བོད་སློབ་འཛིན་སྐྱོང་ཁག་གི་སློབ་གྲྭ་ཁག་རྩིས་ལེན་འཆར།

དེ་རིང་ཞོགས་པར་ཤེས་རིག་ལས་ཁུངས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ། རྒྱ་གར་དབུས་བོད་སློབ་འཛིན་སྐྱོང་གི་ཁྱབ་ཁོངས་སུ་ཡོད་པའི་གཏན་ཉིན་སློབ་གྲྭ་ཁག་དབུས་བོད་མིའི་སྒྲིག་འཛུགས་ཀྱི་ཁྱབ་ཁོངས་སུ་ལེན་རྒྱུ་ཡིན་ཞེས་ཤེས་རིག་དྲུང་ཆེས་བརྗོད་སོང་།

དེ་ཡང་ཟླ་འདིའི་ཕྱི་ཚེས་༡༠ ཉིན་གྱི་ཞོགས་པའི་ཆུ་ཚོད་༡༠ པའི་སྟེང་། ཤེས་རིག་ལས་ཁུངས་ནས། དྷ་ས་གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། རྒྱ་གར་དབུས་བོད་སློབ་འཛིན་སྐྱོང་གི་ཁྱབ་ཁོངས་སུ་ཡོད་པའི་གཏན་ཉི་སློབ་གྲྭ་ཁག དབུས་བོད་མིའི་སྒྲིག་འཛུགས་ཀྱི་ཁྱབ་ཁོངས་སུ་ལེན་རྒྱུའི་གསལ་བསྒྲགས་ཤིག་སྤེལ་ཏེ། ཤེས་རིག་ལས་ཁུངས་ཀྱི་དྲུང་ཆེ་དངོས་གྲུབ་ཚེ་རིང་མཆོག་གིས་གསར་འགོད་གསལ་བསྒྲགས་སྒྲོགས་སྦྱང་གནང་དོན།

“བོད་སློབ་འཛིན་སྐྱོང་ཁྱབ་ཁོངས་གཏན་ཉི།་སློབ་གྲྭ་ཁག་གི་ཤེས་ཡོན་གྱི་གནས་ཚད་དང་བདེ་དོན་གང་ཅིའི་ལྟ་རྟོགས་འཐུས་གཙང་ཡོང་ཐབས་སུ། སློབ་གྲྭ་ཁག་རང་ཕྱོགས་ལ་རྩིས་སྤྲོད་གནང་སླད་ཤེས་རིག་ལས་ཁུངས་ནས་སྔ་རྗེས་འབད་བརྩོན་གནང་ཡོད་པ་དང་། བོད་ཚོགས་འགན་འཛིན་ལྷན་ཚོགས་ནང་ལན་མང་བཀའ་བསྡུར་ཡང་ཞུ་མྱོང་ཡོད། ལྷག་པར་བཀའ་ཤག་སྐབས་༡༤ པས་བོད་མིའི་སྒྲིག་འཛུགས་ཀྱི་འཛིན་སྐྱོང་ཐུགས་འགན་བཞེས་པ་ནས་བཟུང་། དཔལྡན་བཀའ་ཁྲི་མཆོག་ནས་བོད་སློབ་འཛིན་ཚོགས་ཀྱི་ཚོགས་གཙོས་དབུས་རྒྱ་གར་གྱི་མཐོ་རིམ་མི་སྣ་ཁག་མཇལ་འཕྲད་དང་། མཇུག་གནོན་མུ་མཐུད་ཞུས་འབྲས་སུ་ཉེ་ལམ་བོད་སློབ་འཛིན་ཚོགས་ནས། སློབ་གྲྭ་ཁག་རྩིས་ལེན་གནང་ཕྱོགས་ཞིབ་ཕྲའི་འཆར་འབུལ་དགོས་ལུགས་གསུང་དོན་ལྟར། འདི་ལས་ནས་ཕྱི་ལོ་༢༠༡༢ ཟླ་༥ ཚེས་༨ ཉིན་ཞིབ་འཆར་འབུལ་ལམ་ཞུས་ཡོད།

