ལྷོ་ཕྱོགས་མོན་གྷོ་རུ་མར་མེའི་ཁྲོམ་སྐོར་ལས་འགུལ།
ཟླ་འདིའི་ཚེས་༢༡ཉིན་གྱི་དགོང་མོ་ཆུ་ཚོད་༦་༣༠ ཕྱེད་ཐོག་རྒྱ་གར་ལྷོ་ཕྱོགས་མོན་གྷོ་ས་གནས་ཀྱི་སེར་སྐྱ་མི་མང་གིས་ རྟ་མགྲིན་ཐར་དང་ངག་དབང་ནོར་འཕེལ། བསྟན་འཛིན་མཁས་གྲུབ་བཅས་ལ་གདུང་སེམས་མཉམ་སྐྱེད་མཚོན་ཆེད་མཆོད་འབུལ་སྨོན་ལམ་དང་མར་མེ་ཁྲོམ་སྐོར་བཅས་ཀྱི་ལས་འགུལ་ཞིག་སྤེལ་སོང་།
དེ་ཡང་མོན་གྷོ་ས་གནས་གཞོན་ལྷན་དང་བུད་མེད་ཚོགས་པ་གཉིས་ཀྱི་ཐུན་མོང་གི་གོ་སྒྲིག་འོག ཚོགས་མི་ཡོངས་མཉམ་འཛོམ་ཐོག་རྒྱལ་གཅེས་དཔའ་བོ་གསུམ་ལ་གདུང་སེམས་མཉམ་བསྐྱེད་མཚོན་ཆེད་དུ་མར་མེའི་ཁྲོམ་སྐོར་གྱི་ལས་འགུལ་ཞིག་དུས་འཁོར་ཕོ་བྲང་མདུན་ཐང་དུ་སྤེལ་ཡོད་པ་དང་། ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་དང་མྱ་ངན་ངག་བཅད་དེ་བཞིན་བདེན་ཚིགས་སྨོན་ལམ་གསུང་འདོན་སོགས་ཀྱི་ལས་རིམ་གྲུབ་པ་དང་། ས་གཞོན་རྒྱུན་ལས་བྱང་ཆུབ་ལགས་ཀྱིས་དེ་ལྟར་གདུང་སེམས་མཉམ་བསྐྱེད་ཀྱི་ལས་འགུལ་སྤེལ་དགོས་སྐོར་དང་རང་ལུས་ཞུགས་འབུལ་གནང་མཁན་རྒྱལ་གཅེས་དཔའ་བོ་རྟ་མགྲིན་ཐར་དང་ངག་དབང་ནོར་འཕེལ། བསྟན་འཛིན་མཁས་གྲུབ་གསུམ་གྱི་ལོ་རྒྱུས་དང་ཞལ་ཆེམས་བཅས་ངོ་སྤྲོད་གནང་རྗེས་ལས་འགུལ་མཇུག་བསྡོམས་གནང་ཡོད་པ་རེད།
དེ་དང་ཆབ་གཅིག་མོན་གྷོ་ས་གནས་གངས་ལྗོངས་རང་བདེན་རྩོད་ལེན་མཐུན་ཚོགས་དང་དབུ་མའི་ལམ་ལས་འགུལ་ཁང་གཉིས་ཀྱིས་ཐུན་མོང་གིས་གོ་སྒྲིགས་འོག་ཉེ་ལམ་མདོ་སྨད་གཅན་ཚ་རྫོང་དུ་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་བྱས་ཏེ། འདས་གྲོངས་སུ་ཕྱིན་པའི་རྒྱལ་གཅེས་དཔའ་བོ་རྟ་མགྲིན་ཐར་ལགས་དང་། དེ་བཞིན་ཁམས་རྫ་སྟོད་དུ་