མོན་གྷོ་རུ་སྨན་སྦྱིན་རོགས་སྐྱོར།
ཟླ་འདིའི་ཚེས་༩ ནས་༡༡ བར་ཉིན་གསུམ་རིང་རྒྱ་གར་ལྷོ་ཕྱོགས་མོན་གྷོ་ས་གནས་དགའ་ལྡན་བྱང་རྩེ་སྤྱི་ཚོགས་འཕྲོད་བསྟེན་སྨན་ཁང་གིས་སྣེ་ལེན་གོ་སྒྲོག་འོག ཐེའི་ཝན་བྱམས་བརྩེ་ཚོགས་པ་ཞེས་པའི་སྨན་པའི་རོགས་ཚོགས་ཤིག་ཆེད་གཉེར་གྱིས་ཕེབས་ནས། དགའ་བྱང་རྩེ་འཕྲོད་བསྟེན་སྨན་ཁང་དུ་རིན་མེད་ཐོག་སྨན་སྦྱིན་བྱེད་ཀྱི་ཡོད་པ་དང་།
སྨན་སྦྱིན་བྱེད་ཕྱོགས་དེ་ཡང་ཁག་ཁ་ཤས་ཡོད་པ་དང་། བརྟག་དཔྱད་སྔོན་སོང་ཐོག་རྩ་སྨན་སྤྲོད་སྦྱིན་གྱི་སྐོར་དང་འཕུར་མྱེད་ཀྱི་སྐོར་། དེ་བཞིན་སོ་ཕུད་པ་དང་བཙུགས་པ་སོགས་རིགས་ཁ་ཤས་ཐོག་རིན་མེད་ཀྱི་སྨན་སྦྱིན་ཉིན་གསུམ་བྱེད་ཀྱི་ཡོད་པ་རེད།
ཕྱི་ཚེས་༡༢ ནས་ཉིན་གཉིས་རིང་འབྲས་སྤུངས་བློ་གསར་གླིང་སྨན་ཁང་དུ་དེ་བཞིན་སྨན་སྦྱིན་བྱེད་ཀྱི་ཡིན་སྐོར་བརྗོད་སོང་། ཐེའི་ཝན་བྱམས་བརྩེ་སྨན་པའི་རོགས་ཚོགས་དེ་ནི་ཕྱི་ལོ་༢༠༠༩ ལོར་དྷ་སར་༧གོང་ས་མཆོག་གི་སྐུ་མདུན་དུ་བཅར་ནས་གསར་འཛུགས་བྱས་པ་ཞིག་ཡིན་པ་དང་། བྱམས་བརྩེ་ཚོགས་པ་ཞེས་པའི་མིང་བྱང་དེ་ཡང་༧གོང་ས་མཆོག་གིས་བསྩལ་བ་དང་། ད་ལྟའི་ཆར་ཐེའི་ཝན་ནང་གི་ཚོགས་པ་སྐད་གྲགས་ཆེ་ཤོས་ཀྱི་གྲས་སུ་འགྲོ་བཞིན་ཡོད་སྐོར་འདུག ཚོགས་པ་དེ་བཙུགས་ནས་ད་ལྟའི་བར་དུ་བཙན་བྱོལ་བོད་པའི་སྤྱི་ཚོགས་གང་སར་སྨན་སྦྱིན་གྱི་རོགས་སྐྱོར་ཐེངས་མང་བྱས་དང་བྱེད་མུས་ཡིན་པ་རེད་འདུག
མོན་གྷོ་གསར་འགོད་པས།
