གནས་ཆེན་མཚོ་པདྨར་ཟངས་མདོག་དཔལ་རིའི་ཕོ་བྲང་དབུ་འབྱེད།
ཟླ་འདིའི་ཕྱི་ཚེས་༢ ཉིན་གུ་རུ་རིན་པོ་ཆེས་མེ་དཔུང་མཚོ་རུ་བསྒྱུར་བའི་གནས་ཆེན་ཟ་ཧོར་མཚོ་པདྨ་ཅན་དུ། སྔ་དྲོ་༧གོང་ས་མཆོག་གིས་མི་མང་ལ་གསུང་ཆོས་དང་ཚེ་དབང་བསྩལ་ཡོད་པ་དང་། དེའི་རྗེས་སུ་རི་མགོ་སྤྲུལ་སྐུས་གསར་བཞེངས་གནང་བའི་ཟངས་མདོག་དཔལ་རིའི་ཕོ་བྲང་དེ་ཉིད་བོད་གཞིས་བྱེས་གཉིས་ཀྱི་མགོན་སྐྱབས་སྤྱི་ནོར་༧གོང་ས་༧སྐྱབས་མགོན་མཆོག་གིས་དབུ་འབྱེད་མཛད་ཡོད་པ་རེད།
དེ་ཡང་ཕྱི་ཚེས་༢ ཉིན་གྱི་ཞོགས་པ་༧གོང་ས་མཆོག་ཟ་ཧོར་མཚོ་པདྨ་ཅན་གྱི་ཉེ་འགྲམ་གསུང་ཆོས་ར་བའི་དབུ་གཡབ་འོག་ཆིབས་བསྒྱུར་བསྐྱངས་ནས་སྔ་དྲོ་མི་མང་ལ་གསུང་ཆོས་དང་། དགེ་བསྙེན་གྱི་བསླབ་སྡོམ། ཚེ་དབང་བཅས་བསྩལ་གྲུབ་རྗེས། སྔ་འགྱུར་རྙིང་མ་པའི་བླ་ཆེན་རི་མགོ་སྤྲུལ་སྐུ་རིན་པོ་ཆེས་ཟངས་མདོག་དཔལ་རིའི་རྟེན་དང་བརྟེན་པ་བཅས་གསར་བཞེངས་ལེགས་གྲུབ་བྱུང་བའི་མཛད་སྒོར་༧གོང་ས་༧སྐྱབས་མགོན་ཆེན་པོ་མཆོག་གདན་ཞུས་ཆིབས་བསྒྱུར་དང་འབྲེལ་ཟླ་འདིའི་ཕྱི་ཚེས་༢ དང་། བོད་ཟླ་༢ པའི་ཡར་ངོས་ཚེས་བཅུའི་ཉིན་དབུ་འབྱེད་བསྐྱངས་ཡོད་པ་རེད། ཐོག་མ་༧གོང་ས་མཆོག་སྤོས་སྣེ་སྤྱན་རྒྱ་མཆོད་རྫས་སྣ་ཚོགས་ཐོགས་པའི་དགེ་འདུན་པ་རྣམས་ཀྱིས་༧གོང་ས་མཆོག་གཟིམ་ཆུང་དུ་གདན་ཞུས་གྲུབ་པ་དང་། སྐུ་མགྲོན་རྣམས་ལ་ཉིན་གུང་གསོལ་ཚིགས་འདེགས་འབུལ་ཞུས།
ཉིན་གུང་ཆུ་ཚོད་༡།༢༠ ཐོག་༧གོང་ས་༧མཆོག་སྤོས་སྣེ་སྤྱན་རྒྱས་གདན་ཞུས་ཐོག་དཔལ་རིའི་ཕོ་བྲང་དུ་ཆིབས་བསྒྱུར་གྱིས་རྟེན་འབྲེལ་དར་ཚོན་གཅོད་འབྲེག་བཀའ་དྲིན་བསྐྱངས། གཙུག་ལག་ཁང་དུ་ཞབས་སོར་འཁོད་ནས་སྣང་གསལ་མར་མེའི་ཞལ་དབྱེ་དང་འབྲེལ། བཞུགས་ཁྲིར་ཞབས་སོར་འཁོད་མཚམས་རི་མགོ་སྤྲུལ་སྐུ་རིན་པོ་ཆེས་མཎྜལ་རྟེན་གསུམ་འདེགས་འབུལ་ཞུས། རྟེན་འབྲེལ་ཤིས་ཚིག་དང་སྨོན་ལམ་རིགས་གྲུབ་རྗེས་རི་མགོ་མཆོག་སྤྲུལ་རིན་པོ་ཆེས་ཟངས་མདོག་དཔལ་རིའི་ཕོ་བྲང་དེ་ཉིད་གསར་དུ་བཞེངས་དགོས་པའི་དམིགས་ཡུལ་དང་། བཞེངས་པའི་ལོ་རྒྱུས་སྐོར་གསུང་བཤད་གནང་། དེ་བཞིན་དབྱིན་དྲུང་སློབ་དཔོན་ཀུན་བཟང་རྡོ་རྗེ་ལགས་ཀྱིས་དབྱིན་ཡིག་ཐོག་ཕོ་བྲང་གསར་བཞེངས་དགོས་པའི་དམིགས་ཡུལ་དང་ལོ་རྒྱུས་ངོ་སྤྲོད་མདོར་བསྡུས་ཞུས།
དེའི་རྗེས་སུ་དཔལ་བོད་གཞུང་ཆོས་རིག་བཀའ་བློན་པདྨ་ཆོས་འབྱོར་མཆོག་ནས་བོད་གཞུང་གི་ཚབ་ཞུས་ནས་གསུང་བཤད་གནང་བ་དང་། སྔ་འགྱུར་མཐོ་སློབ་འདིའི་མཁན་སློབ་བསླབ་པ་མཐར་སོན་པ་རྣམས་ལ་ཆོས་དོན་བཀའ་བློན་པདྨ་ཆོས་འབྱོར་མཆོག་གིས་ཕྱག་ཁྱེར་བསྩལ་ཡོད་པ་རེད། ཟངས་མདོག་དཔལ་རིའི་སྦྱིན་བདག་དང་། འཆར་འགོད་པ། ལྷ་བཟོ། ལས་དཔོན་བཅས་ལའང་དམིགས་བསལ་ལེགས་སྐྱེས་གསོལ་སྩལ་དང་། ༧གོང་ས་མཆོག་གིས་སངས་རྒྱས་ཀྱི་བསྟན་པ་ལུང་དང་རྟོགས་པ་ལ་རག་ལས་པ་དང་། དེ་འཛིན་སྐྱོང་སྤེལ་གསུམ་བྱེད་པར་དགེ་འདུན་པའི་སྡེ་ཐུགས་མཐུན་ཁྲིམས་གཙང་དགོས་སྐོར་སོགས་བཀའ་སློབ་བཀའ་དྲིན་བསྐྱངས་པའི་རྗེས། མཁན་པོ་ཨོ་རྒྱན་རིག་འཛིན་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ནས་མཛད་སྒོ་ལེགས་པར་གྲུབ་ཡོད་པ་རེད།
༧གོང་ས་མཆོག་མཛད་སྒོ་གྲུབ་པ་དང་། བདུད་འཇོམས་འཇིགས་བྲལ་ཡེ་ཤེས་རྡོ་རྗེ་མཆོག་གིས་གསར་བཞེངས་གནང་བའི་སྔ་འགྱུར་རྙིང་མ་པའི་དགོན་པ་རུ་ཆིབས་བསྒྱུར་བསྐྱངས་ཡོད་པ་རེད། མཚོ་པདྨ་ཅན་གྱི་སློབ་དཔོན་གུ་རུ་རིན་པོ་ཆེའི་གནས་ཆེན་བྱིན་རླབས་ཅན་ཞིག་ཡིན་པ་དང་། དེ་ཡང་སློབ་དཔོན་གུ་རུ་རིན་པོ་ཆེ་ཉིད་ཟ་ཧོར་རྒྱལ་པོས་གསོན་བསྲེག་མཛད་པ་དང་། ཞག་བདུན་གྱི་རྗེས་སུ་བལྟ་བའི་སྐབས་མེ་དཔུང་མཚོ་རུ་བསྒྱུར་ནས་པད་སྡོང་གི་དབུས་སུ་སྐུལ་ཟིལ་བ་ཁྲོམ་མེར་བཞུགས་པར་གྲགས་པའི་ཟ་ཧོར་མཚོ་པདྨ་ཅན་ཞེས་ཐོགས་པ་ཞིག་རེད།།
