གསལ་བསྒྲགས།

༄༅། བཙན་བྱོལ་བོད་མིའི་སྤྱི་ཚོགས་ནང་ཚོང་ལས་འགྲུབ་འབྲས་གཟེངས་སུ་ཐོན་པའི་ཚོང་པ་ཁག་གི་ཁོངས་ནས་ཚོང་པ་གཅིག་ལ་ “བོད་མི་ཚོང་པའི་གཟེངས་རྟགས་ ༢༠༡༢” དང༌།

དེ་བཞིན་ཚོང་དོན་ལས་གཞིའི་ཐོག་དམིགས་བསལ་བྱས་རྗེས་བཞག་པའི་གཞོན་སྐྱེས་གཅིག་ལ་ “གཞོན་སྐྱེས་བྱས་རྗེས་གཟེངས་རྟགས་ ༢༠༡༢” བཅས་ཚོང་པ་གཉིས་ལ་ཀོ་ལེ་གལ་དོན་ལྡན་གླིང་གཞི་ཆགས་སུ་ཕྱི་ལོ་ ༢༠༡༢ ཟླ་ ༨ ཚེས་ ༢༥ ཉིན་བོད་མིའི་མཉམ་འབྲེལ་བཅོ་ལྔའི་འཛིན་སྐྱོང་ཚོགས་ཆེན་ཐེངས་ ༡༢ པའི་དབུ་འབྱེད་མཛད་སྒོའི་སྐབས་བོད་མིའི་སྤྱི་མཐུན་མཉམ་འབྲེལ་ནས་གོང་གསལ་གཟེངས་རྟགས་ཁག་འབུལ་རྒྱུ་ཡིན།
གཟེངས་རྟགས་འདི་བཞིན་བཙན་བྱོལ་བོད་མིའི་སྤྱི་ཚོགས་ནང་དུ་ཚོང་ལས་འགྲུབ་འབྲས་ལེགས་ཐོན་བྱུང་བའི་ཚོང་པ་ཁག་ལ་ཆེ་བསྟོད་དང་ངོས་འཛིན་ཐོབ་ཐབས་ཀྱི་ཆེད་དུ་ཡིན་པ་དང༌། གཟེངས་རྟགས་ངོ་བོའི་ཐོག་ཕྱག་འཁྱེར་ཞིག་དང་ལེགས་སྐྱེས་ཧིན་སྒོར་ ༢༥༠༠༠།༠༠ རེ་འབུལ་རྒྱུ།
གོང་གསལ་གཟེངས་རྟགས་ཆེད་དུ་མི་འགྲོ་འདེམས་སྒྲུག་ཞུ་ཆེད་དགོས་མཁོའི་ཆ་རྐྱེན་ཁོངས་སུ་ཚོང་པ་དེ་དག་གིས་གཞོན་སྐྱེས་རྣམས་ལ་ལས་ཀ་གསར་བསྐྲུན་དང༌། སྤྱི་ཚོགས་ཞབས་ཞུ། དེ་བཞིན་སྤྱི་ཚོགས་སམ་གཞིས་ཆགས་སྲ་བརྟན་གྱི་ལས་གཞི་བཅས་ཀྱི་ཐོག་ལ་མཐུན་འགྱུར་བྱས་ཡོད་པ་ཞིག་དགོས་རྒྱུ། གཞོན་སྐྱེས་བྱས་རྗེས་གཟེངས་རྟགས་ཁོངས་སུ་འཛུལ་བཞུགས་སླད་རང་ལོ་ ༤༠ ལས་མི་འགལ་བ་ཞིག་དགོས་རྒྱུ།
འོས་གཞིར་དམིགས་འཛུགས་རྒྱབ་གཉེར་འགེངས་ཤོག་ཁག་ཕྱི་རྒྱལ་སྐུ་ཚབ་དོན་གཅོད་ཁག་དང༌། ས་གནས་འགོ་འཛིན་དང་བདེ་དོན་ཁག མཉམ་འབྲེལ་ཁག དེ་བཞིན་དྲ་རྒྱ་ www.hoteltibets.com བཅས་ཀྱི་བརྒྱུད་ནས་བཞེས་གནང་ཆོག་རྒྱུ།
གོང་གསལ་རྒྱབ་གཉེར་འགེངས་ཤོག་འཐུས་བཀང་ཞུས་ཏེ་ཕྱི་ལོ་ ༢༠༡༢ ཟླ་ ༦ ཚེས་ ༣༠ འགྱངས་མེད་བོད་མིའི་སྤྱི་མཐུན་མཉམ་འབྲེལ་ལས་ཁུངས་སུ་ངེས་འབྱོར་དགོས་རྒྱུ་བཅས་ཕྱི་ལོ་ ༢༠༡༢ ཟླ་ ༤ ཚེས་ ༡༠ ལ།།

Or by email to: Email: nyamdel@gmail.com