རང་ལུས་མེར་བསྲེགས་བཏང་བའི་རྒྱལ་གཅེས་དཔའ་བོ་ངག་དབང་ནོར་འཕེལ་ལགས་དང་། བསྟན་འཛིན་མཁས་གྲུབ་བཅས་ཀྱི་གཙོས་བོད་བསྟན་སྲིད་ཆེད་དུ་རང་ལུས་ཞུགས་འབུལ་གནང་མཁན་དཔའ་བོ་དཔའ་མོ་ཚོར་མྱ་ངན་གུས་འདུད་དང་ཁོང་རྣམས་པའི་ཤུལ་ལུས་ནང་མི་ཡོངས་ལ་གདུང་སེམས་མཉམ་བསྐྱེད་བཅས་ཀྱི་ཆེད་དུ་མཆོད་འབུལ་སྨོན་ལམ་གཞི་རྒྱ་ཆེ་བ་ཞིག་འཚོགས་ཡོད་པ་དང་། ལས་འགུལ་འདིའི་ནང་མོན་གྷོ་ས་གནས་ཀྱི་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་ལས་ཀྱི་སྣེ་མོ་ཡོངས་དང་ས་གནས་ཀྱི་སེར་སྐྱ་མང་ཚོགས་བཅས་ཁྱོན་མི་གྲངས་༡༠༠༠ ལྷག་འདུ་འཛོམས་གནང་ཡོད་པ་རེད།
དེ་ཡང་ཐོག་མར་བོད་རྒྱལ་ཁབ་ཀྱི་རྒྱལ་གླུ་དང་བདེན་ཚིགས་སྨོན་ལམ་གསུང་འདོན་དང་རྒྱལ་གཅེས་དཔའ་བོ་ཚོའི་ཆེད་དུ་མྱ་ངན་ངག་བཅད་བཅས་ཀྱི་ལས་རིམ་གྲུབ་པ་དང་། མོན་གྷོ་ས་གནས་དབུ་མའི་ལམ་ལས་འགུལ་ཁང་གི་ཚོགས་གཙོ་སྤྲུལ་འཇམ་དབྱངས་ཡོན་ཏན་ལགས་ཀྱིས་འདི་ལྟར་ལས་འགུལ་སྤེལ་དགོས་དོན་དང་། ད་ལྟའི་བོད་ནང་ཛ་དྲག་གི་གནས་སྟངས་དེ་བཞིན་ང་རང་ཚོ་བཙན་བྱོལ་ནང་འཚོ་སྡོད་བྱས་ཡོད་མཁན་བོད་མི་སེར་སྐྱང་ཡོངས་ཀྱི་འཕྱར་གྲུ་མཉམ་འདེགས་ཀྱི་ཐོག་ནས་ལས་འགུལ་ཚ་ཚ་འུར་འུར་གྱི་སྤེལ་དགོས་པ་དང་། ལྷག་པར་དུ་གང་སྤེལ་བའི་ལས་འགུལ་ནང་དེ་རིང་ནང་བཞིན་སེར་སྐྱ་མི་མང་དང་བླ་མ་གྲྭ་བ། དགེ་རྒན་སློབ་མ་བཅས་དབྱེ་བ་མེད་པར་བོད་མི་རྩམ་ཟན་ཡོངས་ཀྱི་རང་འགན་རང་ཁུར་དང་རང་དོན་རང་གཅེས་ཀྱི་སྒོ་ནས་ལས་འགུལ་ནང་ཆ་ཤས་ངེས་པར་དུ་ལེན་དགོས་པ་རེད་ཅེས་སོགས་གསུང་སོང་། དེ་བཞིན་མོན་གྷོ་ས་འཐུས་ཚོགས་གཞོན་དགེ་བཤེས་རྣམ་རྒྱལ་རྒྱལ་མཚན་ལགས་ཀྱིས་ལས་འགུལ་དེ་དང་འབྲེལ་བའི་ཐོག་གཏམ་བཤད་གནང་དོན། བོད་ནང་རང་ལུས་མེར་བསྲེགས་བཏང་དང་གཏོང་བཞིན་ཡོད་པ་དེ་ལ། རྩ་བའི་རྒྱུ་མཚན་གནང་སྟངས་མང་པོ་ཞིག་གི་ཆ་ནས་རེད། གཙོ་བོ་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། ཆོས་དད་རང་དབང་སོགས་རྩིས་མེད་རྡོག་རོལ་བཏང་དང་གཏོང་བཞིན་ཡོད་པའི་རྒྱུ་མཚན་གཅིག་དང་། ལྷག་པར་དུ་ད་ལྟའི་ཆར་བོད་ས་ཡོངས་རྒྱ་ནག་གི་མི་སེར་སྤེལ་ཡུལ་དུ་བཟོས་ནས་བོད་ནང་སོ་སོའི་ཆོས་དང་སྐད་ཡིག་ཡུལ་སྲོལ་གོམས་གཤིས་སོགས་རྩ་མེད་བཟོ་རྒྱུའི་ངན་འཆར་སྣ་ཚོགས་ཤིག་མགོ་སྐོར་དང་བསླུ་བྲིད། དྲག་གནོན་དང་འཇིགས་སྐུལ་སོགས་ཀྱི་གཡོ་ཐབས་སྣ་ཚོགས་འོག་རྩ་མེད་བཟོས་དང་བཟོ་བཞིན་ཡོད་པར་བརྟེན། རང་ལུས་མེར་བསྲེགས་ཀྱི་ལས་འགུལ་འདི་ལྟར་མི་སྤེལ་ཐབས་མེད་བྱུང་བ་རེད་ཅེས་དང་། ཡང་ཁོང་གིས་འབྱུང་འགྱུར་བཙན་བྱོལ་ནང་གི་བོད་དོན་ལས་འགུལ་སྤེལ་ཕྱོགས་སྐོར་ལ་གསུང་དོན། མི་མང་གི་དུས་རྒྱུན་གཞི་རྒྱ་ཆེ་བའི་ལས་འགུལ་སྤེལ་དགོས་པ་རེད་ལབ་ཀྱི་ཡོད་རེད། ངའི་ངོས་ནས་ལས་འགུལ་སྤེལ་སྐབས་མི་མང་ཉུང་ལ་ཁྱད་པར་གལ་ཡོད་པ་མཐོང་གི་མེད། གང་སྤེལ་བའི་ལས་འགུལ་དེ་འཆར་གཞི་ལྡན་པ། མཐུས་སྒོ་ཚང་བ་ལྷག་པར་དུ་ལས་འགུལ་སྤེལ་ཕྱོགས་གཅིག་ཙམ་མིན་པར་ཕྱོགས་ཡོངས་ནས་ལས་འགུལ་འདྲ་མིན་མུ་མཐུད་ནས་རྒྱུན་སྐྱོང་གི་ལས་འགུལ་སྤེལ་ཐུབ་ལ་གཞུང་མང་གཉིས་ཀྱི་ངོས་ནས་འབད་རྩོན་བྱེད་དགོས་པ་མཐོང་གི་ཡོད་ཅེས་དང་། མུ་མཐུད་ནས་གསུང་དོན། ད་ལྟའི་ཆར་༧གོང་ས་སྐྱབས་མགོན་རིན་པོ་ཆེའི་ཡང་དག་པའི་བཀའ་སློབ་ལམ་སྟོན་གནང་དོན་བཞིན་བོད་པའི་བདེན་དོན་འཐབ་རྩོད་དེ་བོད་རྒྱ་གཉིས་སྨན་དབུ་མའི་ལམ་ལ་འགྲོ་བསྡད་ཡོད