བོད་ཀྱི་ཁོར་ཡུག་སྐོར་ལ་མཁས་པའི་བགྲོ་གླེང་།
ཟླ་འདིའི་ཚེས་༡༡ ཉིན་བཀའ་ཁྲི་མཁས་དབང་བློ་བཟང་སེངྒེ་མཆོག་དབུ་བཞུགས་ཐོག་འཛམ་གླིང་གི་སྣེ་གསུམ་པ་བོད་དང་དེའི་གོ་ལའི་གལ་གནད་ཅེས་པའི་བརྗོད་གཞིའི་འོག་ཉིན་གཅིག་གི་མཁས་པའི་བགྲོ་གླེང་གི་ཚོགས་འདུ་ཞིག་དྷ་ས་གངས་སྐྱིད་སྤྱི་ཐབ་ཚོགས་ཁང་དུ་འཚོགས་ཡོད་པ་རེད།
ཚོགས་འདུ་དེ་བོད་ཀྱི་སྲིད་ཇུས་ཉམས་ཞིབ་ཁང་གི་གོ་སྒྲིག་འོག བོད་ཀྱི་ཁོར་ཡུག་དང་འབྲེལ་བའི་མཁས་པའི་ལྷན་ཚོགས་ཤིག་ཡིན་པ་དང་། ཉམས་ཞིབ་ཁང་དེའི་ལས་བྱེད་བསྟན་འཛིན་པདྨ་ལགས་ཀྱིས་ཚོགས་འདུ་ངོ་སྤྲོད་བྱས་པ་དང། ཚོགས་འདུ་དེའི་ཐོག་བོད་དང་། རྒྱ་གར། དེ་བཞིན་རྒྱལ་སྤྱིའི་མཁས་པ་ཁག་ཅིག་གིས་རྒྱ་ནག་གིས་བོད་ལ་འཛིན་པའི་སྲིད་ཇུས་ཀྱི་གནོན་ཤུགས་དང་། བོད་ཀྱི་ཁོར་ཡུག་ལ་བརྟེན་ནས་གོ་ལའི་གནམ་གཤིས་ལ་འགྱུར་ལྡོག བོད་ཀྱི་ཁོར་ཡུག་གི་གནད་དོན་རྐྱེན་པས་རྒྱལ་སྤྱིའི་མི་མང་གི་དོ་སྣང་སོགས་ཀྱི་བརྗོད་གཞིའི་ཐོག་བགྲོ་གླེང་བྱས་ཡོད་པ་རེད།
བཀའ་བློན་ཁྲི་པ་བློ་བཟང་སེངྒེ་མཆོག་དང་། རྒྱ་གར་དབུས་གཞུང་གི་ཕྱི་སྲིད་དྲུང་ཆེ་ཟུར་པ་དང་གཞུང་ཚབ་ཟུར་པ་དྷི་ལིབ་མཱེ་ཏཱ་མཆོག་དང་། བོད་ཀྱི་ལོ་རྒྱུས་ཉམས་ཞིབ་པ་མ་ཐེའུ་ཨཀ་ཀེས་ཊར། ཕྱི་དྲིལ་ཁུར་ཡུག་ཉམས་ཞིབ་པ་ཚེ་རིང་དོན་གྲུབ། ཕྱི་དྲིལ་ཁོར་ཡུག་འགན་འཛིན་བསྟན་འཛིན་ནོར་བུ། བོད་ཀྱི་སྲིད་ཇུས་ཉམས་ཞིབ་པ་འཕྲིན་ལས་འཇིགས་མེད་དང་བསྟན་འཛིན་དོན་ལྡན་བཅས་བགྲོ་གླེང་བྱས་ཤིང་། དེར་བོད་གཞུང་གི་ལས་ཁུངས་ཁག་གི་ལས་བྱེད་དང་། ཕྱི་རྒྱལ་བའི་མཁས་པ་ཁག་ཅིག་བཅས་ཚོགས་ཞུགས་པ་བརྒྱ་སྐོར་ཞིག་མཉམ་ཞུགས་བྱས་ཡོད་པ་རེད།
