བོད་མདོ་སྨད་གསང་ཆུ་རྫོང་ཁོངས་ནས་བོད་མི་དམར་གསོད།

བོད་མདོ་སྨད་གསང་ཆུ་རྫོང་ཁོངས་ཨམ་མཆོག་ཤང་ནས་ཡིན་པའི་བོད་མི་རྟ་པོ་ཞེ་པ་ཞིག་ལ་རྒྱ་གཞུང་གི་ཉེན་རྟོག་པས་མེ་མདའ་བརྒྱབ་ནས་བསད་ཡོད་འདུག

དེ་ཡང་ཟླ་འདིའི་ཕྱི་ཚེས་༩ ཉིན་ཨེ་ཤ་ཡ་རང་རླུང་འཕྲིན་ཁང་ལ། ཁོང་གསོད་དགོས་པའི་རྒྱུ་མཚན་ནི། ལོ་སྔོན་མར་རྒྱ་ནག་གཞུང་གི་སྤྱི་བདེ་ལས་ཁུངས་དང་འབྲེལ་བ་ཡོད་པའི་མདོ་སྨད་བླ་བྲང་གི་ཚོང་ཁང་ཞིག་གི་ནང་ནས། གསེར་བརྐུས་ཡོད་པའི་དོགས་གཞིའི་འོག ཉེ་ཆར་གསང་ཆུ་རྫོང་གི་ཉེན་རྟོག་པ་ཁག་ཅིག་གིས་ཉེན་རྟོག་པའི་སྒྲིག་ཆས་མ་གྱོན་ཏེ། ཁོང་འཛིན་རྩིས་བྱེད་སྐབས། ཁོང་གིས་རྒྱ་གཞུང་གི་ཉེན་རྟོག་པ་གཉིས་ལ་གྲི་བཙུགས་པ་དང་། སྐབས་དེ་རང་ལ་རྒྱ་གཞུང་གི་ཉེན་རྟོག་པས་མེ་མདའ་བརྒྱབ་སྟེ་ཁོང་བསད་ཡོད་འདུག

དེ་བཞིན་ལོ་སྔོན་མར་ཡང་ཕྱི་ཟླ་༡ པོའི་ནང་དུའང་ཨ་མཆོག་ཁུལ་གྱི་བོད་མི་ཞིག་གིས་གསེར་བརྐུས་ཡོད་པའི་དོགས་གཞིའི་འོག རྒྱ་གཞུང་གི་ཉེན་རྟོག་པས་མེ་མདའ་བརྒྱབ་ནས་བསད་ཡོད་འདུག འོན་ཀྱང་ཁོང་གཉིས་ཀྱིས་གསེར་བརྐུས་ཡོད་པའི་དོགས་པ་བྱུང་བ་ཙམ་ལས། རྐུན་མ་ཡིན་པའི་ཁུངས་སྐྱེལ་ར་སྤྲོད་གང་ཡང་མེད་པ་དང་། ཐེངས་འདིའི་དོན་རྐྱེན་དེས་མ་ཚད་འདས་པའི་ཟླ་བ་དྲུག་བདུན་ཞིག་གི་ནང་ལ། གསང་ཆུ་རྫོང་ཨ་མཆོག་ཤང་ཁུལ་གྱི་བོད་མི་༣ རྒྱ་གཞུང་གི་ཉེན་རྟོག་པས་བསད་ཡོད་པའི་གནས་ཚུལ་ཡང་ཐོན་ཡོད་པ་རེད།

ད་རེས་ཀྱི་དོན་རྐྱེན་དེ་བྱུང་རྗེས་ཨ་མཆོག་ཁུལ་གྱི་བོད་མི་མང་པོ་ཞིག་གསང་ཆུ་རྫོང་གི་ཕྱོགས་སུ་མཛོམས་ཏེ་ངོ་རྒོལ་ཡར་ལངས་བྱེད་རྩིས་བྱས་སྐབས། ཁུལ་དེའི་བླ་ཆེན་ཁག་ཅིག་གིས་མི་མང་རྫོང་ཐོག་ཏུ་འགྲོ་མ་བཅུག་པར། བོད་མི་དང་རྒྱ་གཞུང་གི་ཉེན་རྟོག་པའི་དབར་འདུམ་སྒྲིག་བྱས་ཏེ། མཐར་རྒྱ་གཞུང་གི་ཉེན་རྟོག་པས་བསད་པའི་བོད་མི་རྟ་པོ་བསད་པའི་གུན་གསབ་ཆེད་ནང་མིར་རྒྱ་གཞུང་གིས་རྒྱ་སྒོར་ཁྲི་༢༠ སྤྲོད་རྒྱུ་བྱས་ཡོད་པ་རེད། །