གཞོན་ལྷན་དབུས་རྒྱུན་གྱིས་ཕྱོགས་བསྐྱོད།

ཟླ་འདིའི་ཚེས་༢༣ ཉིན་རྒྱ་གར་ལྷོ་ཕྱོགས་མོན་གྷོ་ས་གནས་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཟུང་དྲུང་བསྟན་འཛིན་ནོར་བཟང་དང་། དྲིལ་བསྒྲགས་འགན་འཛིན་བསྟན་འཛིན་དབྱངས་འཛོམས་གཉིས་འཚམས་གཟིགས་དང་སྦྲགས། བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་བྱུང་རབས་བོད་རང་བཙན་གྱི་ལས་འགུལ་སྤེལ་ཕྱོགས་སྐོར་ལ་གཏམ་བཤད་བྱས་ཡོད་པ་རེད།

དེ་ཡང་ཉིན་འདིའི་ཞོགས་པ་ཆུ་ཚོད་༧ ཕྱེད་ཐོག་མོན་གྷོ་ནོར་བུ་རི་རྩེར་ལྷག་དཀར་སྲུང་རྩི་དང་སྟབས་བསྟུན་ནས་བོད་སྐྱོང་ལྷ་སྲུང་འཕྲིན་བསྐུར་དང་བསངས་གསོར་ཟབ་རྒྱས་གནང་རྗེས། ཆུ་ཚོད་༩པར་མོན་གྷོ་ས་གནས་གཞོན་ནུའི་རྒྱུན་ལས་དང་རུ་དཔོན་ཚོགས་མི་ཡོངས་མཉམ་འཛོམས་ཐོག་ས་གནས་གཞོན་ལྷན་ཚོགས་ཁང་ཚོགས་འདུ་རྒྱས་འཚོགས་གནང་ཡོད་པ་དང་།  ཐོག་མར་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་དང་བོད་རྒྱལ་ཁབ་ཆེན་པོའི་རྒྱལ་གླུ་འབུལ་བཏང་སྟེ་བོད་བསྟན་སྲིད་མི་རིགས་བཅས་ཀྱི་ཆེད་དུ་སྐུ་སྲོག་བློ་བཏང་གནང་མཁན་ཚོའི་ཆེད་མྱ་ངན་ངག་བཅད་བཅས་ཀྱི་ལས་རིམ་གྲུབ་མཚམས་སུ་མོན་གྷོ་ས་གཞོན་ཚོགས་གཙོ་པདྨ་ཚེ་རིང་ལགས་ཀྱིས་ཉིན་འདིའི་ཚོགས་འདི་ངོ་སྤྲོད་དང་འབྲེལ་བའི་གཏམ་བཤད་གནང་སོང་།

དེ་རྗེས་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་དྲིལ་བསྒྲགས་འགན་འཛིན་བསྟན་འཛིན་དབྱངས་འཛོམས་ལགས་ཀྱིས་བོད་ཀྱི་གཞོན་ནུ་ལྷན་ཚོགས་ཀྱི་ད་ལྟའི་གནས་སྟངས་དང་འབྲེལ་གསུང་བཤད་གནང་དོན།

དེ་རིང་འདིར་ཚོགས་མི་མཉམ་དུ་འཛོམས་རྒྱུ་དེ་དབུས་དང་ས་གནས་གཉིས་ཕ་མ་དང་བུ་ཕྲུག་ནང་བཞིན་བརྩི་ཡི་ཡོད་པས། ང་རང་ཚོ་དེ་རིང་འདིར་ནང་མི་ལྷན་འཛོམས་བྱུང་བ་དེར་དགའ་བོ་ཞེ་དྲག་བྱུང་སོང་།  གཙོ་བོ་ང་རང་གིས་འདོད་པ་ལ་མར་བཤད་པ་ལས་ལྷག་ཡར་ས་གནས་ཚོགས་མིའི་བསམ་ཚུལ་ཉན་པའི་འདོད་པ་ཤུགས་ཆེར་སླེབ་ཀྱི་འདུག རྒྱུ་མཚན་ག་རེ་བྱས་ནས་ལབ་ན་ང་ཚོ་ཡང་ཡང་ཐུག་པའི་གོ་སྐབས་རག་གི་མེད་པས།  ལས་འགུལ་སྤེལ་སྐབས་དང་དེ་མ་ཡིན་པའི་ལྟ་བ་ལངས་ཕྱོགས་སོགས་ཀྱི་ཐད་ནས་ས་གནས་ལ་དཀའ་ངལ་ག་རེ་འཕྲན་གྱི་ཡོད་མེད་དང་། དཀའ་ངལ་དེའི་རིགས་ལ་གདོང་ལེན་དང་ལན་ག་འདྲ་རྒྱག་དགོས་མིན་དང་།

