་ན་བཀའ་བློན་རྣམས་ཀྱང་ཤེས་ཡོན་དང་འཇོན་ཐང་། ཉམས་མྱོང་། དྲང་ཚུགས་ཡོད་མེད་ཁོ་ན་ལ་གཞི་འཛིན་དགོས་པ་ལས། མི་ཚང་ཆེ་ཆུང་སོགས་ཀྱི་འབྲེལ་བ་ལ་གཏན་ནས་ལྟོས་དགོས་དོན་མེད། དེ་ལྟར་གནང་ན་ནང་ཁུལ་སྲིད་དོན་གྱི་དཀའ་ངལ་ཆུང་ཙག་རིགས་ཀྱིས་དཀའ་ངལ་འཕྲད་སྲིད་ཀྱང་། ཆེ་ས་ནས་ལས་དོན་ལ་ནུས་པ་ཐོན་ཐུབ་པའི་རེ་བ་ཆེན་པོ་ཡོད། འདི་ནི་ད་ལྟའི་བཀའ་བློན་ཁྲི་པ་ལ་མཚོན་ན་གདམ་ཀ་དང་པོ་རུ་ངོས་འཛིན་མི་གནང་ཐབས་མེད་དུ་སྣང་།

ཡང་ན་ཡབ་གཞིས་དང་། བཀྲས་མཐོང་། རྒྱ་རི་སོགས་མི་ཚང་ཆེ་ཁག་གི་ནང་མི་དང་། ཡང་ན་དེ་དག་དང་ཐད་ཀར་འབྲེལ་ཡོད་ཀྱི་མི་སྣ་ཁག་ཅིག་བཀའ་བློན་དུ་བསྐོ་དགོས་པ་དང་། དེའི་སྟོབས་ཤུགས་ལ་བརྟེན་སྤྱི་པའི་ལས་དོན་སྒྲུབ་པའི་སྐབས་འགལ་རྐྱེན་ཉུང་བ་དང་ལས་དོན་འགྲུབ་པར་ཅུང་ནུས་པ་ཐོན་ཐུབ། འདི་ལྟར་གནང་ན་ནང་ཁུལ་གྱི་རྩོད་རྙོག་ཆུང་ངུའི་རིགས་མི་ཡོང་བར་ཕན་ཐོགས་ངེས་ཅན་ཡོང་བའི་རེ་བ་ཆེ་ཡང་། བཀའ་ཤག་གི་ཆིག་སྒྲིལ་གྱི་ནུས་པ་ཅི་ཙམ་ཡོང་ཐུབ་མིན་ད་དུང་དྲི་རྟགས་ཤིག་ཏུ་གྱུར་ཡོད། དེར་བརྟེན་བཀའ་བློན་ཁྲི་པའི་གདམ་ཀ་འདིའི་ཐོག་ལ་དགོངས་བཞེས་ག་ཚོད་ཅིག་གནང་གི་ཡོད་མེད་བཤད་ཚོད་ཐིག་དཀའ་ཡང་། གདམ་ཀ་འདི་ཡང་ང་ཚོའི་སྤྱི་ཚོགས་ཀྱི་གནས་སྟངས་ལ་གཞིགས་ན་བསམ་བློ་མི་གཏོང་ཀ་མེད་རེད།

གནད་དོན་འདི་ནི་བཀའ་བློན་ཁྲི་པའི་ལས་དོན་གྱི་གྲུབ་འབྲས་གང་དུ་འགྲོ་ཐུབ་མིན་གྱི་འགག་རྩ་གཙོ་བོ་ཡིན་པས་བསམ་བློ་ངེས་པར་དུ་གཏོང་དགོས། བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ལ་མཚོན་ན་བོད་མི་རིགས་ཀྱི་ཕུགས་ཀྱི་དགོས་མཁོ་ཁོ་ན་ལ་དམིགས་ནས་བཀའ་ཤག་གིས་བཟོ་འགོད་ཞུས་པ་དང་། བོད་མི་མང་སྤྱི་འཐུས་ལྷན་ཚོགས་ནས་སྤྱི་མོས་ཀྱིས་གཏན་ལ་ཕབ་པ་ཞིག་ཡིན་ཡང་། བོད་ཁྱིམ་ལྟ་བུ་ལ་མཚོན་ན་གཏན་ནས་དང་ལེན་གནང་མེད། དོན་དངོས་ཐོག་བོད་ཁྱིམ་གྱི་སློབ་ཕྲུག་ཕལ་ཆེ་བ་བོད་ནས་ཡོང་བ་ཤ་སྟག་ཡིན་པས། དེ་དག་གི་མདུན་ལམ་དང་བོད་མི་རིགས་ཀྱི་ལས་དབང་སོགས་ལ་བསམ་གཞིགས་ནན་པོ་བྱེད་དགོས་པ་ལས། གནས་སྐབས་དང་འཕྲལ་སེལ་གྱི་བསམ་བློ་ཙམ་གྱིས་ཕན་ཐོགས་རྒྱ་ཆེན་པོ་གང་ཡང་མེད།