ཚོགས་འདུའི་དབུ་འབྱེད་གསུང་བཤད་ནང་སྲིད་སྐྱོང་བློ་བཟང་སེངྒེ་མཆོག་གིས་གསུང་དོན། དེ་རིང་བགྲོ་གླེང་འདི་ཧ་ཅང་གི་གལ་གནད་ཆེན་པོ་རེད། ཚན་རིག་པ་ཁག་ཅིག་བརྗོད་པ་ལྟར། བོད་འདི་འཛམ་གླིང་གི་ལྷོ་སྣེ་དང་། བྱང་སྣེའི་འཚམས་ནས་འཁྱགས་པ་དང་། གངས་རྙིང་མཐུག་ཤོས་དང་མང་ཤོས་གསུམ་པ་ཡིན་པས་གོ་ལའི་སྣེ་མོ་གསུམ་པ་ལྟར་ཆགས་ཡོད་པ་རེད། ཨན་ཊར་ཊི་ཀ་དང་ཨར་ཊིག་གི་འཁྱག་རོམ་ཞུ་རྗེས་རྒྱ་མཚོར་འབབ་ཀྱི་ཡོད་ཀྱང་། བོད་ཀྱི་འཁྱགས་རོམ་དང་གངས་ཏེ་སེ་ཞུ་རྗེས་གཙང་ཆུར་གྱུར་ནས་ཨེ་ཤ་ཡའི་རྒྱལ་ཁབ་མང་པོའི་ནང་རྒྱུག་གི་ཡོད་པ་རེད་ཅེས་བོད་ཀྱི་གཙང་པོ་ཆེན་པོ་བརྒྱད་པོས་ཤར་ཕྱོགས་ཀྱི་རྒྱལ་ཁབ་རྣམས་ཀྱི་འཚོ་བ་དང་དཔལ་འབྱོར་གྱི་འབྱུང་ཁུངས་ལྟ་བུའི་གལ་གནད་ཆེན་པོ་ཆགས་ཡོད་སྐོར་གསུངས་སོང་།
ཡང་ཁོང་གིས་སྔོན་རྒྱལ་ཁབ་ཁག་ས་ཆའི་དོན་དུ་དམག་འཁྲུག་བརྒྱབ་པ་དང་། དེ་རྗེས་རྫས་རིགས་ཐོག་འཁྲུག་རྕོད་བྱེད་པ་དང་། འབྱུང་འགྱུར་ཆུ་ཡི་དོན་དུ་དམག་འཁྲུག་རྒྱག་རྒྱུ་ཡིན་སྐོར་མཁས་པ་མང་པོས་གསུང་གི་ཡོད་པ་དང་། ཁ་ཤས་ཀྱི་ཆུ་ནི་གསེར་དཀར་པོ་རེད་བརྗོད་ཀྱི་ཡོད་པས། ཆུ་ནི་ཧ་ཅང་རྩ་ཆེན་ཞིག་རེད། དེར་བརྟེན་རྒྱ་ནག་དང་རྒྱ་ནག་གི་ཁྱིམ་མཚེས་རྒྱལ་ཁབ་ཀྱི་བར་བོད་ཀྱི་གཙང་ཆུའི་ཐོག་རྩོད་རྙོག་ཧ་ཅང་ཆེན་པོར་གྱུར་ཡོད་ཅེས་འཛམ་གླིང་གི་ཆུའི་གནས་བབས་སྤྱི་དང་། ལྷག་པར་བོད་ཀྱི་གཙང་པོའི་དང་འབྲེལ་བའི་ཨེ་ཤ་ཡའི་རྒྱལ་ཁབ་དབར་འཐབ་རྩོད་དང་དཀའ་རྙོག་ཆེན་པོ་ཡོད་སྐོར་དང་། དེ་བཞིན་བོད་ལ་རང་དབང་ཐོབ་ནས་བོད་ཀྱི་ནང་པ་སངས་རྒྱས་པའི་ལྟ་བ་དང་མཐུན་པའི་སྒོ་ནས་འཛམ་གླིང་མི་མང་ལ་བོད་ཀྱི་རང་བྱུང་ཐོན་ཁུངས་ལས་རང་དབང་ངང་ཁེ་ཕན་ཆེན་པོ་འཐོབ་པའི་སྐོར་སོགས་ངོ་སྤྲོད་གནང་ཡོད་པ་རེད།