གཉིས་པ་དེ་བོད་ཀྱི་གཞོན་ནུ་ལྷན་ཚོགས་ལ་མཚོན་ན་ངོམ་རྒྱུ་ཡོད་ན་མེད་ན་ས་གནས་ཡན་ལག་༨༧ དང་ཚོགས་མི་༣༥༠༠༠ ཡོད་པ་དེ་རེད། སྤྱིར་བཏང་བོད་ཀྱི་གཞོན་ནུ་ལྷན་ཚོགས་གཞུང་འབྲེལ་མ་ཡིན་པའི་ཚོགས་པ་རྙིང་ཤོས་དང་ཆེས་ཤོས་སུ་བརྩི་ཡི་ཡོད་པ་རེད།  གལ་ཆེན་པོ་ཞེ་དྲག་རེད།  ཡིན་ན་ཡང་སྒྲིག་འཛུགས་འདི་ད་ལྟ་བར་ལོ་༤༣ རིང་ལ་རྩ་བ་བརྟན་པོ་མཁྲེགས་པོ་གནས་ཐུབ་ཡོད་པ་དེ་ག་རེ་བྱས་ནས་རེད། སྤྱིའི་དཔལ་འབྱོར་གྱི་སྦྱིན་བདག་ཆེན་པོ་སོགས་གང་ཡང་ཡོད་པ་མ་རེད། ང་ཚོ་ལ་ཡོད་ན་མེད་ན་ས་གནས་ཡན་ལག་༨༧ དང་ཚོགས་མི་༣༥༠༠༠་དེ་རེད། དེ་འདྲ་ཡིན་དུས་ཚོགས་མི་ཚོའི་སོ་སོའི་སྒྲིག་འཛུགས་ལ་ཞེན་ཁོག་དང་རྒྱབ་སྐྱོར་བྱེད་རྒྱུ་དང་ལས་འགུལ་ཁག་ལ་མཉམ་ཞུགས་གནང་རྒྱུ་དེ་ཧ་ཅང་གལ་ཆེན་རེད་དྲན་གྱི་ཡོད་ཅེས་དང་།

ཡང་ཁོང་གིས་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་དེ་བཙུགས་དགོས་པའི་རྒྱུ་མཚན་དང་བྱུང་རབས་ལོ་རྒྱུས་སྐོར་ལ་གསུངས་དོན།

དམིགས་བསལ་གཞོན་སྐྱེས་ཚོའི་ཤེས་ཆེད་དུ་ཡིན། སྒྲིག་འཛུགས་འདིའི་ཚོགས་མི་ཆགས་ན་སྒྲིག་འཛུགས་འདི་ག་འདྲ་བཙུགས་ཡོད་མེད་དང་ག་རེའི་ཆེད་དུ་བཙུགས་ཡོད་མེད་ཤེས་དགོས་པ་གལ་ཆེན་པོ་སོང་ཙང་།  སྤྱིར་བཏང་ཚང་མའི་མཁྱེན་གསལ་རེད། ༡༩༧༠་ཕྱི་ཟླ་༡༠ བའི་ཚེས་༧ ཉིན་བོད་ཀྱི་གཞོན་ནུ་ལྷན་ཚོགས་དབུ་རྙེས་པ་རེད། ༡༩༥༩ ལོར་ང་རང་ཚོའི་ཕ་མའི་ཕ་མ་ཚོར་བཙན་བྱོལ་ལ་སླེབ་པ་རེད། བཙན་བྱོལ་ལ་སླེབ་དགོས་པའི་རྒྱུ་མཚན་ག་རེ་རེད་ལབ་ན། ང་ཚོ་ལ་བཟའ་རྒྱུ་དང་བཏུང་རྒྱུ་དེ་བཞིན་གྱོན་རྒྱུ་མ་རག་ནས་བཙན་བྱོལ་ལ་ཡོང་བ་མ་རེད། ང་ཚོ་ལ་རང་དབང་མེད་ཙང་ཆབ་སྲིད་ཀྱི་སྐྱབས་བཅོལ་དུ་བཙན་བྱོལ་ལ་ཡོང་བ་ཚང་མའི་ཤེས་གསལ་རེད།  ང་ཚོའི་ཕ་མེས་ཚོ་བཙན་བྱོལ་ལ་སླེབ་པའི་རྗེས་སུ་བཟའ་གོན་གཉིས་དང་གནམ་གཤེས་སོགས་ཀྱི་དཀའ་ངལ་མཐའ་དག་ལ་གདོང་ལེན་གནང་ནས་༡༩༧༠ ཟླ་བ་༡༠ ཚེས་༧ ཉིན་བོད་ཀྱི་གཞོན་ནུ་ལྷན་ཚོགས་དངོས་སུ་དབུ་བརྙེས་པ་རེད། སྐབས་དེར་གཞིས་ཆགས་ཁག་ནས་སྐུ་ཚབ་༣༡༥་ཕེབས་པ་མ་ཟད་༧གོང་ས་མཆོག་ཀྱང་ཚོགས་མགོན་དུ་ཆིབས་བསྒྱུར་གནང་ཡོད་པ་རེད།

