རང་བྱུང་ཚན་རིག་དང་ནང་པའི་ལྟ་གྲུབ་སྐོར་ལ་བགྲོ་གླེང་།

ཕྱི་ཟླ་༤ པའི་ཚེས་༡༤ ཉིན་རྗར་མེ་ནི་བོད་ཀྱི་ཁང་པའི་ནང་རང་བྱུང་ཚན་རིག་དང་། ནང་པའི་ལྟ་གྲུབ་སྐོར་ལ་བགྲོ་གླེང་ཞིག་བོད་སྐད་ནང་འཚོགས་ཡོད་པ་རེད།

ད་རེས་ཀྱི་བགྲོ་གླེང་དེར་གཙོ་བོ་གནད་དོན་དྲུག་ལ་ཕྱེས་ཡོད་པ་དང་། དེ་ལས་གནད་དོན་བཞི་རང་བྱུང་ཚན་རིག་གི་བརྗོད་བྱ་གཙོ་བོར་བྱས་ཐོག ཚན་རིག་པས་ཤེས་བྱ་དེ་རྣམས་ཇི་ལྟར་རྙེད་སོན་བྱུང་ཡོད་མེད་ཀྱི་ལོ་རྒྱུས་དང་ངོས་འཛིན་བྱ་ཕྱོགས། དེ་བཞིན་ནང་པའི་ལྟ་གྲུབ་ལས་དེའི་ཐོག་ལ་གཟིགས་ཕྱོགས་དང་ངོས་འཛིན་གང་འདྲ་གནང་གི་ཡོད་མེད་སོགས་ཀྱི་གནད་དོན་ཁག་རེད།
བགྲོ་གླེང་དེ་ནི་ད་བར་རྗར་མེ་ནི་རུ་བོད་སྐད་ནང་འཚོགས་པའི་ཚན་རིག་པ་དང་། ནང་པའི་ལྟ་གྲུབ་བར་གླེང་སློང་བྱས་པའི་མཁས་པའི་བགྲོ་གླེང་ཐེངས་མ་དང་པོ་དེ་ཆགས་ཡོད་པ་དང་། བགྲོ་གླེང་གནང་མཁན་ཧམ་སྦག་གཙུག་ལག་སློབ་ཆེན་གྱི་(University Hamburg, Germany)རྒྱ་གར་དང་བོད་རིག་པའི་ཚན་ཁག་གི་དབུ་འཛིན་སློབ་དཔོན་རྡོ་རྗེ་དབང་ཕྱུག་དང་། སྨན་པ་མཁས་དབང་རྟའུ་བློ་བཟང་དཔལ་ལྡན་གཉིས་མཉམ་ཞུགས་བྱས་ཡོད་པ་རེད། བགྲོ་གླེང་གཙོ་སྐྱོང་གནང་མཁན་གནང་མཁན་བོད་ཀྱི་ཁང་པའི་དབུ་འཛིན་འདུས་བྱུང་ཕུན་ཚོགས་ཚེ་རིང་ཡིན་པ་དང་། བགྲོ་གླེང་གི་ནང་དོན་ཁག་ནི་ཐོག་མར་བོད་ཀྱི་སྤྱི་སྐད་རྒྱ་ཁྱབ་དང་རིག་གསར་ལ་ཉེ་བར་མཁོ་བའི་བརྡ་ཆད་ཐ་སྙད་སྐོར། ཚན་རིག་པ་དང་ནང་པའི་བར་བགྲོ་གླེང་ཐེངས་མང་གནང་ཡོད་པའི་ཁྲོད་ལས་ཕན་ཚུན་དགེ་མཚན་དང་ལེགས་ཆ་གང་བྱུང་ཡོད་མེད། དེ་ནས་བདེན་པ་དང་། རྦང་སྒྲ་ཆེན་མོའི་རྣམ་གཞག(Big Bang Theory) ལྟོས་བཅས་སྨྲ་བ་(Relativity Theory)དང་། ཚད་རྡུལ་ནུས་རིག་སྨྲ་བ་(Quantum Physics)བཅས་རེད་འདུག

སློབ་དཔོན་རྡོ་རྗེ་དབང་ཕྱུག་ལགས་ཀྱིས་ནང་པའི་ལྟ་གྲུབ་ཀྱི་དགོངས་པ་བཞེད་ཕྱོགས་ཐད་བཀའ་མོལ་གནང་ཡོད་ལ། མཁས་དབང་རྟའུ་བློ་བཟང་དཔལ་ལྡན་ལགས་ཀྱིས་རང་བྱུང་ཚན་རིག་གི་དགོངས་པ་བཞེད་ཕྱོགས་དང་འབྲེལ་བཤད་རྒྱག་ཕྱོགས་ཐོག་གསུང་བཤད་གནང་སོང་། ཉིན་དེར་ས་གནས་བོད་རིགས་ཁ་ཤས་གསན་པར་ཕེབས་འདུག་ལ། གོ་སྒྲིག་པས་འགྲེལ་བརྗོད་བྱས་པ་ལྟར་ན་བགྲོ་གླེང་དེ་ནི་གཙོ་བོ་བརྙན་ལམ་ལས་དྲ་རྒྱ་བརྒྱུད་རྒྱང་སྲིང་བྱེད་འཆར་ཡོད་འདུག

བགྲོ་གླེང་བྱ་ཡུལ་དང་། གོ་སྒྲིག་གནང་མཁན་རྗར་མེ་ནི་བོད་ཀྱི་ཁང་པ་ཡིན་པ་དང་། བོད་ཀྱི་ཁང་པའི་༢༠༡༢ལོའི་ལས་རིམ་མང་པོའི་ནང་གི་རྒྱལ་སྤྱིའི་མཁས་པའི་བགྲོ་གླེང་དང་གཏམ་བཤད་བྱ་བའི་ལས་རིམ་གྱི་ཆ་ཤས་ཤིག་རེད་འདུག

རྗར་མེ་ནི་བོད་ཀྱི་ཁང་པ་ཞེས་པ་ནི་༧གོང་ས་༧སྐྱབས་མགོན་ཆེན་པོ་མཆོག་གིས་མཚན་འཛིན་དབུ་ཁྲིད་ ཐོག་ནས་མགོན་སྐྱབས་མཛད་པ་དང་། བྲག་གཡབ་༧སྐྱབས་མགོན་རིན་པོ་ཆེ་མཆོག་ནས་དབུ་ཁྲིད་ཀྱིས། ༢༠༠༥ ལོར་དབུ་བརྙེས་པ་རེད། རྒྱལ་སྤྱིའི་ནང་གདེང་འཇོག་ཚད་ལྡན་ཡོད་པའི་བོད་ཀྱི་ཤེས་རིག་ལྟེ་གནས་དེར་ལས་ཀའི་རྣམ་གྲངས་སྡེ་ཚན་ལྔ་ཡོད་པའི་ནང་ནས་༼ཚན་རིག་དང་ལེགས་བྱང་༽སྡེ་ཚན་གྱི་ཁྱབ་ཁོངས་ནང་ད་རེས་ཀྱི་ལས་རིམ་འདི་ཚུད་ཡོད་འདུག །