རྒྱ་གར་ནང་པའི་དུས་སྟོན་སྐབས་བོད་དོན་གླེང་སློང་།
རྒྱ་གར་མཱ་ཧ་རཤ་ཊ་ར་མངའ་སྡེའི་ཡ་ཝནཏ་མལ་གྲོང་ཁྱེར་ནང་འདི་ཟླའི་ཚེས་༢༥ ནས་༢༧ བར་ཉིན་གསུམ་རིང་རྒྱ་གར་ནང་པའི་དུས་སྟོན་རྒྱས་འཛོམས་ཤིག་ཚོགས་ཡོད་པ་དང་། སྐབས་དེར་དབུ་འབྱེད་མཛད་སྒོའི་སྐུ་མགྲོན་གཙོ་སྤྱི་འཐུས་ཀརྨ་ཡེ་ཤེས་ཕེབས་ཡོད་པ་རེད།
དེ་ཡང་ཚེས་༢༥ ཉིན་གྱི་སྔ་དྲོ་དུས་སྟོན་གྱི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་སྤྱི་འཐུས་ཀརྨ་ཡེ་ཤེས་ཀྱིས་སྤྱིར་ནང་ཆོས་ཀྱི་ངོ་སྤྲོད་སྙིང་བསྡུས་དང་། བོད་དུ་ནང་ཆོས་དར་ཚུལ། ད་ལྟ་བོད་ཀྱི་སྣོད་བཅུད་གཉིས་ཀར་རྒྱ་དམར་གྱིས་དྲག་སྤྱོད་ཇི་ལྟར་བྱས་དང་བྱེད་བཞིན་ཡོད་སྐོར། བོད་ནང་རྒྱལ་གཅེས་དཔའ་བོ་དཔའ་མོ་རྣམས་ཀྱིས་རང་ལུས་མེར་བསྲེག་གི་གནས་ཚུལ་རྣམས་ཧིན་སྐད་ཐོག་ངོ་སྤྲོད་ཞུས་པར་ཚོགས་བཅར་བ་ཡོངས་ནས་རྒྱབ་སྐྱོར་གྱི་རྣམ་པ་ཤུགས་ཆེན་ཐོབ་ཡོད་པ་རེད།
དུས་སྟོན་ཚོགས་གཙོ་སྐུ་ཞབས་སཱུ་ལོ་ཆའོ་ནཱ་མོ་ཧན་རའོ་ཡིས་ངོ་སྤྲོད་གསུང་བཤད་སྐབས། རྒྱ་གར་གྱི་ནང་པ་ཚོའི་ངོས་ནས་བོད་ནང་གི་བོད་མིའི་དཀའ་སྡུག་སྤྱི་དང་། ལྷག་པར་ཆོས་བྱེད་རང་དབང་དང་། འགྲོ་བ་མིའི་ཐོབ་ཐང་གི་གནད་དོན་སོགས་ཀྱི་ཐད་དུས་དང་རྣམ་པ་ཀུན་ཏུ་རྒྱབ་སྐྱོར་གནང་རྒྱུ་ཡིན་ལུགས་ཀྱི་གསུང་བཤད་ཀྱང་གནང་ཡོད་པ་དང་། ད་རེས་ཀྱི་དུས་སྟོན་ཐོག་མི་མང་གསུམ་སྟོང་ཙམ་ནས་ལྷན་བཞུགས་གནང་ཡོད་པ་རེད།
ད་དུང་ད་རེས་ཀྱི་དུས་སྐབས་དང་བསྟུན་ཕྱི་ཚེས་༢༥ ཉིན་རྒྱབ་མཱ་ཧ་རཤ་ཊ་ར་མངའ་སྡེའི་སྤྱི་ཚོགས་བདེ་དོན་བློན་ཆེན་སྐུ་ཞབས་ཤཱི་ཝ་རྗེ་རའོ་དང་མཇལ་འཕྲད་ཞུས་ཏེ། བོད་ནང་གི་ད་ལྟའི་ཛ་དྲག་གནས་སྟངས་ངོ་སྤྲོད་དང་། རྒྱ་གར་གཞུང་མང་ནས་བོད་མིའི་ཐོག་རྒྱབ་སྐྱོར་ཤུགས་ཆེ་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་པ་དང་། སླད་མར་ཡང་བོད་དང་བོད་མིའི་དཀའ་ངལ་མ་སེལ་བར་སྔར་བཞིན་རྒྱབ་སྐྱོར་མུ་མཐུད་གནང་སྐྱོང་ཡོང་བའི་རེ་འདུན་ཡང་ཞུས་ཡོད་པ་རེད།
སྐབས་དེར་བློན་ཆེན་མཆོག་གི་སར་ངོ་བཅར་ཡོད་པའི་ཁུལ་དེའི་གསར་འགྱུར་བརྒྱུད་ལམ་འདྲ་མིན་འཛོམས་པ་དང་བསྟུན། བརྒྱུད་ལམ་ཁག་ཏུ་ཡང་བོད་དོན་ངོ་སྤྲོད་བྱས་ཡོད་པ་རེད།།