སྐབས་དེ་དག་ཏུ་ད་ལྟ་ནང་བཞིན་གྱི་མཐུན་རྐྱེན་འཛོམས་པོ་མེད་ན་ཡང་ལྷག་བསམ་དང་སེམས་ཤུགས་ཧ་ལས་པའི་ཕྱུག་པོ་རེད།   ད་ལྟའི་ཆར་ང་ཚོ་མཐུན་རྐྱེན་འཛོམས་པོ་རེད་དེ་ལྷག་བསམ་དང་སེམས་ཤུགས་དྲང་བདེན་རིགས་དེ་ཚོ་ཏོག་ཙམ་ཉམས་རྒུད་དུ་འགྲོ་ཡི་ཡོད་པ་རེད།   དེ་འདྲ་ཡིན་དུས་ང་རང་ཚོ་གཞོན་སྐྱེས་ཚོའི་ངོས་ནས་མི་རབས་རྒན་པ་ཚོར་མིག་དཔེར་བལྟས་ནས་སོ་སོའི་རྒྱལ་ཁབ་དང་མི་རིགས་ཀྱི་དྲང་བདེན་གྱི་ལོ་རྒྱུས་ལ་གཞི་བཅོར་ནས་མི་རབ ས་རྒན་པ་ཚོའི་དཀའ་ལས་རྒྱབ་བཞག་པ་དེ་རྒྱུན་སྐྱོང་ང་ཚོའི་མ་བྱས་ན་སུའི་བྱེད་དགོས་པ་རེད། དེ་འདྲ་ཡིན་དུས་རེ་སྐུལ་ཞུ་རྒྱུ་ཞིག་ལ་མ་འོངས་པར་ས་གནས་ཀྱི་གཞོན་སྐྱེས་ཚོའི་འགན་ཁུར་དང་དོ་སྣང་མང་ཞིག་བྱེད་རྒྱུའི་འབོད་སྐུལ་ཞུ་བཞིན་ཡོད་ཅེས་སོགས་གསུངས་སོང་།

དེ་རྗེས་ཟུང་དྲུང་བསྟན་འཛིན་ནོར་བཟང་ལགས་ཀྱིས་སྤྱི་ཡོངས་ཀྱི་བོད་ཕྱི་ནང་གི་ཆབ་སྲིད་ཀྱི་གནས་སྟངས་དང་ལྷག་དོན་བོད་རང་བཙན་འཐབ་རྩོད་ཀྱི་བརྒྱུད་རིམ་ནང་གང་སྤེལ་བའི་ལས་འགུལ་ལ་གྲུབ་འབྲས་གང་མཚམས་ཐོན་གྱི་ཡིན་པའི་སྐོར་ལ་གསུང་དོན།

