སེ་ར་ཆོས་སྒར་དུ་མ་ཎི་དུང་སྒྲུབ་འཚོགས་པ།

ཟླ་འདིའི་ཚེས་ ༤ ཉིན་སེ་ར་ཆོས་སྒར་དུ་༧རྒྱལ་བ་རིན་པོ་མཆོག་གི་སྐུ་ཚེའི་ཞབས་རིམ་དང་བོད་བསྟན་སྲིད་ཆེད་མ་ཎི་དུང་སྒྲུབ་ཅིག་འཚོགས་ཡོད་པ་རེད།

དེ་ཡང་ས་ག་ཟླ་བའི་ཚེས་བཅོ་ལྔའི་དུས་ཆེན་ཁྱད་པར་ཅན་གྱི་ཉིན་མོ་འདིར། སེར་བྱེས་མཁན་རིན་པོ་ཆེ་བློ་བཟང་བདེ་ལེགས་མཆོག་ནས་སེར་བྱེས་ཆོས་རའི་ནང་སྦེལ་ཀོབ་ཁུལ་གྱི་མི་མང་སྟོང་ཚོ་བརྒལ་བ་ཞིག་ལ་སྤྱན་རས་གཟིགས་ངན་སོང་ཀུན་གྲོལ་གྱི་རྗེས་གནང་ཞིག་གནང་ཡོད་པ་དང་། སྐབས་དེར་ས་གནས་སྦེལ་ཀོབ་བོད་རིགས་མང་ཚོགས་ཀྱིས་༧གོང་ས་མཆོག་གི་ཞབས་རིམ་དང་། བོད་བསྟན་སྲིད་མི་རིགས་ཀྱི་ཆེད་དུ་སྐུ་སྲོག་དོར་བའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་དུ་མ་ཎི་དུང་ཕྱིར་གསོག་སྒྲུབ་འཚོགས་ཡོད་པ་རེད།

གཞན་ཡང་ཉིན་མོ་དེར་སེར་བྱེས་ཕྱག་མཛོད་དགེ་བཤེས་ཐུབ་བསྟན་སྨོན་ལམ་གྱིས་སེར་བྱེས་དགེ་འདུན་པ་ཡོངས་ཀྱི་ཚབ་བྱས་ནས་བོད་བསྟན་སྲིད་རང་དབང་གི་ཆེད་དུ། སྐུ་སྲོག་དོར་བའི་རྒྱལ་གཅེས་དཔའ་བོ་དང་དཔའ་མོ་ཡོངས་ཀྱི་ནང་མི་ཉེ་འབྲེལ་རྣམས་ལ་ཐུགས་གསོའི་བྱེད་ཀྱི་ཡོད་ཅེས་གསར་འགོད་པར་བརྗོད་ཡོད་པ་རེད། དེ་མིན་ད་དུང་ཉིན་མོ་དེར་སྦེལ་ཀོབ་ཁུལ་གྱི་བོད་མིའི་ཚོང་ཁང་དང་ཟ་ཁང་སོགས་ཡོངས་རྫོགས་སྒོ་རྒྱབ་ཡོད་པ་དང་། མི་མང་རྣམས་ཀྱིས་རང་ལུགས་ཀྱི་ཟབ་འཆོར་སྤྲས་ཏེ། ཞོགས་པ་སྔ་པོ་ནས་དགོན་སྡེ་ཁག་ལ་ཆོས་མཇལ་དུ་བསྐྱོད་པ་སོགས་རྣམ་དཀར་དགེ་བའི་ལས་ལ་རྒྱ་ཆེར་འབད་ཏེ་སངས་རྒྱས་ཤ་ཀྱཱ་ཐུབ་པའི་སྐུའི་འཁྲུངས་སྐར་ལ་སྲུང་བརྩི་ཞུས་ཡོད་པ་རེད།།

མེ་སོར་གསར་འགོད་པ།