མོན་གྷོ་རུ་འཁྲུངས་སྐར་སྲུང་བརྩི།
ཟླ་འདིའི་ཚེས་༦ ཉིན་གྱི་ཞོགས་པ་ཆུ་ཚོད་༧་༣༠ ཕྱེད་ཐོག་རྒྱ་གར་ལྷོ་ཕྱོགས་མོན་གྷོ་ས་གནས་གཞིས་ལས་ཁང་གི་གོ་སྒྲིག་འོག གོང་ས་མཆོག་གི་འཁྲུངས་སྐར་སྲུང་བརྩིའི་མཛད་སྒོ་ཞིག་འཚོགས་ཡོད་པ་རེད།
དེ་ཡང་ཉིན་འདིའི་ཞོགས་པ་ཐོག་མར་མོན་གྷོ་ས་གནས་ཀྱི་སེར་སྐྱ་མི་མང་ཧ་ཅང་ཕོན་ཆེན་ནོར་བུ་རི་རྩེར་མཉམ་འཛོམས་ཐོག་༧གོང་ས་མཆོག་གི་སྐུ་པར་གདན་ཞུས་ཀྱི་ཐོག་མཎྜལ་རྟེན་གསུམ་འདེགས་འབུལ་དང་མཇལ་དར་སྒྲོན་འབུལ། དེ་བཞིན་བསང་གསོལ་དང་རླུང་རྟ་སྒྲེང་འཛུགས་སོགས་ཀྱི་ལས་རིམ་གྲུབ་རྗེས། ཆུ་ཚོད་༩ པའི་ཐོག་མོན་གྷོ་ས་གནས་མི་མང་ཚོགས་ཁང་ཆེན་མོའི་ནང་སྐུ་མགྲོན་རྣམ་པ་དང་མི་མང་བཅས་མཉམ་འཛོམས་ཐོག གོང་ས་མཆོག་དགུང་གྲངས་༧༧ ལ་ཕེབས་པའི་སྐུའི་འཁྲུངས་སྐར་དུས་ཆེན་གྱི་དངོས་གཞིའི་མཛད་སྒོ་དབུ་འཛུགས་གནང་སོང་།
མཛད་སྒོའི་ཐོག་སྐུ་མགྲོན་གཙོ་བོད་མི་མང་སྤྱི་འཐུས་ཐུབ་བསྟན་ལུང་རིགས་དང་ཕྱོགས་བཞུགས་སྤྱི་འཐུས་ཨ་ཀྲུག་ཚེ་བརྟན་གཉིས་ཀྱིས་གཙོས་གདན་ས་དགའ་འབྲས་གཉིས་ཀྱི་གཙོས་གྲྭ་ཚང་ཁག་གི་མཁན་ལས་ཐོག་རྣམ་པ་དང་། དགེ་སྐོས་ཕྱག་མཛོད་རྣམ་པ་སོགས་བཀའ་རབས་འབྱམས་བླ་སྤྲུལ་དགེ་བའི་བཤེས་གཉེན་ཡོངས་དང་། མོན་གྷོ་ས་གནས་གཞིས་འགོ་བསོད་ནམ་བསྟན་འཛིན་དང་ས་འཐུས་ཚོགས་གཙོ་གུ་རུ་རྒྱལ་མཚན་གཉིས་ཀྱིས་གཙོས་གཞུང་དང་གཞུང་འབྲེལ་མ་ཡིན་པའི་སྲི་ཞུའི་ལས་བྱེད་ཡོངས་དང་། དེ་བཞིན་མོན་གྷོ་ས་གནས་ཀྱི་རྒྱ་གར་དཔོན་རིག་ཁག་གཅིག་དང་མོན་གྷོ་ས་གནས་ཀྱི་བོད་རིགས་སེར་སྐྱ་མི་མང་ཧ་ཅང་ཕོན་ཆེན་བཅས་འདུ་འཛོམས་གནང་ཡོད་པ་དང་།