བཀའ་ཁྲི་མཆོག་གིས་ལྡི་ལི་ནས་ཕེབས་པའི་ཚོགས་ཆེན་གྱི་སྐུ་མགྲོན་གཙོ་བོ་རྒྱ་གར་གྱི་གཞུང་ཚབ་ཟུར་པ་དྷི་ལིབ་མཱེ་ཏཱ་ངོ་སྤྲོད་དང་སྦྲགས། མི་སྣ་གྲགས་ཅན་གཞུང་ཚབ་པ་དྷི་ལིབ་མཱེ་ཏཱ་ཁོང་ལྟ་བུ་ལ་བརྟེན་ནས་བོད་ཀྱི་སྲིད་ཇུས་ཉམས་ཞིབ་ཁང་ལ་འབྱུང་འགྱུར་མདུན་ལམ་ཧ་ཅང་བཟང་པོ་ཡོད་པ་དང་། བོད་ཀྱི་སྲིད་ཇུས་ཉམས་ཞིབ་ཁང་ལ་ཁོང་ལྟ་བུ་རླབས་ཆེན་གྱི་མི་སྣ་མང་པོ་བསྐྲུན་དགོས་ཤིང་། འབྱུང་འགྱུར་མདུན་སྐྱོད་བྱེད་པའི་དུས་ཚོད་མང་པ་ཡོང་རྒྱུ་ལྷག་ཡོད་ཅེས་གསར་དུ་བཙུགས་པའི་བོད་ཀྱི་སྲིད་ཇུས་ཉམས་ཞིབ་ཁང་ངོ་སྤྲོད་གནང་ཡོད་པ་རེད།
སྐུ་མགྲོན་གཙོ་བོ་རྒྱ་གར་གྱི་གཞུང་ཚབ་ཟུར་པ་དྷི་ལིབ་མཱེ་ཏཱ་ཡིས་གསུང་སོན། ངས་བོད་དང་འབྲེལ་ནས་བདེ་འཇགས་ཀྱི་ཁོར་ཡུག་ཅེས་པའི་ཐོག་བརྗོད་འདོད་བྱུང་། ཨེ་ཤ་ཡའི་བདེ་འཇགས་ནི་རྒྱ་དཀར་ནག་གཉིས་ཀྱི་མཐུན་ལམ་ལ་ཤིན་ཏུ་རག་ལས་ཡོད། ཕྱི་ལོ་༡༩༤༩ ལོར་རྒྱ་ནག་གི་བོད་ལ་བཙན་འཛུལ་མ་བྱས་བར། བོད་དེ་རང་བཙན་གྱི་རྒྱལ་ཁབ་ཏུ་གནས་ཤིང་། ཞི་བདེའི་བསྟི་གནས་ཤིག་ཀྱང་ཡིན་པ་རེད། དེ་ལ་བརྟེན་ནས་ཁྱིམ་མཚེས་རྒྱལ་ཁབ་བར་དུ་བདེ་འཇགས་བསྐྲུན་ཡོད་ལ། འཛམ་གླིང་གི་མི་འབོར་ཆེ་ཤོས་ཏེ་རྒྱ་དཀར་ནག་གཉིས་ལ་ཡང་དེའི་སྐབས་ས་མཚམས་བགོ་བཤའ་སོགས་དང་འབྲེལ་བའི་རྩོད་གླེང་ཞིག་མེད་ཅེས་སྔོན་མའི་བོད་ཀྱི་པན་རླབས་སྐོར་ལ་བརྗོད་ཡོད་པ་རེད།
ཡང་ཁོང་གིས་༡༩༥༩ རྗེས་ལ་བོད་ཀྱི་རང་དབང་ཤོར་བ་དང་། ས་བབས་སྲིད་ཇུས་ཀྱི་གནས་བབས་ཀྱང་འགྱུར་བ་ཆེན་པོ་ཕྱིན་པ་རེད། ད་ལྟ་རྒྱ་ནག་དང་རྒྱ་གར་གཉིས་ཀྱིས་རྒྱ་ཆེ་ཞིང་ཛ་དྲག་པའི་མཐའ་མཚམས་མཉམ་སྤྱོད་བྱེད་དགོས་ཤིང་། ས་མཚམས་ཐོག་རྩོད་རྙོག་ལུ་གུ་བརྒྱུད་པ་ལྟར་གྱུར་ཡོད། ཕྱི་ལོ་༡༩༦༢ ལོར་རྒྱལ་མཚམས་དོན་དུ་དམག་འཁྲུག་བྱུང་མྱོང་ཞིང་། དེ་རིང་རྒྱ་དཀར་ནག་གཉིས་ནི་རྒྱལ་སྤྱིའི་ནང་སྟོབས་ཆེན་གྱི་རྒྱལ་ཁབ་ལ་དམིགས་པའི་རྡུལ་མཚོན་ཅན་གྱི་རྒྱལ་ཁབ་ཆགས་ཡོད་པས། རྒྱ་དཀར་ནག་བར་གྱི་བར་གནས་རྒྱལ་ཁབ་ཅིག་མེད་པར་ཆགས་པར་བརྟེན། བོད་འདི་རྒྱ་དཀར་ནག་བར་གྱི་གལ་གནད་ཇི་ཙམ་ཡིན་མིད་ཤེས་ཐུབ་ཅེས་བརྗོད་ཡོད་པ་རེད།
