དབུ་མའི་ལམ་གྱི་ཟབ་སྦྱོང་།

ཟླ་འདིའི་ཚེས་༥་ཉིན་གྱི་ཞོགས་པ་རྒྱ་གར་ལྷོ་ཕྱོགས་མོན་གྷོ་ས་གནས་དབུ་མའི་ལམ་གྱི་མི་མང་ལས་འགུལ་ཁང་གིས་གོ་སྒྲིག་འོག་དབུ་མའི་ལམ་གྱི་གོ་རྟོགས་སྤེལ་བའི་ཆེད་དུ་ཟབ་སྦྱོང་ཞིག་ས་གནས་བུད་མེད་ཚོགས་ཁང་དུ་གོ་སྒྲིག་བྱས་ཡོད་པ་དང་། ཟབ་སྦྱོང་སྤྲོད་དུ་བོད་མི་མང་སྤྱི་འཐུས་ཐུབ་བསྟན་ལུང་རིག་ལགས་གདན་འདྲེན་ཞུས་ཡོད་པ་རེད།

གཞིས་གྲོང་ཁག་གི་མི་མང་བརྒྱ་མ་ཟིན་ཙམ་ཟབ་སྦྱོང་སྤྲོད་སར་བཅར་ཡོད་ལ། དེ་ཡང་ཐོག་མར་དབུ་མའི་ལམ་ལས་འགུལ་ཁང་གི་དྲུང་ཆེ་སྤྲུལ་འཇམ་དབྱངས་ཡོན་ཏན་ལགས་ཀྱིས་དབུ་མའི་ལམ་གྱི་བྱུང་རིམ་དང་མི་མང་བརྒྱ་ཆ་༦༤་ལྷག་གིས་དབུ་མའི་ལམ་ལ་རྒྱབ་སྐྱོར་བྱེད་དགོས་དོན་གྱི་དམིགས་ཡུལ་གཙོ་བོ་ག་རེ་ཡིན་མིན་དང་། དེ་ཡང་རྒྱལ་བ་རིན་པོ་ཆེས་གསུང་ཡོད་པ་ཙམ་མ་ཡིན་པར་དབུ་མའི་ལམ་ལ་དངོས་ཤུགས་བརྒྱུད་གསུམ་ནས་དེང་དུས་དང་འཚམ་པའི་ལམ་ལུགས་ཤིག་ཡིན་ཙང་མི་མང་གི་དེ་ཤེས་རྟོགས་ཡོང་བའི་ཆེད་དུ་འདིར་ལྟར་ཟབ་སྦྱོང་གོ་སྒྲིག་ཞུས་པ་ཡིན་མ་གཏོགས་ལྟ་གྲུབ་གཞན་དག་ལ་དགག་སྒྲུབ་ཆེད་དུ་ལས་འགུལ་ཁང་འདི་ཡང་བཙུགས་བཞག་པ་ཞིག་ནམ་ཡང་མ་རེད་ཅེས་སོགས་ངོ་སྤྲོད་གནང་རྗེས། སྤྱི་འཐུས་ཐུབ་བསྟན་ལུང་རིག་ལགས་ཀྱིས་དབུ་མའི་ལམ་ངོ་སྤྲོད་དང་འབྲེལ་ཟབ་སྦྱོང་ཐོག་གསུང་བཤད་གནང་རྒྱུར། དབུ་མའི་ལམ་དེ་ཐོག་མ་༧སྐྱབས་མགོན་རིན་པོ་ཆེའི་དགོངས་པ་རེད་དེ་༧སྐྱབས་མགོན་རིན་པོ་ཆེའི་རལ་གྲི་གནམ་གཡུགས་བྱས་ནས་ཐག་བཅད་པ་དེ་འདྲ་མ་རེད་ལ། མང་གཙོའི་འགྲོ་ལུགས་ནང་བཞིན་གྱི་ལམ་ནས་མང་ཚོགས་རང་ལ་དྲི་བ་གནང་ནས་མང་ཚོགས་ཀྱི་བརྒྱ་ཆ་ཚད་མཐོ་བོའི་ཐོག་ནས་དབུ་མའི་ལམ་ལ་རྒྱབ་སྐྱོར་བྱས་པ་ཞིག་དང་། ལྷག་པར་དུ་གྲོས་ཚོགས་ཀྱི་ནང་ལ་སྤྱི་མོས་ཐོག་ནས་༧སྐྱབས་མགོན་རིན་པོ་ཆེའི་དུས་ནས་དུས་སུ་ཐུགས་ཐག་ག་རེར་བཅད་གནང་པ་ཡིན་ན། དེ་ཁྲིམས་དང་མཐུན་པའི་ཐོག་ནས་གཏན་ལ་ཕབས་པ་ཞིག་ལ་ཚད་འཛིན་བྱེད་ཀྱི་ཡིན་ཅེས་སྤྱི་མོས་ཐོག་ནས་གྲོས་ཆོད་སྙན་སེང་ཞུས་ཏེ་དེ་ག་རིང་ལ་༧སྐྱབས་མགོན་རིན་པོ་ཆེའི་ངོ་འཛིན་གནང་བཞག་པ་ཞིག་རེད། ད་ལྟ་ང་ཚོའི་སྐུ་མདུན་གྱི་དགོངས་པ་ལབ་ཀྱི་ཡོད་པ་དེ་ཙམ་མ་ཡིན་པར། མང་ཚོགས་ཀྱི་མངོན་འདོད་ཡོད་པས། ང་ཚོ་རང་དབང་གི་འཐབ་རྩོད་པ་ཞིག་གི་ཐབ་ལམ་གྱི་སྲིད་ཇུས་ཞིག་ལ་ངོ་འཛིན་གནང་བཞག་པ་ཞིག་རེད་ཅེས་དང་།

