བོད་རྒྱ་འབྲེལ་མོལ་ལ་གྲུབ་འབྲས་ཡོང་གི་མ་རེད།

༧གོང་ས་མཆོག་གིས་རྒྱ་གཞུང་གིས་བོད་ཀྱི་གནད་དོན་ཐོག་བཟང་ཕྱོགས་ཀྱི་འགྱུར་བ་ཞིག་མ་བཏང་པར། བོད་རྒྱ་འབྲེལ་མོལ་སླར་གསོ་གནང་ཡང་གྲུབ་འབྲས་གང་ཡང་ཡོང་གི་མ་རེད་ཅེས་གསུངས་འདུག

དེ་ཡང་ཟླ་འདིའི་ཕྱི་ཚེས་༢༠ ཉིན་གོང་ས་མཆོག་གིས་དབྱིན་ཡུལ་གྱི་རྒྱལ་ས་ལོན་ཊོན་དུ་གསར་འགོད་པའི་དྲི་བར་ལན་འདེབས་གནང་སྐབས། ད་བར་ང་ཚོའི་ངོས་ནས་མིང་དོན་མཚུངས་པའི་རང་སྲིད་རང་སྐྱོང་མ་གཏོགས་གཞན་གང་ཡང་རྩོད་ལེན་བྱེད་ཀྱི་མེད་སྐོར་ཐེངས་མང་པོར་བཤད་ཀྱང་། རྒྱ་གཞུང་གི་ངོས་ནས་ཕན་ཐོགས་མེད་པའི་གྲོས་མོལ་ཐེངས་ཁ་ཤས་ཤིག་བྱས་པ་མ་གཏོགས། བཟང་ཕྱོགས་ཀྱི་བརྡ་ལན་གང་ཡང་སྤྲད་མེད་པར་བརྟེན། རྒྱ་གཞུང་གིས་བོད་ནང་གི་དངོས་ཡོད་གནས་ཚུལ་གཞིར་བཞག་གི་ལམ་ནས་འབྲེལ་མོལ་མ་བྱས་པར། མ་འོངས་པར་བོད་རྒྱ་འབྲེལ་མོལ་སླར་གསོ་གནང་ཡང་གྲུབ་འབྲས་གང་ཡང་ཡོང་གི་མ་རེད་ཅེས་གསུངས་འདུག

སྐབས་དེར་རུའུ་ཊར་གསར་ཁང་གིས་གནད་དོན་དེའི་ཐོག་གནས་ཚུལ་སྤེལ་གསལ་ལྟར་ན། ༧གོང་ས་མཆོག་གིས་སྐབས་དེར་གནད་དོན་གཙོ་བོ་མང་ཚོགས་ཀྱི་གཞི་རྩའི་ཐོབ་ཐང་ལ་ཐུག་ཡོད་པས། གལ་ཏེ་རྒྱ་གཞུང་གིས་བོད་ནང་གི་དཀའ་ངལ་སེལ་ཆེད་བཟང་ཕྱོགས་ཀྱི་འགྱུར་བ་ཞིག་མ་བཏང་པར། ཕྱོགས་གཉིས་ཀྱི་བར་ལ་གྲོས་མོལ་བྱ་རྒྱུའི་བརྗོད་གཞི་ཡང་གང་ཡང་ཡོད་མ་རེད། རྒྱ་གཞུང་གིས་བོད་དེ་རྒྱ་ནག་གི་ཆ་ཤས་ཡིན་སྐོར་གྱི་གནས་ཚུལ་སྤེལ་བ་མ་གཏོགས། དོན་དམ་གྱི་སྐད་ཆ་གང་ཡང་མེད་པས། གང་ཉིད་ལ་ཐབས་ཤེས་མི་འདུག་ཅེས་བཀའ་ལན་གནང་ཡོད་པ་རེད། །