༧གོང་ས་མཆོག་གིས་བོད་པ་ཁ་ཆེ་ཚོར་འཚམས་གཟིགས།

ཟླ་འདིའི་ཚེས་༡༢ ཉིན་༧གོང་ས་མཆོག་ཤི་རི་ན་གྷར་ཞབས་སོར་ལེགས་པར་འཁོད་དེ། ཁུལ་དེའི་མངའ་སྡེ་བློན་ཆེན་གཙོས་པའི་དད་ལྡན་མང་ཚོགས་དང་མཉམ་དུ་མཇལ་འཕྲད་གནང་བ་དང་། ས་གནས་ཀྱི་བོད་པ་ཁ་ཆེའི་མི་མང་ལ་མཇལ་ཁ་དང་བཀའ་སློབ་གནང་རྒྱུ་ཡིན་པ་རེད།

དེ་ཡང་ནོར་ཝེ་བོད་ཀྱི་རླུང་འཕྲིན་ཁང་གིས་གནས་ཚུལ་སྤེལ་གསལ་ལྟར་ན། ཟླ་འདིའི་ཕྱི་ཚེས་༡༢ ཉིན་༧གོང་ས་མཆོག་མཁའ་ལམ་བརྒྱུད་རྒྱ་གར་གྱི་རྒྱལ་ས་ལྡི་ལི་ནས་ཤི་རི་ན་གྷའི་གནམ་ཐང་དུ་ཞབས་སོར་འཁོད་ཡོད་པ་དང་། སྐབས་དེར་ཀ་ཤི་མིར་གྱི་མངའ་སྡེ་བློན་ཆེན་ཨོ་མར་ཨབ་ཊོ་ལ་མཆོག་དང་། མངའ་སྡེ་དེའི་ཡུལ་སྐོར་སྤྲོ་འཆམ་ལྷན་ཁང་གི་བློ་ཆེན་ངག་དབང་རིག་འཛིན་མཆོག་གཉིས་གནམ་ཐང་དུ་ཆེད་བཅར་གྱིས། ༧གོང་ས་མཆོག་ཕེབས་བསུའི་སྣེ་ལེན་དང་ཕན་ཚུན་ལ་མཇལ་འཕྲད་གནང་ཡོད་པ་རེད། དེ་ནས་ཉིན་གུང་ཆུ་ཚོད་༡༢ ཡོལ་ཙམ་གྱི་སྟེང་༧གོང་ས་མཆོག་གིས་དབུས་པའི་མངའ་སྡེའི་བློན་ཆེན་རྣམ་པ་གཉིས་དང་། ཆིབས་ཞབས་པ་རྣམ་པ་ཤི་རི་ན་གྷའི་གྲོང་ཁྱེར་གྱི་མི་སྣ་ཆེ་གྲས་བཞུགས་ས<>ཞེས་པའི་ཕེབས་མལ་དུ། ཤི་རི་ན་གྷའི་ཁུལ་གྱི་བོད་རིགས་ཁ་ཆེ་མི་མང་གཙོས་པའི་ལ་དྭགས་དང་། དེ་བཞིན་ཧི་མ་ལ་ཡའི་མི་རིགས། གཞན་ཡང་གྲོང་ཁྱེར་དེའི་ནང་གི་བོད་རིགས་ཚོང་ལས་པ་སོགས་དད་ལྡན་མི་གྲངས་༡༠༠ ལྷག་གིས་ཕེབས་བསུའི་སྣེ་ལེན་དང་འབྲེལ། ཕྱག་ཏུ་མེ་ཏོག་དང་མཇལ་དར། དེ་བཞིན་བོད་ཀྱི་རྒྱལ་དར་སོགས་བསྣམས་ཏེ་ཕེབས་བསུ་ཟབ་རྒྱས་ཞུས་ཡོད་པ་མ་ཟད། སྐབས་དེར་༧གོང་ས་མཆོག་སྐུ་ངལ་འཛེམས་མེད་ངང་ཞབས་ཐང་དུ་ཕེབས་ཏེ། ཕེབས་ལམ་གཡས་གཡོན་གྱི་མང་ཚོགས་དང་མཉམ་དུ་ཐུགས་མཉེས་འཚམས་འདྲི་གནང་ཡོད་འདུག

མཛད་འཆར་ལྟར་ན་དེ་རིང་དང་སང་ཉིན་སྟེ་ཉིན་གཉིས་ཀྱི་རིང་དམིགས་བསལ་གྱི་མཛད་འཕྲིན་གང་ཡང་མེད་པར། སྐུ་ངལ་གསོ་རྒྱུ་ཡིན་པ་དང་ཕྱི་ཚེས་༡༤  ཉིན་ཤི་རི་ན་གྷའི་རྒྱལ་སར་རྟེན་གཞི་བྱས་པའི་བོད་རིགས་ཁ་ཆེའི་མང་ཚོགས་ཀྱི་སློབ་གྲྭའི་ནང་ཕེབས་ཏེ། མངའ་སྡེ་བློན་ཆེན་མཆོག་གི་གཙོས་གཞུང་འབྲེལ་མི་སྣ་ཆེ་ཁག་དང་ལྷན་བཞུགས་ཐོག ཁུལ་དེའི་བོད་རིགས་ཁ་ཆེའི་མང་ཚོགས་ལ་བཀའ་སློབ་གནང་རྒྱུ་ཡིན་པ་རེད།