ཁོང་གིས་གང་འདྲ་ཞིག་ལ་དབུ་མའི་ལམ་ཟེར་གྱི་ཡོད་མེད་སྐོར་ལ་གསུང་དོན། མཐའ་གཉིས་སུ་མ་ལྷུང་པ་ཞིག་ལ་དབུ་མའི་ལམ་ཟེར་གྱི་ཡོད་པ་རེད་ལ།  ཀྲུང་གོ་གུང་ཁྲན་ཏང་གི་རྩ་ཁྲིམས་ཀྱི་སྒྲོམ་གཞིའི་འོག་ལ་ཆོལ་གསུམ་གཅིག་ཏུ་དྲིལ་ནས་བོད་མི་རིགས་ལ་ཚད་མཐོའི་རང་སྲིད་རང་སྐྱོང་གི་སོ་སོའི་མི་རིགས་ཀྱི་འཛིན་སྐྱོང་དང་འཕྲོད་བསྟེན། ཤེས་ཡོན། དེ་ག་ནང་བཞིན་སྐད་ཡིག་རིག་གཞུང་བདག་ཉར་བྱེད་རྒྱུ་སོགས་ནང་གི་རང་དབང་ཆ་ཚང་ཞིག་ང་ཚོ་ལ་དགོས་པ་དང་། ཕྱིའི་རྒྱལ་ཁབ་ལ་འབྲེལ་བ་འཛིན་རྒྱུ་དང་། ལུང་པ་ཡར་རྒྱས་གཏོང་བ་དེ་ཚོའི་དབང་ཚད་ཁྱེད་རང་ཚོའི་ཉར་ན་འགྲིག་གི་འདུག་ཅེས་ལབ་ཡོད་པ་རེད། ཕྱོགས་གཉིས་ཀར་ཁེ་ཕན་ཡོད་པ་ཁས་ལེན་བྱེད་ཐུབ་པ་ཞིག་ལ་དབུ་མའི་ལམ་ཟེར་གྱི་ཡོད་པ་རེད་ཅེས་དང་། ཡང་ཁོང་གིས་མུ་མཐུད་ནས་དེ་ལྟར་བློས་གཏོང་བྱེད་དགོས་པའི་རྒྱུ་མཚན་སྐོར་ལ་གསུང་དོན། རྒྱུ་མཚན་རྒྱབ་ལྗོངས་ངོས་གནས་མ་ཤེས་པ་ཡིན་ན། རྒྱ་མིའི་འོག་གྲངས་ཉུང་མི་རིགས་གཅིག་གི་ཐོབ་ཐང་རེག་ན་སྡོད་ཀྱི་ཡིན་ཟེར་དུས་ཧང་སང་མདོག་ཁ་བོ་རེད། ཡིན་ནའང་དེ་ལ་༧སྐུ་མདུན་གྱི་དགོངས་པ་རྒྱ་ཆེན་པོ་ཞེ་དྲག་བཞེས་ཡོད་པ་རེད། དཔེར་ན་ཆ་བཞག་པ་ཡིན་ན། ང་ཚོའི་རང་བཙན་རྩོད་མ་མྱོང་བ་མ་རེད། རང་བཙན་བརྩད་པ་རེད། ༡༩༥༩་ལོར་བོད་རྒྱ་འོག་ཏུ་ཤོར་བ་རེད། དེ་ནས་བཟུང་བདུན་ཅུ་དོན་བརྒྱད་བར་རང་བཙན་གཙང་མ་བརྩད་ནས་ཡོང་བ་རེད། གྲུག་འབྲས་གང་ཡང་མ་ཐོན་པ་རེད། རྒྱ་ནག་དང་རྒྱལ་སྤྱི་ང་རང་ཚོ་ཚང་མའི་གནས་སྟངས་ལ་བལྟས་ནས། དེ་ལ་བབ་པའི་གོམ་པ་ཞིག་རྒྱབ་དགོས་པ་གཅིག་དང་། ཐུབ་རྒྱུ་མེད་པ། ཡོང་རྒྱུ་མེད་པ། དཀའ་ལས་ཁག་པོ་ཞིག་ལ་བལྟ་མི་སྡོད་པར་། དངོས་གནས་དྲང་གནས་ཐུབ་རྒྱུ་ཡོད་པ་ཞིག་ལག་ལེན་བྱེད་དགོས་པ་སོང་ཙང་༧སྐུ་མདུན་ནས་བདུན་ཅུ་དོན་གྲངས་ནས་དགོངས་པ་དེ་ལྟར་བཞེས་ཀྱི་ཡོད་པ་རེད། དབུ་མའི་ལམ་གྱི་གྲུབ་འབྲས་ལ་བསམ་བློ་བཏང་བ་ཡིན་འང་ང་ཚོ་ལ་འཛམ་གླིང་རྒྱལ་སྤྱིའི་ཐོག་རྒྱབ་སྐྱོར་ཚད་མཐོ་བོ་སླེབ་ཀྱི་ཡོད་འདི་ཡང་དབུ་མའི་ལམ་ལ་བརྟེན་ནས་བྱུང་བ་ཞིག་ལ་ངོས་འཛིན་བྱེད་ཀྱི་ཡོད་ཅེས་སོགས་གསུངས་སོང་། དེའི་རྗེས་སུ་མི་མང་གིས་དྲི་བར་ལན་འདེབས་ཀྱང་གནང་སོང་།

མོན་གྷོ་གསར་འགོད་པས།