མོན་གྷོ་རུ་གདུང་སེམས་མཉམ་བསྐྱེད་ཀྱི་ལས་འགུལ།
མོན་གྷོ་རུ་དཔའ་བོ་ཚེ་དབང་རྡོ་རྗེ་ལ་གདུང་སེམས་མཉམ་བསྐྱེད་ཀྱི་ལས་འགུལ་ཞིག་སྤེལ་ཏེ། བོད་ནང་གི་བོད་མི་ཚོས་ཉིན་འཁྱོལ་ཡང་མཚན་འཁྱོལ་གྱི་ཡོད་མ་རེད་ཅེས་ས་གནས་གཞོན་ལྷན་གྱི་ཚོགས་གཙོ་པདྨ་ཚེ་རིང་གིས་གསུངས་སོང་།
དེ་ཡང་ཟླ་འདིའི་ཚེས་༡༢་ཉིན་གྱི་དགོང་དྲོར་འདི་ག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་ས་གནས་གཞོན་ནུ་དང་། བུད་མེད་ལྷན་ཚོགས་གཉིས་ཐུན་མོང་གི་གོ་སྒྲིག་འོག་མར་མེ་ཁྲོམ་སྐོར་གྱི་ལས་འགུལ་ཞིག་མོན་གྷོ་ས་གནས་དུས་འཁོར་ཕོ་བྲང་མདུན་ཐང་སྤེལ་ཡོད་པ་དང་། སྐབས་དེར་གཞིས་གྲོང་ཁག་དགུའི་མི་མང་དང་བཙུན་དགོན་བྱང་ཆུབ་ཆོས་གླིང་གི་བཙུན་མ་རྣམ་པ་བཅས་ཀྱིས། ལག་ཏུ་བོད་ཀྱི་རྒྱལ་དར་དང་འཕྲེད་དར་འདྲ་མིན་དེ་བཞིན་མར་མེ་སོགས་བཟུང་སྟེ་བྱང་ཆུབ་སེམས་མཆོག་མ་སྐྱོར་བཞིན་ཁོངས་སོ་སོ་ནས་གོམ་བགྲོད་གྱིས་དུས་འཁོར་ཕོ་བྲང་དུ་འཛོམས་ཏེ། མོན་གྷོ་ས་གནས་གཞོན་ལྷན་གྱི་ཚོགས་གཙོ་པདྨ་ཚེ་རིང་གིས་ལས་འགུལ་དང་འབྲེལ་བའི་སྐོར་ལ་གཏམ་བཤད་གནང་དོན།དེ་རིང་ང་ཚོ་འདིར་མོན་གྷོ་འདོད་རྒུ་གླིང་ས་གནས་སུ་ཡོད་པའི་བོད་ཀྱི་གཞོན་ནུ་ལྷན་ཚོགས་དང་། བུད་མེད་ལྷན་ཚོགས་གཉིས་ཐུན་མོང་གི་ངོས་ནས་ཕྱི་ཚེས་༧་ཉིན་བོད་ཀྱི་རྒྱལ་ས་ལྷ་སའི་འདམ་གཞུང་དུ། རང་ལུས་མེར་སྲེག་གནང་མཁན་རྒྱལ་གཅེས་དཔའ་བོ་ཚེ་དབང་རྡོ་རྗེས་བོད་རྒྱལ་ཁབ་དང་མི་རིགས་ཀྱི་ཆེད། རང་ཉིད་ཀྱི་སྐུ་ལུས་མཆོད་མེ་རུ་བསྒྲོན་ཏེ་སྐུ་གཤེགས་ཟིན་པ་དང་རྒྱལ་གཅེས་པ་ཁོང་གིས་བོད་མི་རིགས་ལ་བཅངས་བའི་ལྷག་བསམ་དང་སྙིང་སྟོབས་ལ་ང་ཚོ་འདིར་ཤུལ་དུ་ལུས་པའི་སྤུན་ཟླ་ཚོའི་ངོས་ནས་བཀའ་དྲིན་རྗེས་དྲན་དང་། ཁོང་གིས་ནང་མི་ཚོར་སེམས་གསོ་དང་གདུང་སེམས་མཉམ་བསྐྱེད་བྱེད་རྒྱུ་ཡིན།རྒྱ་ནག་མི་མང་གཅིག་སྡུད་རིང་ལུགས་ཀྱིས་བོད་ས་ཡོངས་ལ་བཙན་འཛུལ་བྱས་པ་ནས་བཟུང་བོད་ཀྱི་ཆོས་དང་རིག་གཞུང་རྩ་མེད་བཟོ་བའི་སྲིད་བྱུས་ངན་པ་ལག་ལེན་དུ་བསྟར་བ་དང་། བོད་ཀྱི་རང་བྱུང་ཁོར་ཡུག་ལ་གཏོར་སྐྱོན་གྱིས། གཏེར་ཁ་ཉིན་ལྟར་རྒྱ་ནང་དུ་དབོར་འདྲེན་བྱེད་རྒྱུའི་མཚོན་པའི་རྐུ་འཕྲོག་བཅོམ་གསུམ་སོགས་ཚད་ལས་བརྒལ་བའི་མནར་གཅོད་བཏང་དང་གཏོང་བཞིན་ཡོད་པར་བརྟེན། བོད་ནང་དུ་ཡོད་པའི་བོད་མི་ཚོའི་ཉིན་འཁྱོལ་ཡང་མཚན་མ་འཁྱོལ་བར་འདུག་དགོས་བྱུང་ཡོད་པའི་གནས་སྟངས་དེ་དག་གིས། བོད་མདོ་དབུས་ཁམས་གསུམ་དུ་གནས་པའི་གཞིས་སྡོད་བོད་མི་ཚོ། ཐབས་ཟད་འུ་ཐུག་གི་འོག་རང་ལུས་མེ་ལ་སྒྲོན་མཁན་ཕོ་མོ་༤༣ བྱུང་བའི་ནང་ནས།ཚེ་དབང་རྡོ་རྗེ་ལགས་ནི་༤༣ པ་དེ་རེད་ཅེས་སོགས་གསུངས་སོང་།
དེའི་རྗེས་ཕྱོགས་བཞུགས་བོད་མི་མང་སྤྱི་འཐུས་ཨ་དཀྲུགས་ཚེ་བརྟན་གྱིས་ད་ལྟའི་བོད་ཕྱི་ནང་གི་ཆབ་སྲིད་ཀྱི་གནས་སྟངས་ཐོག་གཏམ་བཤད་གནང་དོན། དེང་སྐབས་རྒྱ་ནག་གིས་འཛམ་གླིང་ཐོག་སྐྱག་རྫུན་མང་པོ་ཞིག་དྲིལ་བསྒྲགས་བྱེད་བཞིན་ཡོད་པ་རེད། དཔེར་ན་བོད་ནང་གི་བོད་མི་ཚོ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་འོག དུས་བདེ་གནས་འཇམ་ངང་གནས་ཡོད་ཚུལ་དང་ཡང་ཕྱོགས་གཅིག་ནས་བོད་མི་རང་ལུས་མེར་སྲེག་གཏོང་མཁན་དེ་དག་ཏྭ་ལའི་ཁ་བྲལ་རིང་ལུགས་ཀྱིས་ངན་སྐུལ་ཡིན་ཚུལ་གནས་ལུགས་དང་རྒྱུ་མཚན་མེད་པའི་རྫུན་གཏམ་སྒྲོགས་ཀྱི་ཡོད་པ་དེ་ཚོར། བདེན་རྫུན་གང་ཡིན་ལ་ལན་རྒྱག་རྒྱུ་ལྷག་བསྡད་ཡོད་པ་རེད།