ཡང་ཁོང་གིས་རྒྱ་ནག་གི་བོད་མཐོ་སྒང་འདི་རྡུལ་ཕྲན་མཚོན་ཆའི་གོ་མཛོད་ཡོད་པའི་དྲག་དམག་གི་ལྟེ་བ་ཞིག་ཏུ་བསྒྱུར་བ་མ་ཟད། ཉིང་རྡུལ་གྱི་སྙིགས་རོ་གཡུག་ས་ཞིག་ཏུའང་བསྒྱུར་ཡོད། རྒྱ་ནག་གིས་བོད་ལ་སྤྱི་ལེ་༡༡༠༠༠ ཐམ་པའི་རིང་ཚད་ཀྱི་མེ་འཁོར་ལྕགས་ལམ་བཟོས་པ་དང་། ད་དུང་ཡང་ཨ་སྒོར་ཐེར་འབུམ་གཅིག་དང་ཕྱེད་ཀ་བཏང་ནས་ལམ་ཁ་བཟོ་རྒྱུ་ཡིན་ཞིང་། དེ་ནས་ཡོང་བབ་ཨ་སྒོར་ཐེར་འབུམ་༧་༣ ཡོང་གི་ཡོད་པ་རེད། དམག་དོན་དང་བདེ་སྲུང་གི་འགྲོ་གྲོན་ཨ་སྒོར་ཐེར་འབུམ་༡༠༠ ཐམ་པ་བཏང་ནས་་ལོ་རྒྱུས་ཐོག་བྱུང་མ་མྱོང་གནད་དོན་གཅིག་ཆགས་ཡོད། དེས་རྒྱ་གར་གཙོས་པའི་ཁྱིམ་མཚེས་རྒྱལ་ཁབ་ཁག་ལ་ཉེན་ཁ་ཅིག་ཆགས་ཡོད་ལ། བོད་ཀྱི་རང་བྱུང་ཐོན་ཁུངས་ཀྱི་རྒྱ་ནག་གི་དཔལ་འབྱོར་འཕེལ་རྒྱས་ལ་ཧ་ཅང་ཁེ་ཕན་ཆེན་པོ་ཡིན་པ་རེད། བོད་ཀྱི་གཙང་ཆུ་དག་གི་ལྷོ་དང་ལྷོ་ཤར་ཨེ་ཤ་ཡའི་མི་མང་ས་ཡ་མང་པོའི་འཚོ་གནས་ལ་ཕན་རླབས་ཆེ་ཞེས་རྒྱ་ནག་གི་བོད་ནང་དམག་དོན་དང་ཁོར་ཡུག་ཐད་འགྱུར་ལྡོག་ཅི་ཙམ་གཏོང་གི་ཡོད་པ་དང་། དེས་རྒྱ་གར་ལ་ཉེན་ཁ་ཇི་ཙམ་བཟོ་ཡི་ཡོད་མེད། ཨེ་ཤ་ཡའི་ནང་བོད་ཀྱི་གལ་གནད་སོགས་དང་འབྲེལ་ནས་བདེ་འཇགས་ཀྱི་ཁོར་ཡུག་བསྐྲུན་གལ་ཆེ་སྐོར་འགྲེལ་བརྗོད་བྱས་ཡོད་པ་རེད།
ཡང་ཁོང་གིས་རྒྱ་ནག་གི་ཡར་ཀླུང་གཙང་པོའི་ཁ་ཕྱོགས་རྒྱ་ནག་ལ་བསྒྱུར་འཆར་གྱི་ལས་གཞི་དང་འབྲེལ་ནས་མུ་མཐུད་ནས་བརྗོད་དོན། གཙང་པོ་ཁ་ཕྱོགས་བསྒྱུར་བ་ཡིན་ན། དེར་བརྟེན་པའི་མི་མང་ས་ཡ་མང་པོའི་འཚོ་གནས་ལ་ཉེན་ཁ་དང་དཀའ་ངལ་ཡོང་གི་རེད། ཉེ་ཆར་པར་སྐྲུན་བྱས་པའི་མཁས་དབང་བྷརྷ་མན་ཆ་ལེས་བརྩམས་པའི་ཨེ་ཤ་ཡའི་དམག་ས་གསར་པ་ལྟ་བའི་ཆུ་