ཀོ་ལེ་གྷལ་དུ་བོད་ཀྱི་འཛམ་གླིང་སྤྱི་བསང་དུས་ཆེན།
ཟླ་འདིའི་ཚེས་༣ ཉིན་ནི་བོད་ཟླ་༥ པའི་ཚེས་༡༥ སྟེ་འཛམ་གླིང་སྤྱི་བསང་གི་ཉིན་མོར་ཁེལ་ཡོད་པར་བརྟེན། ཞོགས་པ་ཆུ་ཚོད་༨ ཕྱེད་ཙམ་ལ་རྒྱ་གར་ལྷོ་ཕྱོགས་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་སུ། མི་མང་གིས་ལུས་ལ་གཟབ་མཆོར་སྤྲས་ཤིང་རྫོགས་ཆེན་དགོན་པའི་ཉེ་འགྲམ།
༧རྒྱལ་བ་རིན་པོ་ཆེའི་ཕོ་བྲང་ཆགས་སའི་རི་འབུར་ཞིག་གི་རྩེར་རུ་འཛོམས་བཞིན་འདུག
རི་འབུར་དེ་ནི་ས་གཙང་བ་དང་ལྗོན་ཤིང་སྣ་ཚོགས་ཀྱིས་བརྒྱན་པས་ཉམས་དགའ་ཞིང་ཁ་ཁུ་སིམ་པོ་ཞིག་ཡིན་པ་དང། དོན་ལྡན་གླིང་མི་མང་གིས་དུས་དྲན་སྲུང་བརྩི་དང་སྤྲོ་སྐྱིད་གཏོང་བ་སོགས་མི་མང་མཉམ་འཛོམས་ཀྱི་བྱེད་སྒོ་སྤེལ་ས་གཙོ་བོ་ཞིག་ཀྱང་རེད་འདུག
རྫོགས་ཆེན་དགོན་པའི་གྲྭ་ཤག་ནས་བལྟས་སྐབས་རི་མགོ་བསང་དུད་ཀྱིས་བཀླུབས་ཤིང་། བསང་རྫས་ཀྱི་དྲི་བཟང་རླུང་གིས་ཁུར་ནས་རྫོགས་ཆེན་དགོན་པའི་ཁོར་ཡུག་ཀུན་ལ་ཡང་ཁྱབ་ནས་འདུག བསང་གསོལ་འདོན་བཞིན་པའི་དབྱངས་ལྟ་སྙན་མོ་ཞིག་ཀྱང་རྒྱང་གྲགས་ནས་གྲགས་བཞིན་འདུག་ལ། གནམ་གཤིས་ཚ་གྲང་སྙོམས་ཤིང་རླུང་བུ་བསིལ་མོ་ཞིག་ལྡང་བཞིན་འདུག་པས་རི་མགོར་འགྲོ་རྒྱུ་སྤྲོ་སྣང་སྐྱེས་པ་ཞིག་འདུག་པས་ང་ཡང་དེར་ཕྱིན་པ་ཡིན། རི་མགོ་དེར་ས་གནས་འགོ་འཛིན་ཕུན་ཚོགས་ཚེ་རིང་གིས་གཙོས་པའི་ས་གནས་རང་བདེན་ཚོགས་ཆུང་དང་། ས་གནས་འཐུས་ཚོགས། སྨན་རྩིས་ཁང་སོགས་ཀྱི་འགན་ཡོད་མི་སྣ་དང་ས་གནས་གཞོན་ནུ་བུད་མེད་ཀྱི་ཚོགས་མི། དེ་མིན་མི་མང་ཡང་གཞི་རྒྱ་ཆེ་བ་ཙམ་འདུ་འཛོམས་བྱུང་འདུག