ཁམས་དཀར་མཛེས་སུ་སྐད་འབོད་ངོ་རྒོལ་བྱས་འདུག
ཟླ་འདིའི་ཚེས་༢༤ ཉིན་དཀར་མཛེས་རྫོང་དུ་བོད་པའི་བུད་མེད་འཇིགས་མེད་སྒྲོལ་མ་ཞེས་པ་ཞིག་གིས་“བོད་ལ་རང་དབང་དགོས་པ་དང་། རྒྱལ་བ་རིན་པོ་ཆེ་བོད་ལ་གདན་ཞུ་དགོས་པ། ཆབ་སྲིད་བཙོན་པ་ཚོ་གློད་གྲོལ་དགོས་པའི་”རྒྱ་གཞུང་ལ་ངོ་རྒོལ་སྐད་འབོད་བྱས་པས་གཅར་རྡུང་ཚད་མེད་བྱས་འདུག
ཟླ་འདིའི་ཚེས་༢༩ ཉིན་འབྲེལ་ཡོད་མི་སྣས་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ ༢༤ ཉིན་ཁམས་དཀར་མཛེས་རྫོང་། ཀ་ལ་ཡུལ་ཚོ། ཤོང་ཀ་གྲོང་ནས་ཡིན་པའི་བུ་མོ་འཇིགས་མེད་སྒྲོལ་མ་ཞེས་པ་ཞིང་ལས་བྱེད་དུ་འགྲོ་བཞིན་པའི་སྐབས། ནང་མིས་མ་ཤེས་པ་བྱས་ནས་དཀར་མཛེས་རྫོང་ཐོག་ཏུ་བསྐྱོད་ནས། 
དཀར་མཛེས་རྫོང་གྲོང་ནས་གསེར་རྟ་རྫོང་སོགས་སུ་འགྲོ་སའི་ཕྱོགས་ཀྱི་ཟམ་ཆེན་ཞིག་ཡོད་པ་ནས་རླུང་རྟ་ཕོན་ཆེན་གཏོར་བཞིན་ “བོད་ལ་རང་དབང་དགོས་པ་དང་། རྒྱལ་བ་རིན་པོ་ཆེ་བོད་ལ་གདན་ཞུ་དགོས་པ་དང་། ཆབ་སྲིད་བཙོན་པ་ཚོ་གློད་གྲོལ་དགོས་པའི་” སྐད་འབོད་བྱེད་བཞིན་རྫོང་གྲོང་དཀྱིལ་གྱི་རྒྱ་ལམ་བཞི་མདོ་ཞིག་ཡོད་པ་དེར་འབྱོར་འཕྲལ། ས་གནས་ཉེན་རྟོག་པས་འཛིན་བཟུང་གིས་གཅར་རྡུང་ཚད་མེད་གཏོང་ཞོར་བཙན་ཁྲིད་བྱས་ཡོད་འདུག དེས་རྗེས་སུ་བུ་མོའི་འབྲེལ་ཡོད་ཉེ་འབྲེལ་གྱིས་རྩད་གཅོད་བྱས་སྐབས་དཀར་མཛེས་རྫོང་གི་སྨན་ཁང་དུ་ཡོད་པ་ཤེས་འདུག་པ་དང་། སྨན་ཁང་དུ་ཐུག་འཕྲད་ལ་ཕྱིན་སྐབས་བུ་མོའི་ལག་པ་དང་རྐང་པར་རྨས་སྐྱོན་ཕོག་ཡོད་འདུག་ལ། ཕར་བལྟས་ཚོད་ལ་གཟུགས་གཞི་སྐྱོ་པོ་ཆགས་ཡོད་འདུག ཐུག་འཕྲད་པ་ཚོ་ནད་པའི་ཉེ་འཁྲིས་སུ་ཡུན་རིང་སྡོད་བཅུག་མེད་པ་དང་། རྗེས་སུ་སྨན་ཁང་ནས་ས་གནས་གཞན་ཞིག་ཏུ་ཁྲིད་འདུག
ད་ལྟ་ཁོ་མོའི་བདེ་འཇགས་སོགས་ཀྱི་གནས་ཚུལ་གང་ཡང་ཤེས་ཀྱི་མེད་པ་རེད་འདུག གནས་ཚུལ་མཁོ་སྤྲོད་པས་བརྗོད་པ་ལྟར་ན་བུ་མོ་འཇིམས་མེད་སྒྲོལ་མ་ནི་རང་ལོ་ ༡༧ ཡིན་པ་དང་། ཆུང་དུས་སློབ་གྲྭར་འགྲོ་མྱོང་མེད་པར་ནང་མི་དང་ལྷན་དུ་ཞིང་ལས་བྱེད་བཞིན་ཡོད་འདུག ༢༠༠༨ ལོའི་ཞི་རྒོལ་ཆེན་མོའི་སྐབས་སུ་བུ་མོ་དེའི་ནང་མི་གཅིག་པའི་བཙུན་མ་བཀྲ་དགའ་ཟེར་བ་ཞིག་ཀྱང་ས་བྱིའི་ཞི་རྒོལ་བའི་ཁྲོད་དུ་ཞུགས་ནས་རྒྱ་གཞུང་གིས་འཛིན་བཟུང་བྱས་རྗེས། ལོ་ ༡ ཟླ་ ༧ ཀྱི་བཙོན་འཇུག་ཁྲིམས་ཐག་བཅད་པ་སོགས་ལ་བརྟེན་ནང་མིའི་གནས་སྟང་ལ་རྒྱ་གཞུང་གིས་ལྟ་སྟངས་ཡག་པོ་མེད་པ་ཞིག་ཀྱང་ཡིན་འདུག །
མེ་སོར་གསར་འགོད་པས།