སྐབས་འདིར་ཡང་གཞི་རིམ་ཤེས་ཡོན་གྱི་སྲིད་བྱུས་ལག་བསྟར་ཐུབ་མིན་ལ་གདེང་ཚོད་གང་ཡང་མེད་པ་དང་། བཀའ་ཁྲི་གསར་པ་ལ་མཚོན་ན་བཙན་བྱོལ་ནང་གི་སྲིད་དོན་པ་ཆེ་ཁག་གི་ངོ་གདོང་འཚོ་དགོས་པ་གལ་ཆེན་པོ་ཡིན་པའི་མཚོན་རྟགས་ཆུང་ངུ་ཞིག་ནི། སྤྱི་ཚོགས་ནང་བཀའ་ཟུར་མང་པོ་ཡོད་པ་དང་ལྷག་པར་དུ་དྷ་སའི་ཉེ་འཁོར་ཁོ་ན་རུའང་བཀའ་ཟུར་བདུན་བརྒྱད་ཅིག་ཡོད་མོད་བཀའ་ཁྲིའི་དམ་འབུལ་མཛད་སྒོའི་སྐབས་གཅིག་ཀྱང་ཕེབས་མེད། སྐབས་དེ་དུས་བཀའ་ཟུར་གྱི་མཚན་གནས་ཡོད་མཁན་རྒྱ་རི་རིན་པོ་ཆེ་ཁོ་ན་རེད། འདས་མ་ཐག་པའི་བཀའ་ཤག་ལ་བཀའ་ཟུར་རྣམས་ཀྱིས་འཕྱར་གྲུ་མཉམ་འདེགས་གནང་མེད་པ་མ་ཟད། ལྡོག་ཕྱོགས་སུ་གྱུར་པའང་ཅུང་ཙམ་རེ་བྱུང་ཡོད་པས། ཁོང་རྣམས་ལ་མཚོན་ན་སྤྱི་ཚོགས་ནང་ཤུགས་རྐྱེན་ངེས་ཅན་རེ་ཡོད་པ་སྨྲོས་མེད་རེད།

གོང་གསལ་གྱི་གནས་ཚུལ་འདི་དག་ལ་གཞིགས་ནས་བཀའ་བློན་ཁྲི་པའི་ཕྱག་རོགས་བཀའ་བློན་རྣམས་གདམ་ཀ་མ་ནོར་བའི་ཐོག་ནས་བསྐོ་དགོས་ཤིང་། གནད་དོན་འདིའི་ཐོག་ནས་སྤྱི་ཚོགས་ལྷིང་འཇགས་ལ་བསམ་བློ་གཏོང་དགོས་ལ། ལས་དོན་འགྲུབ་མིན་ལ་བསམ་བློ་གཏོང་དགོས། གཙོ་ཆེ་ཤོས་རྩ་དོན་གྱི་ཐོག་ལ་རྡོག་རྩ་གཅིག་སྒྲིལ་གྱི་ཐོག་ནས་འབད་བརྩོན་བྱེད་ཐུབ་མིན་དེ་ལ་དེ་བས་ཀྱང་བསམ་བློ་གཏོང་དགོས། དེར་བརྟེན་གནད་དོན་འདི་དག་གཞི་རྩར་བཟུང་ནས་ཕྱག་རོགས་བཀའ་བློན་རྣམས་བསྐོ་གཞག་བྱེད་སྟངས་མ་ནོར་བ་གནང་དགོས་པ་དེ་གལ་ཆེ་ཤོས་སུ་གྱུར་ཡོད། འདིའི་ཐོག་ལ་དགོངས་པ་བཞེས་མ་ཐུབ་ན་ལས་དོན་ཚང་མའི་ཐོག་ལ་ནུས་པ་ཐོན་ཐུབ་མིན་གྱི་འགག་རྩ་ཆེན་པོ་ཞིག་འཐུས་ཤོར་དུ་སོང་བ་རེད།།