མོན་གྷོ་རུ་མཆོད་འབུལ་སྨོན་ལམ།
ཟླ་འདིའི་ཚེས་༢༣ ཉིན་གྱི་སྔ་དྲོ་རྒྱ་གར་ལྷོ་ཕྱོགས་མོན་གྷོ་ས་གནས་གཞོན་ལྷན་དང་བུད་མེད་ཚོགས་པ་གཉིས་ཀྱི་ཐུན་མོང་གི་གོ་སྒྲིག་འོག ཉེ་ཆར་བོད་ནང་རང་ལུས་མེར་བསྲེག་གཏོང་མཁན་ཚོར་གདུང་སེམས་མཉམ་སྐྱེད་དང་མྱ་ངན་གུས་འདུད་མཚོན་ཆེད་མཆོད་འབུལ་སྨོན་ལམ་ཞིག་འཚོགས་ཡོད་པ་རེད།
དེ་ཡང་ཚོགས་ཐོག་ཏུ་ཕྱོགས་གཞུགས་སྤྱི་འཐུས་ཨ་ཀྲུག་ཚེ་བརྟན་གདན་ཞུས་ཐོག་བཙུན་དགོན་བྱང་ཆུབ་ཆོས་གླིང་གི་བཙུན་མ་རྣམས་དང་། གཞིས་གྲོང་ཁག་དགུའི་མི་མང་༣༠༠ མ་ཟིན་ཙམ་མཉམ་འཛོམས་ཐོག་ས་གཞོན་རྒྱུན་ལས་བྱང་ཆུབ་ལགས་ཀྱིས་གདུང་སེམས་མཉམ་བསྐྱེད་ཀྱི་ལས་འགུལ་སྤེལ་དགོས་སྐོར་དང་། ཉེ་ཆར་རང་ལུས་ཞུགས་འབུལ་གནང་མཁན་རྒྱལ་གཅེས་དཔའ་བོ་རྟ་མགྲིན་ཐར་དང་ངག་དབང་ནོར་འཕེལ། བསྟན་འཛིན་མཁས་གྲུབ་བཅས་ཀྱི་གཙོས་རྒྱལ་གཅེས་དཔའ་བོ་དཔའ་མོ་ཚོར་གདུང་སེམས་མཉམ་བསྐྱེད་ཡོད་སྐོར་དང་། རྒྱལ་གཅེས་དཔའ་བོ་གསུམ་གྱི་ཞལ་ཆེམས་སྒྲོགས་སྦྱང་གནང་རྗེས། བོདམི་མང་སྤྱིི་འཐུས་ཨ་ཀྲུག་ཚེ་བརྟན་ལགས་ཀྱིས་བོད་ནང་གི་ཛ་དྲག་གི་གནས་སྟངས་དང་བཙན་བྱོལ་ནང་གི་གདུང་སེམས་མཉམ་བསྐྱེད་བྱེད་ཕྱོགས་བཅས་ཀྱི་ཐོག་གཏམ་བཤད་གནང་དོན། ངས་མང་པོ་ཞིག་ཞུ་དགོས་པ་མི་འདུག གོང་དུ་ཕེབས་ཟིན་པའི་དཔའ་བོ་ཚོའི་ཞལ་ཆེམས་ཀྱི་ནང་དུ་ང་ཚོའི་ག་རེ་བྱེད་དགོས་ཀྱི་འདུག ད་ལྟའི་ཛ་དྲག་གི་གནས་སྟངས་ག་འདྲ་ཞིག་ཆགས་ཀྱི་ཡོད་མེད་སོགས་གསལ་པོ་ཞེ་དྲག་བཀོད་འདུག ངའི་བསྐྱར་ཟློས་བྱེད་དགོས་པ་མི་འདུག་དེ་ཉེ་ཆར་སྐུ་ལུས་མེར་བསྲེགས་གནང་མཁན་དཔའ་བོ་ཁོང་གསུམ་གྱིས་མཚོན་པའི་༢༠༠༩་ནས་ད་ལྟའི་བར་བོད་ཕྱི་ནང་གཉིས་ནས་རྒྱལ་གཅེས་དཔའ་བོ་དཔའ་མོ་༤༡ ཙམ་ཞིག་གིས་བོད་བསྟན་སྲིད་མི་རིགས་རིག་གཞུང་དང་བཅས་ཀྱི་ཆེད་དུ་གཅེས་པའི་ལུལ་སྲོག་བློས་བཏང་གི་སྐུ་ལུས་མཆོད་མེར་ཕུལ་ནས་འདི་ལྟར་ལས་འགུལ་སྤེལ་ཡོད་པ་རེད། དེའི་ནང་ནས་རྒྱལ་གཅེས་དཔའ་བོ་དཔའ་མོ་༣༡ ཙམ་གྱི་སྐུ་སྲོག་ཤོར་ཡོད་པ་རེད། ༡༠ ཐམ་པ་ད་ལྟའི་ཆར་སྐུ་སྲོག་ཤོར་ཡོད་མེད་སོགས་གནས་སྟངས་ག་རེ་ཆགས་མིན་ང་ཚོའི་ཤེས་ཀྱི་ཡོད་པོ་མ་རེད། ད་ལྟའི་ཆ་ལ་མཚོན་ན་ཁམས་སྐྱེ་དགུ་རྫ་སྟོད་ཀྱིས་མཚོན་པའི་སྐྱེ་དགུ་ས་ཁུལ་ཡོངས་ལ་རྒྱ་གཞུང་གི་དྲག་ཆས་དམག་དཔུང་གིས་ཁེངས་ནས་མི་མང་ཚོ་ཕན་ཚུན་འགྲིམ་འགྲུལ་བཀག་བསྡོམས་དང་ཐ་ན་ཉིན་རེའི་མཁོ་ཆས་ཇ་ཚ་ཉོ་ཚོངསོགས་ཀྱང་བཀག་བསྡོམས་བྱས་ནས་དམ་དྲག་གི་འོག་གནས་ཡོད་པ་རེད། མདོར་ན་ད་ལྟའི་ཆར་ང་ཚོ་མདོ་དབུས་ཁམས་གསུམ་བོད་ས་ཡོངས་རྫོགས་རྒྱ་གཞུང་གིས་གདུག་རྩུབ་དང་མནར་བཅོད་དམྱལ་བ་མི་ཡུལ་དུ་འཕོས་པ་ལྟ་བུའི་དཀའ་ངལ་མྱངས་དང་མྱོང་བཞིན་པ་ང་ཚོ་ཚང་མས་ཤེས་གསལ་རེད། བོད་ནང་གི་གཞིས་ལུས་མི་མང་ཚོ་དེ་ལྟ་བུའི་རྒྱ་ནག་གི་སྡུག་སྦྱོང་དང་མནར་གཅོད་ཀྱི་འོག་ལ་ཡོད་རེད་དེ། ཡིན་པ་ནའང་ཁོང་རྣམས་པ་ཚོའི་སོ་སོའི་མི་རིགས་ལ་བཅངས་པས་ལྷག་བསམ་དང་རྒྱལ་ཁབ་ལ་བཅངས་པས་སྙིང་སྟོབས་དེ་ཞུམ་པ་མེད་པར་རི་རབ་ནང་བཞིན་བརྟན་པོ་གནས་ཡོད་རེད། དཔེ་མཚོན་ཙམ་ཞུས་ན། ཉེ་ཆར་རྒྱལ་སྤྱིའི་གསར་འགོད་པ་ཞིག་བོད་ནང་ལ་གསང་བའི་ཐོག་ཕེབས་ནས་མདོ་སྟོད་སྨད་ཀྱི་ས་ཁུལ་གཅིག་ནས་བོད་མི་ཚོར་དྲི་བ་དྲིས་ལན་བྱས་བཞག་པ་ཞིག་རྒྱལ་སྤྱིའི་ཐོག་བཀྲམས་ཡོད་པ་རེད། གནས་ཚུལ་དེའི་ནང་བོད་ནང་གི་གཞོན་སྐྱེས་ཚོའི་ག་རེ་ལབ་ཡོད་པ་རེད་ཟེར་ན། རྒྱ་ནག་གིས་བོད་ཐོག་འཛིན་པའི་དྲང་བདེན་མ་ཡིན་པའི་སྲིད་བྱུས་བདེན་པ་ར་སྤྲོད་བཟོ་ཆེད་དང་། ལྷག་པར་དུ་བོད་ཀྱི་བླ་ན་མེད་པའི་༧སྐྱབས་མགོན་རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་མ་ཐུབ་པ་ཡིན་ན་སྡོད་ཐབས་མེད་པའི་གནས་སྟངས་ཤིག་གི་འོག