ནང་ཆོས་དང་ཚན་རིག་གི་འཛིན་གྲྭ་གསར་འཛུགས།
ཟླ་འདིའི་ཚེས་༡༦ ཉིན་ཞོགས་པ་རྒྱ་གར་ལྷོ་ཕྱོགས་མོན་གྷོ་ས་གནས་འབྲས་སྤུངས་བློ་གསལ་གླིང་གྲྭ་ཚང་གི་གོ་སྒྲིག་འོག ཚན་རིག་གི་འཛིན་གྲྭ་གསར་འཛུགས་ཀྱི་མཛད་སྒོ་ཞིག་བློ་གླིང་འདུ་ཁང་གསར་པའི་ཐོག་ཁང་དུ་འཚོགས་ཡོད་པ་རེད།
མཛད་སྒོའི་ཐོག་སྐུ་མགྲོན་གཙོ་བོ་བློ་གླིང་མཁན་ཚབ་རྒན་བློ་བཟང་ཡེ་ཤེས་ལགས་ཀྱིས་དབུས་དགེ་བཤེས་དང་ཕྱག་མཛོད། དགེ་སྐོས་སོགས་ཕེབས་ཡོད་པ་དང་། ཐོག་མར་བློ་གླིང་ཚན་རིག་སྡེ་ཚན་གྱི་འགན་འཛིན་ངག་དབང་གྲགས་པ་ལགས་ཀྱིས་ཚན་རིག་སྡེ་ཚན་དེའི་བྱུང་རབས་དང་ད་ལྟ་ཚན་རིག་འཛིན་གྲྭ་འདི་གསར་འཛུགས་དགོས་པའི་དམིགས་བཅས་ཀྱི་སྐོར་ལ་ངོ་སྤྲོད་དང་འབྲེལ་གསུང་དོན། གཞི་རྩའི་ནང་ཆོས་དང་ཚན་རིག་གཉིས་ཀྱི་དམིགས་ཡུལ་ནི་འགྲོ་བ་མིའི་བདེ་སྐྱིད་སྐྲུན་ཐབས་ཀྱི་གཞི་རྩ་ཡིན་པས། ནང་ཆོས་ཀྱིས་ནང་སེམས་ཀྱི་བདེ་སྡུག་གི་མྱོང་ཚོར་དང་དེ་དག་གི་བཅོས་སྒྱུར་ཡག་ཏུ་གཏོང་བའི་རྒྱུ་རྐྱེན་ཟབ་མོ་བཞག་ཡོད། ཚན་རིག་གི་ཕྱིའི་དངོས་པོའི་ཤེས་བྱའི་ཐོག་ལ་དཔྱད་ཞིབ་ཀྱི་གོ་རྟོགས་སྤེལ་ཀྱི་ཡོད་པ་རེད་ལ། དེ་གཉིས་མཉམ་ལས་དང་ཟུང་འབྲེལ་ཐོག་བསྐྱོད་ཐུབ་པ་ཡིན་ན་ཞི་བདེ་ཅན་གྱི་འཛམ་གླིང་ཞིག་བསྐྲུན་ཐུབ་པ་རེད་ཅེས་སོགས་གསུངས་ཡོད་པ་རེད།
དེ་རྗེས་སྐུ་མགྲོན་གཙོ་བོ་བློ་གླིང་མཁན་ཚབ་བློ་བཟང་ཡེ་ཤེས་ལགས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་དོན། དེ་རིང་སང་ཉིན་འཛམ་གླིང་སྤྱི་ཡོངས་ནས་ནང་ཆོས་ཐོག་དོ་སྣང་ཤུགས་ཆེན་བྱེད་ཀྱི་ཡོད་པ་རེད། དེ་དང་མཉམ་དུ་ཚན་རིག་དེ་ཡང་སྦྱང་བརྩོན་དགོས་པ་གལ་ཆེན་པོ་རེད། དེ་རིང་གྲྭ་ཚང་གི་ངོས་ནས་ཀྱང་གལ་ཆེན་ལ་བརྩིས་ནས་ཚན་རིག་འཛིན་གྲྭ་གསར་འཛུགས་གནང་བ་རེད། དེ་བཞིན་སློབ་ཕྲུག་ཚོའི་ངོས་ནས་ཡིན་ན་ཡང་མ་འོངས་པར་མིག་དཔེ་སྟོན་འོས་པ་ཞིག་ཡོང་རྒྱུར་འབད་བརྩོན་བྱེད་དགོས་པ་གལ་ཆེན་པོ་རེད་ཅེས་སོགས་གསུངས་སོང་།
