བོད་པའི་བུ་མོ་ཞིག་རྒྱལ་སྤྱིའི་མིག་མང་རྩེད་འགྲན་ནང་ཚུད་འདུག

བོད་པའི་བུ་མོ་ཞིག་གིས་ཨོ་སུ་ཊི་ལི་ཡའི་རྒྱལ་ཁབ་ཀྱི་ཚབ་བྱས་ཏེ། རྒྱལ་སྤྱིའི་མིག་མང་རྩེད་འགྲན་ཚད་མཐོ་ཤོས་དེའི་ནང་མཉམ་ཞུགས་བྱ་རྒྱུ་རེད་འདུག

དེ་ཡང་ཟླ་འདིའི་ཕྱི་ཚེས་༢༨ ནོར་ཝེ་བོད་ཀྱི་རླུང་འཕྲུན་ཁང་གིས་གནས་ཚུལ་སྤེལ་གསལ་ལྟར་ན། ཨོ་སི་ཊི་རི་ཡའི་རྒྱལ་ས་ཁེན་བྷེ་རན་དུ་གནས་སྡོད་བྱས་པའི་རང་ལོ་༡༧ ཡིན་པའི་གཡུ་ཐོག་ཨེ་མ་སྒྲོལ་མ་ལགས་རིང་མིན་ཕྱི་ཟླ་༨ པའི་ནང་། ཊ་ཀའི་ཁུལ་དུ་འཛམ་གླིང་གི་མིག་མང་རྩེད་འགྲན་ཚད་མཐོ་ཤོས་དེའི་ནང་ཨོ་སུ་ཊི་ལི་ཡའི་རྒྱལ་ཁབ་ཀྱི་ཚབ་བྱས་ཏེ་མཉམ་ཞུགས་བྱང་རྒྱུ་ཡིན་པ་དང་། ཨོ་སུ་ཊི་རི་ཡའི་རྒྱལ་ས་ཁེན་བྷེ་རན་དུ་གནས་སྡོད་བྱས་པའི་གཡུ་ཐོག་ཨེ་མ་སྒྲོལ་མ་ཕྱི་ལོ་༢༠༡༡ ལོར། ནིའུ་ཟི་ལིའི་ཁུལ་གྱི་རོ་ཐོ་རོའོ་གྲོང་ཁྱེར་ནང་དུ་རྒྱལ་སྤྱིའི་བུད་མེད་ཀྱི་མིག་མང་རྩེད་འགྲན་གྱི་ཐོག་བྱ་དགའ་ཨང་དང་པོ་ཐོབ་ནས་རྒྱལ་སྤྱིའི་ཐོག བུད་མེད་མིག་མང་རྩེད་འགྲན་གྱི་རྩེ་ཕུད་ཆགས་ཡོད་པར་བརྟེན།  ད་ལམ་ཨོ་སུ་ཊི་རི་ཡའི་རྒྱལ་ཁབ་ཀྱི་ཚབ་བྱས་ཏེ། རྒྱལ་སྤྱིའི་མིག་མང་རྩེད་འགྲན་ཚད་མཐོ་ཤོས་དེར་ཞུགས་རྒྱུའི་གོ་སྐབས་ཐོབ་ཡོད་པ་དང་། དེ་ནི་བོད་རིགས་ཤིག་གིས་ཚད་མཐོ་བའི་རྩེད་འགྲན་དེ་འདྲ་ཞིག་གི་ནང་། རྒྱལ་ཁབ་ཅིག་གི་སྐུ་ཚབ་བྱས་ཏེ་མཉམ་ཞུགས་གནང་བ་ཐེངས་དང་པོར་ཆགས་ཡོད་པ་རེད།

ཨོ་སུ་ཊི་རི་ཡའི་རྒྱལ་ས་ཁེན་བྷེ་རན་དུ་གནས་སྡོད་རང་ལོ་༡༧ ཡིན་པའི་གཡུ་ཐོག་ཨེ་མ་སྒྲོལ་མའི་ཕ་ལགས་ཀྱི་མིང་ལ་བླ་མ་ཆོས་གྲགས་རིན་པོ་ཆེ་ཟེར་གྱི་ཡོད་པ་དང་། ཨེ་མ་སྒྲོལ་མའི་སྤུན་མཆེད་བུ་ཤེས་རབ་དང་འཇིགས་མེད་གཉིས་ཀྱང་མིག་མང་རྩེད་རྒྱུར་དགའ་པོ་ཡོད་པ་རེད་འདུག