ཞེས་པའི་དཔེ་དེབ་གསར་པའི་ནང་གནས་ཚུལ་འཁོད་དོན། བོད་ཀྱི་གནད་དོན་ནི་ཆབ་སྲིད་དང་རིག་གཞུང་གི་བརྡ་ཆད་ལས་བརྒལ་ནས་རྒྱ་ཆེ་ཞིང་གཏིང་ཟབ་པའི་དཀའ་གནད་ཅིག་རེད། དེ་ནི་ཨེ་ཤ་ཡའི་ཆུ་དང་། བདེ་འཇགས། ཁོར་ཡུག་སོགས་ཀྱི་གནད་དོན་ཡིན་པ་དང་། ལྷག་པར་ཨེ་ཤ་ཡའི་འབྱུང་འགྱུར་གྱི་བདེ་འཇགས་ཀྱི་གནད་དོན་དུ་གྱུར་ཡོད་ཅེས་འཁོད་འདུག་ཅེས་ཁོང་གིས་ལུང་འདྲེན་གནང་བ་དང་སྦྲགས་གསུང་དོན། བོད་ནང་གི་འགྲོ་བ་མིའི་ཐོབ་ཐང་རྡོག་རུལ་གཏོང་བའི་སྲིད་ཇུས་དང་། བོད་ནང་རྒྱ་མི་གནས་སྤོས་ཐོག་མགྱོགས་མྱུར་ངང་བོད་རིགས་རང་ཡུལ་ནས་གྲངས་ཉུང་མི་རིགས་སུ་བཟོ་བཞིན་པའི་སྲིད་ཇུས་སོགས་ངོ་སྤྲོད་བྱས་ཤིང་། རྒྱུ་མཚན་དེ་དག་ལ་བརྟེན་ནས་རྒྱལ་བ་རིན་པོ་ཆེས་གཏན་ལ་ཕབ་པའི་དབུ་མའི་ལམ་ནས་བོད་དོན་འཐབ་རྩོད་ཀྱི་གནད་དོན་སེལ་ཐབས་བྱེད་གལ་ཆེ་བའི་སྐོར་ལ་འགྲེལ་བརྗོད་བྱས་ཡོད་པ་རེད།
བོད་ཀྱི་ལོ་རྒྱུས་ཐོག་ལ་མཁས་པ་མཱེ་ཐེའུ་ཨཀ་ཀེ་ས་ཊར་གྱིས་བོད་ནང་གཏེར་ཁ་རྔོག་འདོན་སྐོར་བརྗོད་དོན། རྒྱ་ནག་གིས་འཕེལ་རྒྱས་ཀྱི་མིང་ཐོག་ནས་གཏེར་ཁ་རྔོག་འདོན་ཚད་ལས་བརྒལ་བ་བྱེད་ཀྱི་ཡོད་ལ། སྤྱིར་འཚོ་གནས་ཡར་རྒྱས་དང་ཁོར་ཡུག་སྲུང་སྐྱོབ་སོགས་ཀྱི་ཁྲིམས་དང་སྒྲིག་གཞི་ཡོད་རུང་རྒྱ་ནག་ཆབ་སྲིད་ཚོགས་པའི་ཁེ་ཕན་ལ་ཐུག་དུས་དོན་དམ་ཐོག་དྲག་གནོན་གྱིས་བདེན་གསུབ་རྫུན་སྒྲིག་གིས་སྲིད་ཇུས་ལག་བསྟར་བྱེད་ཀྱི་ཡོད་པས་དེ་ནི་ཉེན་ཚབས་ཆེ་བའི་གནད་དོན་ཞིག་རེད་ཅེས་བརྗོད་ཡོད། ད་དུང་ཁོང་གིས་གནད་དོན་དེའི་ཐོག་ལས་ཀ་བྱེད་མཁན་དང་དོ་སྣང་ཡོད་མཁན། དེ་བཞིན་བསམ་བློ་ཡོད་མཁན་གྱི་མི་གཞན་ལ་འབྲེལ་བ་འཛུགས་རྒྱུ་དང་། བོད་མི་ཚོས་བདེན་པ་ང་ཚོའི་ཕྱོགས་ལ་ཡོད་ཅེས་བརྗོད་སྲོལ་ཡོད་པས། བདེན་པ་དེ་ག་རེ་ཡིན་མིན་འཚོལ་ཞིབ་བྱེད་དགོས་པ་གལ་ཆེན་ཡིན་ཚུལ་སྐོར་ཡང་ནན་བརྗོད་བྱས་སོང་།