བོད་སློབ་འཛིན་སྐྱོང་ཁྱབ་ཁོངས་སུ་ད་ལྟའི་ཆར་འཛིན་རིམ་བཅུ་གཉིས་ཅན་གྱི་སློབ་གྲྭ་༩ དང་བཅུ་པ་ཅན་༦། གཞི་རིམ་བར་མའི་སློབ་གྲྭ་༧ དང་། གཞི་རིམ་འོག་མའི་སློབ་གྲྭ་༧། སྔོན་སློབ་བཅས་ཡོད་པའི་ནང་ཁྱོན་བསྡོམས་སློབ་མ་གྲངས་༧༥༥༥དང། དགེ་ལས་གྲངས་༧༦༡ ཙམ་ཡོད་”ཅེས་དང་།

ཡང་ཁོང་གིས་སློབ་གྲྭ་ཁག་རྩིས་ལེན་རྗེས་དགེ་ལས་ཀྱི་ཐོབ་ཐང་སྐོར་ནས་“སློབ་གྲྭ་ཁག་རྩིས་ལེན་བྱས་རྗེས་ད་ཡོད་དགེ་ལས་རྣམས་ཀྱི་ཕོགས་དང་རྒན་ཡོལ་སོགས་ཀྱི་ཐོབ་ཐང་ཁག་ལ་དོ་ཕོག་མེད་པར་རང་འཇགས་གནས་རྒྱུ་ཡིིན། འདིའི་སྐོར་བོད་སློབ་འཛིན་ཚོགས་ཀྱི་ངེས་སྟོན་པས་ཉེ་དུས་ཕྱི་ཟླ་༦ ཚེས་༢༢ ཉིན་ལྡི་ལིར་བོད་དགེའི་ཟབ་སྦྱོང་ཞིག་གི་སྐབས་སུ། དགེ་རྒན་རྣམས་ཀྱིས་དྲི་བ་ཞུས་ལན་དུ་རྩིས་བླངས་རྗེས་རྒྱ་གར་དགེ་རྒན་རྣམས་རྒྱ་གར་དབུས་གཞུང་གི་འཛིན་སྐྱོང་གནང་བཞིན་པའི(kvs) དང་། ཨེན་ཝི་ཨེས། (NVS) སློབ་གྲྭའི་སྡེ་ཁག་གཉིས་དང་། ཨེན་སི་ཨི་ཨར་ཊི་(Demonstration Multipurpose school of NCERT) སློབ་འཁྲིད་སྦྱོང་བརྡར་གནང་ཡུལ་སློག་གྲྭ་གང་རུང་ནང་རང་མོས་བཞིན་འཇུག་གཏོང་ཆོག་རྒྱུ་དང་། ཡང་མུ་མཐུད་འཛིན་སྐྱོང་གསར་པའི་ནང་སྡོད་བློ་ཡོད་རིགས་ཀྱི་ཕོགས་སོགས་ཐོབ་ཐང་ཁག་ད་མུས་བཞིན་གནང་རྒྱུའི་ཁས་ལེན་གསལ་བཤད་གནང་ཡོད། འདིའི་སྐོར་འདི་ལོའི་ཕྱི་ཟླ་༤ པའི་ནང་དྷ་སར་བསྐོང་འཚོགས་ཞུས་པའི་བོད་སློབ་ཁག་གི་སློབ་སྤྱི་དང་། དགེ་ཆེའི་ཚོགས་འདུའི་ཐོག་ཏུ་ཡང་དཔལྡན་བཀའ་ཁྲི་མཆོག་ནས་གོང་མཚུངས་བཞིན་གསལ་བཤད་གནང་ཡོད།

གོ་སྐབས་འདི་བརྒྱུད་ནས་རྒྱ་གར་གཞུང་མང་གཉིས་དང་། ལྷག་པར་དབུས་བོད་སློབ་འཛིན་ཚོགས་སློབ་གྲྭ་ཁག་གི་ནང་ཕྱག་ལས་གནང་དང་གནང་བཞིན་པའི་དགེ་ལས་རྣམས་ནས་འདས་པའི་ལོ་༥༠ བརྒལ་བའི་རིང་། མ་འོངས་བོད་ཀྱི་སོན་རྩ་རྣམས་ཀྱི་ཤེས་ཡོན་དང་འབྲེལ་བའི་ལས་དོན་ཐོག་ཧུར་བསྐྱེད་གནང་བར། བཀའ་དྲིན་རྗེས་དྲན་དང་ཐུགས་རྗེ་ཆེ་ཞུ་རྒྱུ་ཡིན་”ཞེས་བསྒྲགས་སོང་།