རྫོགས་ཆེན་དགོན་པར་༧གོང་ས་མཆོག་གི་སྐུ་པར་སྒྲིག་གཤོམ།
ཕྱི་ཟླ་༣ ཚེས་༢༩ ཉིན་བོད་ནང་གི་རྫོགས་ཆེན་དགོན་པར་ཕུར་པ་རྡོ་རྗེ་གཞོན་ནུའི་གར་འཆམ་ཉིན་༧གོང་ས་མཆོག་གི་སྐུ་པར་སྒྲིག་གཤོམ་བྱས་པར་བརྟེན། རྒྱ་ནག་གཞུང་གིས་དམ་དྲག་བྱས་ཡོད་པ་རེད།
ཟླ་འདིའི་ཚེས་༣ ཉིན་འབྲེལ་ཡོད་ནས་ཁུངས་ལྡན་གནས་ཚུལ་འབྱོར་གསལ་ལྟར་ན། ཁམས་རྫོགས་ཆེན་དགོན་དུ་རྫོགས་ཆེན་སྐུ་ཕྲེང་ལྔ་པ་ཐུབ་བསྟན་ཆོས་ཀྱི་རྡོ་རྗེའི་སྐུ་རིང་ལ་དབུ་འཛུགས་གནང་སྟེ། ལོ་ལྟར་ཕུར་པའི་སྒྲུབ་མཆོད་ཉིན་བདུན་དང་གར་འཆམ་ཉིན་བཞིར་གནང་སྲོལ་ཡོད་པ་ལྟར། འདི་ལོའི་ཕྱི་ཟླ་༣ པའི་ཚེས་༡༩ སྟེ་བོད་དང་པོའི་ཚེས་༢༧ ཉིན་ཕུར་ཆེན་སྒྲུབ་མཆོད་རྗེས་སུ་ཕུར་པ་རྡོ་རྗེ་གཞོན་ནུའི་གར་འཆམ་ཉིན། སྔར་ལས་ལྷག་པའི་མངོན་གསལ་དོད་པོའི་སྒོ་ནས་༸རྒྱལ་བ་རིན་པོ་ཆེའི་སྐུ་པར་དགོན་པའི་འཆར་རྭར་བཞུགས་ཁྲི་མཐོན་པོར་བརྩེགས་པར་ཞོགས་པའི་ཆུ་ཚོད་༧ པར་སྤྱན་འདྲེན་ཞུས་ཤིང་། ཕྱི་དྲོ་ཆུ་ཚོད་༥ པའི་བར་མི་མང་གིས་མཇལ་དར་འཐེན་པ་དང་གསོལ་འདེབས་སྨོན་ལམ་བྱས་ཡོད་འདུག་པར་བརྟེན། ས་གནས་རྒྱ་གཞུང་གི་ལས་བྱེད་མི་སྣ་སླེབས་ནས་ཕྱིར་བསྡུ་བྱེད་དགོས་པ་དང་། མུ་མཐུད་ནས་བྱ་སྤྱོད་དེ་འདྲ་བྱས་ན་འཆམ་ཆེན་བཀག་འགོག་བྱེད་རྒྱུ་ཡིན་པའི་ཉེན་བརྡ་བཏང་སྟེ་བཀག་འགོག་བྱས་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན་སྲོལ་རྒྱུན་ལྟར་ཕུར་པའི་སྒྲུབ་མཆོད་དེ་ནི་བོད་ཟླ་དང་པོའི་ཚེས་༡༩ ནས་ཉིན་བདུན་གྱི་རིང་ལ་འདོན་སྲོལ་ཡོད་པ་དང་། ཚེས་༢༧ ཉིན་ཕུར་པ་རྡོ་རྗེ་གཞོན་ནུའི་གར་འཆམ་དང་། ཚེས་༢༨ ཉིན་གནས་ཆུང་ཆོས་སྐྱོང་དང་། ཚེས་༢༩ ཉིན་རྒྱལ་མདོས་འཕེན་པ་དང་། གནམ་གང་ཉིན་གླིང་རྗེ་གེ་སར་འཆམ་སྲོལ་ཡོད་པ་རེད་འདུག་ལ། འདི་ལོར་སྒྲུབ་ཆེན་དེའི་དབུ་བཞུགས་བླ་མ་རྫོགས་ཆེན་གླིང་བླའམ་རིན་པོ་ཆེ་ཡིན་འདུག་པ་དང་། དད་ལྡན་མང་ཚོགས་ཀྱིས་ཉིན་མོ་དེར་བར་སྣང་ནས་རྟགས་མཚན་ངོ་མཚར་བ་མཐོང་བ་སོགས་ཀྱི་གནས་ཚུལ་ཡང་བྱུང་ཡོད་པ་རེད་འདུག གནས་ཚུལ་དེ་འདྲ་ལ་བརྟེན་ནས་དེང་སྐབས་རྫོགས་ཆེན་དགོན་པར་དམ་དྲག་བྱེད་བཞིན་པ་དང་། རྫོགས་ཆེན་གླིང་བླ་རིན་པོ་ཆེར་ཡང་ཉེན་ཁ་ཡོད་སྲིད་པའི་སེམས་འཚབ་བྱེད་ཀྱི་ཡོད་འདུག་ནའང་། ས་གནས་སུ་བརྡ་འཕྲིན་གྱི་བརྒྱུད་ལམ་བཀག་ཟིན་པས་གནས་ཚུལ་ཞིབ་ཕྲ་གོ་ཡིི་མི་འདུག་ཅེས་བརྗོད་སོང་། མེ་སོར་གསར་འགོད་པས།
