༧གོང་ས་མཆོག་ཟ་ཧོར་མཚོ་པདྨར་༧ཞབས་སོར་འཁོད་པ།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཟ་ཧོར་མཚོ་པདྨ་ཅན་དུ་འཛི་སྒར་གྲུབ་དབང་བླ་མ་དབང་རྡོར་རིན་པོ་ཆེས་གསར་བཞེངས་གནང་བའི་གུ་རུ་རིན་པོ་ཆེའི་སྐུ་བརྙན་དང་། རི་མགོ་སྤྲུལ་སྐུ་རིན་པོ་ཆེ་མཆོག་གིས་གསར་བཞེངས་གནང་བའི་ཟངས་མདོག་དཔལ་རིའི་ཕོ་བྲང་གཉིས་ཀྱི་དབུ་འབྱེད་རབ་གནས་ཀྱི་ཆེད་དུ་ཕྱི་ཟླ་༤ པའི་ཚེས་༡ ཉིན་གྱི་ཕྱི་དྲོ་ཆུ་ཚོད་༢ དང་ཕྱེད་ཙམ་གྱི་དུས་སུ་ཞབས་སོར་འཁོད་ཡོད་པ་རེད།
དེ་ཡང་གོང་ཚེས་ཉིན་༧གོང་ས་མཆོག་ཐོག་མ་མཚོ་པདྨའི་འགྲམ་དུ་ཡོད་པའི་འབྲི་གུང་བཀའ་བརྒྱུད་བླ་མ་དབོན་སྤྲུལ་རིན་པོ་ཆེའི་དགོན་པ་རུ་ཞབས་སོར་འཁོད་ཡོད་པ་དང་། དེའི་རྗེས་སུ་འབྲུག་པ་བཀའ་བརྒྱུད་ཀྱི་གདན་ས་འཛི་སྒར་དགོན་པའི་གུ་རུ་ལྷ་ཁང་དུ་ཆིབས་བསྒྱུར་བསྐྱངས་ཡོད་པ་རེད། ཐོག་མའི་མཛད་རིམ་ལྟར་ན་ཉིན་འདིར་གུ་རུ་རིན་པོ་ཆེའི་སྣང་བརྙན་གསར་བཞེངས་ཟིན་པ་དེ་རབ་གནས་མཛད་རྒྱུའི་དུས་ཚོད་གཏན་འཁེལ་བྱུང་ཡོད་ནའང་། སྐུ་བརྙན་དེ་དང་འབྲེལ་བའི་གླེང་རྙོག་ཅིག་ཁྲིམས་ཐོག་ནས་གཏན་འཁེལ་དགོས་པ་ཡོད་པར་བརྟེན་ཉིན་འདི་རེས་གཟའ་ཉི་མ་ཡིན་པས་ཐག་གཅོད་ཡོང་ཐབས་མེད་ཀྱང་། ཕྱི་ཚེས་༢ ཉིན་རེས་གཟའ་ཟླ་བ་ཡིན་པས་ཁྲིམས་ཁང་ནས་རབ་གནས་ཆོག་པའི་ཆོག་མཆན་གནང་རྒྱུའི་རེ་བ་ཡོད་འདུག
༧གོང་ས་མཆོག་ཆིབས་བསྒྱུར་སྐབས་སེར་སྦྲེང་སྤོས་སྣེ་སྤྱན་རྒྱ་དང་བཅས་གུ་རུ་རིན་པོ་ཆེའི་འགྲམ་གྱི་བཞུགས་གནས་ཞབས་སོར་འཁོད་པ་དང་། ཕྱི་དྲོ་མཛད་རིམ་དམིགས་བསལ་གང་ཡང་མེད་པ་རེད། སྐབས་འདིར་ཆོས་རིག་བཀའ་བློན་པདྨ་ཆོས་འབྱོར་མཆོག་དང་། བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་དབུས་སྤྱི་འཐུས་རྒྱུན་ལས་དང་སྤྱི་འཐུས་ཁག་ཅིག་སོགས་བླ་སྤྲུལ་དང་མི་མང་གང་མང་ཕེབས་ཡོད་པ་རེད།
ཕྱི་ཚེས་༢ ཉིན་གྱི་སྔ་དྲོ་མཚོ་པདྨ་ཅན་གྱི་ཉེ་འགྲམ་དུ་མི་མང་ལ་ཚེ་དབང་བཀའ་དྲིན་སྩོལ་རྒྱུ་དང་། ཕྱི་དྲོ་རི་མགོ་མཆོག་སྤྲུལ་རིན་པོ་ཆེས་གསར་བཞེངས་མཛད་པའི་ཟངས་མདོག་དཔལ་རིའི་ཕོ་བྲང་དབུ་འབྱེད་མཛད་སྒོ་བསྐྱང་རྒྱུ་ཡིན་འདུག།
