སྦེལ་ཀོབ་དུ་ཆུ་སྒང་དུས་དྲན།

ཟླ་འདིའི་ཚེས་ ༡༦ ཉིན་རྒྱ་གར་ལྷོ་ཕྱོགས་སྦེལ་ཀོབ་ཁུལ་དུ་མདོ་ཁམས་ཆུ་བཞི་སྒང་དྲུག་སྟན་སྲུང་དྭངས་བླངས་དམག་གི་སྒྲིག་འཛུགས་དབུ་བརྙེས་ནས་མི་ལོ་ ༥༤ འཁོར་བའི་དུས་དྲན་བསྲུང་བརྩི་བྱས་ཡོད་པ་རེད།

དེ་ཡང་ཉིན་དེའི་ཞོགས་པའི་ཆུ་ཚོད་ ༨ ཕྱེད་ནས་དཀར་ཕྱོགས་སྐྱོང་བའི་ཆོས་སྐྱོང་ལ་འཕྲིན་བཅོལ་དང་བསང་གསོལ་རྒྱ་ཆེར་བྱས་ཤིང་། བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེ་བོད་བསྟན་སྲིད་རང་དབང་ཆེད་དུ་སྐུ་སྲོག་དོར་བའི་རྒྱལ་གཅེས་དཔའ་བོ་དཔའ་མོ་ཡོངས་ལ་གདུང་སེམས་མཉམ་བསྐྱེད་དང་མྱ་ངན་གུས་འདུད་ཞུས། དེ་ནས་མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་གི་གསུང་འཕྲིན་སྒྲོགས་སྦྱང་གནང་བ་དང་དུས་དྲན་ངོ་སྤྲོད་བྱེད་སྐབས་དེ་རིང་དུས་དྲན་བྱེད་དགོས་དོན་ནི་འདས་པའི་བོད་ཀྱི་ལོ་རྒྱུས་ནང་ཆེས་ཛ་དྲག་དང་ཆག་འཇིག་བྱུང་བའི་སྐབས་སུ། བོད་བསྟན་སྲིད་རང་དབང་གི་ཆེད་དུ་ཞི་དྲག་སྣ་ཚོགས་ཀྱི་སྒོ་ནས་ལུས་སྲོག་ལོངས་སྤྱོད་དང་བཅས་པ་བློས་གཏོང་བྱེད་མཁན། མདོ་ཁམས་ཆུ་བཞི་སྒང་དྲུག་གི་རྒྱལ་གཅེས་དཔའ་བོ་དཔའ་མོ་རྣམས་ཀྱི་བཀའ་དྲིན་རྗེས་དྲན་དང་། དེ་བཞིན་བོད་མདོ་ཁམས་ཁུལ་ནས་འགྲན་ཟླ་བྲལ་བའི་ལ་རྒྱ་དང་སྙིང་སྟོབས་ལ་བརྟེན་ནས་རང་ལུས་མེ་རུ་སྤར་ཏེ། བོད་བསྟན་སྲིད་རང་དབང་སླར་གསོ་བྱ་བའི་འཐབ་རྩོད་གནང་མཁན་གྱི་རྒྱལ་གཅེས་དཔའ་བོ་དཔའ་མོ་རྣམས་ཀྱིས་གཙོས་པའི་བོད་བསྟན་སྲིད་མི་རིགས་དང་བཅས་པའི་ཆེད་དུ་བློས་གཏོང་ཚད་མེད་གནང་བའི་བོད་ཀྱི་རྒྱལ་གཅེས་པ་རྣམས་ལ་རྗེས་དྲན་མཚོན་པའི་ཆུ་སྒང་དུས་དྲན་མཛད་སྒོ་ཞིག་སྤེལ་བཞིན་ཡོད་ཅེས་གསུང་ཡོད་པ་རེད།།

མེ་སོར་གསར་འགོད་པས།