བསང་མཆོད་ཀྱི་ཆོ་ག་རྣམས་གྲུབ་ཟིན་པ་ན་ས་གནས་གཞོན་ནུའི་ཚོགས་གཙོ་གཅུང་ལགས་ཀྱིས་བསང་གསོལ་ངོ་སྤྲོད་བྱས་སོང་། ཁོང་གིས་དེ་རིང་ནི་སྔོན་མ་བོད་དུ་སློབ་དཔོན་པདྨ་འབྱུང་གནས་ཀྱིས་འདྲེ་སྲིན་བཏུལ་ནས་བསམ་ཡས་ལེགས་འགྲུབ་བྱུང་བའི་རྒྱལ་ཁའི་ཉིན་མོར་འཛམ་གླིང་སྤྱི་བསང་ཞེས་པའི་དགའ་སྟོན་གྱི་བསང་མཆོད་ཕུལ་བའི་ཉིན་མོ་དེ་རེད་ལ། ང་རང་ཚོ་བོད་རང་བཙན་ཡིན་སྐབས་གཞུང་འབྲེལ་གྱིས་བསང་མཆོད་བྱ་བའི་དུས་ཆེན་ཞིག་ཀྱང་རེད། འདི་ནི་བོད་མིའི་སྲོལ་རྒྱུན་གྱི་ཆོ་ག་ཞིག་ཡིན་པས། ང་ཚོས་མི་ཉམ་རྒྱུད་འཛིན་བྱེད་ཆེད་ལོ་ལྟར་བསང་མཆོད་བྱེད་ཀྱི་ཡོད་རེད་ཅེས་དང་། བོད་ནང་དུ་འདི་ལྟ་བུའི་བོད་མིའི་ཐུན་མིན་ཁྱད་ཆོས་ལྡན་པའི་སྲོལ་རྒྱུན་རྒྱུད་འཛིན་བྱེད་པར་དཀའ་ངལ་ཡོད་པ་རེད་ལ། བོད་མི་བཞི་བཅུ་བརྒལ་བས་རང་ལུས་མེ་རུ་སྤར་ནས་བོད་རང་དབང་གི་ཆེད་དུ་རྒྱ་གཞུང་ལ་ངོ་རྒོལ་བྱེད་ཀྱི་ཡོད་པ་རེད། འདི་ཚོ་ཚང་མ་ང་ཚོས་སེམས་ལ་དྲན་པ་བྱེད་དགོས་རེད་ཅེས་སོགས་ད་ལྟའི་བོད་ནང་གི་གནས་བབ་བཅས་འགྲེལ་བརྗོད་བྱས་སོང། དེ་ནས་བོད་རང་དབང་འཐབ་རྩོད་ཀྱི་ཆེད་དུ་རང་སྲོག་དོར་བའི་དཔའ་བོ་དཔའ་མོ་དག་ལ་མྱ་ངན་གུས་འདུད་ཞུས་པ་དང་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས། ཀི་བསྭོ་དང་ལྷ་རྒྱལ་འཐེན་ནས་བསང་མཆོད་ཀྱི་ཆོ་ག་སྤྲོ་པོའི་ངང་གྲོལ་སོང་།
དོན་ལྡན་གླིང་གི་འཛམ་གླིང་སྤྱི་བསང་གོ་སྒྲིག་བྱེད་མཁན་ནི་ས་གནས་གཞོན་ནུ་དང་བུད་མེད་རེད་འདུག་ལ། ཚོགས་པ་དེ་གཉིས་ཀྱིས་བསང་གསོལ་གཅིག་པུ་མ་ཡིན་པར་རྐང་རྒྱུག་འགྲན་བསྡུར་དང་། གྲོང་སྡེ་ཁག་ཕན་ཚུན་ཐག་འཐེན་འགྲན་སྡུར་ཡང་གོ་སྒྲིག་བྱས་འདུག་པར་བརྟེན་མི་མང་ཚོ་ལྟད་མོའི་དགའ་སྤྲོ་ལ་རོལ་ནས་བསྡད་སོང་། ཉིན་རྒྱབ་ཐག་འཐེན་མཐའ་མའི་འགྲན་སྡུར་གྲུབ་རྗེས་རྒྱུག་འགྲན་པ་དང་