སྒྲ་སྒྲུབ་རིག་པའི་དཔེ་དེབ་ཅིག་སྒོ་འབྱེད་བྱས་སོང་།
ཟླ་འདིའི་ཚེས་ ༡༩ ཉིན་རྒྱ་གར་ལྷོ་ཕྱོགས་སེར་བྱེས་བྱ་བྲལ་ཁམས་ཚན་གྱི་དཔེ་མཛོད་ཁང་དུ། རྒྱ་གར་ལྷོ་ཕྱོགས་ཧུན་སུར་འོད་སྣང་སློབ་གྲྭའི་དགེ་རྒན་འཇམ་དཔལ་ཚུལ་ཁྲིམས་ཀྱིས་བརྩམས་པའི་<སྒྲ་སྒྲུབ་རིག་པ།>ཞེས་པའི་དཔེ་དེབ་དབུ་འབྱེད་བྱས་སོང་།
དཔེ་དེབ་དེར་ཤོག་ངོས་ ༨༦༢ ཅན་ཙམ་ཡོད་པ་དང་། སེར་སྨད་འོད་ཟེར་རིན་པོ་ཆེའི་སྐུ་ཚབ་དགེ་བཤེས་ལྷ་རམས་པ་དང་དབང་དཔལ་འབྱོར་ལགས་ཀྱིས་དབུ་འབྱེད་གནང་སོང་།
སྐབས་དེར་དཔེ་དེབ་རྩོམ་པ་པོས་གསལ་བཤད་གནང་དོན་“བདག་གིས་མི་ལོ་བཅུ་གཉིས་ཙམ་གྱི་རིང་གི་ལས་ཞོར་དུ་དཔེ་དེབ་འདི་བྲིས་ཡིན་ལ། ད་ལྟ་དངོས་སུ་དཔར་སྐྲུན་ཞུ་ཐུབ་སོང་། དེབ་འདིའི་ཁྱད་ཆོས་གལ་ཆེ་བ་ནི་བདག་གི་སྒྲ་སྒྲུབ་རིག་པ་འདིར་འགྲོ་བ་མིའི་ངག་ལས་སྒྲ་ཇི་ལྟར་དབྱུང་བའི་ཚུལ་ཞིབ་པར་བཤད་ཡོད། འདི་དེབ་འདིའི་ཐུན་མོང་མ་ཡིན་པའི་ཁྱད་ཆོས་དེ་ཡིན། འདིར་བོད་ཀྱི་སྐད་ཆ་ལ་མཁོ་བའི་ཀ་མད་ ༢༤༥ དང་དབྱངས་གྲངས་ ༢༠ ཙམ་ལ་དངོས་སུ་ཚིག་ཟིན་གྱིས་རེ་རེ་བཞིན་ཞིབ་པར་བཤད་ཡོད་པ་ནི་སྔར་རྒྱལ་ཕྱི་ནང་ཀུན་ཏུ་སུས་ཀྱང་མ་ཤོད་པའི་འགྲེལ་བཤད་རྒྱས་པ་ཞིག་ཡིན། དེ་ལྟར་ཁོ་བོའི་དེབ་འདིར་སྤྱིར་འགྲོ་བ་མི་དང་། བྱེ་བྲག་བོད་མིའི་ངག་ལས་དབྱུང་བའི་སྒྲ་ལ་འདི་ལྟར་དབྱེ་ཞིབ་བྱས་ནས་བཤད་ཡོད་སྟབས། འདི་ལ་བརྟེན་ནས་ང་ཚོས་ང་ཚོ་བོད་ཀྱི་ཡིག་གཟུགས་གང་ཞིག་ལ་སྒྲ་གང་ཞིག་འདོན་འོས་པ་དང་མ་འོས་པ་དེའི་རིགས་འགྲོས་ཀྱིས་ཧ་ལམ་ཐག་གིས་གཅོད་ཐུབ་པ་དང་། དེ་ལྟར་ཆོད་པས་ཆོལ་ཁ་གང་གིས་གཟུགས་གང་ཞིག་ལ་སྒྲ་གང་འདོན་པ་དེ་དག་མ་དག་གམ། ཡང་ན་འོས་པ་དང་མི་འོས་དེ་ཡང་རིགས་འགྲོས་ཀྱིས་ཧ་ལམ་དཔོག་ཐུབ་ལ། དེ་ལ་བརྟེན་ནས་དེབ་འདིས་ཆོལ་གསུམ་སྤྱི་སྐད་ཅིག་འགྲུབ་ཐུབ་བམ་འགྲུབ་པར་ཞབས་འདེགས་ནུས་ལྡན་ཞིག་འབུལ་ཐུབ་པར་སྙམ། དམའ་མཐར་ཡང་དེབ་འདི་ལ་བ་རྟེན་ནས་གཟུགས་གང་ཞིག་ལ་ཆོལ་ཁ་གང་གིས་སྒྲ་གང་ཞིག་འདོན་གྱི་ཡོད་པ་གསལ་པོར་བརྗོད་ཐུབ་པར་འགྱུར་བས་བོད་ཀྱི་དག་ཡིག་ཚད་ལྡན་ཞིག་འགྲུབ་པར་ཞབས་འདེགས་བླ་ན་མེད་པ་ཞིག་སྒྲུབ་ཐུབ་པར་སྙམ་”ཞེས་ངོ་སྤྲོད་བྱས་སོང་།
