རྒྱ་གར་ཤིས་ལོངས་སུ་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ།
བོད་མི་མང་སྤྱི་འཐུས་ལྷན་ཚོགས་ཀྱི་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་དེ།བོད་མི་འདུས་སྡོད་བྱེད་སའི་ས་ཁུལ་ལ་དྭགས་དང་ལྷོ་ཕྱོགས་ཀོ་ཅི།བྱང་ཤར་ཤིས་ལོངས་གསུམ་ནས་སྐུའི་འཁྲུངས་སྐར་ཉིན་འགོ་འཛུགས་གནང་འཆར་ཡོད་པ་ལྟར།
ཟླ་འདིའི་ཚེས་༦ཉིན་༧གོང་ས་མཆོག་གི་སྐུའི་འཁྲུང་སྐར་དང་བསྟུན་ནས།བྱང་ཤར་ཤིས་ལོངས་བོད་མི་འདུག་སྡོད་བྱེད་སའི་ས་གནས་སུ་ལས་འགུལ་དངོས་སུ་འགོ་བཙུགས་ཡོད་པ་རེད།
དང་ཐོག་ས་གནས་དེའི་དགའ་ལྡན་ཆོས་གླིང་བོད་དགོན་དུ།གཞུང་དང་གཞུང་འབྲེལ་མ་ཡིན་པའི་ལས་ཀྱི་སྣེ་མོ་བ་དང་སེར་སྐྱ་མི་མང་རྣམས་འདུ་འཛོམས་གནང་སྟེ་བསང་གསོལ་སོགས་གྲུབ་པ་དང་།སྐུ་མགྲོན་གྱི་གཙོ་བོ་རྒྱ་གར་མཱི་གྷ་ལཱ་ཡ་མངའ་སྡེའི་གྲོས་ཚོགས་ཀྱི་ཚོགས་གཙོ་སྐུ་ཞབས་ཆཱར་ལི་སི་པིང་རོབ་ ཕེབས་བསུ་ཞུས།ས་གནས་འགོ་འཛིན་ལས་ཁུངས་ཀྱིས་ཁོང་ལ་བོད་ལུགས་ཀྱི་ཆས་གོས་ཕུལ་བ་ལྟར་བསྣམས་ནས་མཛད་སྒོར་ཕེབས་པ་དང།ས་གནས་འགོ་འཛིན་ལྷག་པ་ཚེ་རིང་གིས་དབྱིན་སྐད་ཐོག་བཀའ་ཤག་གི་གསུང་འཕྲིན་སྒྲོགས་སྦྱང་གནང་རྗེས།བདེན་པའི་མེ་ལྕེ་སྐོར་བསྐྱོད་ལས་འགུལ་ཚོགས་ཆུང་གི་འཐུས་མི་སྤྱི་འཐུས་འཇམ་དབྱངས་བཟོད་པས་ལས་འགུལ་གྱི་སྐོར་གཏམ་བཤད་བྱས།དེ་ནས་ཕྱོགས་བཞུགས་སྤྱི་འཐུས་དབྱངས་ཅན་སྒྲོལ་དཀར་ལགས་ཀྱིས་དབྱིན་ཡིག་ཐོག་འཁྲུངས་སྐར་དང་ལས་འགུལ་གྱི་སྐོར་གསུང་བཤད་གནང་སོང།
དེ་ནས་སྐུ་མགྲོན་གྱི་གཙོ་བོ་མཆོག་གིས་བོད་དང་བོད་མིའི་ཆེད་དུ།བོད་མིའི་སྒྲིག་འཛུགས་ཀྱི་འགོ་འཁྲིད་རྣམས་མཇལ་འཕྲད་གནང་པའི་སྐོར་དང།བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་དེས་འཛམ་གླིང་གཉིད་ལ་དཀྲོག་ནས་བོད་དོན་ཐོག་སྔར་ལས་ལྷག་པ་དོ་སྣང་ཡོང་བ་ཕན་ཐོགས་ཆེན་པོ་ཡོང་རྒྱུ་སོགས་སྙིང་ཉེ་བའི་གསུང་བཤད་གནང་ནས།ཧིན་སྒོར་འབུམ་གཅིག་གསོལ་རས་གནང་སོང།དེ་རྗེས་བདེན་པའི་མེ་ལྕེ་དབུ་འབྱེད་གནང་ནས་མཚན་རྟགས་བསྡུ་རུབ་ཀྱི་ལས་གཞིའི་ཐོག་ཁོང་གིས་མཚན་རྟགས་ཐོག་མ་གནང་སོང།དེ་ནས་རིམ་གྱིས་ཤིས་ལོངས་ས་གནས་སུ་ཉིན་གྲངས་བཞིའི་རིང་།གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་མཉམ་འབྲེལ་གྱིས།བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་སྤེལ་རྒྱུ་ཡིན་པ་དང་།ལོ་འདིའི་ཟླ་༡༢ཚེས་༡༠ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་བར།བོད་མི་འདུས་སྡོད་ཀྱི་ས་གནས་ཁག་ཚང་མ་བརྒྱུད་ནས།བདེན་པའི་མེ་ལྕེ་སྐོར་སྐྱོད་ཀྱི་ལས་འགུལ་ཡོང་གི་ཡོད་པས།དེ་དོན་བོད་མི་ཚང་མས་དོ་སྣང་གནང་རོགས་ཞེས་ཞུ་རྒྱུ་ཡིན་ཞེས་གསུངས་ཡོད་པ་རེད།།
ཤིས་ལོངས་ས་གནས་ནས་བོད་མི་མང་སྤྱི་འཐུས་འཇམ་དབྱངས་བཟོད་པས།
ཕྱི་ལོ་ ༢༠༡༢ ཟླ་ ༧ ཚེས་ ༦ ཉིན།།