ང་རང་ཚོའི་བདེན་དོན་འཐབ་རྩོད་བདེན་ཐོག་ལ་འཁྱོལ་བའི་ཆེད་དུ་མི་ལྔའི་སྐུ་ལུས་མེར་བསྲེགས་བཏང་པ་ཡིན་ན། ཏན་ཏན་རྒྱལ་སྤྱིའི་ཁ་ཞིག་གྲག་ཡོང་གི་རེད། དེ་གཞིན་ཏན་ཏན་རྒྱ་ནག་གི་སྲིད་བྱུས་ལ་འགྱུར་བ་ཞིག་གཏོང་གི་རེད་བསམ་ནས་མེར་བསྲེག་བཏང་བ་རེད། ཡིན་ནའང་འཛམ་གླིང་མཉམ་འབྲེལ་རྒྱལ་ཚོགས་ཀྱིས་མཚོན་པའི་རྒྱལ་སྤྱིིའི་ཁ་གྲག་ཡོད་པ་མ་རེད་ལ། རྒྱ་ནག་གཞུང་གིས་ལེགས་ཕྱོགས་ཀྱི་འགྱུར་བ་གཏོང་རྒྱུའི་ཚབ་ལ། དེ་ལས་ཟློག་སྟེ་ལྡོག་ཕྱོགས་ནས་རྒྱ་གཞུང་གིས་བོད་ས་ཡོངས་རྫོགས་ལ་སྔར་ལས་ལྷག་དམ་དྲག་དང་སྡུག་སྦྱོང་མནར་གཅོད་ཤུགས་ཆེར་བཏང་བས། བོད་མི་བཅུ་ནས་ཉི་ཤུ་སུམ་ཅུ་བཅས་རིམ་པའི་སྐུ་ལུས་མེར་བསྲེགས་བཏང་དང་གཏོང་བཞིན་ཡོད་པ་རེད། ཡིན་ནའང་ད་དུང་རྒྱལ་སྤྱིའི་ཁ་གྲག་གི་ཡོད་པ་མ་རེད་ལ། རྒྱ་ནག་གི་འགྱུར་བ་མ་བཏང་བ་མ་ཟད་འཛམ་གླིང་ཐོག་གནས་ཚུལ་རྫུན་སྒྲོགས་དང་བོད་ཐོག་གདུག་རྩུབ་ཀྱི་གདོང་རིས་དེ་མངོན་གསལ་དོད་རུ་འགྲོ་བཞིན་ཡོད་པ་རེད། ད་ལྟའི་ཆར་བོད་ཀྱི་ན་གཞོན་ཚོའི་ག་རེ་ལབ་ཀྱི་ཡོད་རེད་ལབ་ན། བོད་མི་བཅུ་ཉི་ཤུ་ཙམ་མེར་བསྲེགས་བཏང་པའི་ནུས་པ་ཐོན་གྱི་ཡོད་ས་མ་རེད། དེ་འདྲ་ཡིན་དུས་བོད་མི་༢༠༠༠་ཉིས་སྟོང་ཙམ་གྱི་རང་ལུས་མཆོད་མེར་ཕུལ་བ་ཡིན་ན་ཏན་ཏན་ནུས་པ་ཞིག་ཐོན་མདོག་རེད་ཅེས་ཟེར་གྱི་ཡོད་རེད། ཟེར་བ་ནང་བཞིན་ཏན་ཏན་མེར་བསྲེགས་གཏོང་གི་རེད་ཅེས་སོགས་འགྲེལ་བརྗོད་གནང་འདུག དེ་དངོས་ཡོད་གནས་ཚུལ་རེད། གཞིས་ལུས་མི་མང་ལ་འཇིགས་ཞུམ་དང་བྲལ་བའི་སྙིང་སྟོབས་ཤིག་ཡོད་པ་ཡིན་པས། མི་ཉིས་སྟོང་གི་ད་དུང་ནུས་པ་མ་ཐོན་ན་ཉིས་ཁྲི་ཡང་མེར་སྲེག་གཏོང་སྲིད་པ་ཞིག་རེད། དེ་འདྲ་ཡིན་པས། ང་རང་ཚོ་བཙན་བྱོལ་རང་དབང་ལུང་པར་སྡོད་མཁན་ཚོའི་ག་རེ་བྱེད་དགོས་པ་རེད་བསམ་བློ་ཏན་ཏན་གཏོང་དགོས་པ་ཞིག་རེད། རྩ་བའི་བོད་ནང་ཛ་དྲག་གི་གནས་ཚུལ་བྱུང་མ་ཐག་ཏུ་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་དང་མི་སྒེར་ཚང་མའི་