ཚོགས་ཆེན་དེ་ཚོགས་དུས་གསུམ་དུ་བགོས་ཤིང་། བགྲོ་གླེང་གི་ཚོགས་འདུའི་སྟེང་ཚེ་རིང་དོན་གྲུབ་ཀྱིས་བོད་ཀྱི་མཐོ་སྒང་གི་ས་ཁམས་ཆགས་ཚུལ། བསྟན་འཛིན་ནོར་བུས་བོད་ཀྱི་འབྲོག་པའི་ས་ཁུལ། འཕྲིན་ལས་འཇིགས་མེད་ཀྱིས་ཡར་ཀླུང་གཙང་པོའི་ཆུ་མཛོད། བསྟན་འཛིན་བདེ་ལྡན་གྱིས་བོད་ཀྱི་རང་བྱུང་ཐོན་ཁུངས་བཅས་ཀྱི་བརྗོད་གཞིའི་ཐོག་སྐར་མ་༣༠ རེའི་རིང་གཏམ་བཤད་གནང་ཡོད་པ་རེད།།
མཁས་པ་སོ་སོའི་གཏམ་བཤད་རེ་རེའི་རྗེས་ཚོགས་ཞུགས་པ་དག་གིས་དྲི་བ་དྲིན་ལན་དང་བགྲོ་གླེང་བྱས་ཡོད་པ་རེད།
མཐར་གཙུག་ལག་སློབ་དཔོན་ངག་དབང་ཕུན་ཚོགས་ཀྱིས་ཚོགས་འདུ་གཙོ་སྐྱོང་འོག གཏམ་བཤད་བྱེད་མཁན་གྱི་མཁས་པ་རེ་རེའི་སྐར་མ་ལྔ་རེའི་ནང་མཇུག་བསྡོམས་གཏམ་བཤད་རེ་བྱས་རྗེས། བོད་ཀྱི་སྲིད་ཇུས་ཉམས་ཞིབ་ཁང་གི་འགན་འཛིན་སྐུ་ཞབས་ཐུབ་བསྟན་བསམ་འཕེལ་གྱིས་ཚོགས་འདུར་ཕེབས་པའི་མཁས་པ་དག་གིས་རྒྱ་ཆེ་ཞིང་གནད་ལ་ཁེལ་བའི་བགྲོ་གླེང་ལྷུག་པོ་བྱུང་ནས། བསམ་ཡུལ་ལས་འདས་པའི་ལེགས་གྲུབ་བྱུང་སྐོར་བརྗོད་ནས་ཐུགས་རྗེ་ལེགས་འབུལ་གྱི་གཏམ་བཤད་བྱེད་སྐབས། ཁོང་གིས་བརྗོད་དོན། བཀའ་བློན་ཁྲི་པས་བོད་ཀྱི་སྲིད་ཇུས་ཉམས་ཞིབ་ཁང་འདི་ གསར་འཛུགས་བྱེད་ཕྱོགས་ལ་ལམ་སྟོན་གནང་སྐབས། ཁོང་གིས་ཚོགས་པ་འདི་མཁས་པ་རྣམས་ཀྱི་བསམ་བློ་མི་འདྲ་རྣམས་སྤུངས་སའི་སྡེངས་ཆ་ཞིག་དགོས་པ་དང་། དེ་བཞིན་ཉམས་ཞིབ་ཁང་འདིར་བོད་གཞུང་གི་ལས་བྱེད་རྣམས་ཀྱིས་ཉམས་ཞིབ་དང་བསམ་ཚུལ་སོགས་བཤད་ས་ཞིག་ཏུ་འགྱུར་དགོས། དེ་ལྟ་བུའི་ལམ་ནས་བོད་དང་འབྲེལ་བའི་གནད་དོན་གལ་ཆེན་གང་ཅིའི་ཐད་ཤེས་རྟོགས་ཡོད་པ་དང་གྲ་འགྲིག་པོ་ཡོང་བའི་ཕན་རླབས་ཡོད་ཅེས་གསུངས་པ་ལྟར་ཚོགས་ཆེན་ཡག་པོ་བྱུང་ཡོད་སྐོར་འགྲེལ་བརྗོད་གནང་ཡོད་པ་རེད།།