ང་ཚོ་བོད་མི་ཚོར་རྒྱུ་དང་དཔལ་འབྱོར་དམག་གི་སྒྲིག་འཛུགས་ལ་སོགས་པའི་སྟོབས་ཤུགས་གང་ཡང་མེད་ན་ཡང་། རྒྱ་ནག་གི་ད་ལྟའི་བར་དུ་ང་ཚོ་བོད་རྒྱལ་ཁབ་དང་མི་རིགས་འདི་རྩ་མེད་བཟོ་ཐུབ་རྒྱུ་ཕར་ཞོག དེ་ལས་ལྡོག་ཏེ་འཛམ་གླིང་འདིས་སྒང་ལ་ང་ཚོ་བོད་ཀྱི་རྩ་དོན་དེ། དར་སྤེལ་དང་ཁྱབ་བསྒྲགས་གང་མཚམས་ཚད་མཐོན་པོ་འགྲོ་བཞིན་ཡོད་པ་རེད། དེའི་གནད་འགག་གང་ལ་ཐུགས་ཡོད་ཅེས་ན་ང་ཚོ་ལ་བླ་ན་མེད་པའི་དབུ་ཁྲིད་ཅིག་ཡོད་པ་དང་། ཁོང་གི་ཡང་དག་པའི་ལམ་སྟོན་གནང་བ་ལ་བརྟེན། འབངས་མི་སེར་བར་གྱི་དད་པ་དམ་ཚིག་དེ་ད་ལྟའི་འཛམ་གླིང་འདིའི་སྟེང་གཟི་འོད་འབར་བའི་ལོ་རྒྱུས་ཤིག་བསྐྲུན་ཡོད་པ་རེད་ཅེས་དང་། གཉིས་པ་དེར་རྒྱ་ནག་སྟོབས་ཆེན་རྒྱལ་ཁབ་དེའི་འོག་མགོ་མ་བསྒུར་བ་དེ་གང་ཡིན་ཟེར་ན། ང་ཚོ་གཞི་ལུས་བོད་མི་ཚོར་རི་རབ་ནང་བཞིན་གྱིས་སྙིང་སྟོབས་ཡོད་པ་དེ་སུ་གང་གིས་འགུལ་བསྐྱོད་རྒྱག་ཐུབ་ཀྱི་ཡོད་པ་མ་རེད།
རྒྱ་ནག་ལ་ཆ་མཚོན་ན་ཧ་ཅང་གི་གཡོ་རྒྱུ་ཆེན་པོ་རེད་དཔལ་འབྱོེར་གྱི་འགྲོ་སོང་འཕངས་མེད་དུ་བཏང་སྟེ་བོད་མི་གཅིག་ཁོ་རང་ཚོའི་ཕྱོགས་སུ་ལངས་རྒྱུའི་ཆེད་དུ་སྒོར་མོ་གྲངས་ཀ་མེད་པར་གཏོང་གི་ཡོད་པ་རེད། ཁོང་ཚོའི་ཁ་ལ་མི་ཉན་པའི་བོད་མི་ཚོར་དྲག་གནོན་བྱེད་དུས་གདོང་ལ་མེ་མདའ་འཛུགས་ཀྱི་ཡོད་ ན་ཡང་། གཞི་ལུས་བོད་མི་ཚོར་འཇིག་ཞུམ་སྤུ་ཙམ་ཡང་མེད་པར་ཞི་བའི་ངང་གདོང་ལ་ལངས་ཏེ་ཐ་ན་རང་ལུས་ཡན་མཆོད་མེ་ལ་སྤར་གྱི་ཡོད་པ་རེད། འདི་དག་གིས་གང་ གསལ་བྱེད་བྱེད་གི་ཡོད་པ་རེད་ཟེར་ན། རྒྱ་ནག་གིས་རེ་བ་ངན་པ་ཞིག་བཅངས་ཏེ་ལོ་མང་པོ་ཞིག་ལ་འགྲོ་སོང་བཏང་སྟེ་དཔལ་འབྱོར་གྱིས། བསླུ་བྲིད་བྱས་ནས་ང་ཚོ་བོད་གཞིས་བྱེས་གཉིས་དང་བཙན་བྱོལ་སྒྲིགས་འཛུགས་འདི་རྩ་མེད་བཟོ་རྒྱའི་རྩིས་བརྒྱབ་པ་དེ། རྩིས་ལོག་ཐེབས་ཀྱི་ཡོད་པ་ར་སྤྲོད་བྱས་ཡོད་པ་རེད་ལ་བོད་མི་ཟེར་བ་དེ་དཔལ་འབྱོར་གྱིས་བསླུ་བྲིད་དང་། དྲག་པོའི་བཙན་གནོན་བྱས་པར་མགོ་མི་སྒུར་མཁན་ཞིག་ཡིན་པ་འཛམ་གླིང་ལ་གསལ་བཤད་བྱེད་ཐུབ་ཡོད་པ་རེད་ཅེས་སོགས་བརྗོད་སོང།
མོན་གྷོ་གསར་འགོད་པས།
