སུད་སི་རུ་པཎ་ཆེན་འཁྲུངས་སྐར་སྲུང་བརྩི།
ཟླ་འདིའི་ཚེ་༢༥ ཉིན་ནི་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་༢༣ ལ་ཕེབས་པའི་སྐུའི་འཁྲུངས་སྐར་གྱི་ཉིན་མོ་ཡིན་པ་ལྟར། ཡུ་རོབ་བོད་རིགས་གཞོན་ནུའི་མཐུན་ཚོགས་དང་། བོད་ཀྱི་མི་རབས་གསར་བའི་མཐུན་ཚོགས་གཉིས་ཀྱི་གོ་སྒྲིག་འོག སུད་སིའི་གྲོང་ཁྱེར་ཛོ་རིག་འཁྲུངས་སྐར་སྲུང་བརྩི་བྱས་ཡོད་པ་རེད།
དེ་ཡང་ས་གནས་ནས་འཕགས་པ་དང་ཕུན་ཚོགས་གཉིས་ཀྱིས་གནས་ཚུལ་འགྲེལ་བརྗོད་བྱས་པ་ལྟར་ན། ཉིན་དེའི་དགུང་དྲོའི་ཆུ་ཚོད་༧ ཐོག་རི་ཀོང་མཁན་རིན་པོ་མཆོག་གིས་གཙོས་པའི་སུད་སི་ས་གནས་མི་མང་བརྒྱ་ཕྲག་ཁ་ཤས་མཉམ་འཛོམས་ཐོག་པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མའི་འཁྲུངས་སྐར་སྲུང་རྩིའི་མཛད་སྒོ་དབུ་འཛུགས་གནང་ཡོད། ཡུ་རོབ་གཞོན་ནུའི་མཐུན་ཚོགས་ཀྱི་ལས་འགུལ་གོ་སྒྲིག་པ་ཚེ་རིང་གིས་མཛད་སྒོ་དབུ་འཛུགས་དང་འབྲེལ་བའི་གཏམ་བཤད་ནང་། དེ་རིང་ནི་ང་ཚོས་པཎ་ཆེན་རིན་པོ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ཉེར་གསུམ་ལ་ཕེབས་པའི་འཁྲུངས་སྐར་ཡིན་པ་ལྟར། མཛད་སྒོ་འདི་ཉིད་སྲུང་བརྩི་བྱ་དགོས་དོན་ནི་ཡུ་རོབ་ཁག་གི་ཕྱི་རྒྱལ་མི་མང་རྣམས་ལ་པཎ་ཆེན་རིན་པོ་མཆོག་གི་སྐོར་ངོ་སྤྲོད་བྱེད་ཐབས་དང་། མི་ལོ་༡༧ རིང་པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་མཆོག་རྒྱ་གཞུང་གིས་བཙོན་དུ་བཅུག་ཏེ་གར་ཡོད་ཀྱི་གནས་ཚུལ་ཧ་མ་གོ་བའི་གནས་སྟངས་སོགས་ལ་རྗེས་དྲན་བྱ་ཆེད་ཡིན་ཞེས་བརྗོད་སོང་།
དེ་འབྲེལ་བོད་ཀྱི་མི་རབ་གསར་པའི་མཐུན་ཚོགས་ཀྱི་ཚོགས་གཙོ་དཔའ་བོས་པཎ་ཆེན་སྐུ་ཕྲེང་བཅུ་བ་ཆོས་ཀྱི་རྒྱལ་མཚན་མཆོག་གི་ལོ་རྒྱུས་ངོ་སྤྲོད་མདོར་བསྡུས་ཤིག་གནང་བའི་ནང་། པཎ་ཆེན་རིན་པོ་ཆེ་སྐུ་ཕྲེང་བཅུ་བ་མཆོག་གི་སྐུ་ཚེ་གང་བོར་བོད་བསྟན་པ་དང་ཆབ་སྲིད་གྱི་ཆེད་དུ་མཛད་རྗེས་བརྒྱ་ཕྲག་མང་པོ་ཡོད་པའི་ནང་གལ་ཆེ་ཤོས་ནི། སྐབས་དེའི་རྒྱ་ནག་གི་སྲིད་བློན་ཀྲོའི་ཨུན་ལེ་བརྒྱུད་མོ་ཙེ་ཏོང་ལ་རྒྱ་དམག་བོད་ལ་སླེབས་རྗེས་བོད་ཀྱི་དགོན་སྡེ་ཁག་གཏོར་བཤིག་དང་ཆོས་དང་རིག་གཞུང་ལ་དམ་དྲག