དེའི་རྗེས་སུ་བློ་གླིང་ཁྲིམས་བདག་དགེ་སྐོས་ཚེ་རིང་ནོར་བུ་ལགས་ཀྱིས་སྤྱི་ཡོངས་ཀྱི་འབྲས་བློ་གླིང་གྲྭ་ཚང་གི་ཆོས་ཁྲིམས་ཀྱི་སྒྲིག་གཞི་གཞིར་བཟུང་ཐོག ཚན་རིག་སྡེ་ཚན་འདིའི་སློབ་སྦྱོང་གི་བརྒྱུད་རིམ་ནང་ཁྲིམས་དང་སྒྲིག་གཞི་དོན་ཚན་དྲུག་ཡོད་པ་དེ་སྒྲོག་སྦྱངས་དང་འབྲེལ་གསུང་བཤད་གནང་དོན། སོ་སོའི་རྩ་བའི་ནང་ཆོས་ཐོག་བསླབ་པ་སློབ་གཉེར་ལ་བཀག་རྡོར་མི་འགྲོ་བ་ཞིག་དང་། ཚན་རིག་སློབ་སྦྱོང་འདི་ཡང་ཤེས་བྱའི་རྣམ་གྲངས་གཞན་ཞིག་སྦྱང་གི་ཡོད་བསམ་པ་མ་གཏོགས། གོ་བ་ལོག་སྒྲུབ་ཐེབས་མི་ཉན་པ་ནི་ཧ་ཅང་གལ་གནད་ཡིན་པ་གཅིག་དང་། ༧གོང་ས་མཆོག་གིས་ཚན་རིག་སློབ་སྦྱང་བྱེད་དགོས་སྐོར་གསུངས་པ་དེ་ཡང་ནང་ཆོས་དང་ཚན་རིག་གཉིས་རྐང་པ་མཉམ་གཤིབ་བྱས་ནས་འགྲོ་ཐུབ་པ་དང་། གཙོ་བོ་ནང་བསྟན་ཆོས་ལུགས་འདི་མི་ནུབ་དར་རྒྱས་ཡོང་བའི་ཆེད་སོགས་ཡིན་པ་ངོ་ཤེས་པའི་ཐོག་གྲུབ་འབྲས་ཡོང་བར་རེ་བ་དང་དམིགས་ཡུལ་དགོས་སྐོར་གསུངས་སོང་།
ཡང་དབུ་མཛད་བསྟན་འཛིན་ཐེག་མཆོག་ལགས་ཀྱིས་མཛད་སྒོ་དེ་འབྲེལ་བའི་གསུང་བཤད་གནང་དོན། མཁས་དབང་དགེ་འདུན་ཆོས་འཕེལ་གྱིས་རྒྱལ་ཁམས་རིག་པས་བསྐོར་བའི་གཏམ་རྒྱུད་གསེར་གྱི་ཐང་མའི་ནང་དུ་རིགས་གསར་དང་མཉམ་དུ་ནང་ཆོས་འདི་འགྲོ་ཐུབ་པ་ཡིན་ན། ད་དུང་ཡང་མུ་མཐུད་ནས་འཛམ་བུ་གླིང་འདིའི་ནང་མི་ལོ་བརྒྱ་ཕྲག་ཁ་ཤས་རིང་ནང་ཆོས་འདི་གནས་ཐུབ་ངེས་རེད་ཅེས་གསུང་ཡོད་པ་ནང་བཞིན། ༧སྐྱབས་མགོན་རིན་པོ་ཆེས་ཀྱང་དགོངས་པ་དེ་ལྟར་བཞེས་ཀྱི་ཡོད་པར་ངོས་འཛིན་བྱེད་ཀྱི་ཡོད་ཅེས་སོགས་གསུངས་སོང་།