འདས་པའི་ལོ་༤༣ ནང་ལོགས་སུ་བོད་ཀྱི་གཞོན་ནུ་ལྷན་ཚོགས་ཀྱི་སྒྲིག་འཛུགས་འདི་བོད་ཕྱི་ནང་གཉིས་ཀྱི་མི་མང་གིས་རྩ་ཆེན་པོ་རྩི་སའི་སྒྲིག་འཛུགས་ཤིག་ཆགས་བསྡད་ཡོད།  དེ་ག་ནང་བཞིན་གྱི་སྒྲིག་འཛུགས་འདིའི་ལས་ཀའི་ནུས་པ་ཐོན་གྱི་ཡོད་པ་གསལ་བོ་ཞེ་དྲག་རེད། དེ་ཡང་དབུས་དང་ས་གནས་ཀྱི་རྒྱུན་ལས་གཅིག་པུའི་འཇོན་བཞག་པ་ཞིག་གང་ཡང་མ་རེད། གང་སྤེལ་བའི་ལས་འགུལ་ནང་ཚོགས་མི་ཚོའི་འགན་ཁེར་དང་ཆ་ཤས་ཤུགས་ཆེན་པོ་བླངས་བའི་གྲུབ་འབྲས་ལ་བརྟེན་ནས་ད་ལྟའི་བར་སྒྲིག་འཛུགས་འདི་ཡར་རྒྱས་ཞེ་དྲག་འགྲོ་ཡི་ཡོད་པ་མ་ཟད་ཆ་འཇོག་བྱེད་ས་ཞིག་ཆགས་པ་རེད། མཚམས་གཟིགས་སྐབས་མི་མང་ལ་སྐད་ཆ་བཤད་པའི་དམིགས་ཡུལ་གལ་ཆེ་ཤོས་ཏེ་ཆབ་སྲིད་ཀྱི་གོ་རྟོགས་སྤེལ་རྒྱུ་དང་མི་མང་གི་ལས་འགན་ངོ་སྤྲོད་བྱེད་རྒྱུ་།

དེ་ག་ནང་བཞིན་བོད་ནང་གི་ད་ལྟའི་ཛ་དྲག་གི་གནས་སྟངས་ག་འདྲ་ཆགས་ཀྱི་ཡོད་མེད་དང་། གཞན་ཡང་བོད་ཀྱི་གཞོན་ནུ་ལྷན་ཚོགས་ཀྱིས་ཐོག་མའི་དམིགས་ཡུལ་དཀའ་ངལ་ག་ཚོད་འཕྲད་ཀྱང་རང་བཙན་གྱི་ལངས་ཕྱོགས་སམ་རང་བཙན་འཐབ་རྩོད་དེ་བློས་བཏང་མི་བྱེད་པའི་དམ་བཅའ་ཡོད་པ་བཞིན་རང་བཙན་རྩོད་པའི་སྐབས་སུ་རང་བཙན་རག་གི་ཡོད་པའི་སྤོབས་པ་དང་གདངས་ཚོད་ཡོད་པའི་ཐོག་མི་ལོ་༤༣ ལ་རང་བཙན་རྩོད་ལེན་བྱས་ཡོད་པ་སོང་ཙང་།  འདས་པའི་རང་བཙན་འཐབ་རྩོད་ཀྱི་བརྒྱད་རིམ་ནང་ལོགས་སུ་འགྱུར་བ་ག་རེ་སོང་བ་དང་འབྱུང་འགྱུར་ང་ཚོ་ངོས་ནས་གྲ་སྒྲིག་ག་རེ་ཡོད་མེད་དང་།   དེ་བཞིན་རང་བཙན་རྩོད་དགོས་པའི་རྒྱུ་མཚན་གང་ཡིན་བཅས་ཀྱི་སྐོར་ལ་ཆབ་སྲིད་གོ་རྟོགས་སྤེལ་རྒྱུའི་ལས་རིམ་གཙོ་བོ་དེ་ཆགས་ཀྱི་ཡོད་ཅེས་དང་།

མུ་མཐུད་ནས་གསུང་དོན།  སོ་སོ་རང་ཉིད་ལ་ཆ་བཞག་པ་ཡིན་གཞོན་ནུ་ལྷན་ཚོགས་ནང་ཞུགས་དགོས་པའི་དམིགས་ཡུལ་གཙོ་བོ་དེ་ གཞོན་ནུ་ལྷན་ཚོགས་ཀྱི་ཚོགས་མིའི་ནང་སེར་སྐྱ་དང་ཕོ་མོ། དེ་བཞིན་ཆོལ་ཁ་ཆོས་བརྒྱུད་སོགས་དབྱེ་མེད་ཀྱི་ཚོགས་པ་ཞིག་ཡིན་ཙང་གཞོན་ནུ་ལྷན་ཚོགས་དེ་གཅིག་སྒྲིལ་ཡིན་པའི་གདངས་ཚོད་དང་སྤོབས་པ་ཞིག་རྙེད་པའི་སྒོ་ནས་འཛུལ་ཞུགས་བྱས་པ་ཡིན།  དེ་ག་ནང་བཞིན་རྒྱུ་མཚན་གཉིས་པ་དེ་ང་ཚོའི་ལོ་རྒྱུ་ཆ་ནས་རང་བཙན་རེད་ཅེས་བཤད་ཀྱི་ཡོད་པ་བཞིན་བོད་ནང་ད་ལྟའི་ཆར་ཚེ་སྲོག་གི་འགྲོ་སོང་བཏང་ནས་རང་བཙན་རྩོད་ཀྱི་ཡོད་པ་རེད། གཞོན་ནུ་ལྷན་ཚོགས་ལ་མཚོན་ན་ཐོག་མ་ཉིད་ནས་རང་བཙན་རྩོད་རྒྱུའི་ཆོད་སེམས་བརྟན་པོ་ཡོད་པའི་ཚོགས་པ་ཞིག་ཡིན་པའི་ཆ་ནས་ང་ཚོགས་མིའི་ནང་འཛུལ་ཞུགས་བྱས་པ་ཡིན་ཅེས་དང་།