ཁོང་གིས་གསར་འགོད་པར་དེབ་དེའི་ངོ་སྤྲོད་ཤོག་ལྷེ་ཞིག་སྤྲད་པའི་ནང་“སྤྱིར་གཞུང་འདིའི་ནང་དུ་ངག་སྒྲ་མི་འདྲ་བ་གྲངས་ ༢༩༥,༣༢༧,༩༠༠ ཙམ་གྱི་རྣམ་བཞག་བཤད་ཡོད། འདིའི་ཐོག་ཏུ་ཕྱི་རྒྱལ་སྐད་ལ་མཁོ་བའི་ངག་སྒྲ་ ༣,༩༧༠,༦༨༠ ཙམ་ཁ་སྣོན་དུ་བྱས་ནས་ཞིབ་པར་ཤུགས་ལ་རྟོགས་ཐུབ་པར་བྱས་ཡོད། གྲངས་འདི་ནི་ཁོ་བོས་བཤད་པའི་མིའི་ངག་སྒྲའི་གྲངས་དབྱེ་ཚུལ་རྒྱས་བསྡུས་རིམ་པ་བཞི་བཤད་ཡོད་པ་ལས་བསྡུས་ཤོས་ཀྱི་བརྩི་ལུགས་ལྟར་ཡིན། རྒྱས་ཤོས་ལྟར་ན་འཇིག་རྟེན་མི་ལ་ངག་སྒྲ་མི་འདྲ་བ་གྲངས་ ༤༧,༣༠༠,༨༣༨,༤༨༠ ཙམ་ཡོད་པ་དཔོག་ཐུབ། རྩི་ལུགས་འདིའི་དབང་དུ་བྱས་ན་སློབ་དཔོན་ཐོན་མིས་ཀྱང་ཀ་མད་སུམ་ཅུ་ལས་ངག་སྒྲ་མི་འདྲ་བ་གྲངས་ ༡༡༡༧༢༣ ཙམ་བཟོ་ཐུབ་པའི་ཆ་རྐྱེན་བསྐྲུན་ཡོད། འོན་ཀྱང་། ད་ལྟ་ལག་ལེན་དངོས་ལ་དེའི་ཕྱེད་ཀའི་ཕྱེད་ཡང་བཟོ་མི་ཐུབ་པར་གྱུར་ཡོད། རྒྱུ་མཚན་ནི་རང་རེས་འགྲོ་འདོགས་དང་རྗེས་འཇུག་ལ་ཚད་བཀག་བཞག་ཡོད་པའི་དབང་གིས་རེད། ད་དུང་ས་མགོ་དང་ས་མཐའི་ཀློག་ཉམ་པ་འདིས་བོད་ཡིག་བོད་ཡིག་ལ་གཏོར་སྐྱོན་ཇི་ཙམ་བཏང་བ་ནི་བློ་ཡུལ་མི་ཤོང་པ་ཞིག་རེད། འདིས་ནི་བོད་ཡིག་འདི་ཡན་ལག་བཅས་པའི་ཕུང་པོ་ཞིག་བཞིན་ཧ་ཅང་ནུས་ཞན་དུ་བཏང་ཡོད།”ཅེས་འཁོད་འདུག
དཔེ་དེབ་དབུ་འབྱེད་མཛད་སྒོ་དེར་རྩོམ་པོ་དང་འབྲེལ་ཡོད་དགེ་རྒན་ཁག་ཅིག་དང་། གཞན་སེ་ར་དང་རྣམ་གྲོལ་གླིང་སོགས་ནས་རྩོམ་པ་པོ་དང་བླ་སྤྲུལ་བཅས་སུམ་ཅུ་ཙམ་འབྱོར་འདུག་པ་དང་། སྐུ་མགྲོན་ཁག་ཅིག་གིས་བོད་ཀྱི་སྐད་ཡིག་དང་འབྲེལ་བའི་གཏམ་བཤད་ཐུང་ཐུང་རེ་ཡང་སྤེལ་སོང་།
མེ་སོར་གསར་འགོད་པས།