ངོས་ནས་གདུང་སེམས་མཉམ་བསྐྱེད་ཀྱི་ལས་འགུལ་སྤེལ་གྱི་ཡོད་རེད་ལ་གནས་སྟངས་དེ་དག་རྒྱལ་སྤྱིའི་ཐོག་དྲིལ་བསྒྲགས་ཀྱང་བྱེད་ཀྱི་ཡོད་རེད། ཡིན་ནའང་དེང་སང་ང་ཚོ་སྤྱི་ཚོགས་ནང་ལོགས་སུ་ལས་འགུལ་སྤེལ་ཕྱོགས་ལ་ཡང་བསམ་ཚུལ་འདྲ་མིན་བྱུང་བཞིན་ཡོད་པ་རེད། ང་རང་ཚོའི་དྲང་བདེན་ལ་གཞི་བཅོར་ནས་བདེན་པ་ལ་ཡིད་ཆེ་ཐོག་ནས་འཚེ་བ་མེད་པའི་རྒྱ་ལས་མ་བགལ་བའི་ཐོག་ནས་ལས་འགུལ་སྤེལ་དགོས་པ་རེད་ཅེས་དང་།
ཁོང་གིས་མུ་མཐུད་ནས་གསུང་རྒྱུར། ལས་འགུལ་སྤེལ་རྒྱུ་ལས་ང་ཚོའི་ཆེད་དུ་རྒྱལ་གཅེས་དཔའ་བོ་དཔའ་མོ་མང་པོ་ཞིག་གི་སྐུ་གཤེགས་ཡོད་རེད། ཁོང་ཚོའི་ཞལ་ཆེམས་ལག་ལེན་དོན་འཁྱོར་བྱེད་ཀྱི་དང་སོ་སོ་རང་ཉིད་རྩ་དོན་འཐབ་རྩོད་པ་ཞིག་གི་ངོ་བོའི་ཐོག་གནས་ཐུབ་ལ་འབད་རྩོན་བྱེད་དགོས་པ་རེད། དེ་ཡང་རྩ་དོན་འཐབ་རྩོད་པ་ཞིག་ལ་མཚོིན་ན་ཚང་དགོས་པའི་ཆ་རྐྱེན་གཙོ་བོ་རྒྱལ་ཞེན་ཡོད་དགོས་པ་དེ་རེད། སོ་སོ་རང་ཉིད་ལ་རྒྱལ་ཁབ་དང་མི་རིགས་ལ་རྒྱལ་ཞེན་དང་ལྷག་བསམ་ག་རེ་འདུག དེ་སྔོན་རྒྱལ་ཁབ་དང་མི་རིགས་ལ་ཕན་པའི་ལས་ཀ་ག་རེ་སྒྲུབ་ཐུབ་འདུག་མིན་དང་། མ་འོངས་པར་འདི་ལྟར་གོ་མེད་ཚོར་མེད་བྱས་ནས་བསྡད་ན་འགྲིག་ས་རེད་དམ་མ་རེད། དེ་ཚོའི་ཐོག་ལ་དགོངས་པ་ཏན་ཏན་བཞེས་དགོས་པ་གལ་ཆེན་པོ་རེད། དེ་ཡང་གང་སྤེལ་བའི་ལས་འགུལ་དེ་ལྷག་བསམ་རྣམ་དག་ཐོག་ནས་སྤེལ་དགོས་པ་གཅིག་དང་། ང་ཚོ་རྩོད་རྒྱུ་དེ་བདེན་པ་རེད་བདེན་པ་ཟེར་བ་དེ་ར་སྤྲོད་བྱས་ནས་གསལ་དགོས་པ་རེད་མ་གཏོགས་གྲི་དང་མེ་མདའ་ཁུར་ནས་བདེན་མཐའ་གསལ་གྱི་ཡོད་པ་མ་རེད། ཐབས་ལམ་དེ་འདྲ་ལ་འགྲོ་བ་ཡིན་ན་དེ་ནོར་བ་རེད། མདོར་བསྡུས་ནས་བཤད་ན་རྒྱལ་གཅེས་དཔའ་བོ་ཚོའི་ཞལ་ཆེམས་ཇི་བཞིན་ལག་བསྟར་བྱེད་ཐབ་ལ་འབད་རྩོན་བྱེད་རྒྱུ་དེ་ཟློག་ཏུ་མེད་པའི་འགན་འཁྲི་ཞིག་ལ་ངོས་འཛིན་བྱེད་ཡོད་ཅེས་སོགས་གསུངས་སོང་།
མོན་གྷོ་གསར་འགོད་པས།