ཐག་འཐེན་མཐའ་མའི་རྒྱལ་ཁ་ཐོབ་མཁན་དག་ལ་ལྟད་མོ་བ་རྣམས་ཀྱིས་དགའ་སྤྲོའི་ཐལ་སྒྲ་དང་ཀུ་སྒྲའི་ཁྲོད་ནས་དགའ་རྟགས་སྤྲད་སོང་། ད་དུང་ས་གནས་གཞོན་ནུའི་ངོས་ནས་གཞོན་ནུའི་ཚོགས་མི་རྒྱུན་རིང་བྱས་པ་དང་། ལས་འགུལ་ནང་མཉམ་ཞུགས་བྱེད་མཁན་རྩེ་ཕུད་ཆོས་ཆོས་ཟེར་བའི་སྐྲ་དང་སྨྲ་ར་དཀར་ཞིང་ལུས་ལ་ལྭ་དཀར་གྱོན་པའི་རྒན་རབས་པ་ཞིག་ལ། དམིགས་བསལ་བསྔགས་བརྗོད་དང་བཅས་བོད་ཀྱི་རྒྱལ་དར་ཞིག་དང་དར་དཀར་ཤོག་ཆག་བཅས་ཀྱི་གཟེངས་བསྟོད་དགའ་རྟགས་ཤིག་ཀྱང་སྤྲད་སོང་།
འཛམ་གླིང་སྤྱི་བསང་གི་དགའ་སྟོན་གྲུབ་རྗེས་ང་རྒན་པོ་དེའི་ཉེ་བར་བཅར་ནས་ཁྱེད་ཀྱིས་གཞོན་ནུའི་ཚོགས་མི་ལོ་ག་ཚོད་བྱས་པ་ཡིན། ད་ལྟ་ནང་མི་ག་ཚོད་ཡོད།ཅེས་དྲིས་པར། ཁོང་གིས་ང་བོད་ཀྱི་གཞོན་ནུ་ལྷན་ཚོགས་དབུ་བརྙེས་པ་ནས་ད་ལྟའི་བར་གཞོན་ནུའི་ཚོགས་མི་བྱས་པ་ཡིན། གང་ཐུབ་ཀྱིས་གཞོན་ནུའི་ལས་འགུལ་ཚང་མར་མཉམ་ཞུགས་བྱས་པ་ཡིན། ང་ལ་ནང་མི་མང་པོ་ཡོད། བུ་ཕྲུག་སློབ་ཕྲུག་ཚོ་མ་གཏོགས་ཚང་མ་གཞོན་ནུའི་ཚོགས་མིར་ཞུགས་ཡོད། ད་ལྟ་ངའི་ནང་མི་བུ་མོ་དང་མག་པ་སོགས་ང་ཚོ་མི་ལྔ་གཞོན་ནུའི་ཚོགས་མི་ཡིན། ཞེས་བརྗོད་སོང་།
ད་དུང་ངས་ལྟད་མོའི་བར་གསེང་སྐབས་སུ་ས་གནས་གཞོན་ནུའི་ཚོགས་གཙོ་དང་སྤྱིར་བཏང་གླེང་མོལ་བྱེད་སྐབས་ཁོས་ང་ཚོས་ས་གནས་སུ་འདི་འདྲའི་དགའ་སྤྲོའི་འདུ་འཛོམས་བསྡུ་བསྐོང་བྱེད་ཐུབ་ན་གཞིས་ཆགས་ནང་གི་གཞོན་སྐྱེས་ཚོ་ས་གནས་སུ་སྡོད་རྒྱུ་དང་། གཞིས་ཆགས་ལ་དགའ་པོ་ཡོང་བ་བྱེད་ཐུབ་ཀྱི་རེད་དྲན་གྱི་ཡོད་ཅེས་བརྗོད་ཀྱི་འདུག དེ་ལྟར་ཀོ་ལེ་གྷལ་དོན་ལྡན་གླིང་ས་གནས་མི་མང་གིས་འཛམ་གླིང་སྤྱི་བསང་གི་ཉིན་མོ་རྒྱལ་ཁའི་ངང་གྲོལ་ཡོད་པ་རེད།།
མེ་སོར་གསར་འགོད་པས།