སྒོས་སུ་རིག་གནས་གསར་བརྗེའི་སྐབས་བོད་ཀྱི་རྩ་ཆེའི་ཁོར་ཡུག་དང་རིག་གནས་གཏོར་བཅོམ། བོད་པ་མི་མང་རྣམས་ཀྱི་དཀའ་སྡུག་གི་ལོ་རྒྱུས་གསལ་བརྗོད་བྱས་པའི་ཡིག་འབྲུ་ཁྲི་བདུན་གྱི་སྙན་ཞུ་ཕུལ་བར་རྐྱེན་བྱས་ཏེ། པཎ་ཆེན་རིན་པོ་མཆོག་མི་ལོ་དགུ་དང་ཟླ་བརྒྱད་ལ་རྒྱ་གཞུང་གི་བཙོན་ཏུ་བཞུགས་དགོས་བྱུང་བ་དང་། བཙོན་གྲོལ་ཐོབ་རྗེས་མཛད་དཀའ་ཁྲི་ཕྲག་མང་པོ་བརྒྱུད་བོད་ཀྱི་རིག་གནས་བསྐྱར་གསོ་དང་སྐད་ཡིག་རྒྱུད་འཛིན་ཕྱོགས་ལ་རླབས་ཆེའི་མཛད་རྗེས་བཞག་ཡོད་། ཁྱད་པར་བོད་ས་ཡོངས་ལ་གཟིགས་ཞིབ་ཀྱིས་བོད་ཀྱི་མི་མང་རྣམས་ཀྱི་དཀའ་སྡུག་གནས་སྟངས་ཉམས་ཞིབ་དང་། རྒྱ་གཞུང་གི་མི་རིགས་ས་ཁོངས་རང་སྐྱོང་གི་བཅའ་ཁྲིམས་ནང་གསལ་ལྟར་ཁྲིམས་མཐུན་གྱི་ཁེ་དབང་རྩོད་ལེན་གནང་སྟེ། མདོ་སྨད་གཙོས་པའི་ཆོལ་གསུམ་ཡུལ་གྲུ་ཀུན་ལ་བོད་ཡིག་སློབ་གྲྭ་ཆེད་འཛུགས་ཀྱིས་མཛད་རྗེས་བླ་མེད་བསྐྱངས་པ་བརྟེན། ད་ལྟ་བོད་ཀྱི་རིག་གནས་ཉམས་གསོ་དང་དར་རྒྱས་འབྱུང་བཞིན་པའི་གནས་བབས་སོགས་ཀྱང་མཐར་ཐུག་ན་པཎ་ཆེན་སྐུ་གོང་མའི་མཛད་རྗེས་ལ་རག་ལས་ཡོད་སྐོར་འགྲེལ་བརྗོད་བྱས་སོང་།
དེ་རྗེས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མའི་ལོ་རྒྱུས་སྐོར་བུ་མོ་ན་ཆུང་སུད་སིར་སྐྱེས་པ་ཞིག་གིས་འཇར་མན་སྐད་ཡིག་ནང་ཀློག་འདོན་བྱས་པ་དང་སྦྲགས། མཁན་རིན་པོ་ཆེ་མཆོག་གིས་གཙོས་པའི་མི་མང་རྣམས་ཀྱིས་པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་གི་སྐུ་པར་མདུན་དུ་མཇལ་དར་བསྒྲོན་པ་དང་། འཁྲུངས་སྐར་ལ་རྟེན་འབྲེལ་ཞུ་བའི་བཀྲ་ཤིས་གླུ་དབྱངས་མཉམ་ལེན་གནང་བའི་རྗེས། མཛད་སྒོ་འདི་ཉིད་དགའ་སྐྱོ་གཉིས་ལྡན་གྱི་ངང་ནས་ཡོངས་སུ་མཇུག་གྲོལ་ཡོད་པ་རེད། །
