གཟེངས་རྟགས་ལ་དགའ་བསུའི་རྩེད་འགྲན།
ཟླ་འདིའི་ཚེས་༡༤ ཉིན་དབྱིན་ཡུལ་ཇཱོན་ཊེམ་ལེ་ཊོན་གྱི་ཐེབས་རྩ་ཚོགས་པའི་འདི་ལོའི་ཆེས་མཐོའི་གཟེངས་རྟགས་དེ་༧གོང་ས་མཆོག་ལ་ཕུལ་བའི་མཛད་སྒོ་དང་སྟབས་བསྟུན། ཉིན་དེའི་དགོང་དྲོ་རྒྱ་གར་ལྷོ་ཕྱོགས་མོན་གྷོ་ས་གནས་རྩེད་རིགས་ཚོགས་ཆུང་གི་གོ་སྒྲིག་འོག་རྐང་སྤོལ་རྩེད་འགྲན་གྱི་དགའ་བསུའི་མཛད་སྒོ་སྟབས་བདེ་ཞིག་འཚོགས་ཡོད་པ་རེད།
མཛད་སྒོའི་ཐོག་ས་འཐུས་ཚོགས་གཙོ་གུ་རུ་རྒྱལ་མཚན་གཙོས་མོན་གྷོ་ས་གནས་སེར་སྐྱ་མི་མཉམ་ཞུགས་བྱས་ཡོད་པ་དང་། མོན་གྷོ་རྐང་སྤོལ་རུ་ཁག་དང་གྷོ་ཝ་རྐང་སྤོལ་རུ་ཁག་གཉིས་ཀྱི་བར་རྩེད་འགྲན་བྱས་ནས་ཐ་མའི་རྒྱལ་ཁ་མོན་གྷོ་རུ་ཁག་ལ་ཐོབ་ཡོད་པ་རེད། རྩེད་རིགས་ཚོགས་ཆུང་གི་ཚོགས་གཙོ་པ་སངས་ཚེ་རིང་ལགས་སུ་རྩེད་འགྲན་དེའི་སྐོར་བཅར་འདྲི་ཞུས་པར།
ཁོང་གིས། ཇཱོན་ཊེམ་ལེ་ཊོན་གྱི་ཐེབས་རྩས་གཟེངས་རྟགས་དེ་༧གོང་ས་མཆོག་ལ་འཕུལ་དགོས་དོན་ནི་༧གོང་ས་མཆོག་གིས་བྱམས་བརྩེ་་དང། འཚེ་བ་མེད་པའི་ལྟ་གྲུབ་ཀྱི་ནུས་སྟོབས་ལ་བརྟེན་ནས་འཛམ་གླིང་གི་སྐྱེ་འགྲོ་ཡོངས་ཀྱི་ནང་སེམས་ཀྱི་དཀའ་རྙོག་སེལ་ཐབས་ཀྱི་ཐབས་ལམ་གཙོ་འདོན་གྱིས་རླབས་ཆེན་གྱི་ཕྱག་ལས་གནང་གི་ཡོད་པས། གཟེངས་རྟགས་དེ་ལྟར་ཕུལ་གྱི་ཡོད་སྐོར་འགྲེལ་བརྗོད་གནང་ཡོད་པ་རེད། དེ་ལ་དགའ་བསུའི་ཆེད་དུ་རྩེད་འགྲན་འདི་གོ་སྒྲིག་བྱས་སྐོར་འགྲེལ་བརྗོད་གནང་སོང་།
ཟེངས་རྟགས་དེ་ནི་ཕྱི་ལོ་༡༩༧༣ ལོར་ཐོག་མར་དབུ་འཛུགས་གནང་ནས་ལོ་ལྟར་ཚོགས་པ་དེའཛམ་གླིང་ཆོས་ལུགས་ཀྱི་མཐུན་སྒྲིལ་ཆེད་ལས་དོན་གཟེངས་ཐོན་གནང་མཁན་ཚོར་ཕུལ་གྱི་ཡོད་དང་། འདི་ལོར་ཐེངས་༤༠ པ་དེ་ཡིན་པ་རེད།།
མོན་གྷོ་གསར་འགོད་པས།