དེ་ཡང་ཐོག་མར་སྐུ་མགྲོན་གཙོ་བོ་རྣམ་གྱིས་དུས་འཁོར་ལྷ་ཁང་ནས་༧གོང་ས་མཆོག་གི་སྐུ་པར་གདན་ཞུ་དང་སྐུ་པར་མདུན་དུ་མཎྜལ་རྟེན་གསུམ་འདེགས་འབུལ་དང་མཇལ་དར་སྒྲོན་འབུལ། དེ་བཞིན་སྣང་གསལ་མར་མེ་ཞལ་འབྱེད་བཅས་ཀྱི་ལས་རིམ་མཇུག་ཏུ་ཚང་མ་སྐུ་བཞེངས་ཀྱིས་འཕགས་བོད་རྒྱལ་ཁབ་གཉིས་ཀྱི་རྒྱལ་གླུ་བླངས་རྗེས་། བོད་བསྟན་སྲིད་ཆེད་དུ་རང་ལུས་མཆོད་མེར་ཕུལ་མཁན་རྒྱལ་གཅེས་དཔའ་བོ་ཕོ་མོ་ཡོངས་ལ་གདུང་སེམས་མཉམ་བསྐྱེད་མཚོན་ཆེད་དུ་མྱ་ངན་ངག་བཅད་སྐར་མ་གཅིག་རིང་བྱས་སོང་། དེ་ནས་མོན་གྷོ་ས་གནས་འགོ་འཛིན་བསོད་ནམ་བསྟན་འཛིན་དང་། ཕྱོགས་བཞུགས་སྤྱི་འཐུས་ཨ་ཀྲུག་ཚེ་བརྟན་གཉིས་ནས་༧སྐུའི་འཁྲུངས་སྐར་དུས་ཆེན་ཉིན་ཕུལ་བའི་བཀའ་སྤྱི་གཉིས་ཀྱི་གསུང་འཕྲིན་སྒྲོགས་སྦྱང་དང་། གཞན་ཡང་དགའ་བྱང་མཁན་པོ་བསོད་ནམ་ཆོས་འཕེལ་དང་ས་འཐུས་གུ་རུ་རྒྱལ་མཚན་གཉིས་ཀྱིས་༧གོང་ས་མཆོག་གི་མཛད་རྣམ་དང་མཛད་འཕྲིན་ངོ་སྤྲོད་གནང་བ་སོགས་སྐུ་མགྲོན་རྣམ་པའི་སྐུའི་འཁྲུངས་སྐར་དང་འབྲེལ་བའི་གསུང་བཤད་གནང་གྲུབ་རྗེས། མོན་གྷོ་ས་གནས་གཞིས་བྱེས་ལྷ་ཚོགས་དང་། དགའ་བྱང་ཏྲེ་ཧོར་མི་ཚན། མོན་གྷོ་གཏན་ཉིན་སློབ་གྲྭའི་གཙོས་ས་གནས་སློབ་གྲྭ་ཁག་དང་། གཞིས་གྲོང་ཁག་བཅས་ཀྱིས་༧གོང་ས་མཆོག་གི་སྐུའི་འཁྲུངས་སྐར་དུས་ཆེན་ལ་གཞས་སྣ་འདྲ་མིན་གཟིགས་འབུལ་སོགས་མཛད་སྒོ་ཟབ་རྒྱུས་གནང་ཡོད་པ་རེད།
གཞན་ཡང་ཉིན་འདིའི་ཉིན་རྒྱབ་ཆུ་ཚོད་༣་པའི་ཐོག་མོན་གྷོ་ས་གནས་རྩེད་རིགས་ཚོགས་ཆུང་གིས་༧གོང་ས་མཆོག་གི་སྐུའི་འཁྲུངས་སྐར་དུས་ཆེན་ལ་རྐང་རྩེད་སྤོ་ལོ་འགྲན་སྡུར་ཞིག་ཀྱང་གོ་སྒྲིག་བྱས་ཡོད་པ་དང་། དེ་ཡང་ཉིན་འགའི་སྔོན་ནས་མོན་གྷོ་ས་གནས་ཀྱི་རྐང་སྤོར་རུ་ཁག་ནང་ཕན་ཚུན་འགྲན་སྡུར་བྱས་ནས་དེ་རིང་ཐ་མའི་འགྲན་རྩོད་མཁན་གཞིས་གྲོང་༡་དང་༦་གཉིས་ཀྱི་རྐང་སྤོར་རུ་ཁག་གཉིས་ཡིན་པ་དང་། ཐ་མའི་རྒྱལ་ཁ་གཞིས་གྲོང་དང་པོར་ཐོབ་ཡོད་པ་རེད།
མོན་གྷོ་གསར་འགོད་པས།
