སྦེལ་ཀོབ་བདེ་སྐྱིད་སླར་གསོ་ས་གནས་འགོ་འཛིན་འཕོ་འགྱུར།

ཟླ་འདིའི་ཚེས་༡༧ ཉིན་རྒྱ་གར་ལྷོ་ཕྱོགས་སྦེལ་ཀོབ་བདེ་སྐྱིད་སླར་གསོའི་ས་གནས་འགོ་འཛིན་གསར་རྙིང་གཉིས་ཀྱིས་རྩིས་ལེན་རྩིས་སྤྲོད་ཁམས་གཙང་བྱས་ཟིན་པའི་མི་མང་ཚོགས་འདུ་ཞིག་བསྐོངས་ཡོད་པ་རེད།

དེ་ཡང་བདེ་སྐྱིད་སླར་གསོའི་མི་མང་ཚོགས་ཁང་དུ་ས་གནས་ཀྱི་འབྲེལ་ཡོད་ཚོགས་པ་སྒྲིག་འཛུགས་དང་། གཞིས་གྲོང་ཁག་གི་སྤྱི་མི། མི་མང་ལྷན་འཛོམས་ཐོག་ལྷོ་སྤྱི་བཀྲིས་ཕུན་ཚོགས་ལགས་དབུ་བཞུགས་ཐོག་སྦེལ་ཀོབ་བདེ་སྐྱིད་སླར་གསོའི་ས་གནས་འགོ་འཛིན་སྐབས་༡༡ པ་ཕུན་ཚོགས་ཚེ་རིང་ལགས་དང་། སྐབས་༡༢ པའི་ས་གནས་འགོ་འཛིན་གསར་པ་བྱམས་པ་ཕུན་ཚོགས་ལགས་གཉིས་ཀྱིས་ཕན་ཚུན་ལས་ཁུངས་ཀྱི་ཡིག་ཆ་སོགས་རྩིས་སྤྲོད་རྩིས་ལེན་ཁམས་གཙང་གནང་ཟིན་པ་སྐོར་ལྷོ་སྤྱི་སྐུ་ངོ་བཀྲ་ཤིས་ཕུན་ཚོགས་ཀྱི་གསལ་བསྒྲགས་བྱས་ཏེ། དེ་རིང་འདི་གར་རྒན་གཞོན་མང་པོ་ཞིག་ཕེབས་འདུག ང་ཚོའི་སྒྲིག་འཛུགས་དང་གཞིས་ཆགས་ཁག་གང་ཡིན་རུང་། མི་རབས་རྒན་གཞོན་བརྗེ་པོ་བརྒྱབ་ནས་འགྲོ་བའི་སྐབས་འདིར། མི་རབས་རྒན་པའི་བྱས་རྗེས་དེ་ཚོ་གཞོན་སྐྱེས་ཚོས་ཤེས་དགོས་པས་མ་ཚད། རྒན་པ་ཚོས་ཀྱང་གཞོན་སྐྱེས་ཚོར་ལམ་སྟོན་སློབ་གསོ་གནང་དགོས་ཀྱི་ཡོད་པ་རེད། བརྒྱུད་རིམ་འདི་འདྲའི་ཁྲོད་ནས་ང་ཚོས་རྒྱལ་ཁབ་དང་གཞིས་ཆགས་གང་ཡིན་རུང་འཛིན་སྐྱོང་བྱེད་དགོས་ཀྱི་ཡོད་རེད། ད་ལྟའི་ས་གནས་འགོ་འཛིན་གསར་པར་ཆ་བཞག་ན། མི་རབས་གསར་པ་ཞིག་གིས་ས་གནས་འགོ་འཛིན་གནང་གི་ཡོད་པ་རེད། ཅེས་གསུངས་ཡོད་པ་རེད།

མེ་སོར་གསར་འགོད་པས།