་པ་མ་ཟད་འཚེས་མེད་ཞི་བ་ཉག་གཅིག་གི་ལམ་ཁར་ཤར་བསྐྱོད་བྱེད་བཞིན་ཡོད་པ་རེད། མ་འོངས་པར་བོད་དོན་འཐབ་རྩོད་བྱེད་ཕྱོགས་དེ་གནས་སྟངས་སམ་ལམ་ཁ་དེ་ལས་གཞན་དུ་འགྱུར་མི་སྲིད་པ་མ་རེད། གལ་སྲིད་བོད་རྒྱ་གཉིས་ཀྱི་རྙོག་གླེང་འདིའི་གནས་སྟངས་སམ་རྣམ་པ་གཞན་དུ་འགྱུར་བ་ཡིན་ན་དེའི་འགན་ཡོངས་རྫོགས་རྒྱ་ནག་གཞུང་གི་དཔོན་རིགས་ཚོ་འཁུར་དགོས་པ་རེད་ཅེས་སོགས་གསུངས་སོང་།
དེ་བཞིན་ལས་འགུལ་འདིའི་ཐོག་དབུ་མའི་ལམ་ལས་འགུལ་ཁང་དང་གངས་ལྗོངས་རང་བདེ་རྩོད་ལེན་མཐུན་ཚོགས་ཐུན་མོང་གིས་འབོད་སྐུལ་བསྒྲགས་གཏམ་ཞིག་སྤེལ་ཡོད་པའི་ནང་འཁོད་དོན། ཁྱེད་རྣམས་ཀྱིས་མཁྱེན་གསལ་ལྟར་འདས་པའི་མི་ལོ་བཅུ་ཕྲག་དྲུག་ནི། རང་རིགས་སྤུན་ཟླ་ས་ཡ་གཅིག་ལྷག་དུས་མིན་འཆི་ལམ་དུ་དེད་ཡོད་པ་དང་། ང་ཙོ་སྤུན་ཟླ་འབུམ་ཕྲག་ལྷག་རང་ཡུལ་དང་རང་གི་ཕ་མ་སོགས་དང་ཁ་བྲལ་ཏེ། གཞན་གྱི་ས་ཆ་གཡར་ནས་བསྡོད་དགོས་བྱུང་བས་ཧ་ཅང་སྐྱོ་གར་གྱི་ལོ་རྒྱུས་ཤིག་ཡིན། པཎ་ཆེན་སྐུ་ཕྲེང་བཅུ་པ་མཆོག་གིས། ལས་ལ་བརྩོན་ཞིང་དཔའ་ངར་ལྡན་པའི་མི་རིགས་ཤིག་ཡིན་ཕྱིར། རང་མི་རིགས་ཀྱི་ཆོས་དང་རིག་གཞུང་གི་ཆེད་དུ་རང་སྲོག་ཀྱང་འབུལ་ཐུབ། ཅེས་མ་འོངས་ལུང་བསྟན་ལྟར་གསུངས་ཡོད་པ་བཞིན། འདས་པའི་ལོ་རྒྱུས་ནང་ང་ཚོའི་དཔའ་བོ་དཔའ་མོ་མང་པོ་ཞིག ང་ཚོའི་མི་རིགས་དང་རིག་གཞུང་གི་ཆེད་དུ། ཆེས་གཅེས་པའི་རང་སྲོག་ཀྱང་ཕངས་མེད་དུ་ང་ཚོ་ལ་ལེགས་སྐྱེས་སུ་ཕུལ་ནས་བཞུད་སོང་ལ། ཉེ་བའི་ལོ་འདི་དག་གི་ནང་དུ་ཡང་ང་ཚོའི་དཔའ་བོ་དཔའ་མོ་མང་པོ་ཞིག་དགྲ་བོའི་མཚོན་ཁ་ནས་འགྲེང་སྟེ། ༧སྤྱི་ནོར་གོང་ས་རྒྱལ་བ་རིན་པོ་ཆེའི་གཙོས་ཕྱི་སྟོད་སྤུན་ཟླ་ཕྱིར་རང་ཡུལ་དུ་གདན་འདྲེན་ཞུ་ཆེད། གཅིག་རྗེས་གཉིས་མཐུད་བྱས་ཏེ་ཕྱིར་འོང་མེད་པར་ང་ཚོ་དང་གཏན་དུ་ཁ་བྲལ་སོང་། ལྷག་པར་དུ་ང་ཚོས་མིག་གིས་ལྟ་མི་ཕོད་པ་དང་རྣ་བས་ཉན་མི་ཕོད་པ་ནི། གངས་ཅན་པའི་གཅེས་ཕྲུག་བཞི་བཅུ་རྩ་གྲངས་ཤིག་གིས་རང་ལུས་མེར་བསྲེགས་ཏེ། བོད་གངས་ཅན་གྱི་བདེན་དོན་འཐབ་བརྩོད་བྱས་པ་དེ་ཡིན། དེའི་ཕྱིར་ད་ནི་ཚོར་བ་དང་འགན་ཁུར། རྒྱུ་འབྲས་བློ་མིག་ལྡན་པའི་བོད་པ་ཞིག་ཡིན་ཕྱིར། བལྟས་ནས་བསྡད་རྒྱུའི་དུས་ཚིགས་ཤིག་མ་ཡིན་པར། རང་རང་ས་ནས་རང་དོན་རང་གཅེས་ཀྱི་ལས་འགུལ་སྤེལ་དགོས་པའི་དུས་ལ་བབ་ཡོད།
ཞུས་སྙིང་། ་གོང་གི་བོད་ནང་གི་ལས་འགུལ་ཡོད་ཚད་རྒྱ་ནག་གིས་༧གོང་ས་མཆོག་དང་བཙན་བྱོལ་བོད་གཞུང་གཉིས་ཀྱིས་བསྐུལ་སློང་བྱས་པ་རེད་ཅེས་ཁྱབ་བསྒྲགས་བྱེད་ཀྱི་ཡོད་ལ། ང་ཚོ་བཙན་བྱོལ་བོད་གཞུང་གིས། བོད་མི་ཚོས་འདི་ལྟར་ལས་འགུལ་སྤེལ་དོན་རྒྱ་ནག་གཞུང་གིས་བཙན་གནོན་ལས་བྱུང་བར་འགྲེལ་བརྗོད་བྱེད་ཀྱིན་ཡོད། འདི་ལྟ་བུའི་གནད་དོན་ཞིག་འཛམ་གླིང་མི་མང་གི་མདུན་ན་ལྷག་ཡོད་པས། འདི་གསལ་བོ་བཟོ་བའི་ཆེད་དུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་རྟོགས་ཞིག་ཚོགས་ཆུང་ཞིག་འཕྲལ་ཏུ་བོད་ནང་གཏོང་དགོས་པའི་འབོད་སྐུལ་དང་། བོད་བསྟན་སྲིད་དང་མི་རིགས་ཀྱི་ཆེད་དུ་རང་ལུས་མེ་རུ་བསྒྲོན་མཁན་རྒྱལ་གཅེས་དཔའ་བོ་དཔའ་མོ་ཚོའི་གཙོས། འདས་མ་ད་གསུམ་ལ་བོད་དང་བོད་མིའི་རྩ་དོན་ཆེད་དུ་སྐུ་ལུས་བསྐྱོན་མཁན་ཡོངས་ལ་གདུང་སེམས་མཉམ་བསྐྱེད་ཆེད་འདི་ལྟར་ལས་འགུལ་སྤེལ་བ་ཀྱི་ཡོད་པ་ལགས་ན་མི་མང་ཡོངས་མཉམ་ཞུགས་གནང་རོགས་ཅེས་འགོད་འདུག
མོན་གྷོ་གསར་འགོད་པ་ཐུབ་བསྟན་བཀྲིས་ཀྱིས།