འདས་པའི་བརྒྱུད་རིམ་ནང་ལོགས་སུ་བོད་ཀྱི་གཞོན་ནུ་ལྷན་ཚོགས་དབུས་ས་གཉིས་ནས་ལས་འགུལ་མང་དག་ཞིག་སྤེལ་གྱི་འདུག་དེའི་རྒྱ་གཞུང་ལ་གནོད་ཀྱི་འདུག་གམ། བོད་ནང་གི་བོད་མི་ཚོར་ཕན་གྱི་འདུག་གམ་ཟེར་བའི་དྲི་བ་དེ་རེད།  བོད་ན་ཡོད་པའི་བོད་མི་ཚོར་ཕན་གྱི་ཡོད་པའི་དཔེ་མཚོན་ཞིག་བཞག་ན། སྐུ་ཞབས་དཔལ་ལྡན་རྒྱ་མཚོ་མི་ལོ་༣༣་རིང་རྒྱ་མིའི་མཙོན་ཁང་ནང་བཞུག་པ་རེད།  ད་ལྟའི་ཆར་བཙན་བྱོལ་དུ་འབྱོར་ཡོད་པ་མ་ཟད་ཁོང་གིས་བཙན་བྱོལ་ནང་དང་ཕྱི་རྒྱལ་ཡུལ་གྲུ་ཁག་ཏུ་དུས་ནས་དུས་སུ་བོད་དོན་དྲིལ་བསྒྲགས་ཀྱི་ལས་འགུལ་སྤེལ་གྱི་ཡོད་པ་རེད།  དེའི་སྐབས་སུ་སྤོབས་པ་ཆེན་པོའི་ཐོག་ནས་ང་རང་མི་ལོ་༣༣་ནས་རྒྱ་མིའི་བཙོན་འོག་ནས་གློད་བཀྲོལ་ཐོབ་པ་དེ་བོད་ཀྱི་གཞོན་ནུ་ལྷན་ཚོགས་ཀྱི་བཀའ་དྲིན་ཡིན་ཅེས་གསུང་གི་འདུག   དེ་འདྲ་སོང་ཙང་ང་ཚོའི་ཆབ་སྲིད་བཙོན་མ་རེ་རེའི་མིང་ཐོག་ནས་མར་མེ་ཁྲོམས་སྐོར་གྱི་ལས་འགུལ་ཞིག་སྤེལ་བ་ཡིན་ན་ཉིན་དེར་བཙོན་མ་ཚོའི་ཞར་ལག་ཡག་པོ་རག་གི་ཡོད་པ་དང་གཅར་རྡུང་བྱེད་རྒྱུ་དེ་ཡང་ཉུང་རུ་འགྲོ་གི་ཡོད་པ་གསུང་གི་འདུག  སོང་ཙང་ཁུངས་དང་ལྡན་པའི་རྒྱུ་མཚན་གཅིག་རེད།  གཉིས་པ་དེ་གཞོན་ནུ་ལྷན་ཚོགས་ཀྱི་སྤེལ་བཞག་པའི་ངོ་རྒོལ་སྐད་འབོད་སོགས་རེ་ཟུང་གིས་ཕན་ཐོག་མི་འདུག་གསུང་གི་ཡོད་པ་རེད། འོན་ཀྱང་དེའི་ཕན་ཐོག་གི་ཡོད་པ་གསལ་བོ་རེད། རྒྱུ་མཚན་ད་ལྟའི་ཆར་རྒྱ་མིའི་དཔོན་རིགས་ཚོ་ཕྱི་རྒྱལ་ཡུལ་གྲུ་ཁག་ཏུ་འགྲོ་སྐབས་བོད་པའི་སྐད་འབོད་བྱེད་སྐབས་རྒྱ་མི་ཚོའི་ལད་ཟློས་བྱེད་ཀྱི་ཡོད་པ་རེད། གཞན་ཡང་རྒྱ་མིས་གཞོན་ནུ་ལྷན་ཚོགས་འཇིགས་སྐུལ་རང་ལུགས་པ་རེད་ཅེས་སྐྱོན་བརྗོད་བྱེད་ཀྱི་ཡོད་པ་སོགས་ཀྱི་ག་རེ་མཚོན་གྱི་ཡོད་རེད་ལབ་པ་ཡིན་ན་ལས་འགུལ་དེའི་རིགས་ཀྱིས་རྒྱ་མིར་གནོད་ཀྱི་ཡོད་པ་དང་བོད་ནང་གི་བོད་པ་ཚོར་ཕན་གྱི་ཡོད་པ་གསལ་བོ་རེད་ཅེས་གསུང་སོང་།

