རྒྱ་ནག་གི་དར་དམར་འཕྱར་བར་རྒྱབ་སྐྱོར་ཡོད།

དབུ་མའི་ལམ་ལས་འགུལ་ཁང་ནས་གླིང་ཚ་མ་བུ་གསུམ་གྱིས་རྒྱ་ནག་གི་རྒྱལ་དར་འཕྱར་སྟེ་ཞི་བའི་འཐབ་རྩོད་གནང་བཞིན་པ་ནི་བོད་ལ་མིང་དོན་མཚུངས་པའི་རང་སྐྱོང་ཐོབ་ཆེད་དུ་ཡིན། ཚང་མས་རྒྱབ་སྐྱོར་དགོས་པ་དང་།

ལས་འགུལ་འདི་འདྲ་མར་མེ་གཅིག་ལས་གཉིས་མཆེད་ཀྱི་ཚུལ་དུ་དགོས་པའི་འབོད་སྐུལ་བྱས་འདུག 

དབུ་མའི་ལམ་མི་མང་ལས་འགུལ་ཁང་གི་ཤེས་ཡོན་དང་རིག་གཞུང་འགན་འཛིན་ཤར་ཕྱོགས་ཁུག་རྟས་ དབུ་མའི་ལམ་ལས་འགུལ་ཁང་ལ་ད་ཆར་རྒྱ་ནག་རྒྱལ་དར་འཕྱར་རྒྱུའི་འཆར་གཞི་གང་ཡང་མེད་ཀྱང་། རྒྱ་ནག་རྒྱལ་དར་འཕྱར་མཁན་ཚོར་དགག་བྱ་ཡོད་པ་མ་རེད། རྒྱ་ནག་གི་རྒྱལ་དར་དམར་པོ་དེའི་འོག་བོད་མིའི་སྲོག་ཤོར་གྱི་ཡོད་ནའང་། ཚུར་ཕྱོགས་ནས་ང་ཚོས་དེའི་ཁ་གཏད་དུ་རྒྱ་ནག་རྒྱལ་དར་མེར་བསྲེགས་བཏང་སྟེ། རྒྱ་ནག་མི་དམངས་ལ་ཞེ་འཁོན་འགྲོ་རྒྱུའི་འཚེ་བའི་ལས་རྩ་བ་ནས་སྤེལ་གྱི་མེད་ཅེས་གསར་འགོད་པའི་དྲི་བར་ལན་འདེབས་བྱས་འདུག

