བཙན་བྱོལ་བོད་མིར་འཕྲོད་བསྟེན་ལྟ་སྐྱོང་ལས་གཞི་འགོ་འཛུགས།
ཟླ་འདིའི་ཕྱི་ཚེས་༢ ཉིན་དྷ་ས་གངས་སྐྱིད་ལྷག་པ་ཚེ་རིང་ཚོགས་ཁང་དུ་འཕྲོད་བསྟེན་ལས་ཁུངས་དང་། བོད་མིའི་དྭང་བླང་འཕྲོད་བསྟེན་ཚོགས་པ་གཉིས་ཀྱིས་གསར་འགོད་ལྷན་ཚོགས་ཤིག་བསྐོང་ཏེ། བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི་དེ་ཟླ་འདིའི་ཚེས་༡ ནས་འགོ་འཛུགས་བྱེད་རྒྱུ་ཡིན་ཞེས་བརྗོད་སོང་།
གསར་འགོད་ལྷན་ཚོགས་དེའི་ཐོག འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་དང་། འཕྲོད་བསྟེན་དྲུང་ཆེ་ཤོད་ཟུར་བསོད་ནམས་ཆོས་འཕེལ། ལས་གཞིའི་འགན་འཛིན་སྦྲ་གཉིས་ཚེ་རྒྱལ་བཅས་ཆེད་ཕེབས་ཡོད་པ་དང་། འཕྲོད་བསྟེན་ལས་ཁུངས་ནས་སྤེལ་བའི་གསལ་བསྒྲགས་དེའི་ནང་འཁོད་དོན། བཙན་བྱོལ་བོད་མིའི་སྤྱི་ཚོགས་ནང་ཁྱིམ་ཚང་རེ་རེའི་ཡོང་འབབ་ཀྱི་བརྒྱ་ཆ་༡༤ ཙམ་སྨན་བཅོས་ཁོ་ནའི་ཆེད་གཏོང་དགོས་ཆགས་ཀྱི་ཡོད་པ་མ་ཟད། ནད་གཞི་ཚབས་ཆེན་ཕོག་སྟེ་སྨན་ཁང་དུ་ཉལ་སྡོད་སྨན་བཅོས་བྱ་དགོས་བྱུང་སྐབས། དེ་དག་གི་སྨན་གྲོན་གཏོང་རྒྱུ་མེད་པའི་སེམས་ངལ་ནི་དེ་བས་ཀྱང་ཆེ་བ་ཞིག་འབྱུང་གི་ཡོད་པ་སྨོས་མ་དགོས། དེས་ན་ད་ལྟའི་གནས་སྐབས་ཀྱི་སྨན་བཅོས་གཙོ་བོར་བཟུང་ནས་ལམ་ལུགས་འདིར་བསྒྱུར་བཅོས་གཏོང་དགོས་པར་གཟིགས་ཏེ། བོད་མིའི་དྭངས་བླང་འཕྲོད་བསྟེན་ཚོགས་པའི་འགན་ཁུར་འོག་བོད་མི་ཡོངས་ལ་རིམ་པ་གཉིས་པ་དང་གསུམ་པའི་སྨན་བཅོས་མཐུན་འགྱུར་སྤྲོད་ཆེད་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི་ཞེས་པའི་ཉེན་སྲུང་ལྟ་བུའི་ལས་གཞི་འདིར་གསར་འཛུགས་ཞུས་པ་ཞིག་ཡིན་པ་རེད།
འཕྲོད་བསྟེན་བཀའ་བློན་ནས་གསར་འགོད་གསལ་བསྒྲགས་ནང་གསུང་དོན། ལས་གཞི་འདི་ནི་སྨན་བཅོས་ཉེན་སྲུང་གི་མཐུན་རྐྱེན་བསྐྲུན་རྒྱུའི་ངོ་བོའི་ཐོག་བཙན་བྱོལ་བོད་མིའི་སྤྱི་ཚོགས་ཀྱི་འཕྲོད་བསྟན་སྲུང་སྐྱོབ་དང་གོང་མཐོར་གཏོང་ཐབས་ཀྱི་ལས་གཞི་གལ་གནད་ཆེ་བ་ཞིག་ཡིན་ཞེས་ལས་གཞི་དེའི་གལ་གནད་སྐོར་དང་ལས་གཞི་འདིར་ཚང་མ་མཉམ་ཞུགས་བྱེད་དགོས་གལ་ཆེ་བ་སོགས་ནན་ཏན་གྱིས་འབོད་སྐུལ་དང་སྦྲགས་ནས་གསུངས་སོང་། ལས་གཞི་འདིས་རྒྱ་གར་ནང་ཡོད་པའི་བཙན་བྱོལ་བ་སྤྱི་ཚོགས་ཡོངས་ལ་ཁྱབ་ཆེའི་སྔོན་འགོག་དང་ནད་བཅོས་གཉིས་ཀ་གསོ་རིག་དང་ཕྱི་ལུགས་གཉིས་ཟུང་འབྲེལ་ཐོག་ནས་འཕྲོད་བསྟེན་བལྟ་སྐྱོང་ནུས་ཚད་ལྡན་པ་སྐྲུན་འཆར་ཡོད་པ་རེད།