ཡང་ཁོང་གིས་གསུང་དོན།    སྤྱི་ཚོགས་ནང་ལོགས་སུ་ཁག་གཅིག་གིས་རང་བཙན་རྩོད་ལེན་བྱེད་མཁན་ཚོར་༧གོང་ས་མཆོག་གི་ཁ་གཏད་དམ་བཀའ་གསུང་ལ་ཉན་གྱི་ཡོད་མ་རེད་ལབ་པ་སོགས་མཚམས་རེར་སྐྱོན་མེད་སར་སྐྱོན་བཙུགས་བསྡད་པ་དེ་འདྲ་ཡོང་གི་ཡོད་པ་རེད། ༧གོང་ས་མཆོག་གིས་སྐབས་དང་དུས་ལ་གཟིགས་ནས་དབུ་མའི་ལམ་གྱི་སྲིད་ཇུས་སྒང་ལ་འགྲོ་ཡོད་པ་རེད་དེ། ཡིན་ན་ཡང་ཐ་མའི་ཐག་ཆོད་དེ་མང་གཙོ་ཞིག་ཕུལ་ཡོད་པ་རེད། བོད་རྒྱལ་ཁབ་དང་བོད་མི་རིགས་ཀྱིས་ཆེད་དུ་ལྟ་བ་ལངས་ཕྱོགས་ག་རེ་ཡིན་ཡང་འཛིན་ཆོག་གི་ཡོད་པ་རེད།  གཉིས་པ་དེ་༧གོང་ས་མཆོག་གིས་ཐ་མའི་བཀའ་སློབ་དེ་དབུ་མའི་ལམ་མ་རེད་ལ། རང་སྲིད་རང་སྐྱོང་དེ་བས་ཀྱང་མ་རེད། བོད་པའི་རང་དབང་འཐབ་རྩོད་དེ་འཚེ་མེད་ཞི་བའི་ལྟ་གྲུབ་ཀྱི་ཐོག་ལ་ངེས་པར་དུ་ཤར་བསྐྱོད་བྱེད་དགོས་པ་༧གོང་ས་མཆོག་གི་མཐར་ཐུག་གི་དགོངས་གཞི་རེད་ལ་བོད་ཀྱི་གཞོན་ནུ་ལྷན་ཚོགས་ཀྱིས་བོད་དོན་འཐབ་རྩོད་ཀྱི་བརྒྱུད་རིམ་ནང་ལོགས་སུ་གང་སྤེལ་བའི་ལས་འགུལ་ཐམས་ཅད་འཚེ་མེད་ཞི་བ་ཉག་གཅིག་གི་སྒང་ལ་ཤར་བསྐྱོད་བྱེད་ཀྱི་ཡོད་པ་ཀུན་གྱི་མཁྱེན་གསལ་རེད་ཅེས་སོགས་གསུངས་སོང་།

གཞན་ཡང་ཕྱི་ཚེས་༢༣་ནས་༢༥ བར་ཉིན་གསུམ་རིང་མོན་གྷོ་ས་གནས་གཞིས་སྤྱི་ཚོགས་དང་གདན་ས་དགའ་འབྲས་གཉིས་བླ་སྤྱི་བཅས་སུ་ཚོགས་འདུ་རིམ་པའི་འཚོགས་ནས་མི་མང་གི་བསམ་ཚུལ་བསྡུ་ལེན་དང་དྲི་བ་དྲིས་ལན་གྱི་ལམ་ནས་བསམ་ཚུལ་རྗེས་རེས་སོགས་གནང་སོང་།

མོན་གྷོ་གསར་འགོད་པས།