དབུ་མའི་ལམ་མི་མང་ལས་འགུལ་ཁང་ནས་ཟླ་འདིའི་ཚེས་༨ གསར་འགོད་གསལ་བསྒྲགས་ཤིག་སྤེལ་བའི་མཇུག་ཏུ་གླིང་ཚ་ཚེ་བརྟན་རྡོ་རྗེ་མ་བུ་གསུམ་གྱིས་རྒྱ་མིའི་དར་དམར་འཕྱར་བར་རྒྱབ་སྐྱོར་དགོས་དོན་སྐོར་འཁོད་དོན། ཁོང་མ་བུ་གསུམ་གྱིས་རྒྱ་ནག་གི་རྒྱལ་དར་གཅིག་པུ་འཕྱར་བ་མིན་པར། བོད་ཀྱི་རྒྱ་གར། བལ་ཡུལ་བཅས་ཀྱི་རྒྱལ་དར་མཉམ་འཕྱར་གྱིས་བོད་ཀྱི་བདེན་དོན་འཐབ་རྩོད་གནང་བ་ནི་དངོས་ཡོད་དང་མཐུན་ལ། རྣམ་དཔྱོད་ལྡན་པ། དབུ་མའི་ལམ་གྱི་ནང་དོན་སྒྲུབ་པའི་འཐབ་རྩོད་བྱ་ཕྱོགས་བཅས་ཡིན། རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་འོག་གནས་རྒྱུའི་གྲོས་མོལ་འགྲོ་བཞིན་པ་འདི་དང་རྒྱ་ནག་གི་རྒྱལ་དར་འཕྱར་སྟེ་ཞི་བའི་འཐབ་རྩོད་གནང་བཞིན་པ་གཉིས་ནི་བོད་ལ་མིང་དོན་མཚུངས་པའི་རང་སྐྱོང་ཐོབ་ཆེད་རེད། བོད་ལ་མིང་དོན་མཚུངས་པའི་རང་སྐྱོང་ཐོབ་རྒྱུའི་མངོན་འདོད་ཁ་ཞེ་གཉིས་མེད་ཡིན་པ། བོད་མི་མང་རང་གི་ངོས་ནས་འདི་ལྟའི་ལས་འགུལ་བརྒྱུད་རྒྱ་ནག་དང། འཛམ་གླིང་མི་མང་ལ་ར་སྤྲོད་བྱ་རྒྱུ་ནི་དབུ་མའི་ལམ་ནས་བོད་ཀྱི་བདེན་མཐའ་སེལ་ཐབས་ལ་སྤེལ་དགོས་པའི་འཐབ་རྩོད་རྩེ་གྲས་ཡིན་སྟབས། ཁོང་མ་སྨད་གསུམ་གྱི་རྣམ་དཔྱོད་ལྡན་པའི་འཐབ་རྩོད་འདི་ལ་ཡོངས་སུ་རྒྱབ་སྐྱོར་ཞུ་རྒྱུ་ཡིན། བོད་མིའི་འཐབ་རྩོད་ནི་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ཁ་གཏད་དུ་ལངས་པའམ། རྒྱ་ནག་མི་མང་གི་སེམས་ལ་ཞེ་འཁོན་བསྐྲུན་རྒྱུ་མིན་པར། རྒྱ་ནག་གི་འགོ་ཁྲིད་མཁྲེགས་འཛིན་ཅན་ཚོས་བོད་ནང་ལག་བསྟར་བྱས་པའི་ནོར་འཁྲུལ་ཅན་གྱི་སྲིད་བྱུས་ཀྱི་ཁ་གཏད་དུ་འཚེ་མེད་ཞི་བའི་ལམ་ནས་ལངས་པ་ཞིག་ཡིན་ཞེས་འཁོད་འདུག

གསལ་བསྒྲགས་དེའི་ནང་རྒྱ་མིའི་དར་དམར་འཕྱར་དགོས་དོན་སྐོར་འཁོད་དོན། འཛམ་གླིང་གང་སར་བཞུགས་པའི་བཙན་བྱོལ་བོད་མི་ཆེ་ཕྲ་ཡོངས་ལ་འབོད་སྐུལ་ཞུ་རྒྱུ་ཞིག་ནི། གླིང་ཚ་ཚེ་བརྟན་རྡོ་རྗེ་མ་བུ་གསུམ་ལྟར་བོད་མི་དཀྱུས་མ་ཞིག་གིས་བོད་གཞིས་བྱེས་མི་མང་གི་མངོན་འདོད་རྒྱ་ནག་གཞུང་ལ་དངོས་སུ་བརྡ་སྤྲོད་བྱེད་ཆེད། རང་ཉིད་བློས་གཏོང་གནང་བཞིན་པ་འདི་ནི་ཡོངས་སུ་རྒྱབ་སྐྱོར་གྱི་གནས་ཡིན་པས། མུ་མཐུད་དུ་རྒྱབ་སྐྱོར་ཞུ་རྒྱུ་ཡིན་ལ། ལས་འགུལ་འདི་འདྲ་མར་མེ་གཅིག་ལས་གཉིས་མཆེད་ཀྱི་ཚུལ་དུ་འབྱུང་རྒྱུར་དེ་བས་ཀྱང་འབོད་སྐུལ་ཞུ་རྒྱུ་ཡིན་ཞེས་འཁོད་འདུག །