ལས་གཞི་འདིའི་ཁེ་ཕན་ཐོབ་ཆེད་འཕྲོད་བསྟེན་ལས་ཁུངས་སུ་ནང་མི་གཉིས་ནས་ལྔ་བར་ཡོད་པའི་ཁྱིམ་ཚང་རེས་ལོ་རེར་ཧིན་སྒོར་༣༥༦༥ དང་། ནང་མི་གཅིག་ཡིན་ན་ལོ་རེར་ཧིན་སྒོར་༩༥༠ རེ་བསྡུས་ཏེ་དེབ་འགོད་བྱས་ན། དོ་བདག་སྨན་ཁང་ལ་ཉལ་དགོས་བྱུང་བའི་གནས་སྐབས་སུ་སྨན་བཅོས་ཆེད་ལོ་རེར་ནང་མི་རེ་ལ་ཧིན་སྒོར་མཐོ་ཚད་འབུམ་གཅིག་དང་། སྒེར་པར་ཁྲི་ལྔ་རེ་འཐོབ་ཀྱི་ཡོད་པ་རེད།
ལས་གཞི་འདིར་བོད་མིའི་སྤྱི་ཚོགས་ནང་ཆེས་ཉམ་ཐག་རིགས་ལ་སྨན་བཅོས་ཀྱི་འགྲོ་གྲོན་ཆ་ཚང་མཁོ་སྤྲོད་ཐུབ་པ་བྱ་རྒྱུ་མ་ཟད། གཞན་རྣམས་ལའང་ཚད་མཐོའི་མཐུན་འགྱུར་སྦྱོར་རྒྱུའི་ལས་གཞི་ཁྱད་པར་བ་ཞིག་ལ་ངོས་འཛིན་ཞུ་ཆོག་ཅེས་འཕྲོད་བསྟེན་བཀའ་བློན་ནས་འགྲེལ་བརྗོད་གནང་སོང་།
ལས་གཞི་འདི་ནི་སྤྱི་སྒེར་མཉམ་སྦྲེལ་གྱི་བཀོད་སྒྲིག་འོག་བཙན་བྱོལ་བོད་མི་ཡོངས་ལ་སྨན་བཅོས་འགྲོན་གྲོན་དང་། ཛ་དྲག་སྨན་བཅོས་བྱ་དགོས་སོགས་ཀྱི་དཀའ་ངལ་ཡོད་རིགས་ལ་དཔལ་འབྱོར་གྱི་རྒྱབ་རྟེན་དང་ཉེན་སྐྱོབས་ཆེད་སྨན་བཅོས་མཐུན་རྐྱེན་མཁོ་སྤྲོད་བྱ་རྒྱུ་ཡིན་པ་རེད།
འདི་གའི་གསར་ཁང་ནས་སྨན་བཅོས་ལྟ་སྐྱོང་གི་ལས་གཞི་ཞེས་པའི་གོ་དོན་དང་ཁྱབ་ཚད་ཇི་ཡོད་དྲིས་པར། འཕྲོད་བསྟེན་བཀའ་བློན་མཆོག་ནས་སྨན་བཅོས་ལྟ་སྐྱོང་ཞེས་པ་དོན་ནི། ལས་གཞི་འདིའི་ཚོགས་མི་གང་ཞིག་སྨན་ཁང་ཞིག་ལ་ཆུ་ཚོད་༢༤ ལྷག་སྨན་ཁང་ལ་ཉལ་དགོས་བྱུང་བའམ། སྨན་ཁང་ནང་ནད་གཞི་གང་ཞིག་ལ་བརྟག་དཔྱད་རིམ་པ་གང་འདྲ་བྱུང་བ་ཡིན་ནའང་། སྨན་ཁང་ལ་གནས་པའི་རིང་སྨན་གྱི་འགྲོ་སོང་ཚད་གཞི་མཐོན་པོ་གཏོང་དགོས་བྱུང་ན། ནང་མི་གཅིག་ཅན་ལ་ཧིན་སྒོར་ཁྲི་ལྔ་དང་། ཁྱིམ་ཚང་ལ་འབུམ་གཅིག་འཐོབ་རྒྱུ་ཡོད་པ་རེད་ཅེས་དང་སྨན་བཅོས་ལྟ་སྐྱོང་འདི་ནི་སེམས་ཁམས་དང་ལུས་ཁམས་གཉིས་ཀར་བརྒྱ་ལྔ་བཅུ་ལྔ་བཅུར་ཁྱབ་པ་ཡིན་ཅེས་འགྲེལ་བརྗོད་གནང་སོང་།
ལས་གཞི་འདི་ནི་འཇར་མི་ནིའི་འཕྲོད་བསྟེན་འགན་སྲུང་ཚོགས་པ་དང་། མལ་ཊེ་སེར་རྒྱལ་སྤྱི་རོགས་ཚོགས། དཔལ་འབྱོར་མཉམ་སྦྲེལ་དང་ཡར་རྒྱས་མཐུན་ཚོགས་ཁང་བཅས་ནས་མ་དངུལ་འགྲོ་གྲོན་དང་། ལས་གཞི་གྲ་སྒྲིག་དང་ལམ་སྟོན་སོགས་དངོས་ཤུགས་བརྒྱུད་གསུམ་ནས་རོགས་སྐྱོར་ཐོག་ལས་གཞི་ཚུགས་ཐུབ་ཡོད་འདུག །
