ནང་གི་ཞི་བདེ་གོང་འཕེལ་ཆེད་དུ་འགན་ཁུར་རྒྱུ་ཡིན།

ཟླ་འདིའི་ཚེས་༡༤ དབྱིན་ཡུལ་གྱི་རྒྱལ་སའི་ཡེ་ཤུ་མཆོད་ཁང་ཆེན་མོའི་ནང་ཇཱོན་ཊེམ་ལེ་ཊོན་གྱི་ཐེབས་རྩའི་གཟེངས་རྟགས་འབུལ་བཞེས་ཀྱི་མཛད་སྒོ་འཚོགས་པ་དང་། ཐེབས་རྩ་དེའི་ཚོགས་གཙོས་༧གོང་ས་མཆོག་དེ་རིང་འདིར་ཕེབས་ཐུབ་པ་ང་ཚོར་སྐལ་བཟང་གི་གོ་སྐབས་ཐོབ་པར་ངོས་འཛིན་བྱེད་ཀྱི་ཡོད་ཅེས་གསུངས་ཡོད་པ་རེད།

ཡེ་ཤུ་ཆོས་དཔོན་ཐེབས་རྩ་དེའི་ཚོགས་གཙོས་མཛད་སྒོའི་ཐོག་གསུང་བཤད་གནང་སྐབས། ༧གོང་ས་མཆོག་ནི་བོད་མི་ཙམ་མ་ཡིན་པར་འགྲོ་འཛམ་གླིང་སྤྱི་ཡོངས་ལ་ཞི་བདེ་དང་མཐུན་ལམ་གྱི་མཚོན་རྟགས་ཤིག་རེད། དུས་རྒྱུན་བཟོད་སྲན་དང་གུས་བརྩི་དགོས་པའི་དྲན་སྐུལ་བོད་མི་གཅིག་པུ་མ་ཡིན་པར། འགྲོ་བ་མི་ཡོངས་ལ་སློབ་སྟོན་གནང་མཁན་༧གོང་ས་མཆོག་དེ་རིང་འདིར་ཕེབས་ཐུབ་པ་ང་ཚོར་སྐལ་བཟང་གི་གོ་སྐབས་ཐོབ་པར་ངོས་འཛིན་བྱེད་ཀྱི་ཡོད། ༡༠༡༢ ལོའི་གཟེངས་རྟགས་འདི་༧གོང་ས་མཆོག་ལ་འབུལ་རྒྱུ་བྱུང་བ་དེ་སྐལ་བཟང་གི་གོ་སྐབས་དང་གཟི་བརྗོད་ལྡན་པ་ཞིག་ཡིན་སྐོར་དང་། ༧གོང་ས་མཆོག་གིས་དུས་རྒྱུན་བྱམས་བརྩེ་དང་སྙིང་རྗེའི་སྐོར་གསུངས་པར་ཡིད་སྨོན་ཞུས་པ་ཞིག་ཡིན་ལ། ཁོང་གིས་དུས་ཡུན་རིང་པོར་ནང་ཆོས་ཀྱི་ཐོག་ནས་ཚན་རིག་འགྲེལ་བཤད་གནང་བ་དང་། ཆོས་ལུགས་གཞན་གྱི་དབུ་ཁྲིད་དང་མཉམ་དུ་འབྲེལ་བ་གནང་བ་དང་། ཀུན་ཁྱབ་ཀྱི་བཟང་སྤྱོད་དང་། འཚེ་མེད་ཞི་བ། ཆོས་ལུགས་འདྲ་མིན་བར་འཆམ་མཐུན་གྱི་གོང་འཕེལ་གཏོང་ཐབས་མཛད་པའི་རླབས་ཆེན་གྱི་མཛད་རྗེས་འགྲན་ཟླ་བྲལ་ཞིག་ཡིན་པས། གཟེངས་རྟགས་དེ་འབུལ་ལམ་ཞུས་པ་ཡིན་ཞེས་འགྲེལ་བརྗོད་གནང་འདུག

༧གོང་ས་མཆོག་གིས་གཟེངས་རྟགས་འབུལ་བཞེས་གནང་ཏེ་གསུང་བཤད་གནང་སྐབས། ང་ལ་གཟེངས་རྟགས་ཐོབ་པར་དགའ་པོ་བྱུང་། ང་གཞན་དང་མ་འདྲ་བའི་དམིགས་བསལ་ཅན་ཞིག་གང་ཡང་མིན་ལ། འགྲོ་བ་མི་ཐེར་འབུམ་བདུན་ཙམ་ཡོད་པའི་ནང་ནས་དགེ་སློང་དཀྱུས་མ་ཞིག་ཡིན། ངས་ནང་གི་ཞི་བདེ་གོང་མཐོར་གཏོང་རྒྱུར་སྔར་བཞིན་འགན་ཁུར་རྒྱུ་ཡིན། དེང་སྐབས་སྤྱི་ཚོགས་ནང་དངུལ་དང་དབང་ཆའི་སྐོར་རྐྱང་རྐྱང་བཤད་ཀྱི་ཡོད་པ་རེད། དངུལ་དང་དབང་ཆས་ནང་གི་ཞི་བདེ་གོང་མཐོར་གཏོང་ཐུབ་ཀྱི་མེད། ནང་གི་ཞི་བདེ་གོང་མཐོར་གཏོང་རྒྱུར་ཆོས་ཁས་ལེན་མིན་ལ་ཁྱད་པར་གང་ཡང་མེད་པར་ང་ཚོ་ཚང་མས་དོ་སྣང་སྤྲོད་དགོས། ཁྱིམ་ཚང་ཕྱུག་པོ་ཡིན་ནངའ་ནང་བྱམས་བརྩེ་ཡིས་ཕུང་ཚེ་ཕྲག་དོགས་དང་ཡིད་ཆེས་མེད་པའི་དཀའ་ངལ་ཡོད་སྐོར་གསུངས་ཡོད་པ་རེད།