དེ་བཞིན་ཕྱག་མཛོད་དགེ་བཤེས་མཁྱེན་རབ་ཆོས་རྗེ་ལགས་ཀྱིས་ཚན་རིག་འཛིན་གྲྭ་གསར་འཛུགས་ཀྱི་དགོས་པ་དང་དེའི་དམིགས་ཡུལ་བཅས་ཀྱི་སྐོར་ལ་གསུང་བཤད་གནང་དོན། སྤྱིར་བཏང་༧རྒྱལ་བ་རིན་པོ་ཆེའི་དགོངས་གཞི་གཞིར་བཟུང་གིས་ཐོག་གྲྭ་ཚང་བློ་གསལ་གླིང་གིས་ཚན་རིག་འཛིན་གྲྭ་འདིའི་མཐུན་རྐྱེན་གོ་སྒྲིག་ཞུས་པ་རེད་ལ། མ་འོངས་པ་ཡང་འདིའི་ཐོག་མཐུན་རྐྱེན་ག་རེ་དགོས་ཀྱང་སྦྱོར་རྒྱུ་ཡིན། འོན་ཀྱང་ཚན་རིག་སློབ་གཉེར་བ་ཚོའི་སོ་སོའི་རྩ་བའི་ནང་ཆོས་ཀྱི་སློབ་གཉེར་མཐུས་ཤོར་མི་འགྲོ་བ་གཅིག་དང་། ཚན་རིག་སློབ་གཉེར་གནང་མཁན་ཚོའི་༧གོང་ས་མཆོག་གིས་བཀའ་དགོངས་གཞི་རྩར་བཟུང་ནས་ཚན་རིག་སློབ་གཉེར་བྱས་ནས། ཚན་རིག་པ་ཚོ་ནང་ཆོས་ལ་ཁ་ཕྱོགས་ཆེད་ཡིན་པའི་ཁུར་རེད་དེ། ཁྱེད་རང་ཚོའི་ཚུར་བཀུག་རྒྱུ་ཕར་བཞག་ནས། ཁྱེད་རང་ཚོ་ཚན་རིག་པའི་ནང་ལ་ཁྲིད་རྒྱུའི་ཉེན་ཁ་ཡོད་པ་རེད་གསུང་པ་ནང་བཞིན་གྱི་ནང་ཆོས་ཀྱི་གོ་བ་གཏིང་ཟབ་པོ་དང་རྒྱ་ཆེན་པོ་རྙེད་མེད་པའི་དབང་པོ་རྟུལ་བོ་ཚོས་ཚན་རིག་གི་གོ་བ་རགས་པ་ཙམ་ཤེས་པ་དེ་ཡིན་སྣང་ཤར་ནས་མཆོང་ལྡིང་བྱས་པ་ཡིན་ན་ནོར་འཁྲུལ་ཚང་མ་དེ་ནས་ཡོང་གི་རེད། དེར་བརྟེན་སློབ་གཉེར་བ་ཚང་མའི་༧གོང་ས་མཆོག་གི་དགོངས་གཞི་འགལ་མེད་ཐོག་ནོར་འཛོལ་མེད་པའི་སློབ་སྦྱོང་བྱས་ཏེ་གྲུབ་འབྲས་མི་དམན་པ་གནང་སྐྱོང་ཡོང་བའི་འབོད་སྐུལ་ཞུ་བཞིན་ཡོད་ཅེས་སོགས་གསུངས་སོང་།
དེ་ཡང་བློ་གླིང་གྲྭ་ཚང་གིས་ཚན་རིག་འཛིན་གྲྭ་གསར་འཛུགས་ནང་གདན་ཞུས་དགེ་རྒན་གཅིག་དང་སློབ་ཕྲུག་གྲངས་༨༠ ཙམ་མཉམ་ཞུགས་བྱེད་ཀྱི་ཡོད་ལ། ཁོང་རྣམས་པ་དབུ་མ་འཛིན་གྲྭ་ཡན་ཆོད་རྐྱང་རྐྱང་ཡིན་པ་མ་ཟད། ལོ་ལྟར་འཆད་རྩོད་བྲིས་གསུམ་གྱི་རྒྱུགས་སྤྲོད་སྐབས་ཨང་རིམ་རྩེར་སོན་རྐྱང་རྐྱང་ཡིན་པ་རེད་འདུག །
མོན་གྷོ་གསར་འགོད་པས།
